Month: February 2020

Хууль бусаар мод бэлтгэх гэмт хэрэг үйлдэж байгаль экологид 300 орчим сая төгрөгний хохирол учруулсан этгээдүүдийг шалгаж байна.

Төв аймгийн Эрдэнэ сум Асралт гэх газар “Ebee” ХХК нь зохих зөвшөөрөлгүй мод бэлтгэл хийсэн хэргийг илрүүллээ. ЭЦА-ны алба хаагч нар ажиллан 4 отгийн нийт 42 иргэнээс мэдүүлэг авч мод бэлтгэлийн талбай, цагаалганы хэсэгт бэлтгэсэн 120 орчим куб метр мод байсанд үзлэг хийн мод ачсан байсан 2 зил 131 машиныг саатууллаа.

Хууль бусаар мод бэлтгэж байсан этгээдүүд Төв аймгийн Батсүмбэр, Сэлэнгэ аймгийн Мандал сумын харъяат иргэд бөгөөд нийт 1000 орчим куб метр мод бэлтгэж байгаль экологид 300 сая орчим төгрөгний хохирол учруулсан гэмт хэрэг үйлджээ.

Зөвшөөрөлгүйгээр ойгоос мод бэлтгэх, гарал үүслийн гэрчилгээгүйгээр мод, модон материал бэлтгэсэн, тээвэрлэсэн, худалдсан худалдан авсан тохиолдолд гэмт хэрэг үйлдэхэд ашигласан багаж, тээврийн хэрэгсэл, хөрөнгө, орлогыг хураан авахаас гадна байгаль экологид учирсан шууд хохирлыг Байгаль орчныг хамгаалах тухай хуульд зааснаар учирсан хохирлыг ойн экологи – эдийн засгийн үнэлгээг гурав дахин нэмэгдүүлсэнтэй тэнцэх хэмжээгээр тооцож төлүүлдэг хуулийн заалттай ажээ.

Улаанбаатар төмөр замаас мэдэгдэл гаргасан байна. Шинэ коронавирусийн тархалттай холбоотойгоор 2020 оны гуравдугаар сарын 2-ныг хүртэл Улаанбаатар-Бээжин, Улаанбаатар-Эрээн чиглэлд зорчигчийн галт тэргээр Монгол Улсын иргэдийг тээвэрлэх боломжгүй болсон байна.

Мөн Бээжин-Улаанбаатар, Эрээн-Улаанбаатар чиглэлд БНХАУ-ын иргэд болон тус улсаас ирж буй гадаад иргэдийг тээвэрлэхгүй ба Монгол Улсад нэвтрүүлэхгүй болсныг мэдэгдэж байна. Харин орон нутгийн бүх чиглэлд зорчигчийн галт тэрэг цагийн хуваарийн дагуу хэвийн аялах аж.

Түүнчлэн цахимаар олон улсын тасалбар худалдахгүй болохыг анхааруулжээ.

Мэргэжлийн хяналтын ерөнхий газрын 2020 оны төлөвлөгөөнд тусгагдсаны дагуу “Цагаан сар” нийтийг хамарсан баярын арга хэмжээтэй холбогдуулан мал, амьтны гаралтай хүнсний түүхий эд, бүтээгдэхүүнээр хүнсний үйлдвэрлэл, худалдаа, үйлчилгээ эрхлэгчийн үйл ажиллагаанд Мал эмнэлгийн хяналт, Хүнсний чанар, стандартын хяналт, Эрүүл ахуй, халдвар хамгааллын хяналтын улсын байцаагч нар хамтран хяналт шалгалт хийж байна.

Шалгалтын явцад мал эмнэлэг ариун цэвэр-гарал үүслийн гэрчилгээгүй хонины мах худалдаалж байсан 2 зөрчил илрүүлж Зөрчлийн тухай хуулийн холбогдох заалтын дагуу торгуулийн арга хэмжээ ногдуулан ажилалаа.

Хүчит шонхор худалдааны төвөөс мах авч үйлдвэрлэл, худалдаа, үйлчилгээ эрхэлж буй иргэд мал эмнэлэг ариун цэвэр-гарал үүслийн гэрчилгээгүй байх зөрчил арилахгүй байна. Иймд иргэд гарал үүсэл нь тодорхойгүй мал, амьтны гаралтай хүнсний түүхий эд бүтээгдэхүүнийг худалдан авахгүй байх, мал, амьтнаас дамжин халдварлах халдварт, паразит өвчний халдвараас эрүүл мэнд, амь насаа хамгаалж хэвшихийг анхааруулж байна.

