Month: June 2018

Нийслэлийн Засаг даргын орлогч П.Баярхүү, Дэлхийн Банкны Монгол Улсад суугаа Суурин төлөөлөгч Жеймс Андерсон нар уур амьсгалын өөрчлөлтийг даван туулах, дасан зохицох чадавхтайгаар Улаанбаатар хотын зам тээврийн дэд бүтцийн хөрөнгийн менежмент, төлөвлөлтийг хийхэд хамтран ажиллахаар харилцан ойлголцлын санамж бичигт өнөөдөр гарын үсэг зурав. Харилцан ойлгоцлын санамж бичигт гарын үсэг зурснаар Даян Дэлхийн Гамшгийн Эрсдлийг Бууруулах, Сэргээх Сангийн буцалтгүй тусламжтайгаар Дэлхийн Банкны шинэ техникийн туслалцааг эхлүүллээ.

Хотын гудамж, зам, гүүр, уулзвар зэргээс бүрддэг авто зам, тээврийн дэд бүтцийн хөрөнгийн менежмент тааруу мөн урт хугацааны төлөвлөлт дутагдалтай байснаар хотын авто замын сүлжээний завсар, арчлалтын хязгаарлагдмал төсөвтэй Нийслэл хотоос иргэдэд хүргэх авто зам, тээврийн үйлчилгээний чанарт нөлөөлж байна. Мөн одоо ашиглаж буй авто зам, тээврийн дэд бүтэц гэнэтийн үер, шуурга, өвлийн улиралд авто замын мөстөлт зэрэг цаг ууртай холбоотой аюулт үзэгдэлд өртөмтгий байгаа нь хотын зам тээврийн үйлчилгээний чанарт нөлөөлж, энэ чиглэлээрх хөрөнгө оруулалтыг хэрэгцээг нэмэгдүүлж байна.

Хамтын ажиллагааны хүрээнд хотын авто замын хөрөнгийн ангилал, үндсэн мэдээллийг агуулсан хөрөнгийн тооллого, бүртгэлийн системийг бий болгоход Дэлхийн Банкнаас Нийслэлд туслалцаа үзүүлнэ. Мөн Улаанбаатар хотын уур амьсгалын өөрчлөлтийг даван туулах, дасан зохицох чадавхтай авто зам, тээврийн дэд бүтцийн хөрөнгийн төлөвлөгөөний эхний үе шатыг боловсруулахад туслах аж.

Уг төлөвлөгөө нь уур амьсгалын өөрчлөлтийн даван туулах, дасан зохицох чадавхийг сайжруулахад нэн тэргүүнд шаардлагатай засвар, арчлалтыг хийхэд чиглэсэн хотын авто зам, тээврийн дэд бүтцийн хөрөнгийн менежментийн урт хугацааны төлөвлөгөө байх юм байна. Эцэст нь улсын болон хотын засаг захиргааны авто зам, тээврийн дэд бүтцийн төлөвлөлт, арчлалтыг хариуцсан албаны хүмүүст хөрөнгийн судалгаа, хөрөнгийн менежментийн төлөвлөгөөг боловсруулах чиглэлээр сургалт явуулах ажээ.

