Month: February 2019

Улсын Их Хурлын Аюулгүй байдал, гадаад бодлогын байнгын хорооноос 2018 оны намрын ээлжит чуулганы хугацаанд Мянганы сорилтын компакт гэрээ, Санхүүгийн хамтын ажиллагааны тухай, Иргэний агаарын хөлөг, хөдөлгүүрийн холбогдох тоног төхөөрөмж, эд ангийг гаалийн татвараас чөлөөлөх тухай, нийгмийн хамгааллын тухай, иргэний болон аж ахуйн хэрэг, эрүүгийн хэргийн талаар эрх зүйн туслалцаа харилцан үзүүлэх болон гэмт этгээд шилжүүлэх тухай, ялтан шилжүүлэх тухай зэрэг хоёр талт олон улсын 13 төрлийн гэрээ, хэлэлцээрийг хэлэлцүүлж, соёрхон батлуулсан байна.

Улсын Их Хурлаар соёрхон баталсан гэрээ, хэлэлцээрийг тоймловол:

1.Монгол Улсын Засгийн газар, Америкийн Нэгдсэн Улсын Мянганы сорилтын корпорац хооронд байгуулсан хоёр дахь Компакт гэрээний дагуу Улаанбаатар хотын ус хангамжийг нэмэгдүүлэхэд 350 сая ам.долларын буцалтгүй тусламжийг Мянганы сорилтын корпорацаас олгохоор болсон. Уг санхүүжилтийг Улаанбаатар хотын усны хангамжийг нэмэгдүүлэх дэд бүтцийг байгуулах, ус цэвэршүүлэх, дахин боловсруулах байгууламж барих, тус салбарын тогтвортой байдлыг хангах цогц арга хэмжээнүүдийг хэрэгжүүлэхэд зарцуулна.

2.Монгол Улс нь дэлхийн худалдааны байгууллагын гишүүн орны хувьд дотоодын иргэний нисэхийн салбарын үйл ажиллагааг бодлогоор дэмжих үүднээс тус байгууллагын Иргэний агаарын хөлгийн худалдааны хэлэлцээрт нэгдэн орсон. Хэлэлцээрт нэгдэн орсноор МИАТ компани гадны томоохон нислэгийн компаниудын агаарын хөлөгт засвар хийх хүчин чадалтай болсон тул засварт ашиглах тоног төхөөрөмж, эд ангийг хямд үнээр худалдан авахад томоохон түлхэц үзүүлэх ажээ.

3.Олон улсын маргааныг энхийн замаар шийдвэрлэх тухай 1907 оны конвенцыг Улсын Их Хурлаар соёрхон баталснаар Монгол Улсаас бусад гишүүн улсууд, Засгийн газар болон олон улсын байгууллага, аж ахуйн нэгжийн хооронд үүссэн олон улсын маргааныг хянан шийдвэрлэх үйл ажиллагаанд оролцох эрх үүснэ. Түүнчлэн Монгол Улсаас Арбитрын байнгын Шүүхэд олон улсын эрх зүйн мэдлэгтэй, арбитрын үүргийг гүйцэтгэх чадвартай, ёс зүйн өндөр нэр хүндтэй хүнийг гишүүнээр сонгох боломж нөхцөл бүрдэнэ.

Түүнчлэн Бүгд Найрамдах Хятад Ард Улсын худалдаа, эдийн засаг, банк санхүү, хөрөнгийн зах зээл, аялал жуулчлалын төв болсон Шанхай хотод Монгол Улсын Ерөнхий консулын газар нээн ажиллуулах тухай тогтоолыг Улсын Их Хурлаар хэлэлцэн баталлаа. Ингэснээр Шанхай хотноо суралцаж буй манай улсын 700 орчим оюутнууд, тус хот болон хөрш зэргэлдээ Гуандун, Фужян, Жөжян, Анхуй, Жянсу мужуудад ажиллаж, амьдарч, суралцаж буй олон тооны монгол иргэд, оюутнуудын хууль ёсны эрх ашгийг хамгаалах, консулын үйлчилгээг түргэн шуурхай хүргэхээс гадна манай улсад жуулчлах, хөрөнгө оруулах зорилгоор зорчих БНХАУ-ын болон бусад орны иргэдэд визийн үйлчилгээг ойртуулах боломж нээгдэж байна.

