Month: February 2016

Оюутнууд
ирэх гуравдугаар сарын 4-ний өдөр 14.00 цагт төв талбайд тайван жагсаал
хийж, өөрсдийн эрхийн төлөө дуу хоолойгоо өргөхөөр болжээ. Тэд энэхүү
жагсаалаараа Засгийн газар, БСШУЯ болон бусад холбоотой байгууллагуудад
хандан оюутныг ажлын байраар хангах тухай болон 70200 төгрөгийн
тэтгэлэг, нийтийн тээвэр, оюутны эрхийн тухай асуудлаар үзэл бодлоо
илэрхийлж, шаардлага тавих гэнэ.

Мөн тэнд
цугласан нийт оюутнуудынхаа анкетыг авч, мэдээллийн бааз бүрдүүлэн,
АСЕМ-д ажиллах бүртгэлийг явуулж, холбогдох байгууллагууд руу анкетыг
илгээх юм байна.

Монголд нийт
217 мянган оюутан байгаа гэж үзвэл тэдний 10 хувь буюу “21700 оюутныг
ажлын байртай болгох нь” хөтөлбөрийг санаачлан явуулж буй аж. Энэ ажлын
хүрээнд www.icv.mn сайтыг нээн ажиллуулахад бэлэн болжээ. Энэхүү сайтад
оюутнууд өөрсдийн мэдээллийг оруулснаар ажил олгогч байгууллагуудтай
холбоо тогтоох боломжтой болох юм байна.

Энэ талаар
Монголын оюутны холбооны дэд ерөнхийлөгч З.Төмөртөмөр “Ирэх долоодугаар
сард оюутнуудын амралтын үе таарч байгаа учраас АСЕМ-д олон мянган
оюутан ажиллах боломжтой. Хэчнээн оюутан ажиллаж болох тухай нарийн тоог
гаргаагүй байгаа” гэжээ.

Нийслэлийн
Засаг дарга “Татварын буцаан олголтын тухай” А/155 дугаар захирамж
гаргалаа. Тус захирамжаар хуулийн дагуу татварын хөнгөлөлт чөлөөлөлтөд
хамрагдах иргэдийн материалыг хүлээн авч, бичиг баримтын бүрдлийг
шалган, Хувь хүний орлогын албан татварын буцаан олголт авах иргэдийн
жагсаалтыг баталгаажуулан ирүүлэхийг нийслэлийн Татварын газарт
даалгасан байна. Түүнчлэн нийслэлийн 2016 оны төсөвт тусгагдсан, Хувь
хүний орлогын албан татварын буцаан олголтод олгохоор батлагдсан
26,500,000,000 /хорин зургаан тэрбум таван зуун сая/ төгрөгийг
нийслэлийн Татварын газраас баталгаажуулан ирүүлсэн жагсаалтын дагуу
татвар төлөгчдийн харилцах данс байршиж буй арилжааны банкуудаар
дамжуулан, банкуудтай байгуулсан гэрээний үндсэн дээр татвар төлөгчдөд
олгохыг холбогдох албаныханд үүрэг болголоо гэж Нийслэлийн ЗДТГ-ын
Хэвлэл мэдээлэл, олон нийттэй харилцах хэлтсээс мэдээллээ.

Энэ жилийн наадмаар олон хоног амрах
төлөвлөгөөтэй байна. Учир нь нийтээрамардаг наадмын өдрүүд буюу
долдугаар сарын 11, 12, 13 ажлын өдөр таарч байгаа. Залгуулаад долдугаар
сарын 14-нд АСЕМ /Ази-Европын уулзалт/-ын зочид Монголд бууна. Үүнтэй
холбогдуулан наадмын дараачаас 7 хоног үргэлжлүүлэн амраахаар төлөвлөж
байна. Мөн зах худалдааны төвүүдийг ч мөн амраахаар төлөвлөөд байгаа аж.

