Month: April 2016

Categories
гадаад мэдээ

Газар хөдлөлтөөр 646 хүн амиа алджээ

Өмнөд Америкийн Эквадор улсад өнгөрөгч долоо хоногт 7.8 магнитудын газар хөдөлсөн. Тэгвэл газар хөдлөлтийн улмаас амиа алдагсдын тоо 646 болсон талаар Ерөнхийлөгч Рафаэль Корреа мэдэгдсэн аж.

Мөн гэнэтийн байгалийн гамшгийн уршгаар 130 хүн сураггүй алга болсон бөгөөд өнөөдрийг хүртэл эрэн хайх ажиллагааг үргэлжиж байна. Гамшгийн бүсэд 20 мянган гаруй цэрэг, гадаа болон сайн дурынхан ажиллаж, иргэдийг хайсаар байгаа юм. НҮБ тэргүүтэй олон улсын байгууллагууд тус улсад туслалцаа үзүүлжээ. Мөн дэлхийн 27 орноос тусламж ирсэн талаар Ерөнхийлөгч мэдэгдлийнхээ үеэр онцолсон байна.

Categories
мэдээ нийгэм

Шилжилт хөдөлгөөнийг ирэх долоо хоногт хаана

Ирэх зургадугаар сарын 29-ний өдөр товлогдсон УИХ-ын ээлжит сонгуультай холбогдуулан шилжилт хөдөлгөөнийг хуулийн дагуу санал авахаас 60 хоногийн өмнө буюу дөрөвдүгээр сарын 30-наас зогсоох учиртай. Өөрөөр хэлбэл, ирэх долоо хоногт шилжилт хөдөлгөөнийг зогсоох юм.

Тиймээс иргэд өөр аймаг сум, засаг захиргааны нэгж рүү шилжсэн бол бүртгэлээ дөрөвдүгээр сарын 30-наас өмнө хийлгэх шаардлагатай юм. Одоогоор шилжилт хөдөлгөөн хийсэн ч тухайн газартаа бүртгэлээ хийлгээгүй 11 мянган иргэн байна.

Өнөөдрийн байдлаар сонгуулийн санал авах 2091 хэсэг улс орон даяар байгуулагдаад байна. Мөн Монгол Улсын сонгогчдын нэрийн жагсаалтыг www.burtgel.gov.mn цахим хуудаст байршуулсан байгаа. Урьдчилсан байдлаар санал өгөх насны хоёр сая дөрвөн мянга 48 иргэний мэдээллийг байрлуулжээ. Иргэдийн хувьд зургадугаар сарын 29-нийг хүртэл Бүртгэл статистикийн ерөнхий газрын www.burtgel.gov.mn сайтад орж өөрийн бүртгэлийн мэдээллээ баталгаажуулна. Хэрэв зөрүүтэй мэдээлэл байвал оршин суугаа газрынхаа харьяа бүртгэл статистикийн хэлтэст хандаж зөрчлөө арилгуулна. Мөн Бүртгэл статистикийн ерөнхий газрын лавлах утас 1800 1890 дугаарт хандах юм.

Categories
мэдээ нийгэм

Эмч нарын хариуцлагын талаар хэлэлцүүлэг өрнүүлнэ

Эрүүгийн шинэ хуульд эмч алдаа гаргасан тохиолдолд хариуцлагыг нь өндөржүүлсэн билээ. Гэвч зарим эмч нарын зүгээс ажиллах орчин нөхцөлийг сайжруулаагүй, ачаалалтай, тоног төхөөрөмж тааруу нөхцөлд “шоронжсон” хууль хэрэгжүүлж байна хэмээн эсэргүүцсээр байгаа. Тэгвэл шинэ хууль, эмчийн хариуцлагын тогтолцооны асуудлаар салбарын яамнаас ирэх долоо хоногт хэлэлцүүлэг өрнүүлэхээр болжээ. Хуулийн байгууллагынхан, эмч нараас бүрдэх том хэмжээний хэлэлцүүлэг өрнүүлж асуудлыг шийдвэрлэх юм байна.

