Month: March 2018

Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооноос байгуулагдсан Мэргэжлийн боловсрол, сургалтын тухай хуулийн хэрэгжилттэй танилцаж, цаашид авч хэрэгжүүлэх арга хэмжээний талаар санал дүгнэлт, шийдвэрийн төсөл боловсруулж тус Байнгын хороонд танилцуулах үүрэг бүхий Ажлын хэсгээс өнөөдөр (2018.03.05) Мэргэжлийн боловсрол, сургалтын үндэсний зөвлөлийнхэнтэй уулзлаа.

Уулзалтыг нээж УИХ-ын гишүүн, Ажлын хэсгийн ахлагч Б.Саранчимэг Ажлын хэсгийн зорилгын талаар танилцуулав.

Мэргэжлийн боловсрол, сургалтын үндэсний зөвлөлийн дэд дарга, Монголын ажил олгогч эздийн нэгдсэн холбооны гүйцэтгэх захирал Х.Ганбаатар уулзалтын эхэнд хийсэн танилцуулгадаа Мэргэжлийн боловсрол, сургалтын тухай хууль хэрэгжсэнээр чадамжид суурилсан мэргэжлийн боловсролын сургалт болон Мэргэжлийн боловсрол, сургалтын үндэсний зөвлөлийн тогтолцоог бий болгосон талаар, мөн мэргэжлийн боловсролыг дэмжих төрийн дэмжлэг, бодлогын талаар дурьдлаа.

Түүнчлэн, Үндэсний зөвлөл яаж байгуулагддаг,ямар чиг үүрэгтэй ажилладаг, үйл ажиллагаагаа хэрхэн явуулдаг талаар мэдээлэл өгсөн.

Танилцуулгатай холбогдуулан УИХ-ын гишүүн, Ажлын хэсгийн ахлагч Б.Саранчимэг, УИХ-ын гишүүн, Ажлын хэсгийн гишүүн Д.Гантулга нар үг хэлж, байр сууриа илэрхийлэв.

Дараа нь Мэргэжлийн боловсрол, сургалтын үндэсний зөвлөлийн дэд дарга Х.Ганбаатар, зөвлөлийн гишүүн, Мэргэжлийн боловсрол, сургалтын үндэсний ассоциацийн тэргүүн Б.Мишигжав, Барилгачдын холбооны ерөнхийлөгч М.Батбаатар нар саналаа хэлж, Ажлын хэсэг, Байнгын хорооны ажлын албаныхантай санал солилцсон.

Уулзалтад Мэргэжлийн боловсрол, сургалтын үндэсний зөвлөлийн гишүүд болох Авто замчдын холбооны ерөнхийлөгч Т.Бямбаа, Хөдөлмөр, нийгмийн хамгааллын яамны Мэргэжлийн боловсрол, сургалтын хэлтсийн дарга А.Халиунаа, Мэргэжлийн боловсролын сургалтын Үнэлгээний төвийн дарга Ц.Батдорж нарын албаны хүмүүс оролцлоо гэж УИХ-ын Хэвлэл мэдээлэл, олон нийттэйхарилцах хэлтсээс мэдээлэв.

Дэлхийн Монголчууд намыг улсын бүртгэлд бүртгүүлэх тухай Г.Тэмүүжин нарын хүсэлтийг Улсын Дээд шүүх өнөөдөр хянан хэлэлцлээ.

Хүсэлт гаргагчаас ирүүлсэн баримт болон намын дүрэм, мөрийн хөтөлбөр нь Үндсэн хууль, Улс төрийн намын тухай хууль, Хуулийн этгээдийн улсын бүртгэлийн тухай хуульд нийцсэн хэмээн Дээд шүүх үзэж, тус намыг улсын бүртгэлд бүртгэж гэрчилгээ олгохоор шийдвэрлэжээ. Ингэснээр уг нам нь улс төрийн үйл ажиллагаа явуулах эрхтэй болж байгаа тул Үндсэн хууль, Улс төрийн намын тухай хууль болон бусад хуульд нийцүүлж үйл ажиллагаагаа явуулахыг Дээд шүүх даалгасан аж.

