Month: January 2020

Аргын тооллын нэгдүгээр сарын 15, Буд гариг. Билгийн тооллын 20, улаагчин могой өдөр. Өдрийн наран 08:37 цагт мандан 17:25 цагт жаргана. Энэ өдөр мал гадагш гаргах, газар лусын зан үйл, тахил үйлдэх, нүүдэл хийх, цэрэг хөдөлгөх, зээл авахад сайн. Мод таслах, эм найруулах, үхэгсдийн үйл, усыг хааж бөглөх, бэр өгөх, худалдаа хийх, заргалдах, замд явах, нүүдэл суудал хийх зэрэгт зохимжгүй.

Өдрийн сайн цаг нь үхэр, луу, морь, хонь, нохой, гахай болой.

Үс шинээр үргээлгэх буюу засуулахад өлзий төгс сайхан болно.

БНХАУ-д шинэ төрлийн коронавирусээр үүсгэгдсэн өвчлөл гараад байгаатай холбогдуулан ЭМЯ, ХӨСҮТ, ЗӨСҮТ, МХЕГ-ын хамтарсан эрсдлийн үнэлгээний баг одоогийн байдлаар “Дунд” зэргийн эрсдэлтэй гэж дүгнэлт гаргаад байна. Түүнчлэн БНХАУ болон Хонг Конгоос газрын боомтоор, онгоцоор ирж байгаа иргэдээс эрүүл мэндийн асуумж авч, тус бүс нутгаас ирж буй иргэд халуурч байвал тусгаарлан, өвчлөлийн шалтгааныг нь тогтоож байгаа юм.

Үүнтэй холбогдуулан дараах зөвлөмжийг гаргажээ.

Гадаад харилцааны сайд Д.Цогтбаатар өнөөдөр Канад Улсаас Монгол Улсад суугаа Элчин сайд хатагтай Катрин Ивкофыг хүлээн авч уулзлаа. Уулзалтын үеэр талууд Монгол, Канад нь ардчилал, хүний эрх, эрх чөлөөг дээдэлсэн адил үнэт зүйлстэй бөгөөд хамтын ажиллагааг зөвхөн уул уурхайгаар хязгаарлахгүй эдийн засаг, худалдаа, хөрөнгө оруулалт, хүмүүнлэг болон спортын салбарт өргөжүүлэн хөгжүүлэх сонирхолтой буйгаа харилцан тэмдэглэв.

Гадаад харилцааны сайд Д.Цогтбаатар Монгол Улсын гуравдагч хөрш, уул уурхайн салбар дахь томоохон хөрөнгө оруулагч Канад Улсын олборлох салбарын шилдэг менежментийг нэвтрүүлэх, хүний эрх, эмэгтэйчүүд, охидын эрх, тэдний нийгмийн оролцоог нэмэгдүүлэх, төрийн албаны чадавхийг сайжруулах зэрэг салбарын хамтын ажиллагааг үргэлжлүүлэх хүсэлтээ илэрхийлсэн юм.

Элчин сайд К.Ивкоф хоёр улсын харилцаа, хамтын ажиллагааг цаашид бүхий л чиглэлээр хөгжүүлэх, ялангуяа Канадын хөгжлийн тусламжийн хөтөлбөрийн хүрээнд хэрэгжүүлж буй төсөл хөтөлбөрийг үргэлжлүүлэн хэрэгжүүлэхийн төлөө ажиллахаа мэдэгдлээ.

БНСУ-д хууль бусаар оршин сууж байгаа гадаадын иргэдийг сайн дураараа нутаг буцахад нь зориулан тус улсын Хууль зүйн яамнаас Өршөөлийн аян өрнүүлж байгаа талаар ГХЯ-ны Консулын газраас мэдээлэв.

Энэ оны зургаадугаар сарын 30-ныг дуустал үргэлжлүүлэх уг аяны хүрээнд нутаг буцсан иргэдэд Солонгос улсад дахин очих боломжтой гэсэн тодорхойлолт олгох аж. Харин аяны хүрээнд нутаг буцаагүй бол Солонгос улсад нэвтрэх эрхийг бүрмөсөн хасах юм.

БНСУ-д гадаадын 380 мянган иргэн хууль бусаар амьдарч байгаа бөгөөд энэ нь тус улсын хөдөлмөрийн зах зээл, тэр дундаа барилгын салбарт ажиллаж буй дотоодын иргэд ажлын байргүй болох эрсдлийг дагуулж эхэлсэн байна.

Өнөө маргаашдаа баруун аймгуудын нутгийн хойд хэсгээр ялимгүй цас орж, ихэнх нутгаар хүйтний эрч бага зэрэг суларна гэж ЦУОШГ-аас мэдээллээ.