Өнөөдөр НИТХ-ын дарга С.Амарсайхан 100 айл дахь барилгын материалын зах болон төрийн үйлчилгээ үзүүлдэг байгууллагууд нүүж эхэлсэнтэй холбоотойгоор ажлын явцтай танилцлаа. Энэ үеэр НИТХ-ын дарга С.Амарсайхан хэлэхдээ “Энд зөвхөн 100 айлын хэдэн худалдааны төвийн бизнес эрхлэгчдийн асуудал яригдаж байгаа юм биш. 2008 онд батлагдсан ерөнхий төлөвлөгөө өнөөдрийг хүртэл хэрэгжээгүй байна. Энд 12 мянган айл өрхийн орон сууц баригдах байсан ч, арван жилийн дараа буюу өнөөдрийн байдлаар аравхан хувьтай хэрэгжсэн байна. Түүнчлэн энэ хавийн айл өрхүүдийн амьдрах орчин нөхцлийн сайжруулах, бизнес эрхлэгчдийн үйл ажиллагааг арай өөр төвлөрсөн орчинд явуулах газрыг бүрдүүлнэ. Энэ оны нэгдүгээр улиралд батлагдсан тогтоол шийдвэрийн дагуу ажлаа явуулж байна. Энд олон үйлдвэр үйл ажиллагаагаа явуулдаг. Суурьшлийн бүс, үйлдвэрийн бүсээ ялгаж салгах цаг нь болсон. Үйлдвэрүүдийг үйлдвэр технологийн парк руу шилжүүлнэ. Тиймээс төмөр, чулуу, шохой, будаг, модны үйлдвэрийг Үйлдвэр технологийн паркид үйл ажиллагаа явуулах орчин нөхцөлийг нь бүрдүүлэх үүднээс зам, дэд бүтцийг шийдэж байна. Тэнд газрыг нь шийдэж өгөөд, төвлөрсөн хэлбэрээр үйл ажиллагаа явуулах боломжийг бүрдүүлнэ. Бизнес эрхлэгчдийг хөөж туусан асуудал байхгүй. Бид газрыг нь гаргаж өгч байгаа. Улаанбаатар хотын баруун, зүүн, зуслангийн чиглэлд тараад үйл ажиллагаа явуулах боломж байгаа. Хотын зүгээс түрээс төлөхгүйгээр газраа эзэмшиж, өмчлөөд үйл ажиллагаа явуулах боломжийг нээж өгч байна” хэмээн ярилаа.

НМХЕГ-ын ажилтан н.Даваацэрэн хэлэхдээ “НМХЕГ-аас 100 айл орчимд хяналт шалгалт хийж, гурван төрлийн зөрчил илрүүлсэн. Автозамын зорчих хэсэгт буюу нийтийн эзэмшлийн талбайд худалдаа үйлчилгээ явуулж буй аж ахуй нэгжүүд олон байна. Автозамын дагуу зөвшөөрөлгүй үйл ажиллагаа явуулж буй нийт 37 ТҮЦ, павилон бий. Мөн 70 гаруй үйлдвэр үйл ажиллагаа явуулж байгаагаас чулуу болон төмрийн 26 үйлдвэр байна гэсэн тооцоо гарсан. Харин ил задгай худалдаа эрхлэгчдийг шаардлагын дагуу нүүлгэсэн. Нийслэлийн газрын албатай хамтран 46 байгууллагад өмчилсөн болон эзэмшсэн газраа зориулалтын дагуу ашиглах шаардлагыг тавьж байгаа. Суурьшлын бүсэд хориглосон үйлдвэрлэл явуулж байгаа зөрчил их бий. Тухайлбал, чулууны үйлдвэрлэл явуулж байгаа нь тоос шороо ихээр үүсгэж байна. Мөн төмөр, мод модон бүтээгдэхүүний цехүүд болон хаалга цонхны үйлдвэрүүдэд суурьшлын бүсэд явуулж буй үйл ажиллагаагаа зогсоохыг шаардсан мэдэгдэл хүргүүлээд байна. Хяналт шалгалтаар илэрсэн зөрчлийн талаар дүүргийн болон нийслэлийн прокурорт мэдэгдэж зөрчлийн хэрэг үүсгэж, үйл ажиллагааг нь хязгаарлах акт үйлдсэн. Гэтэл иргэд 100 айлыг бүхлээр нь нүүлгэх гэж байгаа юм шиг ойлголттой байдаг. Бид эрх бүхий байгууллагаас зөвшөөрөл аваагүй хууль бус үйл ажиллагаа явуулж байгаа байгууллагуудыг л цэгцлэх ажил зохион байгуулж байгаа юм. Тэрнээс биш барилгын материалын худалдааны зах, төвүүдийн үйл ажиллагааг хориглох гээгүй байна” гэлээ.

