БСШУС-ын сайд МУИС-ийн удирдлагуудыг өнөөдөр хүлээн авч уулзан, “Өрсөлдөх чадвартай дээд боловсрол” төслийн үйл ажиллагааг идэвхжүүлэх тухай ярилцлаа.
Тэрбээр, тус төслийн хүрээнд барих хичээлийн VI байрны газрын зөвшөөрлийн асуудлаар Хотын захиргаанд уламжилж дэмжлэг үзүүлэхээ илэрхийлээд, Үнэлгээний хороог өргөтгөн, эрчимтэй ажиллуулах чиглэл өгөв.
МУИС-ийн удирдлага дээд боловсролын хүрээнд болон тус сургуулиас цаашид хэрэгжүүлэх шаардлагатай, бодлогын дэмжлэг хүссэн албан хүсэлт, саналыг сайдад танилцуулав. Тухайлбал, Засгийн газраас баталсан Судалгааны их сургуулийн талаар баримтлах бодлого, төрийн өмчит их, дээд сургуульд олгодог тогтмол зардлын санхүүжилтийг сүүлийн жилүүдэд олгоогүй бөгөөд энэхүү зардлыг төсвийн тодотголоор шийдвэрлэж өгөхийг хүслээ.
Түүнчлэн, Оюутны хөгжлийн зээлийн журмыг эргэн харж зээл олгох голч оноог чухал хэрэгцээтэй байгалийн ухаан, инженер, багш, технологийн салбарын мэргэжлийн оюутанд уян хатан байдлаар өөрчлөх санал тавьсан юм.
Монгол Улсын Засгийн газар 2024 он гэхэд, Монгол Улсын 4 их сургуулийг Азийн шилдэг 100 их сургуулийн тоонд оруулах зорилт тавьсантай холбогдуулан МУИС нь олон улсын их сургуулийн эрэмбэ тогтоодог QS Ranking байгууллагатай хамтран ажиллаж байна. Тус байгууллага өнгөрсөн онд олон улсын эрэмбэ тогтоохтой холбоотой сургалт, зөвлөгөөнийг Монголын төрийн өмчит их, дээд сургуулиудыг оролцуулан зохион байгуулсан юм. МУИС, ШУТИС, СУИС, МУБИС зэрэг сургууль уг байгууллагаар эрэмбэ тогтоолгох хүсэлтээ илгээсэн тул, үүнтэй холбоотой гарах зардлыг цаашид улсын төсөвт суулгах санал гаргалаа.
МУИС-ийг түшиглэн докторын зэрэг олгох 17 зөвлөл ажилладаг бөгөөд зарим их сургуульд ажиллаж буй ийм ижил үйл ажиллагаатай зөвлөлийн давхардлыг арилгах, чанарыг сайжруулах, бүрэлдэхүүнийг өөрчлөхтэй холбоотой санал танилцуулав.
БСШУС-ын сайд Ё.Баатарбилэг тэдний саналыг хүлээн авч бодлогоор дэмжихэд онцгой анхаарч ажиллахаа илэрхийллээ.
2019 оны хоёрдугаар сарын 25-ны өдөр Чингэлтэй дүүргийн 19 хорооны нутаг дэвсгэрийн Шадивлан зусланд шар өвсний түймэр гарч, нийслэлийн Байгаль орчны газрын байгаль хамгаалагчид, нийслэлийн Онцгой байдлын газрын Аврах 34-р ангитай хамтран шуурхай арга хэмжээ авч түймрийн тархалтыг зогсоож унтраажээ. Түймэр гарсан шалтгааныг тодруулбал иргэдийн анхаарал болгоомжгүйгээс үүдэлтэй байгальд ил задгай халуун үнс, нурам хаяснаас шар өвсний түймэр дэгдсэн байна. 2019 оны 2, 3, 4 дүгээр саруудад ихэнх нутгаар салхитай, хуурайшилт ихтэй, олон жилийн дунджаас илүү дулаан байх төлөвтэй байгааг Ус цаг уур, орчны шинжилгээний газар болон Онцгой байдлын ерөнхий газраас урьдчилан сэргийлэх мэдээ, мэдэгдэл гаргасаар байгаа билээ. Иймд иргэд анхаарал болгоомжтой байж ой, хээрийн түймрээс урьдчилан сэргийлж, ил задгай гал гаргахгүй байхыг Нийслэлийн Байгаль орчны газраас анхаарууллаа.