Дэлхийн Монголчууд нам нь улсын бүртгэлд бүртгэлтэй 28 дахь нам болж байна.

БОАЖ-ын сайд Н.Цэрэнбат Ерөнхий боловсролын сургуулиудын дунд, ахлах ангийн сурагчдыг байгаль дэлхийгээ хамгаалах үйлсэд уриалан дуудаж, цаашлаад гэр бүлийнхэндээ эх дэлхийгээ хайрлах, хамгаалах үйлсийг түгээн, таниулах зорилготойгоор “Ногоон паспорт” санаачилгыг эхлүүллээ.

Энэхүү санаачилгын хүрээнд сурагчид эко клуб байгуулан нэгдэж, жилд байгаль хамгаалах чиглэлээр 12 ажил хийх юм байна. Сурагч бүрт олгогдох “Ногоон паспорт” нь 12 хуудастай байх ба хийсэн ажлынхаа тоогоор хүүхдүүд хуудастаа тэмдэглэгээ хийлгэж, жилийн эцэст дүгнүүлэх аж.

Энэхүү санаачилгын хүрээнд БОАЖЯ, тус яамны харьяа Цэнгэг усны нөөц, байгаль хамгаалах төв, Нийслэлийн боловсролын газар, Нийслэлийн байгаль орчны газартай хамтран ерөнхий боловсролын сургуулиудын дунд, ахлах ангийн сурагчдын дунд “Хаягдал зай цуглуулах хайрцагны загвар зохион бүтээх уралдаан” зарлаж байгаагаа хэвлэлийн бага хурал зарлан мэдээллээ.

Энэ талаар БОАЖЯ-ны харьяа Цэнгэг усны нөөц, байгаль хамгаалах төвийн захирал Г.Номин хэлэхдээ “Ногоон пасспорт” санаачилгын хүрээнд зарлаж буй энэхүү уралдаанд Нийслэлийн Ерөнхий боловсролын дунд, ахлах ангийн сурагчид эко клуб байгуулан оролцох боломжтой. Хүүхдүүд маань хаягдал зай цуглуулах хайрцаг хийснээрээ бусдадаа хогоо ангилж хаях дадал, зуршлыг бий болгох эхлэлийг тавьж байгаагаараа онцлог юм.

Уралдаанд оролцох бүтээлийг 2018.03.15-ны өдрийн 17.30 цагаас өмнө БОАЖЯ-ны харьяа Цэнгэг усны нөөц, байгаль хамгаалах төвд хүлээн авч, ажлын хэсэг 1, 2 болон тусгай байрыг шалгаруулна. Нэгдүгээр байрт орсон клуб 1 сая, II байр эзэлсэн клуб 500 мянган төгрөг, III байр эзэлсэн клуб тусгай шагнал хүртэнэ. “Ногоон пасспорт” санаачилгад нэгдэж, идэвхитэй оролцсон 1 эко клубыг жилийн эцэст ижил төрлийн үйл ажиллагаа явуулдаг гадны улсын эко клубын туршлагатай танилцуулах үйл ажиллагааг зохион байгуулахаар бэлтгэж байгаа. Үүнээс гадна эко клубын хүүхдүүд маань “Ногоон пасспорт” санаачилгын хүрээнд ямар ажил хийхээ өөрсдөө тодорхойлох бөгөөд энэ сарын 17-нд “Олон улсын хүүхдийн Найрамдал” төвд болох Эко клубуудын чуулга уулзалтаар өөрсдийн дуу хоолойг, шийдвэр гаргах түвшнийхэнд хүргэх боломж нээгдэх юм” хэмээсэн.

