Month: October 2018

Азийн бүсийн орнуудын Засгийн газар хоорондын “Байгаль орчинд ээлтэй тогтвортой тээвэр” 11 дүгээр чуулга уулзалт амжилттай үргэлжилж байна. Энэхүү чуулга уулзалт өнөөдөр өндөрлөх юм. Чуулганд оролцогчид “Бангкок-2020” тунхаглалын хэрэгжилтийн явцыг хэлэлцэж, эхэллээ. Бангкок 2020 тунхаглалыг Ази дахь бүсийн “Байгаль орчинд ээлтэй тогтвортой тээвэр”-ийн 5 дугаар форумаар баталсан бөгөөд тунхаглалын хүчинтэй хугацаа 2 жил үргэлжилнэ. Бангкок 2020 тунхаглал нь байгаль орчинд ээлтэй тогтвортой тээврийн нийт 20 зорилт болон хяналтын үзүүлэлттэй ба Ази дахь анхны байгаль орчинд ээлтэй тээврийн хэрэглээг нэмэгдүүлэх зорилго бүхий бүсийн тунхаглал юм.

Нийслэлийн Засаг даргын зөвлөлийн ээлжит хуралдаанаар өвөлжилтийн бэлтгэл ажлын талаар хэлэлцжээ. 2018-2019 оны өвөлжилтийн бэлтгэл ажлын хүрээнд цахилгаан дулааны эх үүсвэр болон инженерийн хангамжийн байгууллага, харьяа газар, дүүргүүд нийт 1104 арга хэмжээ төлөвлөснөөс энэ сарын 1-ний өдрийн байдлаар 1064 арга хэмжээг хэрэгжүүлэн 96.3 хувийн гүйцэтгэлтэй байгаа аж. Энэ нь өнгөрсөн оны мөн үеийнхтэй харьцуулахад 1.1 хувиар өссөн үзүүлэлт юм.

Улаанбаатар хотын Ерөнхий менежер Т.Гантөмөрийн мэдээлснээр Амгалан дулааны станц, II, III, IV цахилгаан станцууд нийтдээ 295 ажил төлөвлөснөөс өнөөдрийн байдлаар 259 ажлыг хийж гүйцэтгэсэн байна. Өвөлжилтийн бэлтгэл ажил 95.5 хувьтай, станцууд 12-20 хоногийн нүүрсний нөөцтэй байна. Улаанбаатар дулааны сүлжээ ТӨХК, Цахилгаан дамжуулах үндэсний сүлжээ ТӨХК, ОСНААУГ, УСУГ, Мэдээлэл холбооны сүлжээ ТӨХК зэрэг Инженерийн хангамжийн 12 байгууллага өвөлжилтийн бэлтгэл хангахаар 349 ажил төлөвлөснөөс 337 ажлыг гүйцэтгэж 97 хувийн биелэлтэй байгаа аж.

Нийслэлийн хэмжээнд авто зам, замын байгууламжийн цас арилгах 2472.08 тонн тусгай зориулалтын бодис, 1420.8 тонн давс нөөцөлсөн байна.

Монгол Улсын шүүхээр 2018 оны гуравдугаар улиралд шүүх дэх эвлэрүүлэн зуучлагчид 11522 өргөдөл ирснээс 8666 өргөдлийг шийдвэрлэсэн байна. Эвлэрүүлэн зуучлалаар маргаанаа шийдүүлэхээр өргөдөл гаргагчдын 70.8 хувь нь эвлэрчээ.

Шийдвэрлэсэн 8666 өргөдлийн 6343 буюу 73 хувь нь иргэний эрх зүйн маргаан, 2310 хэрэг буюу 27 хувь нь гэр бүлийн эрх зүйн маргаан, 13 хэрэг буюу 0.01 хувь нь хөдөлмөрийн ганцаарчилсан маргаан байна.

Шүүх дэх эвлэрүүлэн зуучлах ажиллагааны 2018 оны 3 дугаар улирлын дүнг өнгөрсөн оны мөн үетэй харьцуулбал, шүүх дэх эвлэрүүлэн зуучлагчид гаргасан өргөдөл 2.74 хувиар, шийдвэрлэсэн байдал 10.53 хувиар, шүүхээс иргэний хэрэг үүсгэхээс өмнө шилжүүлэн ирсэн нэхэмжлэл хоёр нэхэмжлэлээр буурчээ.

