Month: May 2019

Онцгой байдлын ерөнхий газрын тэргүүн дэд дарга, бригадын генерал Г.Ариунбуян, Красноярскийн Хөдөө аж ахуйн Улсын их сургуулийн дэд захирал П.Л.Бопп тус сургуулийн Удирдлагын тэнхимийн менежер В.С.Литвинова нарыг хүлээн авч уулзлаа.

Уулзалтаар ОБЕГ-ын дэргэдэх Гамшиг судлалын хүрээлэн, Красноярскийн Хөдөө аж ахуйн Улсын их сургуулийн эрдэм шинжилгээ, судалгааны ажлын талаар харилцан мэдээлэл солилцсон юм.

Цаашид судалгаа, шинжилгээ хийх, мэдээлэл солилцох, алба хаагчдыг суралцуулах чиглэлээр хамтран ажиллах санамж бичиг байгуулахаар боллоо.

Нийслэлийн ИТХ-ын Тэргүүлэгчдийн ээлжит хуралдаан өнөөдөр (2019.05.14-ний өдөр) болж байна. Монгол Улсын Засгийн газраас гаргасан 62 дугаар тогтоолыг хэрэгжүүлэх ажлын явцыг сонсож, Тогтоолд өөрчлөлт оруулах тухай, Ажлын хэсэг байгуулах тухай, ХК-ийн дүрэмд өөрчлөлт оруулахыг дэмжих тухай, ТУЗ-ийн бүрэлдэхүүнийг батлах тухай, нийслэлийн ИТХ-ын ээлжит XXV хуралдааныг зарлах тухай зэрэг найман асуудал хэлэлцэх товтой.

Нийслэлийн агаар, орчны бохирдлыг бууруулахаар Засгийн газраас өнгөрсөн онд 62 дугаартай тогтоол гаргаж, тэр хүрээнд төвийн зургаан дүүрэгт түүхий нүүрс оруулж, түлшинд хэрэглэхийг хориглосон билээ. Тогтоолын тус заалтыг маргаашнаас мөрдөж эхэлнэ. Тиймээс бэлтгэл ажлыг хангах хүрээнд өнгөрсөн хугацаанд ямар ажил өрнүүлж, цаашид хэрхэн ажиллах талаар нийслэлийн ИТХ-ын төлөөлөгч, нийслэлийн Засаг даргын орлогч, Агаар, орчны бохирдлын асуудал хариуцсан төслүүдийн удирдагч Д.Мөнхжаргал танилцууллаа.

ИРЭХ САРЫН СҮҮЛЧЭЭР НЭМЖ ТҮЛШ БОРЛУУЛАХ 100 ЦЭГ НЭЭНЭ

Агаарын бохирдлыг бууруулахын тулд нийслэлийн удирдлага энэ онд 3.4 тэрбум төгрөг төсөвт суулгаж, түлш борлуулах сүлжээг нэмэх, байгаль орчинд ээлтэй технологи нэвтрүүлэх, дотоод орчны агаарын чанарыг сайжруулах, улмаар суурин харуулуудын тоног төхөөрөмж, техник хэрэгслийг шинэчилж байгаа аж. Мөн сайжруулсан түлшийг нөөцлөх найман агуулах барихаар төлөвлөж, өдгөө тавынх нь бүтээн байгуулалтыг эхлүүлжээ. Үүний зэрэгцээ сайжруулсан түлш борлуулах цэгүүдийг шинээр бий болгож эхлээд байгаа аж. Мод, түүхий нүүрс худалддаг 540 орчим цэг байсан бөгөөд тоог нь нэмэх бодлого барьж буй. Энэ сарын эхээр сайжруулсан түлш борлуулах цэгүүдийн эхний ээлжийг ашиглалтад оруулсан бол ирэх сарын сүүлчээр нэмж 100 цэг нээнэ гэдгийг Агаар, орчны бохирдлын асуудал хариуцсан төслүүдийн удирдагч Д.Мөнхжаргал танилцуулсан юм.

Мөн тэрбээр агаар, орчны бохирдлыг бууруулах ажлын хүрээнд хотоос хийж буй ажлуудыг танилцуулсан юм. Заримаас нь дурдвал, халаалтын зуухуудыг төвлөрсөн дулаан хангамж болон цахилгаанд холбох, галт тэрэгний янданд шүүлтүүр суурилуулах, амьдрах орчны судалгааны апплейкшн ашиглалтад оруулах гээд өргөн цар хүрээтэй ажил олныг хэрэгжүүлж байна.

