Month: May 2018

Нийслэлд хийгдэж буй бүтээн байгуулалтын ажлын хүрээнд Толгойтын авто замыг Орбитын авто замтай холбосонтой уялдуулан Сонгинохайрхан дүүргийн 1 дүгээр хорооны иргэдийн зорчих эрэлтэд үндэслэж ХО:8 “Найрамдал зуслан-Саппоро-3 дугаар эмнэлэг” чиглэлийн замналд өөрчлөлт оруулан үйлчилгээг 2018 оны зургаадугаар сарын 4-ний өдрөөс эхлүүлэхээр төлөвлөөд байна. Иймд иргэд та бүхэн доорх зураглалын дагуу зорчилтоо төлөвлөнө үү.

Үйлчилгээтэй холбоотой санал хүсэлтийг 70044040 болон 11323176 дугаарын утсаар 24 цагийн турш хүлээн авах болно.

Өнөөдөр Тамхитай тэмцэх өдөр тохиож байна. 2000 оноос хойш тамхины хэрэглээ ихээхэн буурчээ. Гэсэн хэдий ч энэ үзүүлэлт нь зүрх судасны болон халдварт бус өвчний улмаас нас барж буй хүмүүсийн тоог бууруулахад гойд нөлөө үзүүлэхгүй байна. Энэ тухай өнөөдөр Дэлхийн эрүүл мэндийн байгууллагаас /ДЭМБ/ нийтэлсэн илтгэлд дурджээ.

ДЭМБ-ын мэдээлснээр, тамхинаас болж жилд 7 сая хүн амиа алдаж байна. Тамхи татдаг хүмүүсийн тоо 2000 оноос хойш 20-27 хувь хүртэл буурсан хэдий ч энэ байдлаараа 2015 он гэхэд нийт тамхи татдаг хүмүүсийн тоог 30 хувиар бууруулах зорилгодоо хүрч чадахгүй байж магадгүй гэж мэргэжилтнүүд болгоомжилж байна.Үүний нэг шалтгаан нь хүн амын өсөлт юм.

Тамхины идэвхтэй болон идэвхгүй хэрэглээ нь зүрх судасны өвчин тэр дундаа зүрхний шигдээс болон цус харвах өвчнөөр өвчлөх үндсэн шалтгаан болдог байна. Зүрх судасны өвчний улмаас жил бүр 17,9 сая хүн хорвоог орхиж байна.

“Тамхи татах нь хорт хавдар болон уушгины өвчин тусахад хүргэдэг гэдгийг олон хүн мэддэг хэдий ч зүрх судасны өвчин үүсгэдэг гэдгийг тэр болгон мэдээд байдаггүй” гэж ДЭМБ-ын ерөнхий захирал Тедрос Адханом Гебрейесус хэлжээ.

Баярын арга хэмжээ маргааш буюу зургаан сарын 01-нд Сүхбаатарын талбайд 09.00-17.00 цагийн хооронд үргэлжлэх бөгөөд албан ёсны нээлт 11.00 цагт болно. Баярын хөтөлбөрт хүүхдэд зориулсан урлагийн наадам, хөгжөөнт тоглоом, бичил амьтны хүрээлэн зэрэг багтсан бөгөөд Ерөнхий найруулагчаар УДЭТ-ын найруулагч С.Болд-Эрдэнэ ажиллаж байгааг Нийслэлийн соёл урлагийн газар (НСУГ)-ын дарга Ж.Дамдинсүрэн хэллээ.

Эх үрсийн баярын өдөр автомашин улсын дугаарын хязгаарлалт үйлчлэхгүй. Мөн Сүхбаатарын талбайн баруун болон зүүн талын автозамыг 09.00-17.00 цагийн хооронд хаахыг зохион байгуулагчид онцлов. Баярын өдрүүдэд цаг агаар хэт халж, хуурайших төлөвтэй тул хүүхдээ наршихаас сэргийлэх, ногоон бүсэд амарч, зугаалж яваа тохиолдолд ил гал гаргахгүй, гал түймрийн аюулаас урьдчилан сэргийлэхийг НОБГ-ын Гамшгаас урьдчилан сэргийлэх хэлтсийн дарга Г.Нэргүй анхааруулаа. Түүнчлэн хүүхдүүдэд ил задгай борлуулж буй, наранд хэт халсан бүтээгдэхүүн авч өгөхгүй байх, тоглоом дээр хүүхдээ тоглуулах бол хөдөлмөрийн аюулгүй байдлыг хангах шаардлагатайг НМХГ-аас сануулсан юм.

