Month: February 2019

Засгийн газрын хуралдааны шийдвэрийн талаар мэдээлэл хийж байна. Сангийн сайд Ч.Хүрэлбаатар: Өнөөдөр ЗГ-ын хуралдаанаар Сангийн яам хоёр асуудал орууллаа. 2018 оны гуравдугаар сард Монгол Улсын эдийн засгийн форумыг хийж байхад блокчейн технологи дээр үндэслэгдсэн флатфорумыг ашиглаж ЗГ үнэт цаас гаргах асуудлыг анх судалж ярьсан. Өнөөдрийн хуралдаанаар үүнийг гаргах журмыг баталлаа. Урд нь ЗГ үнэт цаасыг арилжааны банкуудад голдуу санал болгодог. Арилжааны банкууд хүү тогтоож авсны дараа хоёр дахь зах зээл дээр гаргадаг байсан. Мөн хөрөнгийн бирж дээр ашиглаж, ЗГ-ын үнэт цаасыг зардаг. Хэрвээ ЗГ үнэт цаас гаргахаар бол блокчейн технологи дээр үндэслэсэн флатфорумыг ашиглаж бүх хүн, ААН-үүдэд ЗГ-ын үнэт цаасыг санал болгох боломжийг бүрдүүлж өгч байна.

ЗГ-ын зарим тусгай сангуудад хийгдсэн шалгалтын дүнг ЗГ-ын гишүүдэд танилцууллаа. Авах арга хэмжээний төслийг танилцуулсан. Үүнийг ЗГ-ын тогтоол болгож дараа долоо хоногт гаргахаар болсон. Тариалан эрхлэлтийн санг үүссэн цагаас нь эхлэн шалгалаа. Олон тооны зөрчил гарсан байна лээ. үүнийг засаж залруулах, ямар зөрчил гарсныг олон нийтэд ил болгох талаар ярьсан. Шалгалтын дүнтэй ЗГ-ын гишүүд танилцаад гаргасан шийдвэрийг ирэх долоо хоногт хэрэгжүүлнэ.

УИХ-ын гишүүн, Барилга, хот байгуулалтын сайд Х.Баделхан Засгийн газрын шийдвэрийн талаар мэдээлэл хийлээ.

Тэрээр “2000 оноос эхлэн цэвэрлэх байгууламжийг шинээр байгуулах ажил яригдаж эхлэсэн. 2014 онд Францын Артелло компаниар ТЭЗҮ хийлгэсэн байна. Үүний үндсэн дээр хөрөнгийн эх үүсвэрийг олж, барих ажил эхэлсэн. Өнгөрсөн оны Засгийн газрын хуралдаанаар Хятадын хөнгөлөлттэй зээлийн хүрээнд барих үүрэг надад оногдсон. Үүний дагуу хятадын талаас цэвэрлэх байгууламжийг барих гурван компанийг шалгаруулж ирүүлсэн. Эдгээрээс “Бээжин констракшн инженеринг” гэсэн компанитай гэрээ байгуулсан. Гэрээгээр хоногт 2500 м³ бохир ус цээвэрлэх хүчин чадалтай цэвэрлэх байгууламж баригдана. Цэвэрлэхдээ гаргасан лагийг шатааж эрчим хүч гаргана. Үүнээс өөрийн үйлдвэрийн эрчим хүчний хэрэгцээний 50 хувийг хангах нөхцөлтэйгээр гэрээ байгуулсан.

Гэрээний давуу талд: Нийт ажлын 50 хувийг хятадын тал хийнэ.Мөн монголд үйлвэрлэх боломжтой тоног төхөөрөмжүүдийг 35 хувийг манай талаас нийлүүлэх боломжтой болсон.Энэ байгууламжийг гурван жилийн хугацаанд барьж дуусгах төлөвлөгөөтэй байна.

Ашиглалтад орсны дараа эхний жилд зүгшрүүлнэ, дараагийн зургаан сард манай талын мэргэжилтнүүдийг мэргэшүүлэн хүлээлгэж өгнө.

Шинэ цэвэрлэх байгууламж ашиглалтад ортол үнэр дарах ажлыг хийнэ. Картан дахь шинэ лагийн үнэрийг дарахын тулд лаг өтгөрүүлэх, үнэргүйжүүлэх төхөөрөмжийг суурилуулж байна. Энэ төхөөрөмж наадмын өмнө ашиглалтад орно.

