Month: January 2021

Хөвсгөл аймгийн Мөрөн суманд нэгдүгээр сарын 26-нд Улаанбаатар хотоос ирж, гэрийн тусгаарлалтад орсон иргэдийг хянаж шалгахад есөн иргэн дэглэм зөрчин, гэрээсээ гарчээ. Сумын Засаг даргын захирамжийн дагуу Covid-19-өөс урьдчилан сэргийлэх, гэрийн тусгаарлалтад орсон иргэдийн хяналтыг чангатгах зорилгоор Мөрөн сумын 14 багийн зохион байгуулагчид, Цагдаагийн газар, Онцгой байдлын газар, Улаан загалмайн хорооны сайн дурын ажилчидтай хамтран эргүүл хяналтаар ажилласан байна.

Холбогдох албаныхан Мөрөн суманд гэрийн тусгаарлалтад байгаа 211 иргэний гэрээр халдвар хамгааллын дэглэм баримтлаж буй эсэхийг тодруулахаар хяналт шалгалтаар очжээ. Гэрээсээ гарч, дэглэм зөрчсөн иргэдэд Зөрчлийн тухай хуулиар хариуцлага тооцон, тусгаарлах байранд байрлуулж, үйлчилгээний зардлыг тухайн иргэдээр төлүүлэх юм байна. Иймээс иргэдийг гэрийн тусгаарлалтын дэглэм, журмыг чанд сахин мөрдөх хэрэгтэйг Мөрөн сумын Онцгой комиссоос анхааруулав.

Баянзүрх дүүргийн нутаг дэвсгэрт байрлалтай нийтийн байрны иргэдээс шинжилгээ авч эхэлсэн талаар тус дүүргийн Онцгой комиссоос мэдээллээ.

Баянзүрх дүүргийн Засаг Даргын 2021.01.28-ны өдрийн А/26 дугаар “Дүүргийн нутаг дэвсгэрт үйл ажиллагаа явуулж байгаа нийтийн байрны иргэдийг Коронавирус /Ковид-19/ цар тахлаас урьдчилан сэргийлэх ПГУ шинжилгээнд хамруулах тухай” захирамж гарсан.

Энэхүү захирамжийн хэрэгжилтийг хангах зорилгоор дүүргийн Эрүүл мэндийн төв, Баянзүрх дүүргийн цагдаагийн газар, мэргэжлийн байгууллагууд хамтран ажиллаж байна.

Тиймээс Баянзүрх дүүргийн нутаг дэвсгэрт байрлалтай нийтийн байрны оршин суугчид та бүхэн тусгай чиг үүргийн албан хаагчдын тавьсан шаардлагыг биелүүлж, хамтран ажиллахыг хүслээ.

Өмнөговь аймгийн зарим сумын нутгаар хүчтэй шороон шуурга шуурч байна. Тус аймгийн УЦУОШТ-ийн мэдээлж байгаагаар Ноён, Даланзадгад, Булган, Цогтцэций сумын нутгаар салхи секундэд 18-20метр, зарим үед секундэд 24 метр хүрч шороон шуурга шуурна гэлээ. Аймгийн ихэнх нутгаар бэлчээр гарц тааруу, отор нүүдэл их байгаа. Иймд ялангуяа отор нүүдэлд яваа малчид, хол замд гарахаар төлөвлөсөн иргэд болгоомжтой байхыг анхааруулж байна. Аймгийн төв Даланзадгадад үзэгдэх орчин хязгаарлагдмал салхины хүч их байгаа тул Засаг даргын 7 хоног бүрийн ням гараг бүрт иргэдтэй уулздаг уулзалтыг цуцалжээ.

Хөдөө орон нутгийн малчдыг малаа бэлчээхгүй, ойр бэлчээрт байлгахыг зөвлөлөө.

ХӨСҮТ-ийн Тандалт судалгааны албаны дарга А.Амбасэлмаа: Дотоодын халдвар гарсан 2020 оны 11-р сарын 11-нээс хойш 28 голомт үүссэн. Үүнээс долоон голомт идэвхтэй байна. Тухайлбал,

• Баянзүрх дүүргийн ТҮК-ийн голомтоос 20- хүн
• Х апартментийн СӨХ-тэй холбоотой голомтоос- 11 хүн
• GB Tоwer-т байрлах ББСБ-ын голомтоос сүүлийн 2-3 хоногт – 24 хүн
• Гутлын цехтэй холбоотой голомтоос- 10
• Баянзүрх дүүргийн 26-р хороо, БЗД-ийн 5-р хорооны 6-р байр, БГД-ийн 12-р хорооны 1-р байранд гарсан гэр бүлтэй холбоотой голомтууд идэвхтэй байгаа бөгөөд эдгээр голомтоос 40 гаруй хүн халдвар авсан.
• Микс пицца-тай холбоотой голомтоос 15 хүн
• Хүүхдийн асрамжийн газарт голомт идэвхжиж гурван багш, хоёр хүүхэд халдвар авсан нь батлагдсан бол зургаан хүүхдийг ажиглан тусгаарлаад байна.

Халдварын цар хүрээ эрчимтэй тэлж байгаа энэ үед шинж тэмдэггүй буюу хөнгөн балархай хэлбэрээр өвдсөн хүмүүс гадуур явж байх эрсдэлтэй тул халдвар хамгааллын дэглэмээ сахиж, аль болох гэртээ байхыг иргэдэд анхааруулъя” гэв.

Өнөөдөр Булган, Сэлэнгэ, Хэнтийн өмнөд, Төв аймгийн хойд хэсгээр цасан шуурга шуурна. Маргааш буюу 02-р сарын 1-нд зүүн аймгуудын нутгийн зарим газраар, 3-нд Хэнтэйн уулархаг нутгаар цас орж, цасан шуурга шуурна.

Салхи ихэнх хугацаанд говь, тал, хээрийн нутгаар секундэд 13-15 метр хүрч ширүүснэ.

Хугацааны эхээр нутгийн зүүн хагаст хүйтний эрч чангарч Хүрэнбэлчир орчим, Завхан голын эх, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 35-40 градус, өдөртөө 19-24 градус, Увс нуур болон Дархадын хотгор, Хангай, Хөвсгөл, Хэнтэйн уулархаг нутаг, Идэр, Тэс, Эг, Үүр голын хөндий, Дорнод-Дарьгангын тал нутгаар 28-33 градус, өдөртөө 15-20 градус, говийн бүс нутгийн өмнөд хэсэг болон цас багатай энгэр ээвэр газраар шөнөдөө 12-17 градус, өдөртөө 1-6 градус, бусад нутгаар шөнөдөө 21-26 градус, өдөртөө 10-15 градус хүйтэн байна. 3-наас ихэнх нутгаар хүйтний эрч суларна гэж Ус цаг уур, орчины шинжилгээний хүрээлэнгээс мэдээллээ.