Month: February 2019

ОХУ-ын Сахалин мужийн Южно-Сахалинcк хотноо хоёрдугаар сарын 08-17-ны өдрүүдэд “Азийн хүүхдүүд” өвлийн спортын анхдугаар наадам спортын 8 төрлөөр зохион байгуулагдаж буй билээ. Өчигдөр “Сахалин-2019” наадам албан ёсоор хөшгөө нээж, нээлтийн ёслолд Азийн олимпийн зөвлөлийн гишүүн орнууд болон Москва хот, Урал, Сибирь, Саха, Алс Дорнод, Башкортостан, Татарстан, Сахалинск мужийн нийт 19 багийн 1000 гаруй тамирчин оролцжээ.

Монгол Улсын хөдөлмөрийн баатар, гавьяат тамирчин, “Афин-2004” олимпийн наадмын хүрэл медальт, “Азийн хүүхдүүд-2000” наадмын хүрэл медальт Х.Цагаанбаатар “Сахалин-2019” наадмын тугийг хүндэтгэлтэйгээр залах ажиллагаанд оролцсон байна. Монгол Улсаа төлөөлөн уулын цана, гүйлтийн цана, биатлон, тэшүүрийн төрөлд 13 тамирчин оролцож буй бөгөөд өнөөдөр гүйлтийн цанын тамирчид гараагаа эхлүүлжээ. Гүйлтийн цанын эрэгтэйчүүдийн ойрын зайн төрөлд 65 тамирчин өрсөлдсөнөөс Б.Далхсүрэн, Б.Хонгор, Г.Өсөхбаяр, Б.Тайванбаатар нар 54-57 байруудад орсон бол эмэгтэйчүүдийн зайд 62 тамирчин өрсөлдөж, Ж.Бямбанордог 47, Ш.Ариунжаргал 52 дугаар байрт тус тус орсон байна. Монголын гүйлтийн цанын тамирчдын гол төрөл болох холын зайн төрлүүд маргааш буюу хоёрдугаар сарын 11-ний өдөр зохион байгуулагдана.

Олон улсын олимпын хороо БНАСАУ, БНСУ-ын спортын албаны хүмүүстэй гурван талт хэлэлцээ хийнэ хэмээн мэдэгджээ. Энэ хэлэлцээгээр 2020 оны Токиогийн олимпын наадмаар хоёр Солонгосын хамтын ажиллагааны талаарх асуудлыг ярилцах юм байна. 2018 оны БНСУ-ын Пёнчаны өвлийн олимпын наадмын үеэр хоёр Солонгосын төлөөлөгчид нээлтийн арга хэмжээнд хамтдаа оролцож, хамтарсан баг нь хоккейн тэмцээнд оролцсон юм.

Хоёрдугаар сарын 15-нд БНАСАУ, БНСУ-ын спортын төлөөлөгчид Лозаннад төвтэй ОУОХ-нд уулзалт хийх бөгөөд ОУОХ-той Токиогийн олимпын наадамд хоёр Солонгос хамтран оролцох асуудлыг авч хэлэлцэхээр болжээ.

Олимпийн аварга Анри Дегланы нэрэмжит 45 дахь удаагийн олон улсын тэмцээн хоёрдугаар сарын 1-3-нд Францын Ницца хотод боллоо. Өмнөх долоо хоногт болсон Иван Ярыгиний нэрэмжит Гранприд зодоглоогүй дэлхийд тэргүүлэгч гүрэн Гүржийн бөхчүүд Францад дөрвөн жинд түрүүлж, нэг жинд үзүүрлэж, дөрвөн хүрэл медаль хүртсэн амжилттай багийн дүнгээр тэргүүлжээ. Уулын эрчүүдээс олимп, дэлхийн аварга Владимир Хинчегашвили, дэлхийн аварга Зураб Якобишвили, ДАШТ-ий мөнгөн медальт Бека Ломтадзе тэргүүтэй шилдгүүд Ниццад зодогложээ. Якобишвили, Ломтадзе нар туршлага заан жиндээ түрүүлсэн бол Хинчегашвили 1/4 шигшээд Румыний Георге Букурт 3:8-аар ялагдснаар хоосон хоцорчээ.

ТЭМЦЭЭНИЙ ДҮН
57 кг: 1.Отар Гогава (Гүрж) 2. Владислав Андреев (Беларусь) 3. Раймунд Фуркад (Унгар), Лаша Ломтадзе (Гүрж )
61кг: 1.Бека Ломтадзе (Гүрж) 2. Кори Кларк (АНУ) 3. Арман Элоян (Франц), Андрей Бекренев (Беларусь)
65кг. 1. Бекхан Гойгереев (ОХУ) 2. Ньургун Скрябин ( Беларусь) 3. Адриан Дестрибатс (Аргентин), Георге Букур (Румын)
70 кг: 1. Зураб Якобишвили (Гүрж) 2. Георгий Колиев (Беларусь) 3. Николае Коджокару (Румын), Брэндон Соренсен (АНУ)
74 кг: 1. Томми Гант (АНУ) 2. Максим Василього (Румын) 3. Зураб Эрбоцаношвили (Гүрж), Андрей Карпач (Беларусь)
79 кг: 1. Давид Хуцишвили (Гүрж) 2. Омарасхаб Нажмудинов (Румын) 3. Кшифтоф Садовик (Польш), Франц Бюттнер (Герман)
86 кг: 1. Сэмми Брукс (АНУ) 2. Тарзан Майсурадзе (Гүрж) 3. Йоханнес Демль (Герман), Ахмед Айбуев (Франц)
92 кг: 1. Иштван Вереб (Унгар) 2. Тимми Маккол (АНУ) 3. Бендегуж Тот (Унгар), Михаэль Манеа (Румын)
97 кг: 1. Валерий Андрейцев (Украин) 2. Денис Хроменков (Беларусь) 3. Геннадий Кудинович (Герман), Мамука Кордзая (Гүрж)
125 кг: 1. Камил Косциолек (Польш) 2. Михай Наги (Унгар) 3. Роланди Андриадзе (Гүрж), Ник Матюхин (Герман)

“U-23” насны Азийн аварга шалгаруулах анхдугаар тэмцээн гуравдугаар сарын 23-26-ны өдрүүдэд Монгол Улсын нийслэл Улаанбаатар хотод болох билээ. МЧБХ-ноос тус тэмцээнд оролцох Монголын тамирчдыг сонгох “Сорил” тэмцээнийг хоёрдугаар сарын 12-нд “Буянт-Ухаа” спортын ордонд зохион байгуулна. Тэмцээнд 1996-2000 онд төрсөн тамирчид оролцох боломжтой. 2001 онд төрсөн тамирчид эцэг эхийн зөвшөөрөл, эмчийн магадлагаагаар орж болно.