Дашрамд дуулгахад, өнгөрөгч мягмар гаригт л гэхэд Монголын эрүүл мэндийн ажилтны үйлдвэрчний эвлэлийн хорооныхон эмч нарын төлөөлөлтэйгөөр хэвлэлийнхэнд хандсан. Тэд Эрүүгийн шинэ хуулийн 15.1 дүгээр зүйлд “Эмнэлгийн мэргэжилтэн хүний эрүүл мэнд, амь насанд хохирол учруулсан тохиолдолд 1-3 жил эмчлэх эрхээ хасуулж, 20-80 сая төгрөгөөр торгох эсхүл 2-8 жил хорих ял эдэлнэ” гэж заасныг дурдсан юм. Орчин нөхцөл, ачааллыг нь тооцоололгүй хууль гаргасанд бухимдалтай байгаагаа илэрхийлсэн.

Categories
гадаад мэдээ

Германчууд АНУ- Европын холбооны худалдааны гэрээг эсэргүүцэв

Германы Ханновер хотноо Атлантын худалдаа, хөрөнгө оруулалтын гэрээг (TTIP) эсэргүүцсэн олон мянган хүн жагсаал хийжээ. Германчууд энэ гэрээ нь ажилчдын цалинг багасгаж, байгаль орчны хамгаалалтыг сулруулна хэмээн эсэргүүцэж байна. Харин АНУ-ын ерөнхийлөгч Барак Обама Европын холбоотой энэ гэрээг байгуулснаар олон мянган ажлын байр шинээр бий болгож, тарифыг багасгаснаар худалдааг нэмэгдүүлнэ хэмээн үзэж байгаа юм. Ханновер хотноо 30 мянга гаруй хүн тайван жагсаал зохион байгуулжээ.

Атлантын худалдаа, хөрөнгө оруулалтын гэрээг гурван жилийн өмнөөс хэлэлцэж эхэлсэн бөгөөд ирэх даваа гаригт Нью-Йорк хотноо ээлжит уулзалт болох аж.

Categories
онцлох-нийтлэл туслах-ангилал

Өнөөдөр Истанбул хотын захирагч айлчилна

Туркийн соёлын өдрүүдийн арга хэмжээ үргэлжилж байна. Энэ хүрэнд өнөөдөр Истанбул хотын захирагч Кадыр Топбаш манай улсад айлчлах юм. Түүний айлчлал 26-ны өдөр хүртэл үргэлжилнэ. Тэрбээр Улаанбаатар хотын Засаг дарга Э.Бат-Үүлтэй уулзаж, хоёр хотын хооронд хамтран ажиллах санамж бичиг байгуулж, Турк улсын дахин төлөвлөлтийн талаар холбогдох байгууллагуудын хүмүүстэй уулзах юм.

Мөн соёлын өдрүүдийн хүрээнд “Туркийн кино долоо хоног” арга хэмжээ “Тэнгис” кино театр болох бөгөөд тус улсын соёл, уламжлалыг сурталчилсан киног үнэ төлбөргүйгээр үзүүлэх юм байна. “Монголын Урчуудын эвлэл”-ийн хороонд Турк улсын соёл, аж ахуйг харуулсан гэрэл зургийн үзэсгэлэн энэ сарын 25-нд нээлтээ хийх юм.Туркийн дуурийн дуучин Серап Чифтчи СУИС болон Хөгжим бүжгийн сургуулийн оюутнуудад мастер хичээл заах юм байна. Түүнчлэн тэрбээр энэ сарын 29-нд Дуурь бүжгийн эрдмийн театрт бүрэн хэмжээний тоглолтоо толилуулах ажээ.Турк улсаас Монгол Улсад суугаа Бүрэн эрхт Элчин сайд Мурат Карагөз МУИС-д энэ сарын 27-нд лекц унших аж.