Цахим бодлогын түр хорооны хуралдаанаар ажлын ерөнхий төлөвлөгөөг хэлэлцэн баталж, төрийн байгууллагуудын мэдээллийн систем, сүлжээний нууцлал, аюулгүй байдал, хамгаалалтын өнөөгийн түвшинтэй танилцах, төрийн үйлчилгээг цахимжуулах, иргэнд хүнд сурталгүй, чирэгдэлгүй хүргэх, түүний хүртээмжийг нэмэгдүүлэх талаар хэрэгжүүлсэн арга хэмжээ, хөтөлбөр, төсөлтэй танилцах, үр дүнг үнэлэх, цаашид хэрэгжүүлэх арга хэмжээний талаар санал, дүгнэлтийн төсөл боловсруулах үүрэг бүхий чиглэлээр дөрвөн ажлын хэсгийг байгуулан ажиллаж байна.

Мөн Байнгын хорооны хуралдаанаар “Ялтан шилжүүлэх тухай Монгол Улс, Бүгд Найрамдах Социалист Вьетнам Улс хоорондын хэлэлцээр”, Арабын Нэгдсэн Эмират Улсын нийслэл Абу Даби хотод Монгол Улсын Элчин сайдын яам нээн ажиллуулах тухай, Бүгд Найрамдах Беларусь Улсын нийслэл Минск хотод Монгол Улсын Элчин сайдын яам нээн ажиллуулах тухай, Монгол Улсын Засгийн газар, Бүгд Найрамдах Беларусь Улсын Засгийн газар хооронд байгуулах ‘‘Экспортын зээлийн ерөнхий хэлэлцээр’’ зэрэг олон улсын гэрээ, хэлэлцээрийг зөвшилцөх дөрвөн асуудлыг хэлэлцэж, санал, дүгнэлт, хуралдааны тэмдэглэлээ Засгийн газарт хүргүүлсэн.

Хяналт, шалгалтын ажлын хүрээнд Гадаад харилцааны яам, Батлан хамгаалах яамны 2018 оны үйл ажиллагааны тайлан, холбогдох мэдээллийг авч Байнгын хорооны гишүүдэд хүргүүлж хуулийн хэрэгжилтэд хяналт тавьж ажилласан. Түүнчлэн Дархан-Уул, Орхон аймгуудад байрлах Зэвсэгт хүчний анги байгууллагын үйл ажиллагаатай Байнгын хорооны ажлын хэсгийн гишүүд танилцсан.

АЮУЛГҮЙ БАЙДАЛ, ГАДААД БОДЛОГЫН БАЙНГЫН ХОРООНЫ АЖЛЫН АЛБА

Улсын Их Хурлын 2018 оны намрын ээлжит чуулганы хугацаанд Байгаль орчин, хүнс, хөдөө аж ахуйн байнгын хороо есөн удаа хуралдаж, давхардсан тоогоор 18 хуулийн төсөл, Улсын Их Хурлын тогтоолын төсөл нэгийг хэлэлцэж, яам, агентлаг, байгууллагын тайлан, илтгэл, мэдээлэл гурван удаа сонсож, албан тушаалтныг томилох, чөлөөлөххоёр асуудалд хэлэлцэж, таван хууль, Улсын Их Хурлын тогтоол хоёрыг тус тус батлуулсан байна.

Тус байнгын хорооны 2019 оны 01 дүгээр тогтоолоор байгуулагдсан Ерөнхий хяналтын сонсголыг зохион байгуулах үүрэг бүхий ажлын хэсэг 2019 оны 01 дүгээр сарын 18-ны өдөр хуралджээ.

Хууль, тогтоолын хэлэлцүүлгийн талаар:

Улсын Их Хурлын 2018 оны намрын ээлжит чуулганы хугацаанд хууль, Улсын Их Хурлын тогтоолын төслийг хэлэлцүүлэгт бэлтгэжээ. Тухайлбал, Монгол Улсын Засгийн газраас 2018 оны 06 дугаар сарын 21-ний өдөр Улсын Их Хуралд өргөн мэдүүлсэн Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай, Хөдөө аж ахуйн гаралтай бараа, түүхий эдийн биржийн тухай хуульд нэмэлт, өөрчлөлт оруулах тухай, Хүнсний бүтээгдэхүүний аюулгүй байдлыг хангах тухай, Эм, эмнэлгийн хэрэгслийн тухай, Эрүүл ахуйн тухай хуульд өөрчлөлт оруулах тухай хуулийн төслийг УИХ-ынчуулганы нэгдсэн хуралдаанаар хэлэлцүүлж, батлуулсан байна.