Шүүхээс иргэний хэрэг үүсгэсний дараа шилжүүлэн ирсэн иргэний хэрэг 13.78 хувиар, хүсэлт гаргагч, өргөдлөө буцаасан өргөдөл 65.34 хувиар, үлдэгдэл 18.69 хувиар өссөн үзүүлэлтэй байгаа аж.

Сүхбаатар аймгийн Дарьганга суманд харилцаа холбоо, шуудангийн төрийн цахим үйлчилгээний салбар нээгдлээ. Салбар нь Сүхбаатар аймаг төдийгүй Монгол Улсын хэмжээнд анхдагч бөгөөд жишиг салбар болж буй.

Нутгийн ард иргэд цахим үйлчилгээний тусламжтайгаар төрийн олон үйлчилгээг нэг дороос авах боломжтой. Төрсний гэрчилгээ, нийгмийн даатгалын шимтгэлийн төлөгдсөн байдал, гэрлэлтийн лавлагаа гээд арав гаруй төрлийн мэдээлэл лавлагааг өөрийн хурууны хээ болон иргэний цахим үнэмлэхний туслмажтайгаар маш богино хугацаанд авах юм.

Дарьганга болон бусад хөрш зэргэлдээх сумдын иргэд ч тус төвөөр үйлчлүүлэх боломжтой юм. “Энэ үйлчилгээ иргэдийн цаг завыг хэмнэсэн, төрийн үйлчилгээг иргэдэд ойртуулсан маш чухал ажил болсон. Хэрвээ энэхүү салбар амжилттай байвал цаашид бусад сумдад ч тус үйлчилгээг нэвтрүүэх бүрэн боломжтой” гэж аймгийн Шуудангийн үйлчилгээний газрын дарга Д.Болдмаа хэллээ. “Монгол шуудан” ХХК, “Мэдээлэл холбооны сүлжээ” ХХК, “Үндэсний дата төв” хамтран дээрх салбарын үйл ажиллагааг ийнхүү амжилттай эхэлжээ.

Дархан сумын Засаг даргын үйл ажиллагааны хѳтѳлбѳрт тусгасан эрүүл мэндийн тусламж үйлчилгээг сайжруулах зорилтын хүрээнд Дархан сумын орон нутгийн хөгжлийн сангийн /ОНХС/ хѳтѳлбѳр, тѳслѳѳр Нэгдсэн эмнэлгийн Мэдрэлийн тасагт ѳвчтѳнд тохирсон стандартын 10 ширхэг ор, хяналтын мониторыг хүлээлгэн ѳглѳѳ.

Тус тасгаар сард 120 орчим хүн үйлчлүүлдэг ажээ. Ихэвчлэн чихрийн шижин, цус харвалт, саа саажилт гээд тархи, мэдрэлийн гаралтай хүнд ѳвчтэй, ахмад настай, хѳгжлийн бэрхшээлтэй хүмүүс хэвтэн эмчлүүлдэг байна.

Иймд хуучин хэрэглэж байсан модон орнууд ѳвчтѳнүүдэд босч суухаас эхлээд ихээхэн хүндрэлтэй байсан тул Орон нутгийн хөгжлийн сангийн хөрөнгөөр өвчтөнд тохирсон ортой боллоо.

Ингэснээр энгийн тасагт долоо, хүнд ѳвчтѳний тасагт гурван ширхэг стандарт, шаардлага хангасан ортой болсон төдийгүйѳвчтѳнүүдийн биеийн байдлыг хянах сүүлийн үеийн техникийн үзүүлэлт бүхий монитортой болж байгаад эмч, сувилагч, баяртай байсан.

Тоног төхөөрөмж, зориулалтын ортой болсоноор өвчтөнд үзүүлэх эмчилгээ, сувилгаа сайжрах, сувилагчийн ачаалал багасах гээд олон давуу талтай гэж тус тасгийн эрхлэгч Н.Баярсайхан онцлов.

Увс аймаг гамшгаас хамгаалах өндөржүүлсэн бэлэн байдлын зэрэгт шилжин ажиллаж байгаатай холбогдуулан Улаангом сумын хэмжээнд тээврийн хэрэгслийн хөдөлгөөнийг 10 дугаар сарын 6-ны өглөөний 07 цагаас өдрийн 11 цаг хүртэл, худалдаа үйлчилгээний байгууллагын үйл ажиллагааг өглөөний 08 цагаас өдрийн 12 цагийн хооронд тус тус түр хугацаагаар хязгаарлахаар боллоо.

