Month: May 2019

Нийслэлийн Зоонозын өвчин судлалын төвөөс Төв аймгийн Зоонозын өвчин судлалын төвтэй хамтран 2019 онд хийх ажлын төлөвлөгөөний дагуу өнгөрөгч дөрөвдүгээр сарын 16-наас 30-ны хооронд Төв аймгийн Мөнгөнморьт сумын газар нутагт хачгаар дамжих халдварын байгалийн голомт болон хүн амын тандалт судалгааг хийлээ.

Уг тандалтаар Төв аймгийн Мөнгөнморьт сумын Тэрэлж, Хар ямаат, Жаргалан, Таван салааны гүүр, Тэнүүний гол, Цагаан нуур зэрэг уулт хээрийн бүс нутгийг хамруулан, нийт зургаан цэгээс хачиг цуглуулан халдвартай эсэхийг тодорхойлох шинжилгээ хийж гүйцэтгэлээ.

Түүнчлэн эрсдэлт бүлгийн 100 иргэнээс мэдлэг, хандлага, эрсдлийг үнэлэх зорилгоор асуумж судалгаа, мөн эрсдэлт бүлгийн 92 иргэнээс хачгаар дамжих халдварын шинжилгээний сорьц зэргийг авч ажилласан байна.

Тус ажлын хүрээнд Мөнгөнморьт сумын дунд сургууль, сургуулийн дотуур байрны сурагчдад эрүүл мэндийн боловсрол олгох үүднээс хачгаар дамжих халдварын эрсдэл, хор нөлөө урьдчилан сэргийлэх арга хэмжээг хэрхэн авах талаар мэдээлэл өгч, сургалт зохион байгууллаа.

Олон улсын даралт ихсэлтийн нийгэмлэгээс дэлхий даяар артерийн даралт ихсэлт өвчний талаарх ойлголтыг олон нийтэд хүргэх, даралтын хяналтыг сайжруулах зорилгоор 2017 оноос эхлэн жил бүрийн тавдугаар сарыг “Даралт хэмжилтийн сар” болгон зарлах болсон билээ. “Даралт хэмжилтийн сар”-ын аянд өдгөө 100 гаруй орон нэгдэж, цусны даралт ихсэх өвчнөөс урьдчилан сэргийлэх олон ажлыг зохион байгуулж байна.

Энэ хүрээнд Нийслэлийн Эрүүл мэндийн газар, “Оном”, сан, Монголын даралт ихсэлтийн нийгэмлэгээс хамтран 2019 оны тавдугаар сарын 01-нээс 30-ны хооронд “Даралт хэмжилтийг дадал болгоё” уриан дор даралт ихсэлтийн эрсдэлийг таниулах, түүнээс урьдчилан сэргийлэх, эрт илрүүлэх, цаг алдалгүй эмчилгээнд хамруулах сарын аяныг эхлүүллээ.

Даралт хэмжилтийг нийслэлийн 142 өрх, дөрвөн тосгон, есөн дүүргийн эрүүл мэндийн төв, “Монос”, “Ази Фарма”, “Тавин ус”, “Нахиа” эмийн сангийн салбарууд, ажлын байр, зарим хувийн хэвшлийн эрүүл мэндийн байгууллагад зохион байгуулахаар төлөвлөжээ.

Түүнчлэн дэлхий нийтээрээ цусны даралт ихсэлттэй тэмцэх өдөр буюу тавдугаар сарын 17-нд мэргэжлийн холбоод хамтран Төрийн тусгай албан хаагчдын нэгдсэн эмнэлгийн хурлын танхимд “130/80” сэдэвт нотолгоонд суурилсан даралт ихсэлтийн менежмент сэдэвт эрдэм шинжилгээний хурлыг зохион байгуулах юм.

Дашрамд дуулгахад, дэлхий дахинд жил бүр 9.4 сая хүн даралт ихсэлт өвчний хүндрэл болох зүрхний шигдээс, тархины цус харвалт зэргээс болж нас бардаг байна. Нөгөөтэйгүүр, дэлхий дээрх насанд хүрсэн хүн амын гуравны нэгд тохиолддог даралт ихсэх өвчин нь хүн төрөлхтөний түүхэнд мэдэгдэж байгаа хамгийн том тахал юм.

Манай улсад зүрхний шигдээс, цус харвалт зэрэг зүрх судасны тогтолцооны өвчин нас баралтын тэргүүлэх шалтгаан болж байна. Тухайлбал, зуун мянган хүн амд ногдох тархины цус алдах хэлбэрийн цус харвалтын нас баралтаар манай улс дэлхийд нэгдүгээрт бичигдэж, дэлхийн дунджаас бараг 4 дахин их байгаа тоо баримт бий. Эдгээр тоо баримт нь нийт хүн амын дунд цусны даралт ихсэлтээс сэргийлэх, эрүүл амьдралын хэв маягыг дэмжин дэлгэрүүлэх, цусны даралт ихсэлттэй хүмүүсийн эмчилгээ, хяналтыг сайжруулах нэн тулгамдсан шаардлага байгааг харуулж байна.

