Month: January 2018

Categories
мэдээ улс-төр

“Газрыг улсын тусгай хэрэгцээнд авах тухай” УИХ-ын тогтоолын төслийг өргөн мэдүүллээ

Монгол Улсын Их Хурлын дарга М.Энхболдод өнөөдөр (2018.01.04) “Газрыг улсын тусгай хэрэгцээнд авах тухай” УИХ-ын тогтоолын төслийг УИХ-ын гишүүн, Засгийн газрын гишүүн, Барилга, хот байгуулалтын сайд Х.Баделхан өргөн мэдүүлэв.

Монгол Улсын нэгдэн орсон Консулын харилцааны тухай Венийн конвенц, Монгол Улс, Бүгд найрамдах Хятад Ард Улс хоорондын 1986 оны консулын конвенцийг тус тус үндэслэн хоёр улсын Засгийн газар Бүгд Найрамдах Хятад Ард Улсаас Монгол Улсын Дорноговь аймгийн Замын-Үүд суманд суух Ерөнхий консулын газрыг нээх асуудлыг дипломат шугамаар 2012 онд харилцан тохиролцож нээсэн байна.

Дээрх конвенциудын дагуу талууд нөгөө талынхаа дипломат төлөөлөгчийн газруудын албан хэрэгцээнд зориулж газар олгох, барилга байгууламжаа барьж байгуулахад нь бүх талын дэмжлэг харилцан үзүүлэх үүрэгтэй байдаг. Энэ дагуу хятадын талаас Ерөнхий консулын газрын барилга байгууламжийг барихад зориулан 3-4 га газар авах хүсэлт тавьсныг Дорноговь аймаг, Замын-Үүд сумын эрх бүхий байгууллагуудад уламжлан 2 га газрыг олгуулах шийдвэрийг орон нутгийн түвшинд гаргуулсан байна.

Газрын тухай хуулийн 16 дугаар зүйлийн 16.1.4 дэх заалтад заасны дагуу гадаад улсын дипломат болон консулын газарт олгох газар нь улсын тусгай хэрэгцээний газарт хамаардаг, мөн хуулийн 17 дугаар зүйлийн 17.1.2, 17.1.3 дахь заалтад заасны дагуу Улсын Их Хурал гадаад улсын дипломат болон консулын газарт олгох газрыг улсын тусгай хэрэгцээнд авах, түүний хэмжээ, зааг, ашиглах журмыг тогтоодог зохицуулалттай. Дээрх хууль, эрх зүйн үндэслэл, практик шаардлагын дагуу “Газрыг улсын тусгай хэрэгцээнд авах тухай” УИХ-ын тогтоолын төслийг боловсруулжээ хэмээн УИХ-ын Хэвлэл мэдээлэл, олон нийттэй харилцах хэлтэс мэдээллээ.


Categories
мэдээ нийгэм

Эрүүл мэндийн тухай хуульд нэмэлт, өөрчлөлт оруулах тухай хуулийн төслүүдийг өргөн мэдүүллээ

Монгол Улсын Их Хурлын дарга М.Энхболдод өнөөдөр (2018.01.04) Эрүүл мэндийн тухай хуульд нэмэлт, өөрчлөлт оруулах тухай, Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төслүүдийг УИХ-ын гишүүн Д.Дамба-Очир өргөн мэдүүллээ.

Эрүүл мэндийн тухай хуульд нэмэлт, өөрчлөлт оруулах тухай хуулийн төсөл

Хуулийн төсөлд Монгол Улсын иргэнийг элэг, ходоод, улаан хоолой, умайн хүзүү, хөхний, уушиг, бүдүүн, шулуун гэдэсний хорт хавдрыг эрт илрүүлэх үзлэг, шинжилгээ, оношилгоонд хамруулах зохицуулалт бүхий шинэ зүйлийг дараахь байдлаар хуульд нэмж оруулахаар тусгасан байна. Үүнд:

-40, түүнээс дээш насны, элэгний В, С вирус тээгч, элэгний архаг үрэвсэл, хатууралтай иргэнийг ЭХО, хавдрын маркер, биохимийн шинжилгээнд жилд 1-2 удаа;