Мөн олон жил хуримтлагдсан хуучин лагаас үнэр гарч байгаа. Хуучин лагийн үнэрийг саармагжуулахаар сонгон шалгаруулалт зарлаж Монгол, Япон хоёр компани шалгарсан. Одоогоор тэр хоёр компани лагийг боловсруулж, хар шороо болон бордоо хийж байна. 2019 ондоо багтаад лагийн өмхий үнэрийг бүрэн дарах болно” гэв.

Улсын Их Хурлын 2018 оны намрын ээлжит чуулганы хугацаанд Төсвийн байнгын хороо 10, Төсвийн зарлагын хяналтын дэд хороо хоёр удаа хуралдаж, мөн хууль, тогтоолын төслүүдийг хэлэлцүүлэгт бэлтгэх үүрэг бүхий ажлын хэсэг болон дэд ажлын хэсгийн долоон удаагийн хуралдааныг зохион байгуулжээ.

Ээлжит чуулганы хугацаанд тус Байнгын хороо Монгол Улсын нэгдсэн төсвийн 2019 оны төсвийн хүрээний мэдэгдэл, 2020-2021 оны төсвийн төсөөллийн тухай хууль, Монгол Улсын 2019 оны төсвийн тухай, Нийгмийн даатгалын сангийн 2019 оны төсвийн тухай, Эрүүл мэндийн даатгалын сангийн 2019 оны төсвийн тухай хуулиуд болон хамт өргөн мэдүүлсэн хууль, Улсын Их Хурлын бусад шийдвэрүүд, Монгол Улсын нэгдсэн төсвийн 2019 оны төсвийн хүрээний мэдэгдэл, 2020-2021 оны төсвийн төсөөллийн тухай хуульд өөрчлөлт оруулах тухай хууль, тогтоолыг хэлэлцэн батлах, Жижиг, дунд үйлдвэрийг хөгжүүлэх сангийн зарцуулалтыг шалгаж судлах “Түр хороо байгуулах тухай”, “Төрийн аудитын талаар төрөөс баримтлах бодлого батлах тухай” Улсын Их Хурлын тогтоолын төслүүийг хэлэлцэн шийдвэрлэх, гадаад улс, олон улсын санхүүгийн байгууллагатай байгуулсан зээлийн гэрээ, хэлэлцээрийг зөвшилцөх талаар санал, дүгнэлт гаргах чиглэлээр ажилласан байна.

Мөн Төсвийн зарлагын хяналтын дэд хороо Монгол Улсын 2017 оны төсвийн гүйцэтгэл батлах тухай Улсын Их Хурлын тогтоолын төсөл болон Монгол Улсын 2019 оны төсвийн тухай хуулийн төслийн талаар хэлэлцэж, Төсвийн байнгын хороонд санал, дүгнэлтээ хүргүүлжээ.

Улсын Их Хурлын 2018 оны намрын чуулганы хугацаанд Төсвийн байнгын хороо бие даасан хууль гурав, нэмэлт, өөрчлөлт оруулах тухай хууль найм, Улсын Их Хурлын тогтоол зургааг батлуулж, Олон Улсын зээлийн хэлэлцээрийн хоёр төсөлзөвшилцсөн. Түүнчлэн тус Байнгын хороо Улсын Их Хурлын Тамгын газрын 2019 оны төсвийн төсөл, Монгол Улсын Ерөнхий аудиторын 2019 оны төсвийн төслийг хэлэлцэн баталлаа. Түүнчлэн Төсвийн тогтвортой байдлын зөвлөлийн гишүүд болон зөвлөлийн даргыг томилох асуудлыг байнгын хорооны хуралдаанаар хэлэлцэн баталсан байна.