Баянзүрх дүүрэг дэх Замын цагдаагийн хэлтсээс зам тээврийн аваар ослыг бууруулах ажлын хүрээнд зохион байгуулж буй ‘’Автомашин-2019’’ нэгдсэн арга хэмжээ амжилттай үргэлжилж байна.

Энэхүү арга хэмжээг дүүргийн хэмжээнд үйлдэгдэж байгаа автомашин хулгайлах гэмт хэргийг илрүүлэх, таслан зогсоох, авто машин хулгайлдаг этгээдүүдийн хань, харилцаа хувийн байдлыг тогтоох, тэдгээрээс автомашин худалдан авдаг, зарж борлуулдаг, задалж зардаг, хууль бусаар арлын дугаар сольдог газруудыг тогтоож зам тээврийн осол хэргээс урьдчилан сэргийлэх ажлын хүрээнд зохион байгуулагдаж байгаа юм.

Арга хэмжээний хүрээнд дүүрэг дэх Замын цагдаагийн хэлтсийн алба хаагчид дүүргийн нутаг дэвсгэрт авто машины худалдаа, наймаа эрхэлдэг газруудад хяналт тавьж ажиллаж байна. Тодруулбал өнгөрсөн хугацаанд тус хэлтэс арлын дугаар сольсон-5, тээврийн хэрэгслийн өнгө сольсон-6 зөрчлийг илрүүлсэн бол хулгайд тээврийн хэрэгслээ алдсан 5 зөрчлийг илрүүлж харьяалах дүүргийн Цагдаагийн хэлтсүүд рүү шилжүүлэн ажилласан байна.

Иймд иргэд өөрсдийн болгоомжгүй болон санамсаргүй байдлаас хулгайд алдагдсан, өнгө болон арлын дугаар солигдсон автомашин худалдан авсан бол дүүрэг дэх Замын цагдаагийн хэлтсийн 99991499 дугаарт холбогдож мэдээлэл өгнө үү.

Сонгинохайрхан дүүргийн 6 дугаар хорооны нутаг дэвсгэрт дөрөвдүгээр сарын 29-ний орой 23:00 цагийн орчимд 11 настай хүүхдийг хүчиндсэн гэмт хэрэг гарчээ.

Тус гэмт хэргийг Сонгинохайрхан дүүрэг дэх цагдаагийн хоёрдугаар хэлтсийн Эрүүгийн цагдаагийн тасгийн алба хаагч нар илрүүлж, сэжигтэй этгээд С.Төмөрийг эрэн сурвалжилж олж тогтоосон байна.

Цагдаагийн ерөнхий газрын Эрүүгийн цагдаагийн албаны Хүнд гэмт хэрэгтэй тэмцэх хэлтэс болон Нийслэлийн цагдаагийн газрын Мөрдөн шалгах газрын Хүнд гэмт хэрэгтэй тэмцэх хэлтсийн алба хаагч нартай хамтран шалгалтын ажиллагааг явуулж байна.

Хохирогч охины биеийн байдал хүндэвтэр байсан бөгөөд цагдаагийн алба хаагч нар эмнэлэгт хүргэж, яаралтай тусламж үзүүлжээ.

Баян-Өлгий аймагт тарваган тахлаар хүн өвчилсөн байж болзошгүй шинж тэмдэг илэрсэн. Тухайн бүс нутагт хэсэгчилсэн хорио, цээрийн дэглэм тогтоосон учир өнөөдөр Баян-Өлгий-Ховд-Улаанбаатар чиглэлийн M-182 агаарын хөлгийг тусгаарлан, зорчигчдод үзлэг хийж эхэлсэн байна. Уг нислэгээр Баян-Өлгийн 11, Ховд аймгаас 47 зорчигч иржээ. Халдварт өвчин судлалын үндэсний төв, Хилийн мэргэжлийн хяналтаас бүрдсэн тусгай баг зорчигчдод үзлэг хийж байгаа бөгөөд Баян-Өлгийгөөс ирсэн зорчигчдыг тусгаарлан эмнэлэгт хүргэжээ. Ховдоос ирсэн 47 зорчигчийг Буянт-Ухаа дахь спорт цогцолборт тусгаарлан нарийн үзлэг хийх ажээ.