Categories
онцлох-нийтлэл туслах-ангилал

НОМ ЯРЬЖ ӨГЬЕ: “Галя Ганская”

Оросын нэрт зохиолч И.Бунины “Үзэсгэлэнт наран эмэгтэй” хэмээх түүвэр уншигчдын гар дээр очжээ. Түүнд “Галя Ганская” хэмээх өгүүллэг багтжээ. Уг бүтээлийн тухай өгүүлье.

Хаврын нэгэн сайхан өдөр. Парис хотын нэгэн кафед зураач, далайчин хоёр ярилцаж сууна. Парисын хавар үнэхээр сайхан, харин бүсгүйчүүд нь ер бусын үзэсгэлэнтэйг тэд биширнэ. Гэтэл нэг нь алтан гэгддэг үед Парис бүр сайхан байсныг дурсахдаа “Би залуу байсан болохоор тэгж хэлж байгаа юм биш” хэмээн тайлбарлав. Тэр үед Парист машин бараг байхгүй, амьдрал огт өөр байсан гэнэ. Зураач, далайчин хоёр ийнхүү ярьж суухдаа төрж өссөн Одесс хотынхоо хаврыг сангалзав. Одессын хавар Парисаас ч илүү гэдэгтэй тэд санал нийлнэ. Ийнхүү төрөлх нутгаа дурсан ярьж суусан зураач нэгэн бүсгүйг санав. “Галя Ганская хэмээх үзэсгэлэнтэй бүсгүй Одесст амьдарч байсныг санаж байна уу” хэмээн далайчин найзаасаа асуужээ. Түүн шиг үзэсгэлэнтэй эмэгтэйтэй амьдралдаа учирч байгаагүй, хамгийн сайхан дурсамж нь боловч аймшигтай нүгэл үйлдсэн нь санаанаас нь гардаггүй тухайгаа ярив.

Галя Ганская хэмээх бүсгүйг зураач маань хүүхэд байхаас нь мэддэг байжээ. Эх нь хаяад явсан тул эцэг нь хүүхдээ ганцаараа өсгөсөн. Галягийн аав нэлээд чинээлэг хүн байсан бөгөөд зураач болохыг мөрөөддөг байсан боловч авьяас дутсан. Таалагдсан зургуудаа худалдан авч сэтгэлээ тайтгаруулдаг, урлагт жигтэйхэн хайртай нэгэн. Галягийн аав Одессын зураачдыг гэртээ хүлээн авч уран бүтээлийн талаар сонирхолтой яриа өрнүүлж ирэх бүрт нь дайлна. Цаг хугацаа өнгөрч нэг мэдэхэд Галя сайхан бүсгүй болсон байв. Парист хоёр жил болохдоо Францын соёлд нэлээд автаж өөрийгөө хоёр дахь Монпассан хэмээн бодох болсон зураач нутагтаа эргэж ирээд удаагүй байсан үе. Одессын гудамжаар явж байгаад Либман кафены хажууханд санамсаргүй Галятай таарсан байна. Өвдгөө хүрсэн пальтотой, тансаг малгай духдуулж, лакан гутал өмсч, шүхэр барьсан бүсгүй танигдахын аргагүй болжээ. Уулзсандаа баярлаж Галяд шууд л гудамжнаас цэцэг худалдан авч өгч хамтдаа цайны газар оров. Өнгөрсөн хугацаанд нэлээд хэдэн уран бүтээл туурвисан тухайгаа ярьж өөрийнх нь урланд очиж үзэхийг урихад бүсгүй ч зөвшөөрөв. Энэ удаагийн уулзалт нь ийнхүү өндөрлөсөн байна. Түүнээс хойш зураач маань Галя бүсгүйтэй бүтэн жил уулзаагүй гэнэ. Аавтай нь санамсаргүй таарахдаа охинтой нь эргэж уулзаагүйдээ ихэд ичжээ. Галя нь сайхан хүүхэн болсон тухайгаа эцэг нь бахархалтайгаар ярьж зураачийг гэртээ урьсан байна. Зураач залуу Галятай дахин уулзах хүсэлд автсан тул урилгыг нь хүлээн авчээ. Гэвч охин нь хөдөө явсан байв. Ингээд дахин уулзахаар тохиролцоод гарч явтал Галятай таарчээ. Бүсгүй улам ч үзэсгэлэнтэй болсон харагдана. Энэ өдрөөс хойш тэд бараг салаагүй гэнэ.

