Month: April 2016

Сэлэнгэ аймаг Сүхбаатар сумын долдугаар баг Машинистийн гурван давхар байранд оршин суух иргэн Ц.Батболдын гэрт гал гарч байна гэсэн дуудлага аймгийн Онцгой байдлын газарт энэ сарын 17-ны өдөр иржээ.

Онцгой байдлын газрын бие бүрэлдэхүүн уг дуудлагаар шуурхай ажиллаж галыг унтраан дөрвөн том хүн, нэг хүүхдийн амь насыг гал түймрийн аюулаас авран хамгаалж хүлээсэн үүргээ нэр төртэй биелүүлж ажилласан байна.

Галын шалтгаан нь гэрийн эзэн цахилгаан тогоогоо залгаатай орхиж унтсанаас гал гарч битүү утаажилт үүссэн байжээ.

Жил бүрийн хаврын адаг сард болдог Майдар эргэх их ёслолыг Гандантэгчэнлин хийдэд зохион байгуулж байна.

Ирээдүйд залран ирэх сайн цагийн мянган Бурханы тав дахь бурхан болох Майдар бурханы шашинтай золгож, Майдар бурханаас ном сонсох, мөн бурханы залран ирэх цагийг наашлуулах билэгдлээр энэ зан үйлийг хийдэг аж.

Алтан Майдар бурханыг ногоон морин тэргүүнтэй, хорол дөрвөн дугуйтай тэргэн дээр дэвжээ сэнтий засаж залаад хүрээ хийдээ нар зөв тойрон дөрвөн зүгт нь үдлэн эргэдэг. Ногоон морин тэргүүнт тэргэнд залсан Майдар бурханы баруун, зүүнд Додигалсан, Жадамба, Жамчой динаа, Алтангэрэл судруудыг Боди суврагын хамт залан, номт хувцас соёрхсон хоёр тахилч сүнтагийн хадгийн үзүүрийг Майдар бурханы зүрхэн тус уяад түмэн олноо адис хүртээж явдаг юм байна. Гандантэгчэнлин хийдийн шар хэрэмний гол, барууун, хойд, зүүн зүгт тус тус үдлэн Түй мандал өргөн, ерөөл талбин эргэн гол үүдэнд хүрч Манзуширийн үд хийж их ерөөл хуран, өлзий хутаг оршоож, их мандал өргөдөг. Ийнхүү тус ёслолоор Майдар бурханы номын рашааныг хүртээх зан үйлийг хийдэг бөгөөд таван их номын хүрдэн эргүүлэх лугаа уулзан учрахын билэг зохилдуулан бүх хуврага, түмэн олон, сүсэгтэн бүгд дагалдан ерөөл талбидаг уламжлалтай аж.

Их Монгол Улсын гудамжны 2.1 км авто замын өргөтгөл шинэчлэлтийн ажлын хүрээнд Замын Цагдаагийн баруун урд уулзвараас Баянмонгол хорооллын уулзвар хүртэлх замын хөдөлгөөнийг түр хугацаагаар хааж хучилтын ажил хийнэ. Тодруулбал, Замын Цагдаагийн баруун урд уулзвараас Баянмонгол хорооллын уулзвар хүртэлх хэсгийн хөдөлгөөнийг 04 сарын 29-ний 00:00 цагаас 05 сарын 01-ний 23:00 цагийн хооронд, Замын Цагдаагийн баруун урд уулзварыг 04 сарын 29-ний 22:00 цагаас 04 сарын 30-ны 10:00 цагийн хооронд тус тус хэсэгчлэн хаах тул дээрх хугацаанд Та бүхэн өөр замыг сонгон зорчино уу.

Энэхүү хязгаарлалтай холбогдуулан нийтийн тээврийн үйлчилгээний нийт 4 чиглэл буюу Ч:10 “Ганц худаг-Сансар-Баянмонгол хороолол-Мишээл экспо”, Ч:28 “Сэлх-7 буудал-Ард кино театр-Ривер гарден хороолол”, Ч:32 “Улиастай-Баянмонгол хороолол-ТЭЦ3”, Ч:44 “Нарангийн гол-ТЭЦ3-Дүнжингарав худалдааны төв” чиглэлүүдийн замналд өөрчлөлт ороод байна. Дээрх чиглэлүүдийн нийт 39 тээврийн хэрэгсэл Үндэсний цэцэрлэгт хүрээлэнгийн замаар үйлчилнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

НИТХ-ын Тэргүүлэгчдийн 15 дугаар тогтоолоор Улаанбаатар хотын нутаг дэвсгэрт хүн тавихыг зөвшөөрсөн долоон оршуулгын газрын жагсаалт, байршил ,хэмжээг баталсан.