Таван минут сэтгэлээр унах, хямрахад хүний дархлаа зургаан цаг дарангуйлагддаг байна. Харин таван минут эерэг зүйлс сонсож, мэдэрсэн үед дархлаа 5-6 цаг дэмжигддэг аж. Тиймээс эерэг зүйлийг уншиж, үзэж байхыг СЭМҮТ-ийн эмч нар зөвлөж байна.

Сэтгэл зүйтэй холбоотой асуудал байвал 1800-2000 дугаарын утсаар СЭМҮТ-тэй холбогдож, мэргэжлийн эмчээс зөвлөгөө авч болох юм. Дархлааны систем сулрахад нөлөөлдөг хүчин зүйлсийн нэг нь сэтгэл зүйн байдал байдаг тул сэтгэл зүйгээ удирдах, сэтгэл зовнилоо арилгах талаар Сэтгэцийн эрүүл мэндийн үндэсний төвийн их эмч Ж.Гантулга доорх зөвлөгөөг өглөө.

Сайтар унтаж амрах. Хүн хоногт тогтмол 6-8 цаг унтаж амрах шаардлагатай. Чанартай хүнс, хоол хэрэглэх, мэдээллийг найдвартай эх сурвалжаас авах, холбогдох байгууллагын өгч буй заавар, зөвлөгөөг дагахыг анхаарах хэрэгтэй. Таван минут сэтгэлээр унах, хямрахад хүний дархлаа зургаан цаг дарангуйлагддаг бол харин таван минут эерэг зүйлс сонсож, мэдэрсэн үед дархлаа 5-6 цаг дэмжигддэг аж.

Мэргэжлийн Хяналтын Ерөнхий газрын даргын баталсан 01/13 дугаартай Нийтийг хамарсан баяр ёслол, цаг үеийн шаардлагаар зохион байгуулж буй арга хэмжээнд урьдчилан сэргийлэх хяналт шалгалт хийх тухай удирдамжийн хүрээнд Баянзүрх дүүргийн нутаг дэвсгэрт байрлах Экомогул ХХК-ийн Амгалан худалдааны төв, “Маркетплэйс менежмент” ХХК-ийн Баянзүрх худалдааны төвүүдийн үйл ажиллагаанд 2020 оны 01 дүгээр сарын 24-29-ний өдрүүдэд урьдчилан сэргийлэх хяналт шалгалт хийж, зөвлөмж сэрэмжлүүлэг хүргүүллээ.

Шалгалтын явцад дээрх аж ахуйн нэгжийн удирдлага, эрүүл ахуйч эмч болон дотоод хяналтын ажилтныг байлцуулан нийт 50 гаруй түрээслэгч иргэдийн үйл ажиллагааг шалгахад хүнсний түүхий эд бүтээгдэхүүн бүрд ул мөрийг мөрдөн тогтоох бүртгэл хөтөлөөгүй, Хүнсний чиглэлийн үйл ажиллагаа эрхлэхдээ холбогдох дүрэм журам стандарт мөрдөөгүй зэрэг зөрчлүүд илэрсэн тул Зөрчлийн тухай хуулийн холбогдох заалтын дагуу арга хэмжээ авч ажиллалаа. Хяналт шалгалт үргэлжилж байна.

Монгол Улсын Үндэсний Аюулгүй байдлын зөвлөл хуралдаж, 01/01 дугаартай “Хилийн боомтыг түр хаах тухай” зөвлөмж гаргасан.

Хуралдаанаар Дэлхийн эрүүл мэндийн байгууллагын Онцгой байдлын хорооноос шинэ коронавирус (2019-nCov)-ийн халдварын тархалтын асуудлаар олон улсын хэмжээний онц байдал зарлах тухай зөвлөмж гарсан, Бүгд Нарамдах Хятад Ард улсын хөрш орнууд хилээ хааж байгаа нөхцөл байдалтай холбогдуулан Улсын онцгой комиссын даргын орлогч, Батлан хамгаалахын сайд Н.Энхболдын илтгэл, Үндэсний аюулгүй байдлын зөвлөлийн Ажлын албаны илтгэл, Эрүүл мэндийн дэд сайд Л.Бямбасүрэнгийн мэдээллийг хэлэлцээд Засгийн газарт Монгол Улс, БНХАУ-ын хилээр нэвтрэх зорчигчийн хөдөлгөөнийг зогсоож, хилийн боомтыг түр хаах шийдвэр гаргах зөвлөмж хүргүүлсэн болно.

