Month: July 2020

Монгол Улсын Засгийн газраас хэрэгжүүлж байгаа төрийн үйлчилгээний болон төрийн тусгай алба хаагчдыг орон сууцжуулах хөтөлбөрт хамрагдсан Онцгой байдлын байгууллагын 95 алба хаагчдад батламж гардуулах ёслолын ажиллагааөнөөдөр боллоо. Ажиллагаанд Монгол Улсын шадар сайд, Улсын онцгой комиссын дарга Ө.Энхтүвшин, Шадар сайдын ажлын албаны дарга, ахлах зөвлөх Л.Саянаа болон ОБЕГ-ын тэргүүн дэд дарга, бригадын генерал Г.Ариунбуян болон даргын зөвлөлийн гишүүд оролцжээ.

Дэлхий дахинд тархаад байгаа коронавируст цар тахалаас эх орон, ард түмнээ хамгаалах, урьдчилан сэргийлэх арга хэмжээг хэрэгжүүлж байгаа Онцгой байдлын байгууллагын алба хаагчид Улсын Онцгой комиссын Шуурхай штаб, тусгаарлах байр, хяналтын цэгт 21-110 хоног үүрэг гүйцэтгээд байна. Түүнчлэн ОБЕГ-ын харьяа Давтан сургалт, сургалт сэргээн заслын төв-113 дугаар ангийн алба хаагчид 02 дугаар сарын 23-аас өнөөдрийг хүртэл 450 хүнд тусгаарлан ажиглах үйлчилгээг үзүүлээд байгаа юм.

Онцгой байдлын байгууллагаас:

• ОБЕГ-ын харьяа Үндэсний аврах бригадын ахлагч, тэргүүн ахлагч Ж.Баяртогтох,
• Сэлэнгэ аймгийн ОБГ-ын Эрэн хайх, аврах ангийн дарга, хошууч Т.Сүхбаатар,
• Гал түймэр унтраах, аврах 36 дугаар ангийн аврагч, гал сөнөөгч, ахлагч Э.Цагааншүхэрт,
• Хойд бүсийн төв-Орхон аймгийн ОБГ-ын ахлах мэргэжилтэн, ахлах дэслэгч Д.Цэрэн-Очир,

• Газрын холбоо, зарлан мэдээлэл хариуцсан мэргэжилтэн, ахмад Г.Нэргүйбаатар,
• Гал түймэр унтраах, аврах 56 дугаар ангийн аврагч-гал сөнөөгч, ахлах ахлагч Э.Галдан,
• Гал түймэр унтраах, аврах 56 дугаар ангийн механик жолооч, ахлах ахлагч П.Буян-Эрдэнэ,
• Гал түймэр унтраах, аврах 56 дугаар ангийн шуурхай удирдлагын оператор, ахлах ахлагч М.Жавзандулам,
• Гал түймэр унтраах, аврах 68 дугаар анги механик жолооч, ахлах ахлагч Б.Ганзориг,
• Дорноговь аймгийн ОБГ-ын Эрэн хайх, аврах бүлгийн дарга-аврах ажиллагааны зааварлагч, дэслэгч Э.Бадамдорж,
• Гал түймэр унтраах, аврах 17 дугаар ангийн аврагч-гал сөнөөгч, ахлах ахлагч Г.Намсрай,
• Дархан-Уул аймгийн ОБГ-ын Гал түймэр унтраах, аврах 22 дугаар ангийн аврагч-гал сөнөөгч, ахлах ахлагч М.Болот,
• Дархан-Уул аймгийн ОБГ-ын Гал түймэр унтраах, аврах 22 дугаар ангийн аврагч-гал сөнөөгч, ахлах ахлагч П.Алтансүх, мөн ангийн аврагч-гал сөнөөгч, ахлах ахлагч Г.Гэрэлчулуун,
• Дархан-Уул аймгийн ОБГ-ын Гал түймэр унтраах, аврах 22 дугаар ангийн аврагч-гал сөнөөгч, ахлагч Х.Дөлгөөн,
• НОБГ-ын Аврах анги-105-ын бүлгийн дарга, аврах ажиллагааны зааварлагч, дэслэгч Ц.Наранбаатар,
• СХД-ийн ОБХ-ийн Гал түймэр унтраах, аврах 11 дүгээр ангийн салааны захирагч, ахмад Х. Батбаяр,
• Налайх дүүргийн ОБХ-ийн бичиг хэрэг, архивын эрхлэгч, ахлах ахлагч Э.Батцэцэг,
• Чингэлтэй дүүргийн ОБХ-ийн автын инженер, дэслэгч Ч.Мөнхтөр,
• Сүхбаатар дүүргийн ОБХ-ийн Гал түймэр унтраах, аврах 34 дүгээр ангийн салааны захирагч, ахлах дэслэгч Ж.Дамбасүрэн,
• Багануур дүүргийн ОБХ-ийн Гал түймэр унтраах, аврах 64 дүгээр ангийн гал унтраах автомашины жолооч, ахлах ахлагч Б.Содномдорж,
• Хан-Уул дүүргийн ОБХ-ийн Гал түймэр унтраах, аврах 14 дүгээр ангийн гал сөнөөгч, ахлах ахлагч А.Ганхуяг,
• Баянзүрх дүүргийн ОБХ-ийн Гал түймэр унтраах, аврах 35 дугаар ангийн гал сөнөөгч, ахлах ахлагч Ц.Цэрэнням,
• Баянгол дүүргийн ОБХ-ийн Гал түймэр унтраах, аврах 18 дугаар ангийн гал сөнөөгч, ахлах ахлагч Ч.Тамираа нарын 95 алба хаагч батламжаа гардан авлаа гэж Онцгой байдлын ерөнхий газраас мэдээллээ.

