Month: February 2019

Засгийн газрын хэрэгжүүлэгч агентлаг, Газар зохион байгуулалт, геодези, зураг зүйн газар, аймгуудын Газрын харилцаа, барилга, хот байгуулалтын газар, Нийслэл, дүүргийн газрын албаны дарга нарын ээлжит зөвлөгөөн энэ өдрүүдэд болж байна.

Зөвлөгөөнд газар зохион байгуулалт, геодези, зураг зүйн салбарын хэмжээнд 2018 онд хэрэгжсэн төсөл, хөтөлбөр, арга хэмжээний тайлан, 2019 онд хэрэгжүүлэх гол үйл ажиллагааны талаар хэлэлцэж байна.

Зөвлөгөөний үеэр идэвхи санаачлага, үр бүтээлтэй ажиллан 2018 оны ажлын үр дүнгээр тэргүүлсэн аймгуудын Газрын харилцаа, барилга, хот байгуулалтын газрууд, шилдэг менежер, шилдэг мэргэжилтэн, шилдэг даамлуудыг шалгарууллаа.

Шилдэг байгууллагаар Дундговь, Архангай, Хэнтий аймгуудийн газрын харилцаа, барилга, хот байгуулалтын газрууд шалгарсан бол “Шилдэг ажил”-аар нийслэлийн Газрын албаны хийж хэрэгжүүлсэн “Иргэдийн оролцоотой амьдрах орчныг сайжруулах жил”-ийн хүрээнд иргэдийн эрүүл, тав тухтай, аюулгүй амьдрах нөхцөлийг бүрдүүлэх зорилгоор хэрэгжүүлсэн “Газар чөлөөлөлтийн ажил” болон Сэлэнгэ аймгийн Газрын харилцаа, барилга, хот байгуулалтын газрын Монгол Улсын Засгийн Газрын 2016-2020 оны үйл ажиллагааны хөтөлбөрийн хүрээнд төрийн үйлчилгээг хөнгөн шуурхай, чирэгдэлгүй бөгөөд ил тод, нээлттэй үзүүлэх зорилтын дагуу хэрэгжүүлсэн “Иргэдэд зориулсан ухаалаг Цахим бүтээгдэхүүн апликейшн” тус тус шалгарлаа.

Мөн “Шилдэг менежер”-ээр нийслэлийн Газрын албаны дарга Э.Болорчулуун, Дундговь аймгийн ГХБХБГ-ын дарга Э.Чагнаадорж, “Шилдэг мэргэжилтэн”-гээр Сүхбаатар дүүргийн газрын албаны ахлах мэргэжилтэн Э.Түвшинбаяр, Сэлэнгэ аймгийн ГХБХБГ-ын ГЗБТөлөвлөлт, газар өмчлөлийн асуудал хариуцсан мэргэжилтэн А.Алтанцэцэг, “Шилдэг газрын даамал”-аар Өмнөговь аймгийн Даланзадгад сумын Газрын даамал Мөнхжаргал, Хэнтий аймгийн Дадал сумын Газрын даамал Х.Саранчимэг болон Увс аймгийн Өмнөговь сумын Газрын даамал Ц.Пүрэвсүрэн нар тус тус шалгарлаа.

Баянзүрх дүүргийн 21 дүгээр хороонд байрлах “Очир” төвийн зочид буудлын өрөөнд өнгөрөгч 2017 оны наймдугаар сарын 22- 23-нд шилжих шөнө 13 настай охин амиа алдсан. Уг хэрэгт Д.Жавхлан, М.Амарболд нарыг сэжиглэн шалгасан.

Улмаар Баянзүрх дүүргийн Эрүүгийн хэргийн анхан шатны шүүх 2018 оны 11 дүгээр сарын 23-ны өдөр М.Амарболд, Д.Жавхлан нарт холбогдох эрүүгийн хэргийг хянан шийдвэрлэж, бүх насаар нь хорих ял шийтгэсэн билээ.