ҮАБЗ-өөс зөвлөмж гарсантай холбогдуулан Засгийн газрын ээлжит бус хуралдаанаар дараах шийдвэр гарсан болно.

Үүнд:

1. 2020 оны 02 дугаар сарын 01-ний өдрөөс 2020 оны 03 дугаар сарын 02-ны өдрийг хүртэл хугацаанд БНХАУ-тай хиллэдэг агаар, төмөр зам, автозамын бүх боомтоор БНХАУ-ын иргэд болон тус улсын нутаг дэвсгэрээр дамжиж ирэх бусад улсын иргэдийг хилээр нэвтрүүлэхийг хориглов.
2. 2020 оны 02 дугаар сарын 01-ний өдрөөс 2020 оны 03 дугаар сарын 02-ны өдрийг хүртэл хугацаанд Монгол Улсын иргэд БНХАУ-д зорчихыг хориглов. /Ажлын зайлшгүй шаардлагаар явах бол Улсын онцгой комиссын даргын зөршөөрлийг үндэслэн хилээр гаргана./
3. БНХАУ-аас ирэх, мөн тус улсаар дамжин ирж байгаа Монгол Улсын иргэдийг 2020 оны 02 дугаар сарын 06-ны өдрийг хүртэл бүх боомтоор нэвтрүүлнэ. Энэ өдрөөс хойш 2020 оны 03 дугаар сарын 02-ны өдрийг хүртэл зөвхөн Буянт-Ухаа болон Замын-Үүд боомтоор оруулна.
4. Хилийн Даян-Хуньшанзюй, Байтаг-Улиастай, Бургастай-Лаоемяо, Сүмбэр-Рашаан, Хавирга-Архашаат автозамын боомтуудыг түр хаав.
5. Булган-Такашикэ, Шивээхүрэн-Сэхээ, Гашуунсухайт-Ганцмод, Ханги-Мандал, Замын-Үүд-Эрээн, Бичигт-Зүүнхатавч, Баянхошуу-Өвдөг боомтоор хил нэвтэрч байгаа ачаа тээврийн хэрэгсэл, жолооч нарт энэ дэглэм хамаарахгүй.
6. Замын-Үүд-Эрээн чиглэлд ачаа тээврийн галт тэрэг хуваарийн дагуу зорчих бөгөөд зүтгүүрийн бие бүрэлдэхүүн, агаарын хөлгийн багийн гишүүдэд хорио цээр мөн хамаарахгүй юм. Хорио цээрийн хугацаанд бараа таваарын импорт, экспортыг хязгаарлахгүй.

Засгийн газрын дээрх шийдвэр гарсантай холбогдуулан Монгол Улс-ОХУ-ын хооронд зорчих бүх төрлийн хөдөлгөөн хязгаарлагдахгүй, хэвийн үргэлжилнэ.

Угаарын хийн хордлогоос сэргийлж 3.2 тэрбум төгрөгөөр БНХАУ-аас захиалан авчирсан утаа мэдрэгчийг өрхүүдэд суурилуулахдаа хүн ам ихтэй хороодыг сонгож, эхний ээлжийн 70 мянган ширхэгийг тараагаад байна. Гэвч иргэдийн санамсар болгоомжгүй үйлдлээс болж угаарын хий мэдрэгч төхөөрөмж суурилуулсан ч угаартах тохиолдол гарсаар байна. Угаартсан, толгой эргэж, дотор муухайрсан шалтгаанаар Хордлогын яаралтай тусламжийн төвд хандсан эмэгтэй угаарын хий мэдрэгч тасралтгүй дуугарахаар нь төхөөрөмжийн зай хураагуурыг салгаснаас бага насны хүүхдийн хамт угаартсан тохиолдол гарчээ. Хэрэв угаарын хий мэдрэгч төхөөрөмж дуугарч эхэлсэн бол гэртээ агаар сэлгэлт хийх хэрэгтэй юм.