-40, түүнээс дээш насны иргэнийг ходоод, улаан хоолойн хорт хавдрыг эрт илрүүлэх үзлэг, шинжилгээнд жилд 1 удаа;

-30-60 насны эмэгтэйг умайн хүзүү, хөхний хорт хавдрыг эрт илрүүлэх үзлэг, шинжилгээнд 3 жилд 1 удаа;

-50, түүнээс дээш насны иргэнийг уушигний хорт хавдрыг эрт илрүүлэх үзлэг, шинжилгээнд жилд 1 удаа, бүдүүн, шулуун гэдэсний хорт хавдрыг эрт илрүүлэх үзлэг, шинжилгээнд хоёр жилд 1 удаа.

Хавдрын байдлаас хамаарч хорт хавдарт өртөж буй нас харилцан адилгүй байна. Тухайлбал, умайн хүзүүний хорт хавдрын өвчлөлийн 96% буюу дийлэнх нь 30-аас дээш насны эмэгтэйчүүд өвдөж байгаа бол элэгний хорт хавдраар 40-өөс дээш насны элэгний вирусийн халдвартай хүмүүс, ходоодны хорт хавдраар 40-өөс дээш насныхан хамгийн их өвдөж байна. Иймд умайн хүзүүний хорт хавдрын тухайд 30-аас дээш насны эмэгтэйчүүдийг, элэгний хорт хавдрын тухайд элэгний вирусийн халдвар тээгч болон 45-аас дээш насны хүмүүсийг, ходоодны хорт хавдрын тухайд 40-өөс дээш насны бүх хүнийг эрт илрүүлэх үзлэг, шинжилгээнд хамруулахаар зорилтот бүлгийн хүн амаар сонгосохоор тусгажээ.

Түүнчлэн хуулийн төсөлд хорт хавдрыг эрт илрүүлэх үзлэг, шинжилгээ, оношилгоонд иргэн бүрийг хуульд заасны дагуу хамруулах үүргийг эрүүл мэндийн байгууллагад, үзлэг, шинжилгээ, оношилгооны зардлыг Эрүүл мэндийн даатгалын сан хариуцахаар тусгасан аж. Харин иргэн үзлэг, шинжилгээ, оношилгоонд товлолт хугацаанд хамрагдах үүрэгтэй байхаар, товлосон хугацаанд үзлэг, шинжилгээ, оношилгоонд хамрагдаагүй иргэн дараагийн эрт илрүүлгийн үзлэг, шинжилгээний болон нарийн оношилгооны зардлыг өөрөө хариуцдаг байхаар хуульчлахаар хуулийн төсөлд тусгажээ.

Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төсөл

Хуулийн төсөлд Эрүүл мэндийн даатгалын тухай хуулийн “Даатгуулагчид үзүүлэх эрүүл мэндийн тусламж, үйлчилгээ” гэсэн 9 дүгээр зүйлд “Эрүүл мэндийн даатгалын сангаас зардлын төлбөрийг нь хариуцах эрүүл мэндийн тусламж, үйлчилгээний багцад хорт хавдрыг эрт илрүүлэх үзлэг, шинжилгээ, оношилгоог нэмэж оруулах”-аар, харин хорт хавдрыг эрт илрүүлэх үзлэг, шинжилгээ, оношилгоонд товлосон хугацаанд хамрагдаагүй даатгуулагчийн дараагийн эрт үзлэг, шинжилгээний болон нарийн оношилгооны зардлыг эрүүл мэндийн даатгалын сангаас санхүүжүүлэхгүй байхаар тус тус тусгасан байна гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ нийгэм

Зөвийг дадал болгоцгооё

Сүхбаатар дүүргийн Засаг даргын Тамгын газрын хамт олон хог хаягдлыг анхан шатанд нь ангилан ялгах дадлыг хэвшүүлэх, өөрчлөлтийг өөрсдөөсөө эхлүүлэхээр Тамгын газрын байрандаа болон хорооддоо хог ангилан ялгах савыг байрлуулжээ.