Өнөөдөр Барилга, хот байгуулалтын яамны хурлын танхимд “Барилгын зах зээлийн өнөөгийн байдал ба эрэлт нийлүүлэлт” сэдэвт хэлэлцүүлэг зохиолоо.

Хэлэлцүүлгийн үеэр “Тэнхлэг зууч” үл хөдлөх хөрөнгийн компанитай хамтарсан судалгаагаар орон сууцны нийлүүлэлт иргэдийн эрэлтээс давсан гэх дүнгийн тухай мэдээлсэн байна. Тодруулбал, нийслэлд 217 мянган айл өрх гэр хороололд амьдардаг ч, таван мянга 882 айлын орон сууц ашиглалтад орчихсон борлуулалт байхгүй, эзнээ хүлээж байгаа аж.

Энэ талаар Барилга хот байгуулалтын дэд сайд Ш.Лхамсүрэн хэлэхдээ “Орон сууцны нийлүүлэлт эрэлтээсээ давсан үзүүлэлттэй байна. Яг одоогоор 217 мянган айл өрх гэр хороололд амьдарч байгаа ч энэ хэмжээний эрэлт байгаа гэсэн үг. Хамгийн гол нь орон сууц худалдан авах чадвартай холбоотой асуудал” гэжээ.

“Аз жаргалтай хот”, “Эргүүл дэд” хөтөлбөрийн хүрээнд Нийслэлийн Аялал Жуулчлалын газар, Монголын Оюутны холбоотой хамтран “Оюутан цагдаа-2018” хөтөлбөрийг хэрэгжүүлж байна. Тус хөтөлбөр нь оюутан залуучуудыг гэмт хэрэг, зөрчлөөс урьдчилан сэргийлэх ажилд татан оролцуулах, аялал жуулчлалаар яваа гадаадын иргэдийн аюулгүй байдлыг хангах, жуулчдад аялал жуулчлал, соёлын үйлчилгээний мэдээлэл түгээх зорилготой. Арга хэмжээнд 40 оюутан цагдаа хамрагдаж тэд зургаадугааp сарын нэгний өдрөөс наймдугаар сарын 13-ны хооронд гэмт хэрэг зөрчлөөс урьдчилан сэргийлж ажиллахаар боллоо.

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, БНСУ-ын Олон улсын хамтын ажиллагааны байгууллага КОЙКА-гийн (KOICA) санхүүжилттэй төслийн гүйцэтгэгч “Эм Кэй Ай Ти” (MKIT) сургалтын төвтэй хамтран компьютерийн үндсэн хэрэглээний програмыг заахаар болсон. Мэдээллийн технологийн чиглэлийн нарийн мэргэжлийн долоон төрлийн сургалтыг үнэ төлбөргүй зохиож, дадлага давамгайлсан, инновацилаг сургалтын хөтөлбөрийг 2017 оноос хэрэгжүүлж байгаа юм.

Энэ удаагийн элсэлтээр Вэб дизайны ангид 30, ЖАВА хөгжүүлэгчийн ангид 22 иргэн гуравдугаар сарын хугацаанд суралцах болно.

Нийслэлийн Залуучуудын хөгжлийг дэмжих төвийн дэргэдэх Мэдээллийн технологийн сургалтын төв нь 72 компьютертой гурван сургалтын танхим, Инкубатор төвөөс бүрдэх бөгөөд 2017 онд нийт 1500 орчим залуучуудыг мэдээллийн технологийн чиглэлээр үнэ төлбөргүй сургаснаас, 20 иргэнийг инкубатор төвөөр дамжуулан бойжуулж, 150 гаруй залуучуудыг нарийн мэргэжил эзэмшүүлж, 45 залууг ажлын байранд холбож ажилласан юм гэж Нийслэлийн Залуучуудын хөгжлийн газраас мэдээллээ.