Энэ хугацаанд Улаангом сумын иргэд багийн харъяаллын дагуу дөрвөн цэгт очиж жагсан гамшгийн иж бүрэн сургуулилтад оролцох юм байна.Увс аймагт Гамшгаас хамгаалах иж бүрэн сургуулилт явагдаж байгаатай холбогдуулан аймгийн хэмжээнд 10 дугаар сарын 1-ний өдрийн 9 цагаас 7-ны 21 цаг хүртэл өндөржүүлсэн бэлэн байдал зарлаад байгаа юм. Мөн орон нутгийн гамшгаас хамгаалах алба, мэргэжлийн ангиудыг аюулт үзэгдэл, ослоор цагийн байдал үүсгэн ажиллуулж, гамшгаас хамгаалах дадлага сургуулиудыг бодит байдалд тулгуурлан зохион байгуулна.

Одоогийн байдлаар аймгийн Онцгой комисс, орон нутгийн гамшгаас хамгаалах алба, мэргэжлийн анги, төрийн болон төрийн бус байгууллага, аж ахуйн нэгжийн удирдлагуудад гамшгаас урьдчилан сэргийлэх, мэргэжлийн байгууллагуудын хамтын ажиллагаа, гамшгийн үед хүч хэрэгсэл дайчлан гаргах, нүүлгэн шилжүүлэх журам, байрзүйн зургийн ашиглалт, анхны тусламж хэрхэн үзүүлэх, нийгмийн эрүүл мэндийн бэлэн байдал, гамшгийн үеийн холбоо зарлан мэдээлэл, гамшигт өртсөн хүмүүсийн амьдрах нөхцөлийг бүрдүүлэх, тэдгээрийг нүүлгэн шилжүүлэх зэрэг сэдвээр сургалт явуулж байна.

Нийслэлийн Ерөнхий боловсролын Нэгдүгээр сургуулийн захирал Г.Бум-Эрдэнийг өчигдөр орой АТГ-аас баривчлав.

Түүнийг сургуульд хүүхэд элсүүлэхдээ бусдаас удаа дараа авлигал авсан гэх үндэслэлээр шалгаж байгааг АТГ-аас мэдээлэв. Мөн уг хэргийн талаар цагдан хорих, таслан сэргийлэх арга хэмжээний тухай дэлгэрэнгүй мэдээллийг Прокурорын зөвшөөрөл гарвал өгөх гэнэ.

Өнгөрсөн сарын 25-нд АТГ-аас хийсэн хэвлэлийн хурлын үеэр Нэгдүгээр сургуулийн хамран сургах тойргийн хаягийн бүртгэл дээр 2017 оны хагас жилээс хойш шилжиж ирсэн, хүүхэд дангаараа, эсхүл ээжтэйгээ шилжиж ирсэн, оршин суудаг гэдгээ нотолж чадахгүй зэрэг асуудалтай 58 зөрчил илэрчээ.

Өмнөговь аймгийн Засаг даргын “Бид хамтдаа” үйл ажиллагааны хөтөлбөрт тусгасан “Өрх гэр бүлийн хөгжлийг дэмжих дэд хөтөлбөр”-ийн хүрээнд “Би гэртээ” дугуйланг хоёр дахь жилдээ хичээллүүлж, эмэгтэйчүүдийг өрхийн үйлдвэрлэл эрхлэх боломж нээж байна.Энэ жил таван төрлийн чиглэлээр 50 хүн сургах төлөвлөгөөтэй байгаа бөгөөд тавдугаар сарын 15-аас эхэлсэн уг дугуйлангийн үр үрсэлгээ, суулгац, тасалгааны цэцэг тарих, гар урлал, зодог шуудаг оёх зэрэг гурван төрөлд 30 гаруй эмэгтэй суралцаж өрхийн амьжиргаагаа дээшлүүлж буй. Одоо оёдол эсгүүр, ногоо даршлах, нөөшлөх гэсэн төрлөөр 20 гаруй эмэгтэйг сургахаар бүртгээд байгаа аж.

Уг дугуйланг аймгийн Эмэгтэйчүүдийн зөвлөл, Гэр бүл хүүхэд залуучуудын хөгжлийн газар хамтран Даланзадгад сумын найман багийн гэрээр хүүхдээ харж буй, өрх толгойлсон, тодорхой эрхэлсэн ажилгүй, зорилтот бүлгийн ээжүүд, эмэгтэйчүүдийн дунд үнэ төлбөргүй явуулж байгаа юм. Дугуйланд хамрагдаад сурч мэдсэн зүйл, арга туршлага дээрээ үндэслэн өөрсдөө ажлын байртай болох боломж бүрдэж байна.