Тэргүүлэгчид танилцуулга мэдээллийг сонсоод холбогдох албанаас зарим зүйлсийг тодрууллаа. Тухайлбал, түлш борлуулах цэгүүдийн газрыг шийдсэн, эсэх, түлшний үнэ ямар байх болон эрэлтэд нийцүүлэн бүтээгдэхүүн үйлдвэрлэн нөөцөлж чадах уу гэдгийг Тэргүүлэгчид лавласан юм. Агаар, орчны бохирдлын асуудал хариуцсан төслүүдийн удирдагч Д.Мөнхжаргал худалдах цэгүүдийн газрын асуудлыг шийдэж, тонн тутмыг нь 150,000 төгрөгөөс хэтрэхгүй үнээр иргэдэд нийлүүлнэ гэдгийг онцолсон. Мөн холбогдох албаныхан хангалттай хэмжээний түлш үйлвэрлэн, нөөцөлсөн талаар хэлсэн юм.

Хэлэлцэх асуудлыг хүрээнд Тэргүүлэгчид холбогдох албаныханд зарим саналаа хэлэв. Тухайлбал, халаалтын зуухуудыг сайжруулсан түлшээр хангах ажлыг сайн зохион байгуулж, үнс зэрэг хаягдлын асуудлыг цогцоор нь шийдэх ёстойг дурдсан юм. Тодруулбал, Тэргүүлэгч Б.Бямбадорж “Нам даралтын зуухуудтай аж ахуйн нэгж, байгууллагуудад сайжруулсан шахмал түлш түлэх боломж бүрдүүлж өгөх ёстой. Мөн “Баянхошуу дэд төв”-ийн бүтээн байгуулалтын хүрээнд татаж буй инженерийн шугамд айл өрх, сургууль цэцэрлэгийг холбох ажлын зураг төслийг боловсруулж, тооцоо судалгаа, техникийн нөхцөлийг яаралтай гаргаарай” гэсэн бол Тэргүүлэгч Л.Нарантуяа 62 дугаар тогтоолыг хэрэгжүүлэх явцад гарч буй ойлгомжгүй зүйлсийг тодруулж, дахин танилцуулах санал хэлсэн.

ТҮЛШ НОРОХООРОО ЧАНАРАА АЛДАХ ВИЙ. ТИЙМЭЭС АГУУЛАХ БАРИХ АЖЛЫГ ТҮРГЭВЧЛЭХ ХЭРЭГТЭЙ

Нийслэлийн ИТХ-ын дарга Р.Дагва холбогдох албаныханд хандан “Тэргүүлэгчдийн саналыг анхаарах ёстой. Маргаашнаас хот руу түүхий нүүрс оруулахыг хориглох тул уг асуудал нийслэлийн иргэн бүрийн эрүүл мэнд, аюулгүй байдалтай холбоотой хариуцлагатай үйл ажиллагаа. Холбогдох албанаас ирүүлж буй мэдээгээр энэ зун хур ихтэй байх төлөвтэй. Тэгэхээр сайжруулсан түлшний хадгалалтад онцгой анхаарал хандуулах хэрэгтэй. Түлш норохоороо чанараа алдах вий. Тиймээс агуулах барих ажлыг түргэвчлэх хэрэгтэй” гэсэн юм.

Он гарсаар улсын хэмжээнд өнөөдрийн байдлаар нийт 2025 удаагийн ахуйн гал түймэр гарч, түймрийн улмаас 23 хүн амь насаа алджээ. Үүний 16 нь том хүн, 7 нь хүүхэд байгаа юм.

Гал түймрийн шалтгаан нөхцөл нь айл, өрхүүдэд ашиглагдаж байгаа пийшин, зуухны гэмтэл, хэт галлагаа, ил задгай асгасан цогтой үнс нурам, хараа хяналтгүй орхисон бага насны хүүхэд, иргэдийн болгоомжгүй үйл ажиллагаа, зориулалтын бус цахилгааны утасны ашиглалт, цахилгаан хэлхээний хэт ачаалал зэрэг хувь хүний санамсар болгоомжгүй байдлаас үүдэж байна.

