Month: October 2018

Дэлхийн банкны санхүүжилтээр хэрэгжүүлж буй “Боловсролын чанарын шинэчлэл төсөл”-ийн хүрээнд “Бага ангийн сурагчдын эх хэлний сургалтын арга зүйг сайжруулах, сурагчдын унших чадварыг хөгжүүлэх, үнэлэх арга зүй” сэдэвт сургалт эхэллээ.

Тус сургалтыг Боловсрол соёл, шинжлэх ухаан спортын яам, Дэлхийн банк, Боловсролын хүрээлэн, Бага боловсролын эх хэлний сургалтыг дэмжих баг, Багшийн мэргэжил дээшлүүлэх институт, Үндэсний сургагч багш нар, Ховд аймгийн Боловсрол Соёл Урлагийн Газар хамртан зохион байгуулж байна.

Энэхүү өргөн хүрээнд зохион байгуулагдаж байгаа сургалт бага ангийн сурагчдын унших чадварыг хөгжүүлэх, үнэлэхэд дэмжлэг болох, зарим арга хэрэгслийг сонгогдсон сургуулийн бага ангийн багш нарт түгээх зорилготой юм. Сургалт сурагчдын амралтын өдрүүдийг тохиолдуулан 10 дугаар сарын 29-нөөс эхлэн 11-р сарын 2 хүртэл таван өдөр үргэлжилнэ. Сургалтад Алтай, Манхан сумын ЕБС-ийн, Жаргалант сумын 2, 3, 7-р сургуулийн бага ангийн нийт 80 гаруй бага ангийн багш, тухайн сургуулиудын бага ангийн сургалтын менежерүүд оролцож, тулгамдаж буй асуудлаа ярилцахын зэрэгцээ, харилцан туршлага солилцож байна.

Баян-Өлгий аймгийн нутгаар 11 дүгээр сард агаарын температурын сарын дундаж 9-13 градус хүйтэн буюу уур амьсгалын дунджаас 0.5-1.0 градусаар дулаан байх төлөв ажиглагдсан талаар аймгийн Ус, цаг уур, орчны шинжилгээний газраас мэдээллээ.

Тэрээр нэгдүгээр арав хоногийн эхээр шөнөдөө 8-13 градус хүйтэн, өдөртөө 3-8 дулаан, нэгдүгээр арав хоногийн дунд үе, хоёрдугаар арав хоногийн эхэн болон сүүлчээр шөнөдөө 15-20 градус, өдөртөө 3-8 градус хүйтэн байх аж. Харин гуравдугаар арав хоногийн дунд үеэс хүйтэрч шөнөдөө 19-24 градус, өдөртөө 8-13 градус хүйтэн байна.

Тухайн сард орох хур тунадасны хэмжээ нь нутгийн өмнөд хэсгээр уур амьсгалын дунджаас бага, бусад нутгаар дунджийн орчим бөгөөд хоёрдугаар арав хоногийн сүүлч, гуравдугаар арав хоногийн эхээр зарим газраар цас орно.

Түүнчлэн нэгдүгээр арав хоногийн эхэн болон дунд үе, хоёр ба гуравдугаар арав хоногийн эхэн ба сүүлчээр салхины хурд зарим газраар 16-18 м/с хүртэл ширүүсэж, цасан болон шороон шуурга шуурахыг анхааруулж байна.

Нийслэлийн харьяа байгууллагуудын өдөр тутмын үйл ажиллагааны процессыг цахимжуулсан мэдээлэл солилцох, мэдээллийн чанар, хурд, нийслэлийн төрийн байгууллагуудын уялдаа холбоо, хяналт тавих боломжийг бүрдүүлсэн технологийн шинэ шийдэл бүхий “UB ERP” дотоод удирдлага хяналтын цогц системийг нэвтрүүлэн ажиллаж байна. Энэхүү систем нэвтэрсэнээр төрийн үйлчилгээг иргэдэд цахим хэлбэрээр үзүүлэх суурь тавигдах юм.

Дотоод удирдлага хяналтын шинэ системийг үйл ажиллагаандаа бодитоор хэрэгжүүлэх чадварыг нийслэлийн харьяа байгууллагуудын албан хаагчдад эзэмшүүлэх зорилго бүхий сургалтыг НМТГ-аас үе шаттайгаар зохион байгуулж ээлжит сургалтад Баянгол дүүргийн Засаг даргын Тамгын газар болон түүний харьяа байгууллагууд, хороод, сургууль, цэцэрлэгүүдийн хүний нөөц, мэдээлэл технологи хариуцсан 200 гаруй албан хаагч хамрагдлаа гэж Нийслэлийн Мэдээллийн технологийн газраас мэдээллээ.

Засгийн газрын өнөөдрийн хуралдаанаар Тавантолгой-Гашуунсухайт чиглэлийн 250 км хүнд даацын хатуу хучилттай автозамыг “Зураг төсөл боловсруулах-барих-ашиглах-шилжүүлэх” нөхцөлөөр “Тал нутгийн хөгжлийн зам” компанитай концессын гэрээ байгуулахыг зөвшөөрөв.

