Month: February 2019

Сар шинийн баяр, амралтын өдрүүдэд буюу хоёрдугаар сарын 04-10-ны өдрүүдэд улсын хэмжээнд Тээврийн цагдаагийн алба нь нийт 1,903 дуудлага, мэдээллийг хүлээн авснаас зам тээврийн ослын шинжтэй 489 дуудлагыг хүлээн авч шалгажээ.

Нийт бүртгэгдсэн ослын улмаас 13 хүний амь нас хохирч, 60 хүн гэмтсэн ба амь нас нь хохирсон хүний 92 хувь буюу 12 нь орон нутгийн замд, гэмтсэн хүний 80 хувь буюу 49 нь нийслэл хотод бүртгэгдсэн байна.

Бүртгэгдсэн осол, хэргийг өнгөрсөн 2018 оны сар шинийн баярын өдрүүдтэй буюу Битүүн, Шинийн 1-3-ны өдрүүдийн нөхцөл байдалтай харьцуулахад дуудлага мэдээлэл 13 хувиар, бүртгэгдсэн осол 3 хувиар, гэмтсэн хүний тоо 23.8 хувиар, хүүхэд өртсөн осол 77 хувиар, согтуугаар тээврийн хэрэгсэл жолоодсон зөрчил 24 хувиар тус тус буурсан боловч олон хүний амь нас орон нутгийн замд хохирчээ.

Зам тээврийн ослын шалтгаан, хэлбэрийг авч үзвэл орон нутгийн замд буруу тээвэрлэлт, гүйцэж түрүүлэх үйлдлийг буруу гүйцэтгэх, хэт ядарсан үедээ тээврийн хэрэгсэл жолоодох зэрэг шалтгаан байгаа боловч 65 орчим хувь нь буюу тэргүүлэх шалтгаан нь хурд хэтрүүлснээс, үүний улмаас онхолдох, мөргөлдөх хэлбэрээр гарсан байх ба хүүхэд амь насаа алдсан хэргийн гол шалтгаан нь буруу тээвэрлэлт эзэлж байна.

Орон нутагт Архангай, Дундговь, Булган, Төв, Орхон аймгуудад ноцтой зам тээврийн осол бүртгэгдсэн бөгөөд тухайлбал Булган аймгийн Хутаг өндөр сумын Уньт багийн нутаг “Уран тогоо” гэх газар асфальтан замд Toyota Harrier маркийн автомашин онхолдож, зорчигч 7 настай.эрэгтэй Б нас барж, зорчигч нарын 3 хүн гэмтсэн, Төв аймгийн Лүн сумын 2 “Цагаан хөтөл” гэх газар асфальтан замд Toyota Prius маркийн автомашин онхолдож, зорчигч нарын 2 хүний амь нас хохирч, 3 хүн гэмтсэн зэрэг ноцтой зам тээврийн ослууд бүртгэгдсэнийг харъяа нутаг дэвсгэрийн цагдаагийн байгууллагад шалгаж байна.

Сүүлийн жилүүдэд баярын өдрүүдэд согтууруулах ундааны зүйл хэрэглэсэн үедээ тээврийн хэрэгсэл жолоодох зөрчил буурч байгаа нь иргэд баяр, ёслолоо согтууруулах ундаагүй сайхан тэмдэглэн өнгөрүүлж байгаа мөн цагдаагийн байгууллагаас хийж буй хяналт шалгалттай шууд холбоотой байгаа юм. Түүнчлэн баярын өдрүүдэд өндөржүүлсэн бэлэн байдалд замын хөдөлгөөний аюулгүй байдлыг тасралтгүй ханган ажилласан алба хаагч, сонсогч нарт иргэд талархалтай хандаж байлаа.

Мөн өнөөдрөөс ерөнхий боловсролын сургуулийн хичээл эхэлж байгаатай холбоотойгоор замын хөдөлгөөний ачаалал нэмэгдэх тул иргэдийг цагаа зөв тохируулж гардаг цагаасаа 5-10 минутын өмнө гарах, бага насны хүүхдийг харгалзах хүнгүйгээр замын хөдөлгөөнд оролцуулахгүй байх, хүүхдийг автомашинд хамгаалах хэрэгсэл хэрэглэн тээвэрлэхийг зөвлөлөө.

Сар шинийн баяртай холбогдуулан 2018 оны жилийн эцсийн санхүүгийн болон татварын тайлан хүлээж авах эцсийн хугацааг ажлын тав хоногоор сунгаж, хоёрдугаар сарын 15-ны өдрийг дуустал хүлээн авахаар шийдвэрлэснийг мэдэгдэж байна. Тиймээс энэ хугацаанд багтаж тайлангаа ирүүлэхийг ТЕГ-аас анхааруулж байгаа бөгээд хэрвээ хоцроовол хуулийн дагуу хариуцлага тооцохыг мэдэгдсэн байна.

Сар шинийн баярын өдрүүдэд ажиллах цагийн хуваарийн дагуу хүнсний дэлгүүрүүд хоёрдугаар сарын 5-6-нд амраад өнөөдрөөс буюу хоёрдугаар сарын 7-ноос ердийн цагаар ажиллаж эхэлж байна.