ЭХЭМҮТ-д эрүүл саруул амаржсан эх эмнэлгийн цонхоор унаж амиа хорлосон харамсалтай хэргийн шалтгааныг шалгаж байна. Энэ сарын нэгэнд буюу Хүүхдийн баярын өдрийн 06 цагийн орчимд уг хэрэг гарчээ. Амиа алдсан 27 настай бүсгүй тавдугаар сарын 26-нд төрсөн бөгөөд эмнэлэгт 4-5 хоног сахиуртай байжээ. Гэвч сахиур нь түүнийг ийм үйлдэл хийснийг мэдэлгүй, унтаж байсан бололтой. Болсон явдлыг нягтлан шалгаваас ар гэрийн ямар нэг дарамт шахалт байхгүй, хүүхэд нь эрүүл саруул төрсөн, юуны учир амиа хорлох болсон нь тодорхойгүй байна. Хэргийн шалтгааныг тодруулахаар Баянгол дүүргийн цагдаагийн нэгдүгээр хэлтэст шалгаж байгаа юм.

Нийслэлийн нутаг дэвсгэрт үйлдэгдсэн хохирол ихтэй хулгайлах гэмт хэргийг Хулгайлах гэмт хэрэгтэй тэмцэх хэлтсийн алба хаагчид шуурхай илрүүлжээ.

2017 оны аравдугаар сард Баянзүрх дүүргийн нутаг дэвсгэрт оршин суух иргэн Э-ийн гэрээс 200 орчим сая төгрөгний үнэтэй, алтаар бүрсэн эмээл, 2018 оны дөрөвдүгээр сард Баянзүрх дүүргийн нутаг дэвсгэрт оршин суух иргэн О-ийн гэрээс 60 орчим сая төгрөгний алт мөнгөн эдлэл алдагдсан хэргүүдийг илрүүллээ.

Мөн 2017 оны аравдугаар сард “Чансаа” дэлгүүрийн 50 орчим сая төгрөгний бараа, материалыг бүлэглэн хулгайлсан гурван эмэгтэйг илрүүлэн шалгав. Тэдний хоёр нь өмнө нь хулгайлах гэмт хэрэг үйлдэж ял шийтгэгдэж байсан нь тогтоогджээ.

Улаанбаатар хотын Ерөнхий менежер бөгөөд Захирагчийн ажлын албаны дарга тушаалаар Нийслэлийн нийтийн тээврийн үйлчилгээний хот доторхи болон хот орчмын чиглэлд явдаг дунд багтаамжийн автобус, троллейбусаар үйлчилгээ эрхлэгч аж ахуйн нэгжүүдийн үйл ажиллагаанд түвшин тогтоох, шалгалт явууллаа. Ажлын хэсгийн бүрэлдэхүүн, шалгалтын удирдамж, түвшин тогтоох шалгалт явуулах журмыг батлан дүнг нэгтгэн Ерөнхий менежерийн Зөвлөлийн хурлаар хэлэлцүүллэв.

Тээврийн байгууллагуудад явуулсан түвшин тогтоох шалгалтын дүнг баталгаажуулах тухай тушаалаар “бүрэн хангалттай” үнэлгээтэй зургаа, “хангалттай” үнэлгээтэй 13, “хангалтгүй” үнэлгээтэй нэг, нийтийн тээврийн үйлчилгээ эрхлэх нөхцөл шаардлагыг хангахгүй нэг аж ахуйн нэгжийн үнэлгээг баталгаажуулсан байна.

“Бүрэн хангалттай” үнэлгээтэй дүгнэгдэж, салбартаа мөрдөгдөх стандартыг хэрэгжүүлэгч байгууллагаар шалгарсан аж ахуйн нэгжид Улаанбаатар хотын Ерөнхий менежер бөгөөд Захирагчийн ажлын албаны дарга батламж гардуулж амжилт хүсэв.