Б.МӨНХДУЛАМ

Гүний гаалийн хяналтын бүсэд 2020 оны тавдугаар сарын 28-ний өдөр ОХУ-аас импортолсон “Өрнөх гариг” ХХК-ийн “Сайра” нэрийн лаазалсан загасанд лабораторийн шинжилгээт хяналт шалгалт хийжээ. Шалгалтаар Acanthocephala-eoacanthocepala /скребни/ буюу загасны шимэгч хорхой илэрсэн аж. Улмаар 400 хайрцаг буюу 4.7 тн лаазалсан загасыг ОХУ-руу буцаан татан авалт хийлгэжээ.

“Өрнөх гариг” ХХК-д зөрчил шалган шийдвэрлэх ажиллагаа явуулж Зөрчлийн тухай хуулийн холбогдох заалтын дагуу торгуулийн арга хэмжээ авч, шаардлага хангаагүй “Сайра” нэрийн лаазалсан загасыг импортлон оруулахгүй байх талаар эрх бүхий албан тушаалтны албан даалгавар хүргүүлэн ажиллажээ.

Б.МӨНХДУЛАМ

Нийслэлийн прокурорын газраас Д.Эрдэнэбат болон Б.Болор, Н.Золжаргал, Д.Доржханд, Б.Минжбадам, Л.Санжаадорж, Д.Ганбат нарын 7 хүнд холбогдох нийт 188 хавтаст эрүүгийн хэргийг тус шүүх энэ оны 4 дүгээр сарын 08-ны өдөр хүлээн авсан.

Шүүгдэгч Д.Эрдэнэбат нарт холбогдох шүүх хуралдааныг өнөөдөр 10:00 цагт товлон зарласан боловч шүүхэд дуудагдсан гэрч, шинжээч нар хүндэтгэн үзэх шалтгаангүйгээр ирээгүй тул шүүхээс тэдгээрийг албадан ирүүлж, шүүх хуралдаанд оролцуулахаар шүүх хуралдааныг хойшлуулж, 2020 оны 07 сарын 27-ны өдрийн 10.00 цагт тус шүүхийн шүүх хуралдааны танхимд нээлттэй явуулахаар шийдвэрлэлээ.

Шүүгдэгч нарт урьд авсан таслан сэргийлэх арга хэмжээг тус тус хэвээр үлдээж шийдвэрлэсэн. Шүүх хэргийг хүлээн авсан өдрөөс хойш хэргийн оролцогч нараас гаргасан хүсэлтийг хүлээн авч, гэм бурууг хэлэлцэх шүүх хуралдааныг нийт 2 удаа хойшлуулаад байна.

Энэ жилийн Үндэсний их баяр наадам болох долоодугаар сарын 11, 12-ны өдрүүд ердийн амралтын өдөр буюу бямба, ням гарагт тохиож байна.