Иймд:

-Бага насны хүүхдийг хараа хяналтгүй гэрт нь цоожилж үлдээхгүй байх, пийшин, зуух яндангийн эвдрэл гэмтлийг засч, хүүхэд хүрч, түлэгдэх, гэмтэхээс сэргийлэх, цахилгааны утас, залгуур, ил гарах зүйлс, шатах, тослох материалыг бага насны хүүхдээс хол байлгах,

-Халуун үнс нурам, галтай хог хаягдлыг хогийн ил цэгт хаяхгүй байх, шингэрүүлсэн шатдаг хийгээр болон цахилгаанаар ажилладаг тулга, зуухыг ашиглахдаа аюулгүй ажиллагааны дүрэм, журмыг баримтлах,

-Цахилгаан халаагуур, халаагчийг ашиглахдаа цахилгаан ашиглалтын дүрэм, журмыг мөрдөх, аюулгүй ажиллагааны заавар, зааварчилгаа авах, мэргэжлийн цахилгаанчаар холбуулах, холбогдох байгууллагаас өгч байгаа заавар, зөвлөмжийг дагаж мөрдөх,

-Гарааш, ил зогсоолд автомашинаа байрлуулахдаа галын аюулгүйн зайн хэмжээг баримтлах,

-Аж ахуй, нэгж байгууллагууд барилга байгууламжийн галын аюулгүй байдал, гал унтраах автомат тоног төхөөрөмж, дохиолол, гал унтраах анхан шатны багаж хэрэгслийн бэлэн байдлыг хангаж, хяналтын камер, харуул хамгаалалтыг сайжруулах, яаралтай үед холбогдох утасны дугаар жагсаалтыг тодотгох,

-Гал унтраах тусгай зориулалтын автомашин хүрэлцэн очих зам, гарц, барилга байгууламжийн авралтын зам, гарцыг чөлөөтэй байлгахыг газраас анхааруулж байна.

Нийслэлийн Хан-Уул дүүргийн XV сургуульд сүрьеэгийн халдвар тархсан тухай мэдээлэл цацагдаж эхэллээ. XV сургуул нь 1710 сурагчтайгаас 529 хүүхэд сүрьеэгийн халдвар авсан нь шинжилгээгээр батлагдсан бололтой. Халдвар авсан сурагчдын 38 нь эмчилгээний эм ууж эхэлсэн гэнэ. Одоогоор сургуулийн захиргаа болон холбогдох албаны хүмүүс ажлын хэсгийн уулзалт зохион байгуулж буй юм байна. Уг халдвар 2017 онд сүрьеэ өвчнөөр өвчилсөн нэгэн багшаас тархсан гэх мэдээлэл байгаа ч сургуулийн захиргаа үгүйсгэж байна. Уг багш тухайн үед уг өвчнөөр өвчилсөн боловч эмчилгээ хийлгэн эдгэрсэн гэжээ.

Монгол Улсын Ерөнхийлөгч Х.Баттулга өнөөдөр Богдхан уулын дархан цаазат газрын Түргэний аманд байрлах Монгол-Кувейтын судалгааны төв дэх хөрс судлалын туршилтын ажлын явцтай танилцлаа.

Энэ төвд шимт хөрс, бордоо судлал, суулгац бэлтгэх, хүлэмж, мод үрсэлгээний бортогоны технологи зэрэг чиглэлд хэд, хэдэн иргэн, үйлдвэр туршилт хийж, бүтээгдэхүүн үйлдвэрлэж байгаа юм байна.

Тухайлбал, гарааны “Био ундарга” үйлдвэр гэхэд монгол орны хөрснөөс ялган авсан, ургамлын өсөлтийг дэмжигч 50 орчим омгийн цэвэр өсгөврүүдээс бүрдэх “Дархан ризо” нэртэй бордоо үйлдвэрлэж зах зээлд нийлүүлдэг байна. Мөн Төв Азийн хөрс судлалын холбоо хөдөө аж ахуйн инновацийн нэгдэл био хаягдал ашиглан компост бордоо гарган авч, бордоогоороо хөрсний доройтлыг сайжруулах арга технологийг илүү нарийн судалж байгаа аж.