Хог хаягдлыг дахин боловсруулах боломжтой буюу цаас, ундаа, усны хуванцар сав, хөнгөн цагаан лаазны хэмжээ нийт хог хаягдлын 30 орчим хувийг эзэлдэг.

Тиймээс манай хамт олон ангилан ялгасан хог хаягдлынхаа хуванцар савыг түүгээр амьдралаа залгуулдаг хүмүүст, цаасаа ариун цэврийн цаасны үйлдвэрт өгөхөөр боллоо.
Цэвэрлэгээ үйлчилгээний ажилтнуудын ажил хөнгөрч, тээвэрлэлтийн давтамж ч буурна гэж харж байгаа аж.

Мөн цаашид хог хаягдлыг анхан шатанд нь ангилж сурах дадал хэвшлийг олгох зорилгоор сургууль, цэцэрлэгүүдийн хүүхэд багачуудад сонирхолтой байдлаар сургалт явуулах юм байна.

Categories
мэдээ нийгэм

Баянзүрх авто вокзалыг “Тэнгэр плаза” худалдааны төв рүү нүүлгэжээ

Image result for “Тэнгэр плаза” худалдааны төвЗүүн вокзал буюу Баянзүрх авто вокзал нь Чулуун-Овооны тойрогт байрших “Тэнгэр плаза” худалдааны төвийн хоёр давхарт шилжин очиж байгаа аж.

Иймд Дорнод, Хэнтий, Сүхбаатар, Говьсүмбэр, Өмнөговь, Дорноговь аймаг, Дорноговь аймгийн Замын-Үүд сум, БНХАУ-ын Эрээн хотын чиглэлд улс, хот хоорондын зорчигч тээврийн үйлчилгээг 2018 оны 1 дүгээр сарын 08-ны өдрөөс эхлэн “Тэнгэр плаза” худалдааны төвийн гадна талбайгаас явуулахаар болжээ.

Дээрх чиглэлүүд рүү явах тендертэй том оврын автобус, такси бүгд шилжих юм байна.Зорчигчдынхоо тав тухтай байдлыг хангах, мөн авто вокзал нь техникийн хяналтын үзлэгийн төвтэйгөө хамт байсныг ийнхүү тусгаарлаж байгааг албаныхан хэллээ.

Categories
онцлох-нийтлэл туслах-ангилал

“Эрдэнэт” үйлдвэрийг зуун хувь төрийн өмч болгох шийдвэрийг Засгийн газар гаргажээ

Related image

Дээд шүүхээс гарсан шийдвэрийн дагуу “Эрдэнэт” үйлдвэрийн ТУЗ 51/49 хувийн төлөөлөлтэйгөөр хуралдсан билээ. Үүнтэй холбогдуулан Засгийн газар өнөөдөр ээлжит бусаар хуралдаж, “Эрдэнэт” үйлдвэрийн асуудлыг хэлэлцжээ.

Хуралдаанаар УИХ-аас баталсан “Эрдэнэт” үйлдвэрийг 100 хувь төрийн өмчит үйлдвэрийн газар болгох, агуулга бүхий 23 дугаар тогтоолыг хэрэгжүүлэх нь зүйтэй гэсэн шийдвэр гаргасан байна.

Categories
мэдээ нийгэм

Авлигын эсрэг шүүх байгуулах тухай хуулийн төслийг цахим хуудаснаа байршуулжээ

Related image

Украйны Ерөнхийлөгч Петр Порошенкогийн яаравчлуулж буй Авлигын эсрэг дээд шүүхийн тухай хуулийн төслийг тус улсын Парламент цахим хуудаснаа байршуулсан байна.

Уг хуулийн төслийн танилцуулгад “Авлигын эсрэг дээд шүүх нь Украйн улсын шүүхийн тогтолцооны тусгай шүүх мөн бөгөөд түүний үндсэн чиг үүрэг нь хуулийн зарчмуудын хүрээнд авлига болон түүнтэй холбоотой гэмт хэрэгт шүүн таслах ажиллагаа явуулахад оршино” гэж бичжээ. Харин уг хуулийн төслийг Парламент 2017 оны 12 дугаар сарын 21-ний өдөр хэлэлцээд буцаасан байна.

