.jpg.png)
Нийслэлийн төрийн захиргааны байгууллагаас 2017 оныг хууль эрх зүйн шинэчлэл, иргэдийн оролцооны жил хэмээн зарласан. Үүнтэй уялдуулж нийслэлийн Цэргийн штабаас Батлан хамгаалах хууль, тогтоомжийг иргэдэд сурталчлах, хэрэгжүүлэх зорилго тавин ажиллаж байна. Цэргийн албаны тухай хууль шинэчлэгдэн гарсантай холбогдуулан 2017 оны цэргийн тоо бүртгэлийг явуулах аж. Цэргийн бүртгэлийг жил бүр орон нутгийн төрийн захиргааны байгууллагууд эрхлэн гүйцэтгэж явуулдаг. Түүнчлэн 18-50 насны Монгол Улсын иргэн цэргийн алба хаасан, хаагаагүй эрэгтэйчүүд мөн бэлтгэл офицерууд 60 нас хүртэл бүртгүүлэх хуулийн заалттай байдаг.
Энэ жилийн бүтгэлийн ажил нийслэлийн Засаг даргын захирамжаар нийслэлийн есөн дүүрэг 152 хороонд нэгдүгээр сарын 4-20-ны өдрүүдэд зохион байгуулахаар болсон байна.
Нийслэлийн Цэргийн штабын дарга, Хурандаа Ж.Болдбаатар “Монгол Улсын Үндсэн хуульд тусгаар тогтносон улс өөрийгөө хамгаалах зэвсэгт хүчинтэй байна гэж заасан байдаг. Энэ бол үндэсний аюулгүй байдал, тусгаар тогтнолтой холбоотой чухал бүртгэл гэж үзэх хэрэгтэй. 18-50 насны бүхий л эрчүүдийг цэргийн алба хааж үүргээ биелүүлэх боломжийг хангаж өгөх, бэлтгэл ажлаа хангахын тулд энэхүү бүртгэл явагдаж байгаа. Өнгөрсөн онд иргэдийн зүгээс санаатай, санамсаргүй байдлаар бүртгэлд хамрагдаагүй үлдсэн хүмүүс байгааг үгүйсгэхгүй. Бүртгүүлээгүй үлдсэн хүмүүсийг торгуульгүй үлдээх чиглэл өгөөд байна. Цаашид санаатайгаар бүртгүүлээгүй үлдсэн тохиолдолд хуулийн дагуу арга хэмжээг авч ажиллана” хэмээлээ.
Нийслэлийн есөн дүүргийн Засаг даргын Тамгын газрын Цэргийн штабын дарга нар цэргийн тоо бүртгэлийн ажлын бэлтгэл бүрэн хангагдсан гэдгийг энэ үеэр хэлж байлаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Хөгжлийн банкийг тойрсон асуудал он дамжин яригдаж байна. Тус банкны санхүүг шалгах хоёр ч ажлын хэсэг ажиллаж буй. Засгийн газрын ажлын хэсэг дүгнэлтээ УИХ-д танилцуулж, хэлэлцүүлж буй. Харин УИХ-аас томилогдсон ажлын хэсгийг УИХ-ын гишүүн Ж.Энхбаяр ахалж буй. Тус ажлын хэсэг дүгнэлтээ олон нийтэд танилцуулахад бэлэн болжээ.
Төв банкны өчигдрийн зарласан ханшаар нэг ам.доллар 2489 төгрөг 53 мөнгөтэй тэнцэж байна. Харин “Найман шарга” валют арилжааны төвд нэг ам.долларыг 2490 төгрөгөөр худалдан авч 2493 төгрөгөөр арилжиж байна. Мөн арилжааны банкуудад нэг ам долларыг 2482-2486 төгрөгөөр худалдан авч, 2495-2496 төгрөгөөр арилжиж байна. Манай улсын бусад голлох валют болох ОХУ-ын рубль 43 төгрөгтэй тэнцэж байгаа бол, БНХАУ-ын юань 360 төгрөг 40 мөнгө, евро 2663 төгрөгтэй тус тус тэнцэж байна.
Хөдөлмөр нийгмийн зөвшлийн гурван талт үндэсний хороо хуралдан тогтоол баталж хөдөлмөрийн хөлсний доод хэмжээг 25 хувиар нэмж 240 мянган төгрөг болгохоор шийдвэрлэсэн билээ. Өчигдөрөөс эхлэн хэрэгжиж эхэлсэн энэхүү шийдвэртэй холбогдуулан хуульд заасан зарим нэг торгуулийн хэмжээ өсөх гэнэ.
Бүх нийтийн амралтын өдөр тохиож байгаатай холбогдуулан Монгол, Хятадын хилийн авто замын боомтууд дөрөв хоног амарлаа. Хилийн боомт, түүний дэглэмийн тухай хэлэлцээрийн 4.3-т заасны дагуу бүх нийтийн амралтын өдрүүдэд хилийн боомтууд амрахаар заасан байдаг юм. Харин өнөөдрөөс эхлэн хилийн боомт тогтсон хуваарийн дагуу хэвийн ажиллаж эхэлнэ.
Нийслэлийн агаарын бохирдлыг бууруулах зорилгоор энэ сарын 1-нээс буюу өчигдрөөс хүйтний улиралд гэр хорооллын айл өрхийн цахилгааны шөнийн тарифыг тэглэх шийдвэр гарсан. Гэвч уг шийдвэрийг хэрэгжүүлэх тухай тушаал холбогдох албанаас ирээгүй байгаа учир өнөөдөр дээрх шийдвэр хэрэгжиж эхлээгүй байгаа гэдгийг УБЦТС ТӨХК-өөс мэдээлж байна. Түүнчлэн шөнийн цахилгааныг тэглэх тухай тушаал ирсэн тохиолдолд дөрөвдүгээр сарын нэгнийг хүртэл 21.00-06.00 цагийн хооронд шөнийн цахилгаан үнэгүй болгох аж. Шөнийн цахилгаан үнэгүй хэрэглэх айл өрхүүдэд дараахь шаардлагыг тавьж байгаа ба үүнд, тухайн айл нь цахилгаан эрчим хүчний өргүй байх, шөнийн тарифтай электрон тоолууртай байх ёстой. Өдөр шөнийн тарифтай шөнийн тоолуур нь зах зээлд 60 мянгаар худалдаалдагддаг ажээ.
Хойд Солонгосын удирдагч Ким Жон Ун шинэ оны мэндчилгээ дэвшүүлэх үеэрээ тив хоорондын баллистик пуужингийн туршилтыг удахгүй хийхээ мэдэгдэл хийсэн байна.
Шинэ жилийн баяр, амралтын өдрүүдэд цагдаагийн байгууллагад 2,171 мэдээлэл бүртгэгдэж, гэмт хэргийн 68, зөрчлийн 1,278, согтуугийн 524, зам тээврийн ослын 301 мэдээлэл шалгажээ.