Эдгээр компаниудын аль аль нь сайн технологийг нутагшуулж өндөр чанарын бордоо гарган авч байгаа ч импортын төрөл бүрийн нийлмэл бордоо ихээр орж ирдэг нь борлуулалтад нь сөргөөр нөлөөлдөг байна. Харин борлуулалтыг нь дэмжвэл зээл, тусламж шаардагдахгүйгээр дотоодын хэрэгцээг бүрэн хангах боломжтой тул энэ асуудалд харьяа газар, салбар яам нь анхаарал хандуулж өгөхийг хүссэн юм.

Монгол Улсын Ерөнхийлөгч Х.Баттулга хөрс судлал, шимт хөрсний туршилтын ажилтай танилцаж, аж ахуйн нэгжүүдийн төлөөллүүдтэй ярилцсаны дараа “Шимт хөрс бий болгох, компост бордоо үйлдвэрлэх туршилтыг эхлүүлсэн нь хөрсийг хамгаалж, үр шимийг нэмэгдүүлэхэд тустай ажил болно гэдэгт илтгэлтэй” байгаагаа илэрхийллээ.

Мөн хөдөө аж ахуйн салбарт тулгамдаж байгаа зарим асуудлын талаар “…Хүнсээ өөрсдөө ургуулж тарьж хэрэглэх асуудлыг олон жилийн турш ярьж байна. Энэ асуудалд анхаарал хандуулж, мах хүнсний ногооны хангамжийн асуудлаар чуулган хийсэн. Компани, хувь хүн бүр дор бүрийнхээ асуудлыг ярих бус нэгдэж ярилцаж, нэг тоо статистиктай, нэгдсэн асуудал ярьдаг болох нь чухал” гэсэн юм.

Энэ асуудлаар Монгол Улсын Ерөнхийлөгч Х.Баттулга УИХ-ын гишүүн, Монголын хүнсчдийн холбооны тэргүүн Д.Тэрбишдагвад захиас, даалгавар өгсөн талаараа хэлж, тус холбооноос зохион байгуулах хүнсчдийн ээлжит бус онц хуралд идэвхтэй оролцож, саналаа бодлоо тусгах хэрэгтэй гэж мөн хэллээ.

Монгол Улс 2020 онд “Азийн хүүхдүүд” олон улсын спортын VII их наадмыг зохион байгуулах гэж байгаатай холбогдуулан бэлтгэл ажлаа хангаж байна. Энэ хүрээнд өрнөж буй хамгийн том бүтээн байгуулалт нь Хан-Уул дүүргийн 8-р хороо, “Буянт-Ухаа” спорт цогцолборын эсрэг талд байрлах “Азийн хүүхдүүд 2020” наадмын тосгоны бүтээн байгуулалт юм.

Өнгөрсөн сард Монгол Улсын Ерөнхийлөгч Х.Баттулга битүү дээвэртэй ордны /Мөсөн өргөө/ шав тавьж, усан бассейн, хөлбөмбөгийн талбай зэрэг бүтээн байгуулалтын ажил эхлэх гэж байгааг сонордуулсан. Харин өчигдөр Монгол Улсын Ерөнхийлөгчийг газар дээр нь очиж танилцахад наадмын тосгоны бүтээн байгуулалтын ажил 50 орчим хувьтай үргэлжилж байна гэж барилга угсралт хариуцсан компанийн удирдлагууд танилцууллаа.

Тухайлбал, наадмын тосгонд байх олон улсын хөлбөмбөгийн холбооны 115м х 85м хэмжээтэй ногоон зүлгэн талбай баригдах бүх төрлийн бэлтгэл ажил бүрэн хангагджээ. Өнгөрсөн сард газар шорооны ажлыг дуусгаад дөрвөн үе дайрга, хайрга, элсээр 28.5 см дүүргэлт хийж тэгшлэх, ус зайлуулах шугам татах, талбайг тойруулан явган хүний зам хийх ажлууд үргэлжилж байна. Ажил энэ эрчээрээ үргэлжилж ирэх долдугаар сар гэхэд гадаадын компаниуд ирж ногоон зүлэг тавих ажлыг хийж дуусгахаар төлөвлөжээ.