Цаашид Европын холбоо, Олон улсын валютын сан Украйн улсад туслалцаа үзүүлэхдээ авлигын эсрэг шүүх байгуулах ажлыг шаардлагынхаа гол нөхцөл болгон тавьж байгаа юм байна.

Зарим шүүмжлэгчид энэ шүүхийг авлигатай тэмцэх чиг үүргээс өөр чиг үүрэг гүйцэтгэж, бусдад дарамт төвөг учруулж болзошгүй аюултай болохыг сануулж байна. Харин Ерөнхийлөгчийн Тамгын газрын зүгээс энэ шүүхийн хянан шийдвэрлэх хэргийн харъяалалд зөвхөн Авлигын эсрэг үндэсний товчооны илрүүлэн шалгаж буй хэргийг бус бусад шүүхийн байгууллагын адил Ерөнхий прокурорын газар, Үндэсний цагдаагийн газар, Аюулгүй байдлын албанаас илрүүлэн шалгаж буй хэргийг хянан шийдвэрлэнэ гэж мэдээлжээ.

Categories
мэдээ нийгэм

Цагдаагийн албан хаагч галын аюулаас хүний амь аварчээ

Ховд аймаг дахь Алтай сумын цагдаа, цагдаагийн дэд ахлагч Ж.Маргад-Эрдэнэ галын аюулаас эрдэнэт хүний амь аварчээ. Тус сумын Тахилт багт иргэн Н-ын гэр өнгөрсөн оны арван хоёр дугаар сарын 25-26-нд шилжих шөнийн 02:00 цагийн үед шатаж, гал түймэр гарсан байхыг мэдэж, цаг алдалгүй ажилласнаар гэрт байсан хоёр эмэгтэйн амийг эрсдэхээс аварч чадсан байна.

Эрдэнэт хүний амь насыг эрсдэх аюулаас аварч, цагдаагийн алба хаагчийн, иргэний үүргээ нэр төртэй биелүүлсэн алба хаагчдаа баяр хүргэж, амжилт хүсье.

Categories
мэдээ улс-төр

Банкны тухай хууль, Төв банкны тухай хууль маргаан дагуулж эхэллээ

УИХ-ын чуулганы өнөөдрийн хуралдаанаар Төв банкны тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийлээ. Хуралдаанд оролцсон гишүүдийн 63.5 хувь нь уг хуулийн төслийг эцсийн хэлэлцүүлэгт шилжүүлэхийг дэмжив. Хэлэлцэж байгаа асуудалтай холбогдуулж УИХ-ын гишүүд асуулт, асууж, үг хэллээ.

УИХ-ын гишүүн Т.Аюурсайхан “Ханшийг хариуцах эзэнтэй болж байгаа. Монголбанкны Ерөнхийлөгчийн цалингийн хэмжээг УИХ тогтоодог байхаар төсөлд тусгамаар байна.Монголбанкны Ерөнхийлөгч төрийн өндөр албан тушаалтны зэрэг дэвд нийцсэн цалин хангамж авна гэж хуулийн төсөлд тусгасан нь холбогдох хууль тогтоомжийг зөрчөөд байна. Яагаад хууль зөрчсөн төсөл оруулж ирж байгаа юм бэ” гэлээ.

УИХ-ын гишүүн Д.Дамба-Очир “Монголбанкны Ерөнхийлөгч гэдэг Монгол Улсын санхүү зах зээл, мөнгөний бодлогыг удирдаж байдаг амаргүй албан тушаал.Ийм учраас цалин мөнгө нь ажилдаа зохицож байх ёстой гэж бодож байна” гэв.

