Month: May 2019

Дөнгөж сая Хан-Уул дүүргийн 15-р хорооны нутаг дэвсгэр Энхтайваны гүүрний зүүн талд орших “KH Apart­ment” хотхоны байрнаас эмэгтэй хүн унаж нас барсан хэрэг гарлаа. Хэргийн газар цагдаа, холбогдох байгууллагынхан ирээд байгаа аж. Уг байранд өмнө нь хоёр ч хүн амиа алдсан хэрэг гарч байсан тухай оршин суугчид нь хэлж байна. Энэ талаар дэлгэрэнгүй шууд сурвалжлагыг тун удахгүй мэдээллэх болно.

Цусны бүлэг тохироогүй донороос элэг шилжүүлэн суулгах хагалгааг Монголд анх удаа хийлээ. Энэ талаар Улсын нэгдүгээр төв эмнэлгээс өнөөдөр мэдээлэл хийв.

Тус төвийн элэг шилжүүлэн суулгах үндэсний баг БНСУ-ын АСАН эмнэлэгтэй хамтран 15 цагийн турш ажиллажээ.

“Энэ төрлийн мэс заслыг цаашид бие даан хийх боломжтой” гэж Элэг шилжүүлэн суулгах үндэсний багийн ахлагч, Монгол Улсын хүний гавьяат эмч, дэлхийн шилдэг мэс засалч, О.Сэргэлэн хэлэв. Тэрбээр “Бүлэг тохироогүй донороос элэг шилжүүлэн суулгах эмчилгээг хийхэд аюулгүй байдлыг харгалзан үзэж, БНСУ-ын АСАН эмнэлгийнхэнтэй хамтарлаа. Манай эмч нар энэ төрлийн мэс заслыг цаашид хийх бүрэн итгэлтэй болсон. Мэс заслын техникийн хувьд ижил боловч хагалгааны өмнө болон хагалгааны дараа тусгай эмчилгээ хийдгээрээ онцлогтой. Өвчтөний хувьд B, D вирусын гаралтай элэгний хатууралтай, элэгний хавдартай гэсэн оноштой байсан. Одоогоор биеийн байдал нь сайжирч байна. Ерөнхийдөө манай эмнэлэгт элэг шилжүүлэн суулгах мэс засалд орсон 75 хүний 20 нь элэгний хавдартай гэсэн оноштой, тэдэнд элэг шилжүүлэн суулгах мэс засал хийсэн. Эдгээр хүмүүст хавдрын дахилт илрээгүй, эрүүл саруул амьдарч байгаа юм. Улсын төсвөөс элэг шилжүүлэн суулгах мэс заслын зардлыг бүрэн даадаг болсонд талархаж байна. Гэхдээ цаашид цусны бүлэг тохироогүй мэс заслын төлбөрийг улсын төсөвт суулгахыг хүсч байна” гэлээ.

Элэг шилжүүлэн суулгах үндэсний багийн эмч нар 54 настай Э гэх эмэгтэйд охиноос нь цусны бүлэг тохироогүй донороос элэг шилжүүлэн суулгах анхны мэс заслыг хийсэн нь энэ аж. Өнөөдрийн байдлаар ээж, охин хоёрын биеийн байдал сайжирч байгаа аж. Мөн амьдрах чадварын тухайд тухайн өвчтөн маш сайн гам барьж чадвал 15-20 жил ч болно гэж УНТЭ-ийн Ерөнхий захирлын албан үүргийг түр орлон гүйцэтгэгч, Элэг шилжүүлэн суулгах багийн гишүүн Д.Чулуунбаатар хэллээ. Тэрбээр “Цусны бүлэг тохироогүй донороос элэг шилжүүлэн суулгах мэс заслыг манай улс анх удаа хийлээ. Амьдрах чадварын хувьд дэлхийд 25-30 жил байдаг. Манай улсад анх 2011 онд элэг шилжүүлэн суулгах хагалгаанд орсон хүмүүс одоо амьд сэрүүн, эрүүл саруул амьдарч байгаа юм. Цаашид хэчнээн ч жил амьдрах боломжтой.
Элэгний хавдартай байгаад энэ төрлийн хагалгаанд орсон хоёр эмэгтэй гэхэд дахин төрж, хүүхэдтэй болсон гэх мэт сайхан жишээнүүд ч бий. Энэ төрлийн мэс засал иргэдэд ч бас их ач холбогдолтой. Одоогоор элэг шилжүүлэн суулгах мэс засалд орохоор хүлээж буй 50 орчим хүн байна” гэлээ. Улсын Нэгдүгээр Төв эмнэлэг нь 2011 оны есдүгээр сарын 24-нд БНСУ-ын Асан Анагаах ухааны төв эмнэлэгтэй хамтран анх удаа элэг шилжүүлэн суулгах хагалгааг 45 настай эмэгтэйд хийжээ. Үүнээс хойш нийт 75 хүнд энэ төрлийн мэс заслыг амжилттай хийж, амьдрал хайрласан байна. Эдгээрээс хоёр тохиолдолд тархины үхэлтэй донороос дөрвөн хүүхдэд, 69-д нь амьд донороос элэг шилжүүлэн суулгах хагалгаа хийжээ.