Уг шийтгэх тогтоолыг эс зөвшөөрч шүүгдэгч М.Амарболд, түүний өмгөөлөгч С.Оюунцэцэг, шүүгдэгч Д.Жавхлан, түүний өмгөөлөгч О.Цэрэнпунцаг, нар тус тус давж заалдах гомдол гаргасан бөгөөд Давж заалдах шатны шүүх хурал өнөөдөр Нийслэлийн шүүхэд боллоо. Хохирогчийн өмгөөлөгч эрүүл мэндийн шалтгаанаар шүүх хуралд ирээгүй шалтгаанаар шүүх хурлыг хойшлуулжээ.

Талийгаач охины аав Т.Лхагвасүрэн “Юу хийсэн гэж давж заалдаад ажил, амьдралд минь гай болоод байгаа хүмүүс вэ. Хүний сэтгэлийн шархыг хөндөөд хэцүү хорвоо вэ” хэмээн цахим хуудсандаа нийтэлсэн байна.

2019 оны Улсын аварга шалгаруулах Самбо бөхийн гранд мастер тэмцээнээс Өмнөговь аймгийн тамирчид 1 алт, 5 мөнгө, 3 хүрэл нийт 9 медаль хүртэж багийн амжилтаар дөрөвдүгээр байрт орсон байна.

“Хөдөө аж ахуй, үйлдвэржилтийн жил”-ийн нээлтийн арга хэмжээг нэгдүгээр сарын 24-26-ны өдрүүдэд зохион байгуулахаар төлөвлөсөн боловч орон нутагт гарсан H1N1 вирусын гаралттай холбоотойгоор хойшлуулсан билээ.

”Номоо солилцъё” бичил номын сангийн үйл ажиллагааг 2019 оны нэгдүгээр сараас НИТХ, НЗДТГ, нийслэлийн Соёл, урлагийн газар, нийслэлийн Боловсролын газар, Д.Нацагдоржийн нэрэмжит хотын төв номын сан, “JCI Grand” зэрэг байгууллагуудтай хамтран НИТХ-ын Нийгмийн хөгжлийн хорооноос санаачилсан “Уншлагыг дэмжих 2021” хөтөлбөр болон Нэгдсэн Үндэстний Байгууллагын Тогтвортой хөгжлийн #4 Чанартай боловсролыг дэмжих зорилгын хүрээнд хэрэгжүүлэн ажиллаж байна.

Төслийн дараагийн номын тавиурыг 2019 оны хоёрдугаар сарын 13-ны өдөр “Багшийн мэргэжил дээшлүүлэх институт”-ийн байранд байрлуулж, хүлээлгэн өглөө.

Энэхүү ажиллагаанд Нийслэлийн Соёл, урлагийн газрын дарга, JCI Grand салбар байгууллагын 2019 оны Eрөнхийлөгч Ж.Дамдинцэрэн, “Багшийн мэргэжил дээшлүүлэх институт”-ийн захирал Д.Сүрэнчимэг болон институтийн ажилчид, Нийслэлийн Боловсролын газрын хамт олон оролцлоо.

Бичил номын санг EБС, Их дээд сургуулиуд, Төрийн байгууллага, хувийн хэвшил, эмнэлэг, цэцэрлэгүүдэд байрлуулах бөгөөд зөвхөн төрийн оролцоотой бус төр, хувийн хэвшлийн хамтын ажиллагааны хүрээнд энэхүү төсөл цаашид үргэлжлэх юм.

Өөрөө өөртөө үйлчлэх бичил номын санг тодорхой цэгүүдэд байршуулснаар хувь хүн, гэр бүл, байгууллага, хамт олны ном унших дадал зуршлыг нэмэгдүүлэх, өөрийнхөө уншсан номыг бусдад уншуулах, нийтээрээ номонд хайртай байх, эерэг хандлагыг бий болгох зорилготой юм.

“Номоо солилцъё” төслийн дүрэм энгийн бөгөөд нэг ном өгөөд нэг ном авах юм. Та бүхэн бичил номын сангаар үйлчлүүлэхийг уриалж байна.