Худалдаа, үйлчилгээний бусад байгууллагын ажиллах цагийн хуваарийг танилцуулвал, “Номин холдинг”-ийн хүнсний салбар дэлгүүрүүд хоёрдугаар сарын 5-нд амарч, хоёрдугаар сарын 6-нд 11:00-20:00 цаг хүртэл ажиллаж, 7-ны өдрөөс ердийн цагийн хуваарийн дагуу ажиллана. “Алтан жолоо трейд” ХХК-ийн “Сансар” сүлжээний супермаркетуудаас хоёрдугаар сарын 7-ны өдөр “Сансар-39” Баянзүрхийн товчоо 09.00-22.00, “Сансар-40” Улаанбаатар их дэлгүүр 12.00-22.00 цагт ажиллаж,“Сансар-9.10” амарч, бусад салбар 09.00-22.00 хүртэл ажиллана. Хоёрдугаар сарын 8-ны өдрөөс эхлэн бүх салбар ердийн цагийн хуваарийн дагуу ажиллана.

“Оргил” супермаркетууд: Бүх салбар хоёрдугаар сарын 7-ноос энгийн цагийн хуваариар ажиллана.“Боса” сүлжээний дэлгүүрүүдмөн хоёрдугаар 07-ны өдрөөс ердийн цагийн хуваариар ажиллана. “Миний дэлгүүр” ХХХ-ний сүлжээ дэлгүүрүүд хоёрдугаар сарын 8-ны өдрөөс ердийн цагийн хуваарийн дагуу ажиллана.

“И-Март” их дэлгүүр шинийн 6.7-ны өдрүүдэд 12.00-21.00 цагт ажиллаж, хоёрдугаар сарын 08-аас эхлэн ердийн цагийн хуваарийн дагуу ажиллана.

“Нарантуул” худалдааны төв хоёрдугаар сарын 4-ийг дуустал амрахгүй ажиллаж, хоёрдугаар сарын 5–ны өдрөөс 12-ны өдрийг дуустал амраад, хоёрдугаар сарын 13-ны өдрөөс эхлэн ердийн цагийн хуваарийн дагуу ажиллана.

“Хар хорин” худалдааны төв хоёрдугаар сарын 9-ний өдрөөс,“Барс” 1, 2 худалдааны төвүүд мөн шинийн 5-ны өдрөөс эхлэн ердийн цагийн хуваарийн дагуу ажиллана. “Хүчит шонхор” худалдааны төв хоёрдугаар сарын 11-нийг дуустал амарч, 12-ны өдрөөс эхлэн ердийн цагийн хуваарийн дагуу ажиллана. “Да хүрээ” авто худалдааны төв хоёрдугаар сарын 8-ныг дуустал амарч, хоёрдугаар 9-ний өдрөөс ердийн цагийн хуваарийн дагуу ажиллана. Аж үйлдвэрийн барааны дэлгүүрүүд хоёрдугаар сарын 8-ны өдрөөс эхлэн ердийн цагийн хуваарийн дагуу ажиллана.

Хоол үйлдвэрлэл, үйлчилгээний ресторан, баар, кафе, цайны газар, түргэн хоолны газрууд хоёрдугаар сарын 8-ны өдрөөс эхлэн ердийн цагийн хуваарийн дагуу ажиллана. Үйлдвэр, албан байгууллагын дэргэдэх хоолны газрууд тухайн байгууллагынхаа ажиллах цагийн хуваарийг дагаж мөрдөн ажиллана.

Сар шинийн баярын өдрүүдэд нийтийн тээврийн үйлчилгээнд үндсэн болон хотын доторх болон хот орчмын 89 чиглэлд их багтаамжийн 700 автобус, туслах 4 чиглэлд бага багтаамжийн 10, шөнийн тээврийн үйлчилгээний нэг чиглэлд, нийт 710 автобус үйлчилгээнд ажиллаж байна. Гэвч хотын гэр хороолол болон нийслэлээс гарах, орох чиглэлд түгжрэл, хөдөлгөөний ачаалал ихтэй байгаатай холбоотойгоор нийтийн тээврийн автобусууд тогтмол цаг, чиглэлийн хуваариар явахгүй байна гэсэн гомдол их ирэх болжээ.

Нийтийн тээврийн үйлчилгээтэй холбоотой санал хүсэлтээ 70044040 утсанд 24 цагийн турш өгөх боломжтой аж.

Хөвсгөл нууран дээр жил бүр болдог уламжлалт “Хөх сувд” мөсний баярыг энэ жил ирэх сарын 2-ноос 4-ний өдрүүдэд зохион байгуулахаар болжээ. Хөвсгөл аймгийн Засаг даргын тамгын газрын албан ёсны цахим хуудсанд энэ талаар мэдээлсэн байна. Өвлийн аялал жуулчлалыг хөгжүүлэх, гадаадын жуулчдын тоог нэмэгдүүлэх зорилгоор зохион байгуулдаг “Хөх сувд” мөсний баярын энэ жилийн хөтөлбөрт ардын урлагийн тоглолт, бөө мөргөлийн үзүүлбэр, мөсний шагайн тэмцээн, нохой болон морин чарганы уралдаан, тэшүүрийн уралдаан зэрэг үзүүлбэрүүд багтсан байна. Монгол улс энэ жил аялал жуулчлалын салбараас тэрбум ам.доллар олох зорилт тавьсан бөгөөд мөсний баяр энэхүү зорилтыг хэрэгжүүлэхэд чухал ач холбогдолтой юм.