УИХ-ын гишүүн Д.Хаянхярваа “Сүүлийн үед Төвбанкны хууль орж ирж байгаатай холбоотой улстөржсөн зүйлүүд их яригдаж байна. Тэртээ тэргүй алдаа оноонд тодорхой шалтгаанууд байсан гэдгийг ард түмэн ойлгож байгаа.Тиймээс асуудалд зөв талаас нь хандаж хэрэгтэй. Төвбанк Засгийн газраас болон санхүүгийн хувьд хараат бус байх ёстой гэж ярьдаг. Хараат бус байлгая гэвэл өнөөдрийн оруулж ирж байгаа төслийг дэмжих хэрэгтэй.Төвбанкан дээр орж ирсэн хяналт шалгалтын дэмжлэгийн заалтуудыг дэмжих ёстой. Арилжааны банканд тавих гэж байгаа хяналтад шүүмжлэлтэй хандаж байгаа нь харагдаж байна.Арилжааны банкны дотоод асуудалд орох гээд байна, банкнуудыг хаах гээд байгаа гэсэн болгоомжлол байх шиг байна. Мэдээж хэрэг Төвбанкны ерөнхийлөгч ямар нэг арилжааны банкны ерөнхийлөгчтэй таарахгүй байлаа гээд банкийг нь хаачихгүй шүү дээ” гэлээ

УИХ-ын гишүүн Ж.Энхбаяр “Н.Золжаргал Ерөнхийлөгчийн үед Монгол Улс валютын нөөцөө шавхсан. Дэмжих зээлүүдийг арилжааны банкнуудаас илүү аж ахуйн нэгжүүдэд олгосон.Аж ахуйн нэгжүүдэд 800 гаруй тэрбум төгрөг зээлээр өгсөн байгаа юм. Үнэ тогтворжуулах нэрийн дор Монголбанк олон зээлүүдийг олгосон. Үр дүнд нь Монгол төгрөгийн худалдан авах чадвар муудсан.Энэ бүгдийг засахын тулд хуулийн өөрчлөлт орж ирж байгаа. Төлбөрийн чадвартай банканд зээл олгож болно гэсэн байна.Харин аж ахуйн нэгжид олгох зээлийг яах юм бэ? Аж ахуйн нэгжид олгогдсон зээлүүд эргэн төлөгдсөн үү?Ямар эрх хэмжээний хүрээнд Монголбанкны Ерөнхийлөгч аж ахуйн нэгжүүдэд зээл олгосон бэ? Монголбанк Засгийн газрын түрийвчний үүрэг гүйцэтгэж байна” гэв.

УИХ-ын гишүүн О.Баасанхүү “Манайхан популизмаас салмаар байна. Монголбанкны Ерөнхийлөгч чадамжтай байх ёстой.Монголбанкны Ерөнхийлөгч Nokia барьчхаад гадны хүмүүстэй хэд арван сая долларын гэрээ хэлэлцэл хийвэл инээдтэй шүү дээ.Их хурлын дарга солигдвол Монголбанкны Ерөнхийлөгч солигддог байдлыг болиулмаар байна” гэлээ.

УИХ-ын гишүүн З.Нарантуяа “Төвбанкны мөнгөний бодлогын зөвлөлийг бүрдүүлж байгаа процедурт шүүмжлэлтэй хандаж байна. Бид нар их сүр болж байж, мөнгөний бодлогын зөвлөлийг батлах гэж байна. Мөнгөний бодлогын зөвлөл хамгийн чухал шийдвэр гаргадаг байгууллага байх ёстой. Зээлийн мэдээллийн сангаа ажиллуул. Зээлийн батлан даалтын сангаа ажиллуулах хэрэгтэй байна. Банкин дээрх хяналт шалгалтыг сайжруулж, хороотой болох нь зөв. Гэхдээ хяналт шалгалтын зөвлөлд санхүүгийн зохицуулах хорооны дарга гэх зэрэг хүмүүсийг оруулах хэрэгтэй. Тэгэхгүйгээр Монголбанкны аппаратын хэдэн хүн энэ зөвлөлд багтчихаад хяналт хийнэ гэвэл худлаа” гэв.

