Month: October 2018

Дэлхийн шатрын 43 дахь олимпиад Гүржийн Батуми хотноо 2018 оны есдүгээр сарын 23-наас 10 дугаар сарын 5-нд болж, Монгол Улсын эрэгтэй баг 22 дугаар байр, эмэгтэй баг 20 дугаар байр эзэлсэн амжилтаар тэмцээн өндөрлөлөө.

Дэлхийн 180 орны 1667 шатарчид 14 хоногийн турш оюун ухаанаа уралдуулж, шилдгүүд өчигдөр буюу 10 дугаар сарын 5-нд тодорлоо.

Өчигдөр эрэгтэй баг сүүлийн өрөгтөө Нидерландыг 2,5:0,5 оноогоор хожиж, 6 хожил, 3 тэнцээ, 2 хожигдолтой тэмцээнээ өндөрлүүлж байна. Эрэгтэй шатарчдыг Хятадын баг тэргүүлсэн бол АНУ, ОХУ-ын баг удаалав. Нийт 185 баг оролцжээ. Манай бүсгүйчүүд сүүлийн өрөгт Энэтхэгийн багт 3:1-ээр хожигдон, тэмцээнийг 7 хожил, 4 хожигдолтой дуусгав. Эмэгтэй шатарчдын багаас БНХАУ-ын баг тэргүүлж Укриан, Гүржийн багууд удаалсан байна.

UFC-гийн аварга Хабиб Нурмагомедов болон ирланд эр Конор Макгрегорын тулаан маргааш Лас-Вегаст болно. Дэлхий нийтийн анхаарлын төвд буй тулааны өмнөх хэвлэлийн бага хурал болж өндөрлөлөө. Конор Макгрегор хэвлэлийн бага хурлаас 25 минут хоцорч ирсэн тул Хабиб хэлэх үгээ хэлчихээд хүлээлгүй гараад явчихсан байв.

“Конор сайн тулаанч болохоор би болгоомжтой байх болно. Тэр бокс сайн тоглодог. Гэхдээ би барилдаандаа түүнээс илүү, бяраар ч давуу. Ер нь намайг зогсоохын тулд алах л хэрэгтэй. Тэрнээс нааш би зогсохгүй шүү, Конор. Түүнийг босч чадахгүй болтол нь балбах төлөвлөгөөтэй.
Магадгүй шүүгчийн шийдвэрээр ялагч тодорч ч мэднэ. Эсвэл би цаг дуусахаас өмнө нам цохичих биз. Ямартай ч түүнийг ялахдаа л ялна. Тэр Диаст ялагдсан бас Мейветерт ялагдсан. Одоо надад ялагдана” хэмээн Хабиб Нурмагомедов өгүүлсэн байна.
Ингээд Хабиб гарч яваад 10 минут өнгөрсөний дараагаар Конор Макгрегор гэрийнхээ таавчигтай танхимд орж ирсэн юм.

“Хүлээж чадалгүй хулчийгаад гараад явчихсан уу? Хабиб маш олон сул талтай. Тэр Дагестаных болохоор зөвхөн барилдаж л чаддаг. Тэр багадаа баавгайтай ноцолдож өссөн байж болно. Тэр сайн бөх. Үнэхээр сайн. Гэхдээ тулаан бол бөхийн барилдаан биш. Би түүнийг дөнгөх болно. Тэр баавгайтай ноцолдож үзсэн ч ирланд гориллтой бол тэмцэлдэж чадах ч үгүй” хэмээн Конор Макгрегор өгүүлжээ.

2026 оны Өвлийн Олимпийн наадмыг зохион байгуулахаар нэрээ дэвшүүлсэн хотууд дундаас гурван хотыг сонгосон талаар Олон Улсын Олимпийн Хорооноос мэдээллээ.

Өнгөрсөн пүрэв гаригт Аргентин улсад болсон тус хорооны уулзалтын үеэр Канадын Калгари, Шведийн Стокгольм, Италийн Милан болон Кортина д’Ампеццо хотуудыг сонгох шийдвэрийг гаргажээ. Олимпийн наадмыг зохион байгуулах хүсэлтийг анх долоон хот гаргасны дунд Японы Саппоро болон Швейцарийн Сион зэрэг хот багтаж байсан юм.

2026 оны өвлийн наадмыг зохион байгуулах хотын нэрийг ирэх оны есдүгээр сард Олон Улсын Олимпийн Хороо албан ёсоор зарлах ажээ. Сонирхуулахад өнгөрсөн олимпийн наадам БНСУ-ын Пёнчат хотод зохион байгуулагдсан билээ.

Энэтхэг Улсын Пунь хотод энэ сарын 2-8-ны өдрүүдэд Бодибилдинг, Фитнессийн 52 дахь удаагийн Ази тивийн аварга шалгаруулах тэмцээн болж байна.

Тус тэмцээнд эх орноо төлөөлөн оролцож буй ОУХМ Г.Угалзцэцэг “Women’s Athletic Physique-165 cm” ангилалд алтан медаль хүртсэн амжилтыг үзүүлжээ.

Ингэснээр тэрбээр гурав дахь удаагаа Азийн аварга болж буй юм. Үүнээс өмнө 2016, 2017 онд ААШТ-ээс алтан медаль хүртэж байсан юм.

Дашрамд дуулгахад, тэрээр өнгөрөгч онд Сонирхогчдын Бодибилдинг, фитнессийн Дэлхийн аварга шалгаруулах тэмцээнд түрүүлсэнээр гурав дахь удаагаа аваргын алтан медаль хүртээд байсан билээ.