Гадаад харилцааны сайд Д.Цогтбаатар Ардчилсан орнуудын хамтын нийгэмлэгийн Ерөнхий нарийн бичгийн дарга Томас Гарреттийг хоёрдугаар сарын 25-нд ГХЯ-нд хүлээн авч уулзав. Уулзалтын үеэр Гадаад харилцааны сайд Монгол Улс тус байгууллагын идэвхтэй гишүүн орны хувьд үйл ажиллагаанд идэвхтэй оролцож, ойр дотно хамтран ажиллаж ирснийг тэмдэглээд манай ардчиллын ололт амжилт, тулгарч буй сорилтуудын талаар мэдээлж, Монгол Улс сонгосон ардчиллаа улам бэхжүүлэн хөгжүүлэхээ илэрхийлэв.
Улсын гуравдугаар төв эмнэлэгт Эрүүл мэндийн яам, “Эрүүл мэндийн салбар хөгжил хөтөлбөр-5” төслөөс үе шаттай хэрэгжүүлж буй эмнэлгийн хог хаягдлын менежмент, эмнэлгийн тусламж үйлчилгээтэй холбоотой халдвараас сэргийлэх, хянах төслийн хүрээнд “Эмнэлгийн тусламж үйлчилгээтэй холбоотой халдварыг илрүүлэх идэвхитэй тандалт” сэдэвт ажлын байран дээрхи дадлага сургалтыг 2019 оны 02 дугаар сарын 21, 22-ны өдрүүдэд зохион байгууллаа.
НЭМГ-ын харьяа эрүүл мэндийн байгууллагын удирдах ажилтны ээлжит шуурхай хурал энэ сарын 22-нд боллоо. Тус хурлаар эмнэлгийн тусламж, үйлчилгээ болон нийгмийн эрүүл мэндийн чиглэлээр зохион байгуулж буй ажлууд, мөн цаашид хийхээр төлөвлөсөн томоохон ажлын талаар холбогдох хэлтсүүдийн зүгээс мэдээлэл хүргэсэн юм.
Монгол Улсын Засгийн газрын тогтоолоор жил бүр зохион байгуулагддаг “Архидан согтуурахаас сэргийлэх 10 хоног”-ийн хүрээнд эрүүлжүүлэх байрны ариун цэвэр, эрүүл ахуйн нөхцөл, эмнэлгийн үйлчилгээ, ерөнхий шаардлага MNS 5527:2013 стандартын 5.3 дах заалтыг хангах зорилгоор Нийслэлийн Цагдаагийн газрын харьяа эрүүлжүүлэх, саатуулах байрны эмч нарт эмнэлгийн анхан шатны тусламж, үйлчилгээ үзүүлэх аргад сургах танхимын болон гардан үйлдлийн сургалтыг Нийслэлийн Эрүүл мэндийн газраас зохион байгууллаа.
2019 оны 2 дугаар сарын 9-ний өдөр Оттава хотноо зохион байгуулагдсан Өвлийн баярын арга хэмжээний үеэр Элчин сайд Я.Ариунболд Канад Улсын Амбан захирагч Жюли Пает-д Монгол Улсын баатар, сансрын нисэгч Ж.Гүррагчаагаас ирүүлсэн захидлыг хүндэтгэлтэйгээр гардуулсанд Амбан захирагч талархан хүлээн авав.