Нэг удаа Галя түүний урлан дээр ирэхдээ өөрийг нь Итали явах гэж байгаа тухай хүнээс сонссоноо ярьжээ. Өөрт нь хэлээгүйд гомдож байгаагаа ч хэлэв. Зураач залуу хэдхэн сараар явах гэж байснаа, хэлж хараахан амжаагүйгээ тайлбарлах гэсэн боловч бүсгүй сонсохыг хүссэнгүй. Уурандаа гэрээс нь гүйн гарчээ. Хойноос нь гүйцэж очих гэсэн боловч тайвширсных нь дараа, орой гэрт нь очоод бүгдийг тайлбарлая хэмээн бодсон гэнэ.

Энэ явдал болсноос таван цагийн дараа зураач найз нь гэрт нь ирээд “Ганскийн охин Галя Ганская амиа хорлочихож. Чи мэдсэн үү” хэмээн асуухад толгой дундуур нь цохиод авах мэт болсон гэдэг. Галягийн аав нь гэртээ янз бүрийн хор хадгалдаг байснаа ирсэн зочдодоо ихэд бахархалтайгаар үзүүлдэг байжээ. Түүнээс нь охин ууж амиа хорлосон аж.

Ю.Дэлгэр

Categories
мэдээ нийгэм

Нийслэлийн Үйлчилгээний нэгдсэн төв 200 мянга дахьүйлчилгээгээ үзүүллээ

Төрийн үйлчилгээнүүдийг нэг дор төвлөрүүлж, иргэдэд учруулж буй хүндрэл, чирэгдлийг багасгах зорилгоор “Нийслэлийн Үйлчилгээний нэгдсэн төв”-ийн нэгдүгээр салбарыг байгуулсан. Нэгдүгээр сараас эхлэн үйл ажиллагаа явуулж буй тус төвд харъяалал харгалзахгүй уртасгасан буюу 08-20 цагуудад үйлчилгээ үзүүлэх боломжтой. Одоогийн байдлаар нийслэлийн нутгийн захиргааны байгууллагын 287, Засгийн газрын харъяа агентлагуудын 99, нийт 386 үйлчилгээг Нийслэлийн Үйлчилгээний нэгдэн төвөөс авах боломжийг бүрдүүлжээ.

Тус төвөөр өдөрт дунджаар 2420 иргэн, аж ахуйн нэг үйлчлүүлж байгаа нь иргэд төрийн үйлчилгээг нэг дороос авах хүсэлт, шаардлага өндөр байсныг харуулж байгаа юм.

Харин 2016 оны дөрөвдүгээр сарын 23-ны өдөр Нийслэлийн Үйлчилгээний нэгдсэн төвийн “200 000 дахь үйлчилгээ” хүндэтгэлийн үйл ажиллагааг зохион байгууллаа. Тус төвөөр үйлчлүүлж буй 199 999, 200 000, 200 001 дэх иргэнийг тодруулж, нээлттэй засаглалыг хөгжүүлэхэд үнэтэй хувь нэмэр оруулан, хяналт тавин ажиллаж буй иргэн, төрийн бус байгууллага, хэвлэл мэдээллийн байгууллагыг шалгаруулан хүндэтгэл үзүүллээ. Хүндэтгэлийн үйл ажиллагаанд нийслэлийн Засаг дарга бөгөөд Улаанбаатар хотын Захирагч Э.Бат-Үүл, нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат, нийслэлийн Засаг даргын Тамгын газрын дарга Ё.Гэрэлчулуун болон нутгийн захиргааны байгууллагын удирдлага, албан хаагчид, иргэд оролцлсон юм.