Нийтээр тэмдэглэх баярын болон тэмдэглэлт өдрүүдийн тухай хуульд “Үндэсний их баяр наадам, Ардын хувьсгалын ойн баяр: Долоодугаар сарын 11, 12, 13, 14, 15”-ны өдөр нь нийтээр тэмдэглэх баяр буюу бүх нийтийн амралтын өдөр хэмээн заасан. Энэ жилийн тухайд баяр наадам бямба, ням гарагт таарч буй ч нөхөж амрах хуулийн зохицуулалт байхгүй. Иймд албан байгууллагууд долоодугаар сарын 13, 14, 15-ны ажлын өдөр бүх нийтээр амраад долоодугаар сарын 16-ны пүрэв гарагаас ажилдаа орох юм.

Б.МӨНХДУЛАМ

Улсын онцгой комиссоос ОХУ-д оршин сууж буй иргэдээ 2020 оны 7 дугаар сарын 5,6-ны өдрүүдэд Алтанбулаг боомтоор татан авах шийдвэр гаргасан байна.

Дээрх өдрүүдэд нутаг буцах иргэд Улаан-Үд хотоос өөрсдөө нийтийн тээвэр юмуу унаа хөлслөн Хиагт боомтод очих бөгөөд хилээр нэвтрэхийнхээ өмнө коронавируст халдварын шинжилгээ заавал хийлгэсэн байхаас гадна тусгаарлах байр, тусгаарлах байр руу хүргэх автобусны төлбөрүүдийг хийсэн байх ёстойг анхаарна уу.

Иргэд 21 хоног тусгаарлах байр, хоолны зардал хоногийн 50000 төгрөг буюу нийт 1 070 000 төгрөг /автобусны төлбөр 20.000 төгрөг ороод/, 0-5 настай хүүхэд төлбөргүй, 6-18 хүртэлх насны хүүхэд хоногийн 30000 төгрөг буюу нийт 650000 төгрөг /автобусны төлбөр 20.000 төгрөг ороод/-ийг Онцгой байдлын ерөнхий газрын /ХААН БАНК 5084538375/ дансанд урьдчилан шилжүүлж, төлбөрийг төлнө үү. Тусгаарлах байрны болон тусгаарлах байр руу хүргэх автобусны төлбөрөө урьдчилан төлөөгүй иргэдийг хилээр нэвтрүүлэхгүйг анхаарна уу.

Жич: Төлбөр хийхдээ тухайн иргэний РЕГИСТРИЙН ДУГААР, ОВОГ, НЭР болон БАЙРНЫ ТӨЛБӨР гэдгийг заавал тодорхой бичихийг анхаарна уу. Төлбөрөө зөвхөн банкны теллерээр эсвэл мобайл банк, интернэт банкаар төлөх боломжтой. Тусгаарлах байр, хоолны зардлыг АТМ-ээр төлөхгүй байхыг анхааруулж байна.

ЭСЯ-ын зүгээс Та бүхнийг хувийн аюулгүй байдлаа сайтар хангахыг зөвлөж байна.

Зуны дунд сар эхэлж, амралт зугаалгын цаг иржээ. Цаг уур, орчны шинжилгээний хүрээлэнгээс долдугаар сарын цаг агаарын ерөнхий төлөвийг гаргасан байна.

Долдугаар сарын 2, 3-нд баруун, төв болон зүүн аймгуудын ихэнх нутаг, говийн аймгуудын нутгийн зүүн хэсгээр усархаг бороо, долдугаар сарын 4-5-нд баруун болон төвийн аймгуудын нутгийн хойд хэсэг, зүүн, говийн аймгуудын нутгийн зарим газраар дуу цахилгаантай аадар бороо орно. Салхи борооны өмнө түр зуур ширүүснэ. Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Тэрэлж голын хөндийгөөр шөнөдөө 5-10 градус, өдөртөө 17-22 градус, Алтайн өвөр говиор шөнөдөө 16-21 градус, өдөртөө 28-33 градус, бусад нутгаар шөнөдөө 10-15 градус, өдөртөө 23-28 градус дулаан байна. долдугаар сарын 4,5-нд нутгийн өмнөд хэсгээр бага зэрэг хална.