“Монгол хүүхдүүд” баярын арга хэмжээний үеэр Нийслэлийн цагдаагийн газрын 700 албан хаагч Сүхбаатарын талбай, Үндэсний цэцэрлэгт хүрээлэн, Үндэсний соёл амралтын хүрээлэнд хэв журмыг сахиулах чиглэлээр ажиллана. Харин НМХГ-ын 150 албан хаагч Сүхбаатарын талбайд хүнсний аюулгүй байдалд хяналт тавих юм. Баярын арга хэмжээний үеэр бага насны хүүхэд эцэг эхээсээ төөрөх тохиолдол цөөнгүй бүртгэгддэг. Тиймээс Сүхбаатарын талбайд төөрсөн хүүхдийг түр хамгаалах асрыг байрлуулах, хүүхдүүдэд эцэг, эхийн нэр, утасны дугаарыг бичих бугуйвчийг тараахаар төлөвлөсөн байна.

Аймаг орон нутгаа хөгжүүлэхэд иргэн бүрийн оролцоо маш чухал. Өмнөговьчууд 2018 оныг Бүтээн байгуулалтын жил болгон онцолсон. Иргэд, аж ахуйн нэгж, байгууллагууд бүтээн байгуулалтад идэвхитэй оролцож байна. Улсын тэргүүний Нэгдүгээр сургуулийн хамт олон гадаа талбайдаа “ЭРДЭМ ТӨГӨЛ”-ийг байгуулжээ. Тухайлбал 280 метр хашааг сольж, 500 ширхэг мод тарьж, зүлэгжүүлэлт, цэцгийн мандал, сүүдрэвчүүдийг хийсэн байна. Уг бүтээн байгуулалтын ажлыг Өмнөговь аймаг дахь Капитрон банк 24,3 сая төгрөгөөр санхүүжүүлэн хамтран ажиллажээ.

Нийслэлийн Засаг даргын Тамгын газар нь Германы олон улсын хамтын ажиллагааны нийгэмлэгтэй хамтран “Нийслэлийн хөгжлийн бодлоготой хөрөнгө оруулалтын төлөвлөлтийг уялдуулах нь” сэдэвт сургалтыг өчигдөр зохион байгууллаа. Сургалтад нийслэлийн нутгийн захиргааны байгууллагын төлөвлөгч, эдийн засагч нар хамрагдсан. Семинарыг нээж Нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа үг хэлэв.

Сангийн яамны Эдийн засгийн бодлогын газрын дарга Г.Батхүрэл Монгол Улсын эдийн засаг нийгмийг 2019 онд хөгжүүлэх үндсэн чиглэлийн талаар болон улсын эдийн засгийн 2019 оны төлвийн талаар танилцуулгыг хийсэн. Мөн Сангийн яамны Хөрөнгө оруулалтын газрын мэргэжилтэн Ж.Дэлгэржаргал Монгол Улсын төсвийн хөрөнгө оруулалтын өнөөгийн байдал, 2019-2020 оны төлөвлөлтөд анхаарах асуудлуудыг танилцууллаа. 2018 онд Монгол Улсын төсвийн тухай хуулийн дагуу нийслэлд 193.8 тэрбум төгрөгийн 210 төсөл, арга хэмжээ хэрэгжихээр батлагдсан. Энэхүү хөрөнгө оруулалтын дийлэнх хэсэг нь боловсролын салбарт хэрэгжих бөгөөд 34 цэцэрлэг, 52 сургуулийн барилга нь 2019-2020 онд ашиглалтад орсноор 2020 он гэхэд 3 ээлжээр хичээллэдэг сургуулийг 2 ээлжид бүрэн шилжүүлэх юм.

Мөн Нийслэлийн Засаг даргын Тамгын газрын Бодлого, төлөвлөлтийн хэлстийн дарга Г.Өлзийбаяр Нийслэлийн эдийн засаг нийгмийг 2019 онд хөгжүүлэх үндсэн чиглэлийн төслийг боловсруулахад анхаарах зүйлс, тус хэлтсийн ахлах мэргэжилтэн Ж.Эрдэнэчимэг Нийслэлийн хөрөнгө оруулалтын өнөөгийн байдал, 2019 оны хөрөнгө оруулалтын төлөвлөлтөд анхаарах зүйлийн талаар танилцуулгыг тус тус хийлээ.