УИХ-д өргөн мэдүүлсэн болон хэлэлцүүлгийн шатанд 10 гаруй хууль, УИХ-ын бусад шийдвэрийн төслүүд байна. Тухайлбал, Төсвийн албаны эрх зүйн байдлын тухай хуулийн төсөл болонхамт өргөн мэдүүлсэн бусад хуулийн төслүүдХувь хүний орлогын албан татварын тухай, Татварын ерөнхий хууль, Аж ахуйн нэгжийн орлогын албан татварын тухай хуулийн шинэчилсэн найруулгын төслүүд хамт өргөн мэдүүлсэн бусад хуулийн төслүүд, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай, Онцгой албан татвараас чөлөөлөх тухай хуульд өөрчлөлт оруулах тухай, Улсын тэмдэгтийн хураамжийн тухай хуульд өөрчлөлт оруулах тухай зэрэг хууль, тогтоолын төслүүдөргөн мэдүүлсэн болон хэлэлцүүлгийн шатанд байгаа аж.

Монгол Улсын Ерөнхийлөгч Х.Баттулга өнөөдөр Монгол Улсын Их Хурлын дарга Г.Занданшатарт “Ээлжит бус чуулган зарлан хуралдуулах тухай” албан бичиг хүргүүлэв.

ЭЭЛЖИТ БУС ЧУУЛГАН ЗАРЛАН ХУРАЛДУУЛАХ ТУХАЙ АЛБАН БИЧИГТ:

Улсын Их Хурлын өмнөх дарга, гишүүдийн хооронд үүссэн зөрчил, тэмцлээс шалтгаалан төрийн эрх барих дээд байгууллагын ажил 40 гаруй хоногоор гацаж, 2018 оны намрын ээлжит чуулганаар хэлэлцэхээр төлөвлөсөн 23 хууль, тогтоомжийн төслийн дийлэнхийг нь хэлэлцэлгүй орхин, шийдэл хүлээж байгаа нийгэм, эдийн засгийн амин чухал олон асуудал хойшлох нөхцөл үүссэнтэй холбогдуулан миний бие 2019 оны 01 дүгээр сарын 22-ын өдөр Е/03 тоот албан бичгээр Улсын Их Хурлын даргад албан ёсоор хандаж, чуулганы хугацааг сунган хуралдуулах санал, шаардлагыг хүргүүлсэн боловч намрын ээлжит чуулганыг хуулийн хугацаанд нь завсарлуулаад байна.

Төрийн эрх барих дээд байгууллагын үр дүн муутай ажил нь сахилга, хариуцлагыг бүх түвшинд алдагдуулж, нийгмийн хөгжлийг сааруулах, аливаа бэрхшээлийг гааруулах шалтаг, шалтгаан нь болох тул алдагдсан цаг хугацааг нөхөж улс орон, ард иргэдийн амьдралд тулгамдаж байгаа шийдэл хүлээсэн асуудлуудыг нэн даруй хэлэлцэн шийдвэрлэх арга хэмжээг шуурхай авах шаардлагатай юм.

Ард иргэн олон нийт, эрх баригч нам, Улсын Их Хурал, Засгийн газар болон холбогдох бусад төрийн байгууллага, албан тушаалтнаас “хууль тэгш үйлчилж, хэлбэрэлтгүй хэрэгждэг” шударга нийгмийг цогцлоох дорвитой бодлого, шийдэл хүлээж, шаардаж байна.

Үүний хүрээнд Улсын Их Хурлын нэр бүхий гишүүд болон иргэний нийгмийн байгууллагууд 2019 оны 02 дугаар сарын 14-ний өдөр ээлжит бус чуулганыг 14 хоногийн дотор зарлан хуралдуулж, тодорхой асуудлыг хэлэлцэн шийдвэрлэх санал, шаардлагыг мөн гаргаад байна.

Иймд Монгол Улсын Үндсэн хуулийн Хорин долдугаар зүйлийн 3, Монгол Улсын Ерөнхийлөгчийн тухай хуулийн 12 дугаар зүйлийн 1, Монгол Улсын Их Хурлын тухай хуулийн 16 дугаар зүйлийн 16.2 дахь хэсэгт тус тус заасны дагуу Улсын Их Хурлын гишүүдийн санал болгон шаардаж буй асуудлаар ээлжит бус чуулганыг 2019 оны 03 дугаар сарын 01-ний өдрийн дотор зарлан хуралдуулах саналыг үүгээр хүргүүлж байна.

Судлан үзэж, хуулийн дагуу шийдвэрлэнэ үү” гэжээ.