Үүнд;

• Нарангийн энгэрийн оршуулгын газар,
• Нарангийн энгэр дэх Мусалман шашинтны оршуулгын газар,
• Мааньтын буюу Өлзийтийн оршуулгын газар,
• Алтан-Өлгийн оршуулгын газар баруун турууны шарил чандарлах төв,
• Гачууртын шарил чандарлах төв,
• 61-ийн гармын дурсгалын цэцэрлэгт хүрээлэн зэрэг газруудад оршуулгын үйл ажиллагааг мэргэжлийн компаниуд хэвийн зохион байгуулан ажиллаж байна гэж Улаанбаатар хотын Захирагчийн ажлын албанаас мэдээллээ.

Нийслэлийн статистикийн газраас мэдээлсэн махны үнэ ханшийн талаарх мэдээллийг хүргэе. Энэ долоо хоногт томоохон захуудаар хонины ястай мах нэг килограмм нь дунджаар 6915 төгрөг, үхрийн ястай мах нэг килограмм нь дунджаар 8505 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 4.7 хувиар буюу 380 төгрөгөөр өсч, харин үхрийн цул мах 0.4 хувиар буюу 35 төгрөгөөр буурчээ. Ажиглалтаар үхрийн мах “Хархорин” хүнсний захад хамгийн хямд буюу 8300 төгрөг, харин “Таван-Эрдэнэ” хүнсний захад хамгийн өндөр үнэтэй буюу 9500 төгрөг байна.

Хонины ястай махны үнэ өмнөх долоо хоногтой харьцуулахад 1.7 хувиар буюу 115 төгрөг, хонины цул мах 2.0 хувиар буюу 155 төгрөгөөр тус тус өссөн байлаа. Ажиглалтаар хонины мах “Хархорин” хүнсний захад хамгийн хямд буюу 6700 төгрөгөөр, харин “Меркури” хүнсний захад хамгийн өндөр үнэтэй буюу 8500 төгрөгөөр худалдаалж байна.

Улаанбурхан өвчний тархалт даамжирч олон хүүхэд амиа алдаад байгаа билээ. Нийт иргэдийн “ сэтгэлийг түгшээж буй улаанбурхан өвчний эсрэг ОХУ-д сурч байгаа манай сонсогч нар дуу хоолойгоо нэгтгэн хандив цуглуулсан сайн үйлсийн мэдээ ирүүллээ.

ОХУ дахь Монголын оюутны холбоо, Санкт-Петербург хотын цэргийн академи, сургууль суралцаж буй оюутнууд, энэ хот дахь Монголын оюутны холбоо, хүмүүнлэгийн чиглэлээр идэвхтэй үйл ажиллагаа явуулдаг “80&80” холбоо хамтран бяцхан багачуудынхаа өвчнийг анагаахаар 320 мянган рубль цуглуулаад ОХУ-аас өвчнийг анагаах тоног төхөөрөмжүүдийг худалдан авсан байна. Үүнд, “Хүчилтөрөгч-өтгөрүүлэгч” аппарат дөрвөн ширхэг, тарианы памп хоёр ширхэг, пульсоксиметр зургаан ширхэг, ЭДВ катетер тоног төхөөрөмж 20 ширхэг зэрэг багаж тоног төхөөрөмж багтаж байгаа ажээ.

Өнөө өглөө эдгээр аппаратыг салбар болон төрийн бус байгууллагын төлөөлөгч нар хүлээн авсан бөгөөд улмаар Хавдар судлалын үндэсний төвд удахгүй хүлээлгэн өгнө.

Тавдугаар сард тохиох олон улсын сувилагч нарын өдрийг угтаж “Хавдар судлалын үндэсний төв”-ийн эмч нар өнөөдөр “Дүнжингарав” худалдааны төвд иргэдэд үнэ төлбөргүй үзлэг хийхээр болжээ. Уг арга хэмжээ өдрийн 13:00 цагт эхлэх юм. Энэ үеэр иргэдэд үнэ төлбөргүй үйлчилж, зөвлөгөө өгнө. Өнгөрсөн жил Хавдар судлалын үндэсний төвөөс Нарантуул олон улсын худалдааны төвд ажиллаж иргэдийг үнэгүй үзлэг хамруулж байсан билээ. Сонирхуулахад, Олон улсын сувилагч нарын өдрийг жил бүрийн тавдугаар сарын 12-ны өдөр дэлхий нийтээр тэмдэглэн өнгөрүүлдэг уламжлалтай аж.