Цусны бүлэг нь тохироогүй донороос элэг шилжүүлэн суулгах мэс заслыг манай улс амжилттай нэвтрүүлсэн нь энэ юм.
Энэ төрлийн мэс заслыг элэг болон бөөрнөөс шилжүүлэн суулгаж хийх боломжтой аж. Харин зүрх болон нойр булчирхайг шилжүүлэн суулгах боломжгүй юм байна. Учир нь цусны бүлэг нь тохироогүй донорын хувьд зөвхөн амьд хүнээс хийх боломжтой тул зүрх болон нойр булчирхайд тохиромжгүй аж.

Тайландын хаан Маха Вачиралонгкорнаг (Х Рама) хаан ширээнд залах ёслол Бангкок хотноо бямба гаригт болжээ. Ёслолын арга хэмжээ гурван хоног үргэлжлэх аж. Орон нутгийн телевизээр энэхүү ёслолыг шууд дамжуулж байна. М.Вачирлонгкорна хаан улсынхаа таван гол, дөрвөн нуур, мөн хаант улсын 77 мужийн 100 булаг шандны усаар угаал үйлдсэн байна. Үүний дараа хааны магнайд энгэсэг түрхэх ёслол Байсал Даксин ордонд болжээ. Уг ёслолын дараа эзэн хааны Бхадрапитха сэнтийд заларчээ. Энэ үеэр гол бярман албан ёсны цол, хааны бэлгэ тэмдэг, эртний тушаал болон дээд эрх мэдлийн бусад бэлгэ тэмдэг бүхий хааны алтан тавгийг Х Рамад гардуулсан аж. Тайландыг 70 жил удирдсан хаан Пумипона Адульядета (IX Рама) өөд болсны дараа түүний хүү Маха Вачиралонгкорна хаан ширээнд заларсан. Тухайн үед эзэн хааны шийдвэрээр хаан сэнтийд залах ёслолыг хойшлуулж байжээ. Өнгөрсөн долоо хоногт хаан ширээнд залрахын өмнө Маха Вачиралонгкорна нь генерал бүсгүйтэй гэрлэсэн юм.