Түүнчлэн Монгол Улсын 2019 оны төсвийн тухай, Нийгмийн даатгалын сангийн 2019 оны төсвийн тухай, Эрүүл мэндийн даатгалын сангийн 2019 оны төсвийн тухай хуулийн төслийн хоёр дахь хэлэлцүүлгийг хийж санал, дүгнэлтээ зарчмын зөрүүтэй саналын томьёоллын хамт Төсвийн байнгын байнгын хороонд хүргүүлжээ. Мөн Хүнс, хөдөө, аж ахуй, хөнгөн үйлдвэрийн сайд Б.Батзоригийг үүрэгт ажлаас чөлөөлөх тухай, Монгол Улсын Засгийн газрын гишүүн-Хүнс, хөдөө, аж ахуй, хөнгөн үйлдвэрийн сайдыг томилох тухай асуудлыг хэлэлцэн шийдвэрлэж, Улсын Их Хурлын тогтоолын төслүүдийгтус тус батлуулсан байна.

Улсын Их Хурлын гишүүн Х.Болорчулуун нарын 16 гишүүн өргөн мэдүүлсэн Хүнсний тухай хуульд өөрчлөлт оруулах тухай болон хамт өргөн мэдүүлсэн Хүнсний бүтээгдэхүүний аюулгүй байдлыг хангах тухай хуульд нэмэлт, өөрчлөлт оруулах тухай хуулийн төслийг хэлэлцэх эсэх асуудлыг хэлэлцэн шийдвэрлэсэний дагуу Ажлын хэсэг байгуулан ажиллаж байгаа аж. Түүнчлэн Монгол Улсын Засгийн газраас өргөн мэдүүлсэн “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын төслийг хэлэлцэх эсэх асуудлыг Улсын Их Хурлын чуулганы нэгдсэн хуралдаанаар хэлэлцэн шийдвэрлэж, анхны хэлэлцүүлэгт бэлтгүүлэхээр Байнгын хороонд шилжүүлсэн байна.

Бусад ажлын талаар:

Улсын Их Хурлын 2018 оны намрын ээлжит чуулганы хугацаанд “Ургац хураалтын явц, хэрэгжүүлж буй ажил”, “Мал тооллого, хадлан, тэжээл, ургац хураалт, өвөлжилтийн бэлтгэл ажил, хүнсний ногооны хангамж”-ийн талаар Хүнс, хөдөө аж ахуй, хөнгөн үйлдвэрийн сайдын, “Агаарын бохирдлыг бууруулах талаар” Улсын Их Хурлын болон Байнгын хороодын хамтран баталсан тогтоолын биелэлтийн талаарх Байгаль орчин, аялал жуулчлалын сайдын мэдээллийгтус тус сонсжээ.

Өнгөрсөн хугацаанд Байнгын хорооны гишүүд Дархан-Уул, Сэлэнгэ аймгийн газар тариалангийн бүс нутгаар хадлан, тэжээл, ургац хураалт, өвөлжилтийн бэлтгэл ажил, хүнсний ногооны хангамжийн талаар газар дээр нь очиж танилцаад Монгол Улсын Засгийн газарт “Чиглэл өгөх тухай”, “Агаарын бохирдлыг бууруулах чиглэлээр хууль тогтоомжийг хэрэгжүүлэх чиг үүрэг бүхий байгууллага, албан тушаалтны үйл ажиллагаанд хяналт тавих, үнэлэх зорилгоор ерөнхий хяналтын сонсгол зохион байгуулах үүрэг бүхий ажлын хэсгийг байгуулах тухай”, “Ерөнхий хяналтын сонсголын тов тогтоох тухай” Байнгын хорооны гурван тогтоолыг баталсан байна.

Нийтийн сонсголын тухай хууль хүчин төгөлдөр мөрдөгдөж эхэлсэнээс хойш анх удаа тус Байнгын хорооАгаарын бохирдлыг бууруулах чиглэлийн бодлого шийдвэр, хууль тогтоомжийг хэрэгжүүлэх үүрэгтэй байгууллага, албан тушаалтны үйл ажиллагаанд хяналт тавих, авч хэрэгжүүлсэн арга хэмжээ, түүнд төсөвлөгдсөн хөрөнгийн зарцуулалт, үр дүнг тодруулах зорилготой Ерөнхий хяналтын сонсголыг зохион байгуулсан. Ерөнхий хяналтын сонсголд Монгол Улсын Ерөнхийлөгч, Ерөнхийлөгчийн Тамгын газрын дарга, Ерөнхийлөгчийн зөвлөхүүд, Улсын Их Хурлын гишүүн, Байгаль орчин, аялал жуулчлалын сайд, Орчны бохирдлыг бууруулах үндэсний хорооны дарга Н.Цэрэнбат, Нийслэлийн Засаг дарга бөгөөд Улаанбаатар хотын захирагчийн албан үүргийг түр орлон гүйцэтгэгч Ж.Батбаясгалан, Үндэсний аудитын газар, Үндэсний статистикийн хороо, Орчны бохирдлыг бууруулах үндэсний хорооны гишүүд, ажлын албаны албан хаагчид, яам, агентлагийн холбогдох албан тушаалтнууд, Шинжлэх ухааны академи, иргэд, төрийн бус байгууллага, компанийн төлөөлөл зэрэг нийт 100 гаруй хүн оролцжээ.