Монгол Улсад болох АСЕМ-ын 11 дэх
удаагийн энэ уулзалтад оролцох 51 орны төрийн тэргүүний 1 нь л гэхэд
доод тал нь 4-5 хүний бүрэлдэхүүнтэй ирэх нь тодорхой. Мөн 51 орны
төрийн тэргүүнээс гадна Европын холбоо, АСЕАН /Зүүн өмнөд Азийн орнуудын
нийгэмлэг/-ийн төлөөлөгчид Монголд ирнэ. Тиймээс нийслэлийн удирдлагууд
АСЕМ-ын үеэр нийслэлийн хөдөлгөөнийг багасгаж, томоохон захуудыг хааж,
бүх нийтээр амраахаар төлөвлөж байна. Ингэхдээ нийслэлчүүдийг аль болох
хөдөө орон нутаг уруу амралт, аялал зугаалгаар явахыг уриалж байгаа юм.

Булган аймгийн Орхон сумын Ар булаг багийн нутагт хоёр үхэр галзуу,
Говь-Алтай аймгийн Цээл сумын Дэрстэй багт нэг ямаа галзуу өвчнөөр
өвчилсөн болох нь тус тус батлагджээ. Дээрх газарт 14 хоногийн
хугацаанд хязгаарлалтын дэглэм тогтоож, голомтын хүрээний мал амьтныг
дархлаажуулж байна. Одоогоор галзуу өвчинд өртсөн хүний мэдээлэл
байхгүй.

Ирэх долоо дугаар сард Монгол Улсад болох АСЕМ-ын дээд хэмжээний
уулзалтын үеэр оюутнуудыг ажиллуулах боломж бий хэмээн Монголын оюутны
холбооноос /МОХ/ мэдээлж байна. МОХ-ны төлөөлөгчид АСЕМ-ын бэлтгэл ажлын
албанд багтаж байгаа гэдэг утгаараа оюутнуудыг хөтлөгч, орчуулагч,
урлаг, соёлын арга хэмжээ, хот тохижилтын чиглэлээр ажиллуулах боломжтой
гэж үзэж байгаа гэлээ.

Оюутнуудын дунд явуулсан судалгаагаар 72 хувь нь хичээлийн хажуугаар
ажил хийх бүрэн боломжтой, хүсэлтэй гэж хариулжээ. Тиймээс эхний ээлжид
АСЕМ-ын уулзалтын үеэр оюутнуудыг ажиллуулах боломжийг хангана хэмээн
мэдээлж байна.

Энэ хүрээнд ирэх баасан гаригт АСЕМ-ын үеэр ажил хийх хүсэлтэй
оюутнуудыг Оюутны талбайд 14.00 цагаас цугларахыг уриалж байна. Гэхдээ
энэ нь зөвхөн нэг өдөрлөг бус оюутнуудад тулгарсан асуудлыг
шийдвэрлүүлэхийн төлөө хийж буй тайван жагсаал гэж тайлбарлалаа.
Ялангуяа оюутны 70 мянган төгрөгийг хэзээ, хэрхэн олгох талаар тодорхой
тайлбар, хариу хүссэн тайван жагсаал гэв.

Оюутны 70 мянган төгрөгийг есдүгээр сараас хойш олгоогүй хэмээн
оюутнууд хэлж байна. Тэгвэл оюутны 70 мянгыг ямар асуудлаас болоод өнөөг
хүртэл өгөхгүй байгаа талаар бид Сангийн яамнаас тодруулсан юм.
Санхүүжилтийн асуудал шийдвэрлэгдээгүйгээс олгоогүй. Ирэх сараас
санхүүжилт шийдвэрлэгдэх магадлалтай гэхээс өөр тайлбарыг хэлсэнгүй.
Сангийн сайдаас энэ талаар мэдээлэх чиглэл өгөөгүй учраас тодорхой
мэдээлэх боломжгүй гэх тайлбарыг хэлсэн юм.