УИХ-ын гишүүн Ц.Даваасүрэн: –Эдийн засгийн өсөлт айл гэрт шууд хүрэхэд хүндрэлтэй нөхцөл үүссэн. Энэ нь валютын ханштай холбоотой. Төв банкны тухай хуульд тус банкны Ерөнхийлөгчийн гаргасан тушаал нууц гээд оруулаад өгчихсөн байсан. Ингээд тус банкны Ерөнхийлөгч нь гадныханд үйлчилсэн. Монгол төгрөгөө унагаж, гадны хөрөнгө оруулалттай компаниудад тусалсан. Тиймээс энэ хуульд өөрчлөлт оруулахдаа Төв банкны Ерөнхийлөгчийн дураараа гаргадаг шийдвэрийг хэрхэн хязгаарлаж өгсөн бэ? Бүх шийдвэрээ нууц гэж хуулиар хамгаалуулаад, өөрийнхөө хоёр найзад байр өгсөн байсан. Гишүүд Монголбанкнаас мэдээлэл өгөх гэхээр өгдөггүй. УИХ-тай хэр холбогдох вэ?

УИХ-ын гишүүн Д.Дамба-Очир: –Төв банкны Ерөнхийлөгч замбараагүй үйлдэл гаргуулахгүй байх үүднээс хязгаарлалт хийж өгсөн. Өөрөөр хэлбэл Төв банкны Ерөнхийлөгч дангаараа нууц шийдвэр гаргах боломжийг хаасан. Мөнгөний бодлогыг жил бүр УИХ баталдаг асуудал хэвээрээ байгаа. Дээрээс нь санхүүгийн зах зээлийн байдлыг тайлагнадаг нь хэвээрээ. УИХ Монголбанкийг хянадаг нь мөн хэвээрээ байгаа. Хариуцлагын хувьд өмнө нь байсан хамгаалалтыг авсан. Монголбанкны Ерөнхийлөгч, дэд Ерөнхийлөгч адилхан хариуцлага эдэлнэ” гэлээ.

УИХ-ын гишүүн Ж.Ганбаатар: –Банкны хуулиудыг хэлэлцэхэд Хөрөнгө оруулалтын банкны хуулийг хамтатган хэлэлцэх байсан гэж бодож байна. Төв банкны гол үүрэг бол арилжааны банкууд дээр асуудал үүсэхээс өмнө зохицуулж байх ёстой. Энэ нь хамгийн чухал үүрэг. Төв банкны удирдлагуудын эрх ямба нэмэгдсэн үү.

Монголбанкны Ерөнхийлөгч Н.Баяртсайхан: –Өнгөрсөн жилүүдэд арилжааны банкуудыг дампууруулахгүйн тулд 600 гаруй тэрбум төгрөгийг гаргасан байдаг юм. Алдагдлыг зөвхөн татвар төлөгчдөд үүрүүлэхгүйн үүднээс шинэ механизм гарч ирж байгаа. Энэ нь Тогтворжуулалтын сан юм. Энэ хууль батлагдсанаар банкны салбарт шинэчлэл гарна.

Хууль зүй, дотоод хэргийн сайд Ц.Нямдорж: -Таалагдсан танил талын сүлжээт аж ахуй нэгжид 6 хувийн зээл олгодог. Үүнийг таслан зогсоох, хатуу хориглосон заалт энэ хуульдаа оруулсан юм уу. Хоёрдугаарт, сонгууль дөхөөд ирэхээр Төв банк улс төрийн үйл ажиллагаа явуулдаг шүү.

Д.Дамба-Очир: –Өмнө нь олгогдож байсан төсөл, хөтөлбөр гэх мэт зүйлд хаа хамаагүй зээл олгодог байсныг бүгдийг хаасан. Одоо бол Засгийн газар, арилжааны банкинд л зээл олгох заалтыг үлдээсэн.