Нэгдүгээр сарын 15-19-нийг хүртэлх цаг агаарын урьдчилсан төлөв:15-нд нутгийн баруун өмнөд хэсгээр, 16-нд баруун аймгуудын нутгийн баруун хэсэг, говийн аймгуудын нутгийн зарим газраар, 17-нд баруун болон төвийн аймгуудын нутгийн зарим газaр, зүүн аймгуудын нутгийн хойд хэсгээр, 18-нд төв болон говийн аймгуудын нутгийн зүүн хэсэг, зүүн аймгуудын нутгийн зарим газраар цас орж, зөөлөн цасан шуурга шуурна.

Салхи 16,18-нд Алтайн салбар уулсаар, 17-нд зарим газраар секундэд 12-14 метр хүрч ширүүснэ.

Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө 36-41 градус, өдөртөө 23-28 градус, Хангай, Хөвсгөл, Хэнтийн уулархаг нутаг, Их нууруудын хотгор, Байдраг, Эг-Үүр, Орхон-Сэлэнгэ, Хараа, Ерөө, Хэрлэн, Онон, Улз, Халх голын хөндийгөөр шөнөдөө 27-32 градус, өдөртөө 15-20 градус, говийн бүс нутгийн өмнөд хэсэг болон цас багатай энгэр ээвэр газраар шөнөдөө 16-21 градус, өдөртөө 5-10 градус, бусад нутгаар шөнөдөө 21-26 градус, өдөртөө 11-16 градус хүйтэн байна.

Томуу, томуу төст өвчин эмнэлгүүдийн амбулаторийн үзлэгийн дийлэнх хувийг эзэлж байгаатай холбогдуулан Эрүүл Мэндийн Яамнаас сурагчдын амралтыг сунгах хүсэлт гаргаснаар Нийслэлийн сурагчдын амралтыг долоо хоногоор сунгаад байгаа.

Хөдөө, орон нутгийн сурагчдын амралтыг харин харьяалах аймгуудын Засаг дарга нар өөрсдийн бүрэн эрхийн хүрээнд зохицуулахаар болсон юм. Хуваарийн дагуу сурагчид өчигдөр /2020.01.13/ хичээлдээ орох ёстой байв.

Сүхбаатар, Дорноговь, Дорнод гэсэн гурван аймагт сурагчдын амралтыг хэсэгчлэн хуваах байдлаар Завхан, Булган, Архангай, Говь-Алтайгаас бусад аймгуудад сурагчдын амралтыг нэгдсэн хэмжээнд сунгажээ.

Мэргэжлийн хяналтын байцаагчид хууль бус ан тээвэрлэсэн иргэний үйлдлийг таслан зогсоожээ.

Тодруулбал, Эмээлтийн шалган нэвтрүүлэх товчоогоор Говь-Алтай аймгаас 60-32 ХОА улсын дугаартай тээврийн хэрэгслээр ховор төрлийн болох алтайн хойлог шувуу нэг ширхэг, тарвага есөн ширхгийг тээвэрлэж явсныг илрүүлжээ.

Ингээд Зооноз өвчин судлалын үндэсний төвд есөн тарвагыг, Алтайн хойлог шувууг цагдаагийн байгууллагад шилжүүлсэн байна.

Нийслэлийн Шинжлэх ухаан, үйлдвэрлэл, инновацын газрын даргын үүрэг гүйцэтгэгч Б.Бат-Эрдэнэ, нийслэлийн Гэр бүл, хүүхэд залуучуудын хөгжлийн газрын даргын үүргийг түр орлон гүйцэтгэгч Н.Мандуул, “Цахим хөгжил ирээдүй” нийгэмд үйлчлэх төрийн бус байгууллагын захирал Ш.Төгсбаяр нар мэдээллийн технологи, программ хангамжийн салбар хөгжих таатай боломжийг бий болгох, харилцан мэдээлэл солилцох, салбар байгууллагуудыг дэмжих чиглэлээр харилцан ашигтай, бодит харилцааг хөгжүүлэх үүднээс хамтран ажиллах санамж бичигт гарын үсэг зурлаа.

Санамж бичгийн хүрээнд залуус руу чиглэсэн олон ажлыг хамтран хэрэгжүүлэхээр төлөвлөсөн байна. Тодруулбал, Нийслэлээс хэрэгжүүлж буй “10000 программист” төслөөр дамжуулан Мэдээлэл технологи, программ хангамжийн чадварлаг боловсон хүчин бэлтгэх зорилготой программ хангамжийн сургалтыг энэ оны хоёрдугаар сараас эхлүүлэх бөгөөд Програмчлалын хэлийг анхан шатнаас эхлэн гүнзгийрүүлэн, үнэ төлбөргүй явуулахаар төлөвлөжээ. Сургалт программ хангамжийн талаарх ойлголттой, тус чиглэлээр суралцах, ажиллах чин хүсэл эрмэлзэлтэй бүх хүмүүст нээлттэй аж.