Дээрх компани гэрээ хүчин төгөлдөр болсноос хойш 2.5 жилд багтаан барих бөгөөд 12 жил ашиглаж төрд шилжүүлэх юм. “Тал нутгийн хөгжлийн зам” компанид төрөөс санхүүгийн ямар нэгэн дэмжлэг, баталгаа гаргахгүй. Зам баригдсанаар нүүрсний экспортын 50-60 хувийг тээвэрлэдэг замын урсгал сайжирч, байгаль орчинд үзүүлэх сөрөг нөлөө эрс багасна гэж үзэж байна.

Мөн Өмнөговь аймгийн Ханхонгор сумын Тавантолгой-Барууннаран чиглэлийн 32 км замын төгсгөлөөс “Цагаан дэл” уул хилийн боомт хүртэлх 270 км замыг “Зураг төсөл боловсруулах-барих-ашиглах-шилжүүлэх” нөхцөлөөр “Ундрах говь” компанитай концессын гэрээ байгуулахаар болов. Төрөөс санхүүгийн ямар нэгэн дэмжлэг, баталгаа гаргахгүй бөгөөд компани шаардагдах хөрөнгийг гаргах юм.

Үүний зэрэгцээ Тавантолгой-Ханбогд-Ханги чиглэлийн хатуу хучилттай автозамын төслийн явцыг хэлэлцэв. УИХ-ын 2018 оны 73 дугаар тогтоолд заасны дагуу Тавантолгой-Оюутолгой-Ханги чиглэл болгон өөрчлөн “Нако” компанитай концессын гэрээний хэлэлцээ хийж, санал дүгнэлтээ танилцуулахыг Үндэсний хөгжлийн газрын даргад Б.Баярсайхан даалгав.

Гэр хорооллын айл өрхийн орой, шөнийн цагт хэрэглэсэн цахилгааны тарифт хөнгөлөлт үзүүлэх журам арваннэгдүгээр сарын 1-ний өдрөөс хэрэгжиж эхэлнэ. Үүнд:

Улаанбаатар хотын агаарын бохирдлыг бууруулах зорилгоор Нийслэлийн гэр хорооллын бүсэд орших хоёр тарифт тоолууртай өрхийн орой, шөнийн цагт хэрэглэсэн цахилгааны тарифыг 100 хувиар хөнгөлөх;

Аймгийн төв болон арван мянгаас дээш хүн амтай сум, суурин газрын гэр хорооллын бүсэд орших хоёр тарифт тоолууртай өрхийн орой, шөнийн цагт хэрэглэсэн цахилгааны тарифыг 50 хувиар хөнгөлөх;

Дээрх хөнгөлөлт нь хүйтний улиралд буюу 2018 оны 11 дүгээр сарын 01-ний өдрөөс 2019 оны 04 дүгээр сарын 01-ний өдрийг хүртэлх хугацаанд хэрэгжих бөгөөд оройн 21.00 цагаас өглөөний 06.00 цагийн хооронд гэр хорооллын хэрэглэгчдийн хэрэглэсэн цахилгааны төлбөрт хөнгөлөлт үзүүлнэ.

Гэр хорооллын хэрэглэгчдийн орой, шөнийн цагт хэрэглэсэн цахилгааны тарифыг хөнгөлөхдөө цахилгаан түгээх шугам сүлжээний техникийн боломжтой уялдуулан дараах зохицуулалтыг хийнэ. Үүнд:

220 В-ын буюу 1 фазын сүлжээнд холбогдсон хэрэглэгчдийг хангах цахилгааны дээд чадал 2.5 кВт байгаа учраас гэр хорооллын айл өрхийн орой, шөнийн цагт хэрэглэсэн цахилгааны тарифыг 100 хувь хөнгөлөх цахилгаан хэрэглээний дээд хязгаарыг нэг сард 700 кВт.ц-аар тооцох бөгөөд 700 кВт.ц-аас илүү гарсан орой, шөнийн цахилгааны хэрэглээний тарифыг 50 хувиар хөнгөлөх;

380 В-ын буюу 3 фазын сүлжээнд холбогдсон гэр хорооллын айл өрхийн орой, шөнийн цагт хэрэглэсэн цахилгааны тарифыг 100 хувь хөнгөлөх цахилгааны дээд хязгаарыг нэг сард 1500 кВт.ц-аар тооцох. 1500 кВт.ц-аас илүү гарсан орой, шөнийн тарифыг 50 хувиар хөнгөлөхөөр шийдвэрлэжээ.

Агаарын бохирдлыг бууруулах арга хэмжээний хүрээнд орой, шөнийн тарифын хөнгөлөлтөд Нийслэл хотын 120000 орчим айл өрх, аймгийн төв, арван мянгаас дээш хүн амтай сум, суурин газрын 15000 орчим айл өрх, нийтдээ улсын хэмжээнд 135000 орчим айл өрх хамрагдах урьдчилсан тооцоо гарсан байна.