Баян-Өлгий аймгийн Засаг дарга, Мэргэжлийн хяналтын газар, Автотээврийн төв, Замын цагдаагийн тасгийн удирдлагууд болон нийтийн тээврийн үйлчилгээ эрхэлдэг “Газрын Од”, “Цэнгэл-Транс” компаниудын төлөөлөл, жолооч нар хамтран уулзалт зохион байгуулав.

Уулзалтаар “Газрын Од”, “Цэнгэл-Транс” компанийн зорчигч тээврийн автобусны жолооч нар автобусандаа илүү ачаа ачиж тээвэрлэдэг зөрчлийг арилгуулах, хууль бусаар ачаа тээвэрлэсэн тохиолдолд эрхийг нь түдгэлзүүлэх талаар шийдвэр гаргажээ. Мөн автобусаар зорчигчдод ачааны зөвшөөрөгдөх хэмжээг хэтрүүлэхгүй байхыг сануулж байхаар болсон байна.

Тусгай сонирхлын аялал жуулчлалыг хөгжүүлэх, өвлийн улиралд Улаанбаатар хотод ирэх жуулчдын тоог нэмэгдүүлэх зорилгоор “Улаанбаатарын өвлийн наадам” арга хэмжээг хоёрдугаар сарын 16-17-ны амралтын өдрүүдэд Богд Хан уулын үзэсгэлэнт Хүрхрээгийн аманд зохион байгуулна.

Улаанбаатарын өвлийн наадам нь гадаад дотоодын жуулчдад Монголынхоо ёс заншил, өв уламжлал, үндэсний тоглоом наадгай, соёлыг сурталчлан таниулах, шинэ тутам хөгжиж буй нийтийн биеийн тамир, спорт, аяллын төрлүүдийг ард иргэдэд сурталчлах, жилийн дөрвөн улиралтай Улаанбаатар хотдоо өвлийн аялал жуулчлалыг хөгжүүлэх ач холбогдолтой юм.

Тус наадмын үеэр

Орчин үеийн спортууд болох

Тэмцээнүүдэд дотоодын 800, гадаадын 40 тамирчид оролцож хурд хүч, авхаалж самбаагаа сорино. Үүнээс ОХУ-ын Буриад Улсаас 10, Тува Улсаас 10, БНХАУ-ын ӨМӨЗО-оос 20 сур харваачид хүрэлцэн ирнэ.

Арга хэмжээний үеэр ОХУ-ын АИСТ ТВ, БНХАУ-ын ӨМӨЗО-ны Монгол Одон телевизийн сурвалжлах баг хүрэлцэн ирж Монголын үндэстний ёс заншил, өв уламжлал, үндэсний тоглоом наадгай, соёлыг хөрш хоёр оронд сурталчилна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

KFC сүлжээний хоолонд хордсон иргэд Халдварт өвчин судлалын үндэсний төвд эмчлүүлж байгаа гэх мэдээлэл гарчээ. Тодруулбал, KFC сүлжээний Зайсан дахь салбараар энэ сарын 9, 10, 11-нд үйлчлүүлж “Найзууд” багцыг идсэн болон захиалж авсан хүмүүс хордсон талаар эх сурвалж мэдээлэв. Энэ талаар Халдварт өвчин судлалын үндэсний төвөөс тодруулахад “Дэлгэрэнгүй мэдээлэл өгөх боломжгүй. Ажлын хэсэг гараад тандалт, судалгаа хийж байна. Асуудал тодорхой болохоор мэдээлнэ” гэсэн юм.

Бид энэ талаар KFC рестораны Зайсан дахь салбарт хандсан боловч “Дотоод ажилтай учраас ажиллахгүй байгаа” гэсэн хариу өглөө.

KFC сүлжээ ресторан нь дэлхийн 120 гаруй улс оронд үйл ажиллагаа явуулдаг. Монгол дахь KFC сүлжээ ресторан нь 2013 оны тавдугаар сард нээгдэж, одоо нийт 11 салбар үйлчилж байгаа аж.

Б.УРАН