Мөн битүү дээвэртэй ордны газар шорооны ажил дуусч, суурь цутгах буюу барилга угсралтын ажил үргэлжилж байлаа. Энэ ажлыг хариуцаж буй “Улаанбаатар барилга” компанийн ажилчид өөрсдийн хариуцаж буй ажлыг цаг хугацаанд нь хүлээлгэж өгөхөөр ажиллаж байгаа бөгөөд барилга 16 сарын дотор ашиглалтад орох товтой юм.

Мөн энэ цогцолборт 50м бассейн бүхий олон улсын стандартын усан спортын цогцолбор баригдах бөгөөд газар шорооны суурийн ажил дууссан бол 4000 орчим тамирчин байрлах тосгоны барилга угсралт мөн дуусч, гадна дотно заслын ажил үргэлжилж байна.

Нийслэлийн боловсролын газар, Нийслэлийн Мэдээлэл, технологийн газраас Улаанбаатар хот дахь төрийн өмчийн ерөнхий боловсролын сургуулийн 2019-2020 оны хичээлийн жилийн нэгдүгээр ангийн элсэлтийн талаар мэдээлэл хийлээ.

Нийслэлийн Боловсролын газрын орлогч дарга Ц.Отгончимэг:

Нийслэлийн ЕБС-д хамран сургах тойргийг Нийслэлийн Боловсролын газрын даргын А44 тушаалаар баталсны дагуу бүртгэлийг хийж байна. Нэгдүгээр ангийн элсэлтийг тавдугаар сарын 13-27-нд зохион байгуулна. Энэ жил зургаан настай 38,232 хүүхэд элсэнэ.

Чингэлтэй дүүрэгт ЕБС-ийн цахим элсэлтийг зохион байгуулж байна.

Нийслэлийн Мэдээллийн технологийн газрын дарга О.Чинзориг: 2019-2020 оны нэгдүгээр ангид элсэн сурагчдын бүртгэлийг цахим хэлбэрээр явуулахаар болж байна. Үүнийг зөвхөн Чингэлтэй дүүрэгт зохион байгуулна. Ингэснээр ямар нэг бичиг баримт шаардахгүйгээр бүртгэлийг хийнэ.

Боловсролын салбарын мэдээллийн системийн хөгжүүлэлтийн багийн зөвлөх шинжээч Үнэнбат:

Чингэлтэй дүүргийн төрийн өмчийн 15 сургуульд зохион байгуулж байна. Бүртгэл өчигдөр эхэлсэн бөгөөд 27-ныг дуустал үргэлжилнэ. Мөн уламжлалт байдлаар бүртгүүлж болно. Тус дүүргийн эцэг эхчүүд parent.esis.edu.mn хуудсаар зочилж, бүртгүүлсний дараа хүүхдийн мэдээллээ оруулж, сургуульдаа бүртгүүлэх хүсэлтээ явуулж болно.

• Төрийн өмчийн ерөнхий боловсролын сургуулиуд 2019-2020 оны хичээлийн жилд элсэн суралцах сурагчдыг 2019 оны 05 дугаар сарын 13-наас 05 дугаар сарын 27-ны хооронд бүртгэж элсэгчдийн бүртгэлийг удирдлагын мэдээллийн системд оруулна.
• Нэгдүгээр ангид 2013 оны 01 дүгээр сарын 01-нээс 2013 оны 12 дугаар сарын 31-нийг дуусталх хугацаанд төрсөн бүх хүүхдийг элсүүлнэ.
• 5 настай буюу 2014 оны 01 дүгээр сарын 01-нээс хойш төрсөн хүүхдийг бүртгэхгүй.
• Хамран сургах тойргийн хүүхдийг ямар нэг элсэлтийн шалгалтгүйгээр бүртгэж элсүүлэх бөгөөд элсэгчдээс бүртгэлийн хураамж бусад төлбөр авахгүй болно.
• Элсэлтийн явцын мэдээг 2019 оны 05 дугаар сарын 17-24-нд гаргаж мэдээлнэ Элсэгчдийг бүртгэхдээ дараах материалыг бүрдүүлнэ. Үүнд:

1. Хүүхдийн төрсний гэрчилгээний эх хувь болон хуулбар
2. Эцэг эх болон асран хамгаалагчийн цахим үнэмлэхний эх хувь болон хуулбар
3. 3×4 хэмжзэтэй 1 хувь цээж зураг. шаардлагатай тохиолдолд сургууль нзмэлт материал шаардаж болно.