БАЙГАЛЬ ОРЧИН, ХҮНС, ХӨДӨӨ АЖ АХУЙН БАЙНГЫН ХОРООНЫ АЖЛЫН АЛБА

УИХ-ын гишүүн З.Нарантуяа ОХУ-ын Эрхүү мужийн Засгийн газрын Залуучуудын бодлогын сайд Александр Попов болон “Монгол хурандаа” нийгэмлэгийн төлөөлөгчдийг хүлээн авч уулзлаа.Уулзалтаар хоёр орны найрсаг харилцаа, түүний дотор Монгол, Оросын хүүхэд, залуучуудын хамтын ажиллагааг өргөжүүлэн бэхжүүлэх, гэр бүл, хүүхэд, залуучуудын хөгжил хамгааллын бодлогыг хэрэгжүүлэхэд харилцан туршлага судлах талаар санал солилцов.

Уулзалтын эхэнд сайд Александр Попов ОХУ-ын Эрхүү хотноо 1981 онд болсон хоёр орны хамтарсан “Найрамдал” наадмынбэлтгэл ажлын багт оролцож байсан талаараа дурсаад, энэ оны зургадугаар сарын 25-наас долоодугаар сарын 1-ний өдрүүдэд Байгал нуурын эрэгт “Залуучуудын чуулга уулзалт”-ыг зохион байгуулах болсон талаар хэллээ. Тэрбээр, уг арга хэмжээнд Монголын залуучуудын төлөөллийг урин оролцуулж, цаашдаа ч хоёр орны залуучуудын дунд ийм төрлийн арга хэмжээг тогтмол зохион байгуулах хүсэлтэй байгаагаа илэрхийлэв.

Мөн сайд Александр Попов энэ онд тохиож буй Халхын голын байлдааны ялалтын 80 жилийн ойн арга хэмжээг зохион байгуулахаар Эрхүү мужийн Амбан захирагчаар ахлуулсан ажлын хэсэг ажиллаж байна гээд “Бид Халхын голын байлдаанд оролцож байсан хүмүүсийн төрөл, төрөгсдийг хайж байгаа. Та бүхний дэмжлэгтэйгээр уг түүхэн ойн арга хэмжээг амжилттай зохион байгуулна гэж итгэж байна” хэмээсэн юм.

УИХ-ын гишүүн З.Нарантуяа хоёр орны залуусын харилцааг хөгжүүлэн, бэхжүүлэх хамтарсан арга хэмжээ зохион байгуулж, энэ хүрээнд багш, сурагчдын солилцооны хөтөлбөрийг идэвхжүүлэх боломжтойг онцлов.

Засгийн газрын ээлжит хуралдаан Төрийн ордонд 08.00 цагт эхэлж, 21 асуудал хэлэлцэж байна.

Хуралдаанаар “Эрдэнэс Тавантолгой” компанийн IPO буюу гадны зах зээлээс хөрөнгө босгох бэлтгэл ажлын явц, энэ оны тавдугаар сарын 15-наас Улаанбаатар хот руу ахуйн зориулалтаар түүхий нүүрс оруулахыг хориглосон шийдвэрийг хэрэгжүүлэх хяналт, шалгалтын талаар, Боловсруулсан түлшний үйлдвэрийн хүчин чадлыг нэмэгдүүлэх, нөөц бүрдүүлэх, хэрэглээнд нэвтрүүлэх талаар УУХҮ-ийн сайд, БОАЖ-ын сайд, Эрчим хүчний сайдын мэдээллийг сонсох юм. Мөн хуралдаанд Тавантолгойн төмөр зам, авто замын бүтээн байгуулалт, Төв цэвэрлэх байгууламжийг шинэчлэх бэлтгэл ажлын талаар ЗТХ-ийн сайд болон БХБ-ын сайд мэдээлэл хийх аж.