Баярын өдрүүдээр буюу хоёрдугаар сарын 04-ний өдрөөс 08-ны өдрүүдэд орон нутгийн замд нийт 9 ноцтой зам тээврийн гэмт хэрэг үйлдэгдэж 10 хүн амь насаа алдаж 11 хүн гэмтсэний тав нь бага насны хүүхэд байна. Тухайлбал хоёрдугаар сарын 05-ны өдөр Архангай, Дундговь аймгуудад, хоёрдугаар сарын 06-ны өдөр Төв, Орхон аймгуудад, хоёрдугаар сарын 07-ны өдөр Төв, Сүхбаатар, Булган аймгуудад, хоёрдугаар сарын 08-ны өдөр Сэлэнгэ аймгуудад зам тээврийн гэмт хэрэг бүртгэгджээ. Бүртгэгдсэн зам тээврийн ослын тэргүүлэх шалтгаанд тээврийн хэрэгслийн хурдыг хэтрүүлэх, гүйцэж түрүүлэх үйлдлийг хориглосон тохиолдлуудад хийж гүйцэтгэсэн мөн хэт ядарсан үедээ тээврийн хэрэгсэл жолоодсон шалтгаанууд эзэлж байна.

“БОЛД САН”-ийн нэрэмжит шайбтай хоккейн аварга шалгаруулах тэмцээн энэ сарын 8, 9, 10-ны өдрүүдэд Дархан хотноо 4 дэх жилдээ амжилттай зохион байгуулагдлаа. Энэ жилийн тэмцээнд Дархан, Шарын гол, Улаанбаатар хотын нийт найман багийн 100 гаруй тамирчид авхаалж самбаа, хурд хүчээ сорин өрсөлдсөнбайна.

Цомын эзнээр Улаанбаатар хотын С.Өлзийбаяр ахлагчтай Жалам хар баг шалгарсан бол Хоёрдугаар байрыг Шарын гол сумын Г.Мөнхтулга ахлагчтай Золбоот тамирчид баг, Гуравдугаар байрыг Сэлэнгэ аймгийн Б.Алдармөнх ахлагчтай Бугант багийн тамирчид тус тус эзэлжээ.

Мөн шилдэг хаалгачаар Б.Дашням, Шилдэг довтлогчоор Ц.Шинэбаяр, Шилдэг хамгаалагчаар Б.Батбаясгалан нар шалгарсан юм.

Шагнал гардуулах үеэр “Болд Сан”-гаас Баг тамирчдад Хоккейн хувцас, хэрэглэлийг гардууллаа. Монгол Улсын Их Хурлын гишүүн Болдын Жавхлан 2016 оноос эхлэн аавынхаа нэрэмжит шайбтай хоккейн нээлттэй тэмцээнийг Дархан-Уул аймагт явуулж эхэлжээ. Дархан хотын хүүхэд залуусын урлаг, спортын мэдлэг боловсролыг дээшлүүлэхэд үнэтэй хувь нэмэр оруулсан Лувсангийн Болд нь спортод элэгтэй нэгэн байсан гэдгийг Дарханы иргэд хэлжбайсан юм.

Энэ удаагийн тэмцээнд Олон улсын хэмжээний мастер тав, Монгол Улсын Спортын мастер цолтой 40, спортын 1 дүгээр зэрэгцээ 60 гаруй тамирчид оролцсон нь тус тэмцээн жил ирэх тусам улам өргөжиж буйг илтгэж байна гэж аймгийн Хоккейн холбооны тэргүүн М.Жаргалсайхан онцолж байлаа.

Сар шинийн өмнөхөн гүйлгээд гараад байгаа шинэчлэгдсэн 5000-ын дэвсгэртийг одоогоор орлогын АТМ-д хүлээж авахгүй байна. Тиймээс ХААН банкны бэлэн мөнгөний машинуудад шинэ дэвсгэртийг хүлээн авах хөгжүүлэлтийн ажил хийж байгаа гэв. Хуурамч мөнгөн дэвсгэртээс сэргийлэх үүднээс Монголбанкнаас 5000-ын дэвсгэртийг шинэчлэн гүйлгээд гаргаад байгаа юм. Шинэ таних тэмдэгтэй болсон 5000 төгрөгийн дэвсгэртийн хувьд нүүрэн талд байрлах Соёмбонд сүүлийн үеийн дэвшилтэт технологиор хийсэн гурван хэмжээст(3D) хөдөлгөөнтэй, дээш, доош налуу хөдөлгөхөд өнгө нь солонгорч харагдах Спарк бэхэн элемент оруулж өгснөөр иргэд энгийн нүдээр хараад жинхэнэ тэмдэгтийг хуурамчаас ялгаж танихад хялбар болжээ.