Month: May 2018

Улсаа аврах үндэсний хөдөлгөөний гишүүд өнөөдөр Оюутолгой компанийн төв байранд мэдэгдэл хийлээ. Тус хөдөлгөөний удирдах зөвлөлийн дарга, Оюутолгой компанийн ажлыг дүгнэх, санал дүгнэлт гаргах ажлын хэсгийн гишүүн А.Эрдэнэбаяр “Бид Оюутолгой компанийн гүйцэтгэх захирал Армандо Торресд албан бичиг өгч байна. Учир нь ажлын хэсгийн хурлын үеэр Геологийн төв лаборатори болон Оюутолгой компаниуд нууц гэрээ хийснийг ажлын хэсгийн хуралдааны үеэр бид олж мэдсэн. Нууцын гэрээний улмаас Геологийн төв лаборатори дээжийн шинжилгээ болон сорьцын хариу, бусад дүгнэлтийг Мэргэжлийн хяналтын ерөнхий газарт үзүүлэх боломжгүй гэсэн хариу өгсөн. Энэ нь хууль бус үйлдэл юм” гэж хэлэв.

Харин тус хөдөлгөөний ерөнхий зохицуулагч Б.Жагар “Зэсийн баяжмалд хяналтын дээжийн шинжилгээ сорьц авдаг. Зэсийн баяжмалд 24 төрлийн элемент байдгаас Монгол Улс зэс, алт, мөнгө, гэсэн гурван элементийг л үнийг нь тооцож үлдсэн 21 элементэд ямар нэгэн үнэлэлт шинжилгээ хийхгүй байна” гэв.

Автотээврийн үндэсний төв ТӨҮГ-аас тээврийн хэрэгслийн техник, хяналт, үзлэг оношлогоог нийслэлийн Баянзүрх, Сонгинохайрхан, Баянгол гэсэн гурван төвд хийж гүйцэтгэдэг. Тус төв олон улсын хүүхдийн эрхийг хамгаалах өдрийг угтан жил бүр “Хүүхэд-аюулгүй тээвэр” өдөрлөгийг зохион байгуулдаг байна. Тус өдөрлөгийн хүрээнд өнөөдөр тээврийн хэрэгслийн техникийн хяналтын үзлэг, татвар, даатгалын үйлчилгээнд хамрагдсан жолооч нарын хүүхдүүдэд гарын бэлэг гардуулжээ.

Энэ талаар Сонгинохайрхан дүүргийн техникийн хяналтын үзлэгийн төвийн дарга С.Давааням хэлэхдээ “Төрийн болон хувийн хэвшлийн сургуулиуд, иргэд, жолооч, эцэг эхчүүд хүүхдийнхээ аюулгүй байдлыг хангаж, шаардлага, стандартын дагуу тээвэрлэх нь чухал болоод байна. Улаанбаатар хотод хүүхэд тээвэрлэлтийн аюулгүй байдлыг хангах үүднээс тээврийн хэрэгслийн бүрэн бүтэн байдлыг хангах, ард иргэд, жолооч нарт хүүхдийг хэрхэн аюулгүй тээвэрлэх талаар заавар зөвлөгөөг танилцууллаа. Зөвхөн Сонгинохайрхан дүүргийн техникийн хяналтын үзлэгийн төвөөр жилдээ 100 мянга орчим тээврийн хэрэгсэл үзлэг, оношлогоонд орж, техникийн үйлчилгээ авдаг” гэлээ.

Дашрамд дуулгахад, өнгөрсөн жил энэхүү арга хэмжээг ерөнхий боловсролын сургуулиудтай хамтран тээврийн хэрэгслүүд аюулгүй, стандарт шаардлага хангасан эсэх, ямар стандарт шаардлагын дагуу тоноглогдсон байх талаар таниулан сурталчилж байсан аж.

Япон улсын Токио хотноо энэ сарын 30-наас зургадугаар сарын хоёрны өдрүүдэд “Азийн Галын дарга нарын олон улсын холбоо”-ны 30 дугаар хурал болж байна.

Тус хуралд Онцгой байдлын ерөнхий газрын Гал түймэртэй тэмцэх газрын дарга, дэд хурандаа Ц.Нямбаяр тэргүүтэй манай төлөөлөгчид оролцож байна. Хурлын үеэр олон улсын хамтарсан гал унтраах, аврах ажиллагааны дадлага сургууль болж буй юм. Тус дадлага сургуульд нийслэлийн Онцгой байдлын газраас нийслэлийн Аврах 105 дугаар ангийн аврагч, ахлах ахлагч А.Энхмэнд, Баянгол дүүргийн Онцгой байдлын хэлтсийн аврагч гал сөнөөгч, ахлах ахлагч Ж.Мөнхбаяр нар оролцож олон улсын аврагчидтай туршлага солилцож байгаа юм.

Сонгуулийн ерөнхий хороо (СЕХ)-ноос ирэх сарын 24-нд зарим аймаг, сумын ИТХ-ын төлөөлөгчийн нөхөн болон дахин сонгуулийг зохион байгуулах болжээ. Энэ талаар өнөөдөртус хорооноос мэдээлэл хийв.

Монгол цэргийн музейн нэрэмжит “Цэнгээнт бүжгийн шилдэг хос-2018” шалгаруулах тэмцээн энэ жил хоёр дахь удаагаа боллоо. Энэ сарын 30-ны өдөр Монгол цэргийн музейн үзэсгэлэнгийн танхимд Улаанбаатар цэргийн хүрээний Зэвсэгт хүчний 5 анги, байгууллагын 19 хос бүжигчин ур чадвар, авьяас билгээ сорин шилдгүүдээ шалгаруулсан юм.

Улсын хэмжээнд зохион байгуулагдаж буй “Мотоциклын бүртгэл” нэгдсэн арга хэмжээг Өмнөговь аймаг “Мотоцикль бүхий өрх бүрт хамгаалах малгай аян”-аар үргэлжлүүлж байна. Уг аяны хүрээнд Гурвантэс сум дахь цагдаагийн тасгаас нийт 500 иргэнд стандартын хамгаалалтын малгайг үнэ төлбөргүй өглөө.

Арга хэмжээ тус аймгийн ГХУСАЗСЗ-ийн даргын баталсан удирдамж, төлөвлөгөөний дагуу наймдугаар сарын 15-ны өдрийг хүртэлх хугацаанд бүх сумдад үргэлжлэн зохион байгуулагдах юм.