Цагдаагийн байгууллага тодорхой төрлийн гэмт хэрэг, зөрчлөөс урьдчилан сэргийлэх ажил, арга хэмжээг төрийн болон төрийн бус байгууллага, иргэд, олон нийтийн оролцоо дэмжлэгтэйгээр тогтмол зохион байгуулснаар зарим эерэг үр дүн гарч байна. Тухайлбал: Хулгайлах гэмт хэрэг зөрчлөөс урьдчилан сэргийлэх, илрүүлэх, таслан зогсоох, иргэд, хуулийн этгээдийн идэвх оролцоог нэмэгдүүлэх, өмч эд хөрөнгийн хадгалалт хамгаалалтыг сайжруулах зорилгоор 2019 оны 02 дугаар сард “Сар шинэ-2019”, “Та сэргийлж чадна” нэгдсэн арга хэмжээг улсын хэмжээнд зохион байгуулсан нь оны эхний 4 сард хулгайлах гэмт хэрэг 34.9 хувиар, дээрэмдэх гэмт хэрэг 47.0 хувиар тус тус буурахад нөлөөлжээ. Мөн хүний эрүүл мэндийн халдашгүй байдлын эсрэг гэмт хэрэг, зөрчлийн шалтгаан нөхцөлийг арилгах, хор уршгийг таниулах, урьдчилан сэргийлэх ажилд иргэд, олон нийтийн оролцоо, дэмжлэгийг нэмэгдүүлэх зорилгоор “Нэг хором” аяныг улсын хэмжээнд 2019 оны 03 дугаар сард зохион байгуулснаар дээрх төрлийн гэмт хэрэг 12.0 хувиар буурсан үзүүлэлт гарсан байна. “Хулгайлах” болон “Хүний эрүүл мэндийн халдашгүй байдлын эсрэг” гэмт хэрэг нийт гэмт хэргийн 80 гаруй хувийг эзэлдэг учраас эдгээр гэмт хэргийг бууруулах нь нийт гэмт хэргийн түвшинд шууд нөлөө үзүүлдэг ажээ.

Завхан аймгийн Тосонцэнгэл сумын нутагт энэ сарын нэгний 02.00 цагт Бумбатын ам гэх газар Улаанбаатараас Улаангом чиглэлд явж байсан зорчигч тээврийн автобус “Зил-131” маркийн автомашины чиргүүлийг мөргөсөн осол гарчээ. Ослоос хоёр хүний амь нас хохирч, дөрвөн хүн гэмтсэн байна. Автобус 45 зорчигчтой явж байсан бөгөөд ээлжийн жолооч 57 настай, эрэгтэй Б, зорчигч 16 настай, эрэгтэй О нарын хоёр хүний амь нас хохирсон байна. Хэргийг Завхан аймгийн Цагдаагийн газарт шалгаж байна.

Нийслэлийн Иргэдийн Төлөөлөгчдийн хурлын 2015 оны 187 дугаар тогтоолоор “Гэртээ харих зам” дэд хөтөлбөрийг Хан-Уул дүүрэгт хэрэгжүүлэх ажлын хүрээнд дүүргийн нутаг дэвсгэрт амьдарч буй гэр оронгүй, тэнэмэл амьдралтай иргэдийг бүртгэлжүүлж, эрүүл мэндийн үзлэгт хамруулах үйл ажиллагааг 2019 оны 04 дүгээр сарын 30-ны өдөр зохион байгууллаа.

Тус арга хэмжээнд дүүргийн Засаг даргын 2017 оны 02 дугаар сарын 02-ны өдрийн А/24 дүгээр захирамжаар байгуулсан үндсэн болон дэд ажлын хэсгийн гишүүд болох Цагдаагийн 1, 2 дугаар хэлтэс, Хөдөлмөр, халамж үйлчилгээний хэлтэс, Эрүүл мэндийн төв, Улсын бүртгэлийн хэлтэс, Нийгмийн даатгалын хэлтэс, дүүргийн Улаан загалмайн хороо тус тус оролцсон.

Дүүргийн нутаг дэвсгэрт амьдарч буй гэр оронгүй, тэнэмэл болон 12 дугаар хорооны хогийн цэг дээр амьдардаг нийт 92 иргэнийг Цагдаагийн 1,2 дугаар хэлтэстэй хамтран цуглуулж сүрьеэгийн үзлэг, шинжилгээ, эрүүл мэнд, нийгмийн даатгалын үйлчилгээ, иргэний бүртгэлийн зөрчил тодорхойлон бичиг баримтжуулах, ДОХ/БЗХӨ, дотор, мэдрэл, сэтгэц, зүрх судасны үзлэгт хамруулж халуун хоол цай, солих хувцас тараалаа.

Дээрх иргэдээс авсан сүрьеэ болон эрүүл мэндийн үзлэг, шинжилгээгээр илэрсэн өвчнийг цаашид эмчлэх арга хэмжээ авч ажиллах юм.