Нийслэлийн Засаг даргын зөвлөлийн өнөөдрийн хурлаар Нийслэлийн төр, захиргааны байгууллагуудын ажлын цагийн хуваарийг зохицуулах асуудлыг НЗДТГ-ын Төрийн захиргааны удирдлагын хэлтсийн дарга Ү.Ганболд танилцуулж, Зөвлөлийн гишүүдийн олонхын саналаар баталлаа. Захирамжид, “Дулааны улирал эхэлж, өдөр уртсаж байгаатай холбогдуулан байгалийн гэрэл ашиглаж эрчим хүчийг хэмнэх, ажлын бүтээмжийг нэмэгдүүлэх, ажил хэрэгч соёлыг төлөвшүүлэх, авто замын ачааллыг зохицуулах зорилгоор нийслэлийн төр, захиргааны байгууллагын ажил эхлэх цагийг жил бүрийн зургадугаар сарын 1-нээс наймдугаар сарын 31-ний хооронд 8.00 цагт, бусад хугацаанд ажил эхлэх цагийг 9.00 байхаар тогтоосугай” гэжээ. Тус захирамжийн хэрэгжилтийг зохион байгуулж, биелэлтэд нь хяналт тавьж ажиллахыг нийслэлийн Засаг даргын Тамгын газрын дарга М.Отгонбаярт даалгав. Бүтээн байгуулалтын улирал эхэлсэнтэй холбогдуулан нийслэлийн төр, захиргааны байгууллагаар үйлчлүүлж, даргын зөвшөөрөл авах, тамга даруулах, гарын үсэг зуруулах гэх мэт бичиг цаасны ажлаа эрт амжуулах шаардлага иргэд, аж ахуй нэгжийн өмнө тулгамддаг тул тэдний ажлыг хөнгөвчлөх, бүтээмжийг нь нэмэгдүүлэх зорилгоор уг захирамжийг баталжээ. Мөн үүнээс гадна нийслэлийн төр, захиргааны байгууллагын албан хаагчдын зуны ээлжийн амралтыг зөв зүйтэй зохицуулж, амарсан нэгнийхээ оронд ажил үүргийг нь хэн нэгэн хариуцаж гүйцэтгэдэг, төрийн ажлыг цалгардуулахгүй байхаар нарийн тооцоолдог болохыг Хотын захирагч холбогдох удирдлагуудад анхааруулсан юм.

Налайх дүүргийн III хороо Нарангийн гудамжны задгай хашаанд “Accent” маркын тээврийн хэрэгслийн жолооч Б нь согтуугаар тээврийн хэрэгсэл жолоодож, хоёр настай хүүхдийг гэртэй нь дайрч амь насыг нь хохироосон хэрэг гарчээ. Улмаар хэргийн газрыг орхин явсан хэргийг Багахангай дүүргийн замын хяналтын постонд 24 цагийн үүрэг гүйцэтгэж байсан Орон нутаг, хурдны замын хяналтын хэлтсийн зохицуулагч цагдаагийн дэслэгч Д. Мөнхбат болон Багахангай дүүрэг дэх ЦХ-ийн Замын цагдаагийн хэсгийн цагдаа зохицуулагч, цагдаагийн ахлах ахлагч Б.Ганзориг нар илрүүлэн саатуулжээ.

Монгол Улсын Ерөнхийлөгчийн санаачилгаар Ардын уран зохиолч, Төрийн гурван удаагийн шагналт, зохиолч, орчуулагч, нэрт эрдэмтэн, академич Цэндийн Дамдинсүрэнгийн дурсгалд зориулсан гэрэлт хөшөөг Үндэсний цэцэрлэгт хүрээлэнд өнөөдөр сүндэрлүүллээ. Нээлтийн ёслолд Ерөнхийлөгчийн Соёл, шашны бодлогын зөвлөх Ц.Хулан, МЗЭ-ийн удирдах зөвлөлийн дарга, МУСГЗ До.Цэрэнжав, ШУА-ийн дэд ерөнхийлөгч, академич Д.Чулуунбаатар, Төрийн соёрхолт, Ардын уран зохиолч Д.Цоодол, Төрийн соёрхолт зохиолч, яруу найрагч Д.Төрбат зэрэг эрхэм хүндтэй зочид төлөөлөгчид оролцсон.
Ц.Дамдинсүрэн нь Монгол хэлний дүрмийг үндэслэгч, “Монголын нууц товчоо”-г орчин цагийн монгол хэл рүү хөрвүүлэн хэвлүүлсэн, Монгол Улсын Төрийн дууллын үгийг зохиож байсан гээд өнө хожид дуурсах алдартай, нэрт соён гэгээрүүлэгч нэгэн билээ. Нэрт зохиолчийн мэндэлсний 111 жилийн ой энэ онд тохиож буй юм.