Энэхүү санаачилгыг БОАЖ-ын сайд Н.Цэрэнбат Засгийн газрын мөрийн хөтөлбөрийн дагуу хүүхэд залуусын хүмүүжил, төлөвшилд эергээр нөлөөлөх бодлогын хүрээнд байгаль хамгаалах ажилд бүх нийтийн оролцоог хангах, ёс заншлаа дээдэлсэн, байгальд ээлтэй зөв дадлыг төлөвшүүлэх ажлын хүрээнд эхлүүлж байгаа юм байна. Тэрбээр байгаль орчин, аялал жуулчлалын салбарт “Хандлагаа өөрчилье” багц ажлыг эхлүүлэх бөгөөд өсвөрийн байгаль хамгаалагчдыг бэлтгэх “Ногоон паспорт” санаачилга нь нэгээхэн хэсэг нь аж.

2018 оны 03 дугаар сарын 04-ний шөнийн 02 цаг 10 минутад Багануур дүүргийн 5 дугаар хорооны Залуусын хэсэгт гал гарч байна гэсэн дуудлага ирсэн байна.

Дуудлагын дагуу дүүргийн Онцгой байдлын хэлтсийн Гал түймэр унтраах аврах 64 дүгээр ангийн нэгдүгээр салааг очиход иргэн Э, Ц нарын гэр /бранк/ шатсан байдалтай байжээ.

Аврагчид утаанд угаартсан иргэн Д /56 настай эмэгтэй/-г аварч, нийт 50 сая төгрөгний эд хөрөнгийг авран хамгаалсан юм.

Дуудлагын дагуу Онцгой байдлын хэлтсийн нийт 32 алба хаагч, 3 автомашинтайгаар зургаан цаг гаруй хугацаанд үүрэг гүйцэтгэж, галыг бүрэн унтраалаа гэж Багануур дүүргийн Онцгой байдлын хэлтсээс мэдээллээ.

Банк бус санхүүгийн байгууллага /ББСБ/-ууд хувь нийлүүлсэн хөрөнгөө нэмэгдүүлэх талаар идэвхтэй ажиллаж, дүрмийн сангийн бүртгэл, бүтэц, хувь нийлүүлэгчдийн бүрэлдэхүүнд өөрчлөлт оруулах зөвшөөрлийг Санхүүгийн зохицуулах хорооноос хүсэн хууль, журмын дагуу шийдвэрлүүлсээр байна.

2018 оны 2 дугаар сарын 27-ний өдөр МУ-ын Эрчим хүчний сайд Ц.Дваасүрэн ОХУ-ын Эрчим хүчний сайд А.В.Новактай уулзаж, хоёр улсын эрчим хүчний салбар дахь хамтын ажиллагааны чиглэлээр ярилцлаа. Уулзалтад Оросын талаас ОХУ-ын Эрчим хүчний орлогч сайд А.Б.Яновский, ЭХЯ-ны Олон улсын хамтын ажиллагааны газрын захирал, орлогч дарга нар болон яамны бусад удирдах албан тушаалтнууд, Монголын талаас Эрчим хүчний сайд Ц.Даваасүрэн, харьяа газрын дарга нар, “Диспетчетрийн үндэсний төв” ХХК, “Цахилгаан дамжуулах үндэсний сүлжээ” ТӨХК-ийн төлөөлөл оролцов.

Уулзалтаар Эрчим хүчний салбарт хамтран ажиллах “Монгол Улсын болон ОХУ-ын Засгийн Газар хоорондын хэлэлцээр”-ийг ойрын үед байгуулахаар тохиролцож, хамтын ажиллагааг хөгжүүлэхээр Оросын олон компани хамтран ажиллах сонирхолтой байгааг Эрчим хүчний сайд А.В.Новак онцоллоо.

Мөн энэ үеэр Монгол, Оросын эрчим хүчний салбарт хамтран ажиллах ажлын хэсгийн анхдугаар хуралдаан болж, цаашдын ажиллагааны чиглэлийг тодорхойлсон.

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, Сонгинохайрхан дүүргийн Гэр бүл, Хүүхэд, Залуучуудын хөгжлийн хэлтэс хамтран Монголын оюутны эрхийн өдрийг угтаж “Эерэг залуусын манлайлал” сэдэвт нээлттэй хэлэлцүүлгийг энэ сарын 2-нд “Чингис СоСэ” олон улсын их сургуулийн номын санд зохион байгууллаа.