Германы олон улсын хамтын өжиллагааны нийгэмлэг, Нийслэлийн ЗДТГ-тай хамтран хэрэгжүүлж буй “Төсвийн хөрөнгө оруулалтыг сайжруулснаар эрчим хүчний үр ашгийг нэмэгдүүлэх нь” төслийн II үе шатны хүрээнд 2018-2021 оны хооронд нийслэлийн 20 гаруй сургууль, цэцэрлэгийн дулааны алдагдлыг бууруулах, дулаан техникийн их засварын ажлыг хийж гүйцэтгэнэ. Мөн хөрөнгө оруулалтын удирдлага, бодлогын орчин, засаглалыг сайжруулах ажлын хүрээнд, нийслэлийн Хөрөнгө оруулалтын төлөвлөлт, хэрэгжилтийг боловсронгуй болгох аргачлалыг боловсруулах юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Цагдаагийн ерөнхий газрын Санхүү, аж ахуйн албанаас харьяа нэгжүүдийн үйл ажиллагааг сурталчилах нээлттэй хаалганы өдөрлөг, цагдаа дотоодын цэргийн алба хаагчдын дүрэмт хувцасны дэлгүүрийн нээлтийн үйл ажиллагаа болж Цагдаагийн ерөнхий газрын дарга, цагдаагийн хурандаа С.Баатаржав болон Зөвлөлийн гишүүдийн төлөөлөл, алба хаагчид оролцлоо. Энэ үеэр цагдаагийн албаы үйл ажиллагаанд ашиглаж байгаа маүин техник, тусгай хэрэгсэл, дүрэмт хувцасны үзэсгэлэн гаргаж иргэдэд танилцуулсан юм.

Энэ онд тус албанаас цагдаа, дотоодын цэргийн анги, байгууллагуудын нийт 31 барилга, 5 их засварийг хөрөнгө оруулалтаар, “Сүүж-Уул” амралт, сэргээн засах сувилалын их засварын ажлыг өөрсдийн нөөц, бололцоо ашиглан иж бүрэн завсарлаж , 2018 оны улсын төсвийн хөрөнгө оруулалтаар нэг бүр нь 77,7 сая төгрөгийн төсөвт өртөг бүхий 27 хяналтын постын байрыг барих бөгөөд 14 постын барилгын ажлын гүйцэтгэгч шалгарч, гэрээ байгуулагдсан. 13 постын гүйцэтгэгч шалгаруулах тендер шалгаруулалтын дагуу гүйцэтгэлд хяналт тавин ажиллаж байна. Мөн HYUNDAI UNIVERSE маркийн 5 ширхэг автобусыг түрээсээр авч, автобусыг хамгаалалтын бүрэн тоноглолоод байна.

Нийслэлийн Засаг дарга бөгөөд Улаанбаатар хотын Захирагч С.Батболд “Хамгаалах бүс, хамгаалах малгайн хэрэглээг хэвшүүлснээр зам, тээврийн аюулгүй байдлыг сайжруулах” төслийг хэрэгжүүлж эхэллээ. Энэ төсөл нь нийслэл Улаанбаатар хотын ард иргэдийг халдварт бус өвчин, осол гэмтлийг бууруулах чиглэлээр авч хэрэгжүүлж байгаа чухал санаачлага болж байна.

Төслийн нээлтийн танилцуулгын талаар Нийслэлийн ЗДТГ-ын Хэвлэл мэдээлэл, олон нийттэй харилцах хэлтсийн дарга Э.Дагиймаа, Нийгмийн бодлогын хэлтсийн хэлтсийн дарга М.Эрдэнэжаргал, Нийслэлийн Эрүүл мэндийн газрын Нийгмийн эрүүл мэндийн хэлтсийн дарга О.Энхзаяа, Замын цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал болон “Замын аюулгүй байдлын төв” ТББ-ын тэргүүн О.Батжаргал нар мэдээлэл өглөө.

Дэлхийн Эрүүл мэндийн байгууллагын элч, Нью-Йорк хотын Захирагч асан Майкл Блүүмбергийн санаачлагаар дэлхийн хотууд анх 2017 оны 5 дугаар сард “Эрүүл хотуудын түншлэл”-д нэгдсэн байдаг. Тиймээс халдварт бус өвчин, осол гэмтлийг бууруулах зорилгоор нэгдэн энэхүү төслийг хэрэгжүүлж байгаа юм.