Энэ сард цаг агаар дулаарч, 35 хэм хүрч халах ч сарын дунд болон сүүлчээр зарим аймгийн нутгаар сэрүүсч, дуу цахилгаантай аадар бороо орно гэж мэдээлжээ.Тодруулбал, долдугаар сарын дундаж агаарын температур олон жилийн дундажаар Баян-Өлгий, Хөвсгөлийн ихэнх нутаг, Завханы зүүн, Баянхонгорын хойд хэсэг, Архангайн баруун хэсгээр 2-16 градус, Говь-Алтай, Баянхонгор, Өвөрхангай, Дундговийн өмнөд хэсэг, Өмнөговь, Дорноговийн ихэнх нутгаар 22-28 градус, бусад нутгаар 16-22 градус дулаан байдаг байна. Агаарын температур Дорнодын нийт, Сэлэнгэ, Хэнтийн ихэнх нутгаар, Төв болон Сүхбаатарын хойд хэсгээр олон жилийн дундажаас 1.5-2 градусаар дулаан, бусад нутгаар олон жилийн дундажийн орчим байх төлөвтэй гэжээ.

Баруун аймгуудын нутгаар. Долдугаар сард агаарын дундаж температур Увс, Завханы хойд хэсгээр олон жилийн дундажийн орчим, бусад нутгаар 1.5–2 градус дулаан байна. Агаарын температур, хур тунадасны хувьд нэг, хоёрдугаар арав хоногийн дунд болон гуравдугаар арав хоногийн сүүлчээр өмнөх үеэсээ хүйтэрнэ. Энэ сарын эхээр болон сүүлчээр ихэнх нутгаар бороо орж, зарим газраар түр зуурын дуу цахилгаантай аадар бороо орох төлөвтэй байна. Салхи борооны өмнө түр зуур ширүүсч 12-14 м/с, зарим үед 16-20 м/с хүртэл ширүүснэ.

Төвийн аймгуудын нутгаар. Энэ сард агаарын дундаж температур Хөвсгөлийн ихэнх нутаг, Архангай, Булганы хойд, Сэлэнгийн зүүн, Төвийн зүүн хойд хэсгээр олон жилийн дундажийн орчим, бусад нутгаар 1.5–2 градус дулаан байна. Агаарын температур, хур тунадасны хувьд сарын эхэн болон дунд үеэр өмнөх үеэсээ 2–5 градусаар сэрүүснэ. Бусад хугацаанд дулаарч, өдөртөө 28-32 градус хүрч хална. Мөн энэ үеэр ихэнх нутгаар бороо, зарим газраар дуу цахилгаантай аадар бороо орох төлөвтэй. Салхи борооны өмнө түр зуур ширүүсч 12-14 м/с, зарим үед 16-20 м/с хүртэл ширүүснэ.

Зүүн аймгуудын нутгаар. Энэ сард агаарын дундаж температур Хэнтий, Дорнодын хойд хэсгээр 1.5–2 градус дулаан байна. Хур тунадас Дорнодын ихэнх нутаг, Хэнтийн хойд хэсгээр олон жилийн дундажаас ахиу, бусад нутгаар олон жилийн дундаж орчим байна. Агаарын температур, хур тунадасны хувьд сарын дунд болон сүүлчээр дулаарч, өдөртөө 30–35 градус хүрч хална. Харин сарын дунд үеэр өмнөх үеэсээ бага зэрэг сэрүүснэ. Ихэнх нутгаар бороо орж, зарим газраар дуу цахилгаантай аадар бороо орох төлөвтэй байна. Салхи борооны өмнө түр зуур ширүүсч 12-14 м/с, зарим үед 16-20 м/с хүртэл ширүүснэ.

Говийн аймгуудын нутгаар. Энэ сард агаарын дундаж температур нийт нутгаар олон жилийн дундажаас 1.5–2 градус дулаан байна. Хур тунадас Өмнөговийн ихэнх нутаг, Дорноговийн өмнөд хэсгээр олон жилийн дундажаас бага байна. Агаарын температур, хур тунадасны хувьд долдугаар сарын сүүлчээр дулаарч, өдөртөө 31-36 градус хүрч хална. Харин нэгдүгээр арав хоногийн дунд, гуравдугаар арав хоногийн дунд үеэр ихэнх нутгаар өмнөх үеэсээ сэрүүснэ. Долдугаар сарын нэгдүгээр арав хоногийн дунд үе, гуравдугаар арав хоногийн эхэн болон дунд үеэр ихэнх нутгаар бороо, зарим газраар дуу цахилгаантай аадар бороо орох төлөвтэй байна. Салхи борооны өмнө түр зуур ширүүсч 12-14 м/с, зарим үед 16-20 м/с хүртэл ширүүснэ.