Хэлэлцүүлгийн үеэр Залуучуудын хөгжлийг дэмжих тухай хууль, “Нийслэлийн залуучууд” дэд хөтөлбөр болон дүүргийн Залуучуудын хөгжлийг дэмжих дэд хөтөлбөрийг танилцуулж, дүүргийн залуучуудын хөгжлийн төвийн бүтэц, үйл ажиллагааны талаарх мэдээллийг хүргэлээ.

Мөн Нийслэлийн Залуучуудын хөгжлийн газрын холбогдох мэргэжилтнүүд нийслэлийн “Залуучуудын хөгжлийг дэмжих төв”-ийн танилцуулгыг хийж, эерэг сэтгэлгээний сургалт зохион байгуулав. Нээлттэй хэлэлцүүлэгт “Чингис Соосэ” Олон Улсын Их Сургуулийн оюутны холбоо, “Мандах бүртгэл”, “Ач” Анагаах Ухааны Их сургууль, “Шинэ Анагаах Ухаан“ Дээд Сургууль, “Монос” Эм Зүйн Шинжлэх Ухааны Их Сургууль, зэрэг сургуулиудын оюутны холбоод хамтран нийт 250 гаруй оюутан залуучуудын оролцоог ханган ажиллав.

Хэлэлцүүлгээр цаашид залуучуудын хөгжил, оролцооны чиглэлээр хэрхэн хамтран ажиллах талаар болон оюутан, залуучуудад тулгамдаж буй асуудлын хүрээнд харилцан санал солилцож, Сонгинохайрхан дүүргийн их сургуулиудын оюутны төлөөллөөс бүрдсэн 23 гишүүнтэй дүүргийн “Оюутны холбоо”-г байгуулж, уулзалт хэлэлцүүлгээс гарсан оюутан залуучуудын санал, санаачилгыг дэмжин, хамтран ажиллахаар болов гэж нийслэлийн Залуучуудын хөгжлийн газраас мэдээллээ.

Монгол Улсын Засгийн газрын 2009 онд “Оюу толгой” ХХК-тай байгуулсан хөрөнгө оруулалтын гэрээний зарим үүрэг биелэгдээгүй асуудлаар Авлигатай тэмцэх газрын Мөрдөн шалгах хэлтэс эрүүгийн хэрэг үүсгэн шалгаж эхэллээ.

“Оюу толгой” ХХК нь Засгийн газартай байгуулсан гэрээний дагуу цахилгаан станц барьж ашиглалтад оруулах, Монгол Улсаас цахилгаан эрчим хүч авах үүргээ биелүүлээгүй бөгөөд одоог хүртэл БНХАУ-аас цахилгаан эрчим хүч импортоор авч хэрэглэж байна. Иймээс Хөрөнгө оруулалтын гэрээний 7.3 дахь заалтыг түдгэлзүүлсэн холбогдох эрх бүхий албан тушаалтнуудад Авлигатай тэмцэх газар эрүүгийн хэрэг үүсгэн шалгаж байна.

Авлигатай тэмцэх газрын Мөрдөн шалгах хэлтэс “Жаст групп” ХХК-ийн “Стандарт” банкнаас авсан зээлд “Эрдэнэт үйлдвэр” баталгаа гаргасан асуудлыг шалгаж байна.

Шалгалтын явцад хэргийн цар хүрээ нэмэгдэж байгаа тул Ажлын хэсэг томилогдож нарийвчилсан мөрдөн шалгах ажиллагааг явуулж байна. “Жаст групп”-ийн ерөнхийлөгч асан Ш.Батхүү нарын нэр бүхий хүмүүст холбогдуулан шалгаж байгаа хэргийн хөөн хэлэлцэх хугацаа дуусах болоогүй бөгөөд гэм буруутай этгээдүүд ял завших боломжгүй.

Уг хэргийн мөрдөн шалгах ажиллагааг прокурорын хяналтан дор явуулж байна.