Төсөл хэрэгжиж эхлэхтэй холбоотой иргэдийн дунд хийсэн судалгаагаар зам тээврийн хөдөлгөөнд оролцож байгаа жолооч болон зорчигчид 93.8 хувь бүсээ бүсэлдэг байна. Урд суудалд зорчигчид 73 хувь бүсэлдэг бол тээврийн хэрэгслийн арын суудалд суудаг зорчигчид 82-87 хувь нь бүс бүсэлдэггүй гэж судалгаа гарчээ.

Манай улсад сүүлийн 10 жилийн байдлаар зам тээврийн осол 6.6 дахин өссөн бөгөөд нийт дуудлагын 94.4 хувь нийслэл хотод, 5.6 хувь нь орон нутагт бүртгэгджээ. Мөн Замын цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал хэлэхдээ “2017 оны байдлаар зам тээврийн осолд өртөгсдийн 76 хувь нь хамгаалах бүс хэрэглэсэн, 4 хувь хэрэглэсэн эсэх тодорхойгүй амь насаа алдсан, 20 хувь суудлын бүс хэрэглээгүй байсан. Зам тээврийн осолд өртсөн хүүхдүүдийн хувьд өнгөрсөн онд 55 хүүхэд осолд өртөж амь насаа алдсан. Үүнээс 47 хүүхэд суудлын бүс хэрэглээгүй буюу эцэг эхтэйгээ авто машинд зорчиж яваад орон нутгийн замд амиа алдсан байна” гэлээ. Замын цагдаагийн албанаас хүүхдэд суудлын бүс, зориулалтын суудалд суулгаагүй бол зөрчлийн тухай хуулиар 20 мянган төгрөг, хүн тээвэрлэх журам зөрчсөн бол 50 мянган төгрөгөөр торгох арга хэмжээ авч байгаа юм.

Авто машин 100км/цаг хурдтай явж байгаа нөхцөлд зорчигч хамгаалалтын бүсээ зүүсэн бол амь нас бүрэн аврагдах боломжтой. Манай улсад орон нутгийн замд 80 км/цаг хурдтай явахыг зөвшөөрдөг. Тиймээс иргэд замын хөдөлгөөнд оролцохдоо хамгаалалтын бүсийг хэрэглэж хэвшүүлэх нь энэхүү төслийн гол зорилго юм.

Төсөл 18 сарын хугацаанд хэрэгжиж энэ хүрээнд Улаанбаатар хот болон хот орчмын замд зорчиж буй тээврийн хэрэгслийн жолооч, зорчигч нарын дунд хамгаалах бүсний хэрэглээний түвшинг тодорхойлох судалгаа, хамгаалан бүсний ач холбогдлыг иргэд олон нийтэд сурталчлах, мэдээлэл сурталчилгааг олон нийтэд хүргэнэ. Төслийн албан ёсны нээлт 6 дугаар сарын 6-ны өдөр болох юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Цус судлалын үндэсний төв, Цагдаагийн ерөнхий газар хамтран “Халуун цуст цагдаа” үйл ажиллагааг дөрөв дахь жилдээ зохион байгууллаа.

Энэ үйл ажиллагаанд цагдаагийн 25 алба хаагч сайн дурын цусны донор болж, цусаа хандивласан юм. Хүн бүрийн хандивласан цус бусдын амь насыг аврах буянтай сайхан үйлс юм.

Таны автомашины улсын дугаар 5 болон 0 гэсэн тоогоор төгссөн бол энэ сардаа багтаан татвар төлөх ёстой. Татвар төлөх хугацаа сүүлийн өдөр өнөөдөр дуусч буй тул та үүргээ биелүүлж амжиж татвараа төлнө үү. Тээврийн хэрэгслийн албан татвар, төлбөр төлөхөд ердөө гурван минут л хангалттай. Тээврийн хэрэгсэл эзэмшигч та тээврийн хэрэгслийн нэгдсэн цахим үйлчилгээний /www.smartcar.mn/ цахим хуудасаар нэвтэрч, QPay үйлчилгээг ашиглан төлөх боломжтой болсон. Албан татвар, төлбөрийг онлайнаар хэрхэн төлөх тухай зааврыг доорхи видеоноос харна уу.