Б.Пүрэвдорж: –УИХ-ын гишүүдийн улс төржсөн асуултад Д.Дамба-Очир хариулах ёсгүй. Яагаад гэвэл Д.Дамба-Очир Монголбанкинд зээлийн өртэй. Та тэр зээлээ эрсдэлийн сангаар хаалгасан ч байж мэднэ. Тиймээс УИХ-ын гишүүдийн асуултад би хариулна. Ц.Даваасүрэн гишүүн асуулаа. Ардчилсан нам Засгийн газар авч байхад ам.долларын ханш 1450 төгрөг байсан. Ингээд 1950 төгрөг байхад нь хүлээлгэн өгсөн. Гэвч Н.Баяртсайхан Ерөнхийлөгчийн улс төржсөн үйлдлээс болж ам.доллар 2450 төгрөгт хүрсэн. Одоо Ц.Нямдорж гишүүний асуултад хариулъя. Монголбанк зээл өгдөггүй байсан. 2000 онд Алт хөтөлбөрийн хүрээнд Монголбанк шууд зээл олгож эхэлснийг 2006 оны хамтарсан Засгийн газар зогсоосон. Ж.Ганбаатар гишүүний асуултад хариулъя. Монголбанкны Ерөнхийлөгч ажлаасаа өгснөөс хойш хоёр жилийн турш амьдралын түвшнийг нь бууруулахгүй гэсэн заалт орж ирснийг гишүүд ичээд болиулсан юм. Монголбанкны ажилтнууд бүрэн эрхээ хэрэгжүүлсний төлөө хуулийн хариуцлага хүлээхгүй гэснийг байнгын хороо болиулсан. Энэ заалт нь байхгүй болонгуут Монголбанкныхан хамтын удирдлагын зарчмыг оруулж ирсэн. Хамтын удирдлагын зарчмаар бол Монголбанкны Ерөнхийлөгч өөрийнхөө эрх мэдлийн хүрээн дэх хүмүүсээр буруу зөрүү шийдвэр гаргуулчхаад, хариуцлагаас бултах оролдлого хийж байгаа. Тэгэхээр энэ хуулийг дэмжихгүй.

Categories
мэдээ спорт

Харумафүжи Д.Бямбадоржийг 500000 иенээр торгожээ

Image result for Харумафүжи Д.Бямбадорж

Бусдын биед халдаж, танхайрсан хэргээр ёкозүна Харумафүжи Д.Бямбадоржид Тоттори хотын шүүхээс 500 мянган иений торгууль ногдуулжээ. 500 мянган иен нь монгол мөнгөөр тооцвол 10 орчим сая төгрөгтэй тэнцэнэ. Харумафүжи өнгөрсөн аравдугаар сарын 26-нд Тоттори хотод өөрөөсөө зиндаа доогуур, нутаг нэгт сүмочийн биеийг гэмтээсэн хэрэгт холбогдон өөрийн хүсэлтээр зодог тайлсан билээ.

Categories
онцлох-нийтлэл туслах-ангилал

Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төслийг эцсийн хэлэлцүүлэгт шилжүүллээ

УИХ-ын чуулганы өнөөдрийн үдээс өмнөх нэгдсэн хуралдаанаар Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслийн анхны хэлэлцүүлгийг хийлээ.

Эдийн засгийн байнгын хорооны санал, дүгнэлтийг УИХ-ын гишүүн Б.Баттөмөр танилцууллаа.

Тус байнгын хороогоор дээрх хуулийн төслүүдийн анхны хэлэлцүүлгийг хийх үеэр УИХ-ын гишүүн Б.Баттөмөр, Б.Жавхлан, Я.Содбаатар нар Монголбанкны үндсэн зорилт болон “төрийн мөнгөний бодлого” гэсэн нэр томьёог өөрчлөх шаардлагагүй тул одоогийн хуулийн зохицуулалтыг хэвээр үлдээх, Монголбанк нь Мөнгөний бодлогын болон Банкны хяналт шалгалтын хороотой байх, тэдгээрийн эрх зүйн байдлыг хуульчлах, хянан шалгагч нарын бүрэн эрхийг Төв банк /Монголбанк/-ны хуульд хэвээр үлдээх, төрийн мөнгөний бодлогын үндсэн чиглэлийг дунд хугацаагаар батлах, УИХ-аас Монголбанкинд зөвлөмж, чиглэл өгөхийг хориглох, төрийн мөнгөний бодлогын хэрэгжилт, зээлийн байдлын талаар УИХ-д зургаан сар тутамд танилцуулах заалтууд, түүнчлэн Монголбанкны удирдлагын эрх зүйн баталгааг нэмэгдүүлсэн заалтуудыг төслөөс хасах зэрэг санал гаргасныг хуралдаанд оролцсон гишүүдийн олонхи дэмжжээ.