Нийслэлийн үйлчилгээний нэгдсэн төвийн 199 999 дахь үйлчилгээг Баянгол дүүргийн 13 дугаар хорооны иргэн Д.Эрдэнэтуяа нийслэлийн Өмчийн харилцааны газраас, 200 000 дахь үйлчилгээг ТЭД констракшн нийслэлийн Хөрөнгө оруулалтын газраас, 200 001 дэх үйлчилгээг Сүхбаатар дүүргийн 7 дугаар хорооны иргэн Л.Лхамсүрэн нийслэлийн Ерөнхий төлөвлөгөөний газраас тус тус авчээ.

Categories
энтертаймент-ертөнц

“Victoria’s Secret” дахин усны хувцас үйлдвэрлэхгүй

“Victoria’s Secret” гоёмсог чамин дотуур хувцас, тэр дундаа усны хувцас үйлдвэрлэлээрээ алдартай. Гэсэн ч тус брэндийн хэвлэлийн төлөөлөгч ирэх оноос эхлэн дахин усны хувцас худалдаалахгүй болсноо албан ёсоор мэдэгдлээ. Учир нь “Victoria’s Secret”-ийн толгой компани L брэндийн үзэж буйгаар хэдий усны хувцасны бизнес нь жил бүр 500 сая ам.долларын ашиг авчирдаг ч өнгөрсөн наймдугаар сарын ашиг төсөөлж байснаас бага байсан нь энэ шийдвэрийг гаргахад нөлөөлсөн гэнэ. Усны хувцасны оронд спорт загварын хувцас гаргасан нь хавьгүй өндөр ашиг авчирна хэмээн тус компани үзэж байгаа аж.

Categories
мэдээ улс-төр

Монголын уламжлалт наадгай, зан заншилтай танилцжээ

Монгол Улсын Их Хурал Ази, Европын Парламентын түншлэлийн есдүгээр уулзлатыг Улаанбаатар хотноо энэ оны дөрөвдүгээр сарын 21-23-ны өдрүүдэд амжилттай зохион байгуулав.

1996 онд анх зохион байгуулагдаж байсан Парламентын түншлэлийн энэхүү уулзалт нь АСЕМ-ын 20 жилийн ойн жилд болж буйгаараа онцлогтой. Хоёр өдрийн турш үргэлжилсэн тус уулзалтад 32 орон, 170 гаруй төлөөлөгчид хуран цугларч өнгөрсөн 20 жилийн хугацаанд АСЕМ-ын үйл ажиллагаанд Ази, Европын парламентын түншлэлийн уулзалтын оруулсан хувь нэмэр, үүрэг оролцооны талаар дүгнэн хэлэлцэж, ойрын ирээдүйн хамтын ажиллагааны чиглэлийг тодорхойлон ярилцсан юм. Ази, Европын хууль тогтоох байгууллагын болоод олон улсын байгууллагуудын төлөөлөгчид өчигдөр Монголын уламжлалт наадгай, зан заншил, соёл урлаг, нүүдэлчин ахуйтай танилцжээ.

Энэ үеэр төлөөлөгчид Үндэсний сур харваа, шагай наадгай, уран бичлэг, эрэмгийн эрчүүдийн морин үзүүлбэр зэргийг үзэж сонирхжээ.

Мөн Ази, Европын Парламентын түншлэлийн есдүгээр уулзалтад оролцсон төлөөлөгчдөд зориулсан хүндэтгэлийн тоглолт Улсын дуурь бүжгийн эрдмийн театрт боллоо хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ спорт

Д.Хүдэрбулга шөвгийн наймд шалгарлаа

“Рио-2016” олимпийн эрх олгох чөлөөт бөхийн олон улсын тэмцээн “Буянт-Ухаа” спортын төв ордонд гурав дахь өдрөө үргэлжилж байна. Тус тэмцээнд өрсөлдөж буй 97 кг-ын Азийн аварга Д.Хүдэрбулга өнөөдөр Унгарын бөх А.Смикийг 2:0-ээр ялж, шигшээ наймд шалгарлаа.

Тэрбээр эхний тойрогтоо Грекийн бөхийг оноогоор цэвэр ялсан билээ.