Эх, хүүхдийн эрүүл мэндийн үндэсний төв нь Эрүүл мэндийн сайдын 2020 оны 01 дүгээр сарын 22-ны өдрийн 19 дүгээр албан даалгаврыг хэрэгжүүлэн, төвийн Ерөнхий захирлын 2020 оны 01 сарын 23-ны өдрийн А/06 тоот “Эрүүл мэндийн тусламж үйлчилгээний өндөржүүлсэн бэлэн байдлыг хангах тухай” тушаалын дагуу “Шинэ коронавирусийн болзошгүй эрсдэлээс урьдчилан сэргийлэх, бэлэн байдлыг хангах нь” сэдэвт 2 үе шаттай 6 удаагийн цуврал сургалтыг 2020 оны 1 сарын 28-аас 1 сарын 31-ний өдрүүдэд Төвийн Сургалт, сурталчилгааны алба, Ариутгал халдаргүйтгэлийн тасаг хамтран зохион байгууллаа. Сургалтад тасаг, нэгжийн сургалт хариуцсан эмч, ахлах сувилагч, чанарын багийн гишүүд нийт 203 эмч, мэргэжилтнийг сургасан.

Сургалтаар ДЭМБ-ын “Шинэ коронавирус (nCoV)-ийн халдвар сэжиглэгдсэн тохиолдолд эмнэлгийн тусламж үйлчилгээ үзүүлэхэд баримтлах халдварын сэргийлэлт, хяналтын түр удирдамж” ба бусад холбогдох тушаал, албан даалгаврыг танилцуулж, ЭМС-ын 2019 оны А/537 тоот тушаалын дагуу нэг удаагийн хамгаалах хувцас хэрэгсэл хэрэглэх, зааврын дагуу өмсөх, тайлах дараалал, эрүүл мэндийн ажилтны гарын ариун цэвэр, цэвэрлэгээ сэдвээр лекц, дадлагын хичээл зааж, өмсгөл өмсөх, тайлах, гар ариутгах, цэвэрлэгээ зөв хийх дадлага хийсэн.
Хоёр дахь шатны сургалтаар дээрх сургалтад хамрагдсан эмч, ахлах сувилагч, ажилчид өөрсдийн тасаг нэгжийн бүх эмч, мэргэжилтнүүдэд сэдвийн дагуу дотоод сургалтыг амжилттай зохион байгуулж бэлэн байдлыг ханган ажиллаж байна.

Улаанбаатар хотын Захирагчийн ажлын алба БНСУ-ын “Сеннипан” компанитай Нийслэл хотод ус хангамжийн шугам сүлжээг цэвэрлэх дэвшилтэт тоног төхөөрөмж нэвтрүүлэх чиглэлээр хамтын ажиллагааны санамж бичиг байгууллаа.

2018 оны аравдугаар сарын 18-ны өдөр Баянгол дүүргийн 4 дүгээр хорооны нутаг дэвсгэрт байрлах Орон сууц, нийтийн аж ахуйн удирдах газрын харьяа Ус, дулаан дамжуулах төвийн 12 байрны 672 өрхийн 3,047 хүн, 72 аж ахуйн нэгж байгууллагыг хангадаг хүйтэн усны ф100 мм-ийн голчтой, нийт 469 метр урт шугамд зэв арилгах азотын тусгай хийн дэвшилтэт технологи ашиглан амжилттай туршсан байна. Үүний үр дүнд шинжилгээгээр 0.027 мг/л байсан төмрийн агууламж 0.015 мг/л болж багасаж, өнгө, булингарын агууламж эрс багасчээ.

Мөн хэрэглэгчдэд үйлчлэх төвд оршин суугчдаас ирэх дуудлагын тоо эрс багассан бөгөөд төгсгөлийн байрны айл өрхийн цоргон дахь усны даралт нэмэгдсэн байна.
Энэхүү шинэ технологиор ус хангамжийн шугам сүлжээг угааж цэвэрлэснээр шугам сүлжээний хэвийн, найдвартай ажиллагааг хангаад зогсохгүй эдэлгээг уртасгах давуу талтай аж.

Цаашид шинэ техник технологи нэвтрүүлэх, нутагшуулах, инженер техникийн ажилтнуудыг сургах томоохон ажлууд үе шаттайгаар хийгдэх юм.