Байнгын хорооны санал, дүгнэлттэй холбогдуулан УИХ-ын гишүүд асуулт асууж, хариулт авсан.

Тухайлбал УИХ-ын гишүүн Ц.Даваасүрэн, 1435 төгрөгтэй тэнцэж байсан ам.долларын ханш 2400 болж өссөнөөс, импортоор авч буй бараа бүтээгдэхүүний үнэ 70 хувиар нэмэгдсэн. Үүнээс болж ард түмний амьдрал хүндрэн, ядуурал бий болсон. Энэ бол Төв банкны бодлогын алдаа байсан. Төв банкны өмнөх ерөнхийлөгч нууц тушаал гаргаж, аж ахуйн нэгжүүдэд зээл олгосон. Долларын ханшийг өсгөн гадны хөрөнгө оруулагчдад үйлчилсэн гэж хэллээ. Тиймээс Монголбанкны ерөнхийлөгч дураараа шийдвэр гаргадаг явдлыг хязгаарлах ёстой гээд төв банкны ерөнхийлөгч, дэд ерөнхийлөгчтэй хариуцлага тогтолцоог хэрхэн тусгасан талаар тодруулсан.

Мөн УИХ-ын гишүүн Ц.Нямдорж, Монголбанк аж ахуйн нэгжүүдэд зургаан хувийн хүүтэй зээл олгодог байсан хэмээгээд түүнийг хатуу хориглосон заалт оруулсан уу, Монголбанк сонгууль дөхөөд ирэхээр улстөрийн үйл ажиллагаа явуулж мөнгө цацдаг явдлыг таслан зогсоох заалт орсон уу гэж асуусан.

Эдийн засгийн байнгын хорооны дарга Д.Дамба-Очир, өнгөрсөн жилүүдэд гарсан замбараагүй байдлыг цэгцлэн, эдийн засгийн хямралд хөтөлдөг асуудлыг гаргахгүйн үүднээс Монголбанкны ерөнхийлөгчийн ганцаараа нууцлалын зэрэгтэй шийдвэр гаргадаг явдлыг хязгаарлахаар хуулийн төсөлд тусгаад байгаа гэлээ. Монголбанкинд хуучин байсан Хяналтын зөвлөлөөс гадна Мөнгөний бодлогын зөвлөл ажиллаж, аливаа асуудлаар хамтын шийдвэр гаргаж байхаар төсөлд тусгаж, төв банкны ерөнхийлөгчийн эрх мэдлийг хумьсан аж.

Түүнчлэн Монголбанкны ерөнхийлөгч, дэд ерөнхийлөгчийн хүлээх хариуцлагын талаар тусгаж, арилжааны банкинд зээл олгодог байсныг хаан, зөвхөн Засгийн газар, арилжааны банкинд мөнгө олгодог байхаар тусгажээ. Ингэснээр Монголбанк өөр хэлбэрээр зээл олгохыг хориглосон хэмээн Эдийн засгийн байнгын хорооны дарга Д.Дамба-Очир хариулсан.

Хэлэлцэж буй асуудалтай холбогдуулан УИХ-ын гишүүн О.Батнасан, Ж.Ганбаатар, Б.Бат-Эрдэнэ, Я.Санжмятав, Д.Эрдэнэбат, Н.Оюундарь, Т.Аюурсайхан, Б.Пүрэвдорж, М.Билэгт, Д.Хаянхярваа, Б.Ундармаа нар асуулт асууж, байр сууриа илэрхийлсний дараа зарчмын зөрүүтэй саналын томьёоллуудаар санал хураалт явуулж дуусан хуулийн төслүүдийг эцсийн хэлэлцүүлэгт бэлтгүүлэхээр Эдийн засгийн байнгын хороонд шилжүүллээ хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлээ.