Month: January 2020

2019 оны гуравдугаар сарын 26-нд “Тод каннам” гоо сайхны эмнэлэгт 29 настай эмэгтэй өөх соруулах мэс засал хийлгэн амиа алдсан харамсалтай хэрэг гарсан билээ. Энэ хэрэгтэй холбогдуулан энэ сарын 14-ний өдөр прокуророос “Тод Каннам” эмнэлгийн ерөнхий эмч Д.Тодномбат болон сувилагч Б.Мөнгөнчимэг нарт Эрүүгийн хуулийн тусгай ангийн 10.6 дугаар зүйлийн 1 дэх хэсэгт зааснаар яллах дүгнэлт үйлдэж шүүхэд шилжүүлсэн ба шүүх хурал энэ сарын 27-нд болохоор товлогджээ.

“Тод каннам” эмнэлэг нь өөх соруулах мэс засал хийх тусгай зөвшөөрөлгүй, стандартын шаардлага хангаагүй нөхцөлд хууль бусаар үйл ажиллагаа явуулж байсан нь тогтоогдсон байдаг. Хуулийн байгууллагад хэргийг шилжүүлсэн бөгөөд прокуророос тус эмнэлгийн зөвхөн хоёр ажилтныг яллагдагчаар татсан юм.

Өнөөдөр Үндэсний мэдээллийн төвд хохирогчийн ар гэрийнхнээс Мэдэгдэл хийсэн юм. Энэ үеэр хохирогчийн аав С.Гүндсамбуу “Тэр хоёр хүний цаана хуулийн этгээд буюу эмнэлгийн захирал Н.Тод-Ням гэж хүн бий. Тэр хүн хуулийн хариуцлага хүлээх ёстой. Хайртай охиноо алдсанаас хойш есөн сар болж байхад огт эмгэнэл илэрхийлээгүй, оршуулгын зардлыг ч гаргаж өгөөгүй. Шүүхийн хэлэлцүүлэг дээр өөдөөс инээсэн. Ингэж тохуурхаж байгаа учир энэ бүхний ард эрх мэдэлтэн байна гэж ойлгож байна. Энэ бүхнийг шүүхийн байгуудага үнэн зөвөөр шийдэж өгөхийг хүсэж байна” гэлээ.

Харин хохирогчийн ээж Д.Аюуш “Ганцхан миний охин хохирогч биш юм байна. Өшөө олон хохирогч бид хоёртой холбогдсон. Хамтаръя, нэгдье гэсэн. Энэ эмнэлэг миний охины амийг хохироогоод есөн сар болж байхад ганц удаа гүн эмгэнэл илэрхийлж, уучлал гуйгаагүй. Шүүхийн хэлэлцүүлэг дээр инээгээд л сууж байна. Энэ хүмүүсийн ард том хүн байна гэдэг ойлголт авсан” хэмээв.

Б.НОМИНЗУЛ

Нийслэлийн Засаг даргын 2019 оны “Орон сууц, нийтийн аж ахуйн үйлчилгээг сайжруулах зарим арга хэмжээний тухай” тухай захирамжийн 1.6-д “Сууц өмчлөгчдийн холбооны үйл ажиллагааг давхар эрхлэх барилгын компани, хувийн орон сууцны конторын үйл ажиллагааг таслан зогсоож, тухайн байрны оршин суугчдын бүх нийтийн хурлаас Сууц өмчлөгчдийн холбоог байгуулж, бүртгэх”, 1.7-д “Хууль бусаар байгуулагдсан Сууц өмчлөгчдийн холбоодын үйл ажиллагааг таслан зогсоох, Сууц өмчлөгчдийн холбооны үйл ажиллагаанд тавих хяналтыг сайжруулах, ажилд үнэлэлт өгөх ажлыг 2020 оны 1 дүгээр улиралд багтаан зохион байгуулж, ажил үйлчилгээний түвшинг сайжруулах арга хэмжээ авахыг даалгасан.

Захирамжийн хэрэгжилтийг ханган ажиллах чиглэлээр нийслэлийн Захирагчийн ажлын албанаас албан даалгавар, мэдэгдэл ирүүлсэн юм.

Энэхүү ажлын хүрээнд Сүхбаатар дүүргийн Засаг дарга захирамж гарган ажлын хэсэг байгууллаа.

Ажлын хэсэг хуралдаж захирамжийн дагуу хийж хэрэгжүүлэх ажлаа төлөвлөж, дүүргийн хэмжээнд үйл ажиллагаа явуулж буй СӨХ-дын нэгдсэн хурлыг зохион байгуулан, хяналт шалгалт явуулах удирдамжийг танилцуулахаар боллоо.

Мөн СӨХ-тэй холбоотой оршин суугчдаас ирүүлсэн гомдол мэдээллийг нэг бүрчлэн хянан, холбогдох арга хэмжээг авч, ажил үйлчилгээний түвшинг сайжруулж ажиллах юм.

БХБ-ын сайд асан З.Баянсэлэнгэ болон Ж.Бурмаа, М.Болортуяа нарт холбогдох хэргийн шүүх хуралдаан Сонгинохайрхан дүүргийн эрүүгийн хэргийн анхан шатны шүүхэд 2020 оны нэгдүгээр сарын 22-ны 09:00 цагт товлогджээ.

Прокуророос тэдэнд 2002 оны Эрүүгийн хуулийн ерөнхий ангийн 263 дугаар зүйлийн 2 дахь хэсэг Төрийн албан тушаалтан албаны эрх мэдэл буюу албан тушаалын байдлаа урвуулах, Эрүүгийн хуулийн тусгай ангийн 22.5 дугаар зүйлийн 3 дахь хэсэг Хахууль өгөх гэмт хэрэгт холбогдуулан яллах дүгнэлт үйлдэн шүүхэд ирүүлсэн байна.

З.Баянсэлэнгэ нь Барилга, хот байгуулалтын сайдаар ажиллах хугацаандаа “Бэрэн” группийн барьсан Хангай хотхоны орон сууцнаас 123 айлын орон сууцыг тендер зарлалгүй, шууд худалдан авч, улсад 972.4 сая төгрөгийн хохирол учруулсан гэх хэрэгт холбогдоод байгаа билээ.

Шударга өрсөлдөөн, хэрэглэгчийн төлөө газрын дарга Б.Лхагваар ахлуулсан ажлын хэсэг Орхон аймагт ажиллаж Хэрэглэгчийн эрхийг хамгаалах тухай, Өрсөлдөөний тухай хууль тогтоомжуудын байдалтай танилцаж, зөвлөмж чиглэл өглөө.

Мөн нутгийн өөрөө удирдах болон нутгийн захиргааны байгууллага, удирдах албан тушаалтнуудад, Засаг даргын тамгын газрын дэргэдэх болон харьяа газар, холбогдох дарга нар болон үйлдвэр, үйлчилгээний байгууллагын дарга, захирлуудад Өрсөлдөөний тухай, Хэрэглэгчийн эрхийг хамгаалах тухай, Зар сурталчилгааны тухай, Сонгуулийн тухай, Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хууль, тогтоомжуудын талаар сургалт зохион байгууллаа.

Уг арга хэмжээний үеэр “Хэрэглэгчийн эрхийг хамгаалах орон нутгийн хөтөлбөр”-ийг боловсруулж, энэ оны 1-р улиралд багтаан ИТХ-аараа хэлэлцүүлэн батлуулж, хэрэгжүүлэх зөвлөмж чиглэл өглөө. Түүнчлэн зарим удирдах албан хаагчдаас гаргасан санал хүсэлтийг хүлээн авч, холбогдох дээд шатны байгууллагуудад нь уламжилан хамтран ажиллахаа илэрхийлэв.

Мөн Орхон аймгийн “Эрдэнэт Ус ДТС” ОНӨХК-ийн хэрэглэгчдэд үйлчлэх төвийн үйл ажиллагаатай танилцлаа.

Өнөөдрөөс нийслэлийн хэмжээнд цэргийн бүртгэл албан ёсоор эхэллээ.

Нийслэлийн Засаг даргын 2019 оны А/1248 дугаар захирамжийн дагуу цэргийн бүртгэлийг нийслэлийн хэмжээнд засаг захиргааны анхан шатны нэгж болох хороон дээр явагдах бөгөөд ажлын өдөрүүдэд 09:00-19:00, амралтын өдөрүүдэд 12:00-16:00 цаг хүртэл бүртгэл явагдана. Цэргийн бүртгэл явуулах журмыг Батлан хамгаалахын сайдын 2017 оны А/331 дүгээр тушаалаар баталсан ба уг журмын дагуу бүртгэлийн ажлыг явуулах юм байна. Цэргийн бүртгэлийн тогтолцоо нь цэргийн бэлтгэл үүрэгтний тоо, чанарт дүн шинжилгээ хийх үйл ажиллагааны цогц юм.

Нийслэлийн хэмжээнд 65 нас хүртэлх бэлтгэл дээд офицерууд, 60 хүртлэх насны бэлтгэл ахлах офицерууд, 55 насны ахлагч нар цэргийн бүртгэлд бүртгүүлэх ба 18-55 насны Монгол Улсын иргэд бүртгүүлнэ. Мөн 18 хүрч байгаа иргэд иргэний цэргийн үүргээ биелүүлэх насанд хүрч буй тул “Цэргийн үүрэгтний үнэмлэх” авах ёстой. Үнэмлэх авахдаа 3×4 хэмжээтэй цээж зурагтай ирэх юм.

Б.НОМИНЗУЛ