Сангийн яам өнөөдөр 6.5 сая төгрөгийн Засгийн газрын богино хугацааны
үнэт цаас арилжаалсан талаар Монголын хөрөнгийн биржээс мэдээллээ.
Тус үнэт цаас нь тус бүр 100 мянган төгрөгийн үнэтэй бөгөөд нийт 65
ширхэгийг борлуулжээ. 39 долоо хоног буюу 9 сарын хугацаантай уг үнэт
цаас нь 14.915 хувийн хүүтэй юм. Хүүгийн төлбөр хугацааны эцэст төлөгдөх
аж. Үнэт цаасны арилцаанд “БиДиСек”, “Новел Инвестмент” болон “Голомт
Секюритик” үнэт цаасны компани оролцсон байна.
“Түрээсийн орон сууц” хөтөлбөрт
хамрагдах журмыг Барилга хот байгуулалтын яамнаас баталсан. Уг журамд
зааснаар: Төрийн өмчийн түрээсийн орон сууцны санд иргэдийг хамруулах
ажлыг ТОСК, Орон нутгийн өмчийн Түрээсийн орон сууцны санд хамруулах
ажлыг аймаг, нийслэлийн Засаг дарга нар хариуцна. Хөрөнгө оруулагч,
иргэн, хуулийн этгээдээс энэхүү журмын хүрээнд өөрийн эзэмшлийн орон
сууцыг түрээслүүлэхээр хүсэлт гаргасан тохиолдолд аймаг нийслэлийн Засаг
даргатай гэрээ байгуулан ажиллаж болно гэсэн байна.
ТОСК-ийн нарийвчилсан журам батлагдангуут иргэдийг түрээсийн орон сууц хөтөлбөрт хамруулахаар бүртгэж эхлэх аж.
Түрээсийн төлбөрийн хэмжээ нийслэлд 200-280 мянган төгрөг, хөдөө орон
нутагт 140-230 мянган төгрөг байхаар тогтоосон. Нийтдээ 929 аймлын орон
сууцнаас 572-ыг нь хөдөө орон нутагт, 350-ыг нь нийслэлд олгохоор
шийдвэрлээд байгаа юм.
Чөлөөт бөхийн уламжлалт “Mongolia Open-2016” олон улсын тэмцээн ирэх амралтын өдрүүдэд “Буянт-Ухаа” спорт цогцолборт болно.
Монголын чөлөөт бөхийн холбооноос Биеийн
тамир спортын хөгжлийн төвтэй хамтран зохион байгуулж буй тус тэмцээнд
БНХАУ-ын Өвөр Монголын өөртөө засах орон, Индонези, Киргиз, Монгол,
ОХУ-ын Буриад, Тува, Якут улсын бөхчүүд оролцохоор мэдүүлгээ ирүүлжээ.
Дэлхийн бөхийн нэгдсэн холбооноос
техникийн төлөөлөгчөөр Япон улсын иргэн, олон улсын шүүгч Исао Окиямаг
томилсон байна. “Mongolia Open-2016” тэмцээнийг МҮОНТ, НТВ телевиз шууд
дамжуулан үзүүлэхээр болжээ.
Монгол Улсын Засгийн газар Тавантолгойн нүүрсний ордыг түшиглэн том
чадлын цахилгаан станцыг гадаад, дотоодын хувийн хэвшлийн хөрөнгө
оруулалттай хэрэгжүүлэхээр шийдвэрлэж Эрчим хүчний яамны дэргэд Төслийн
нэгж байгуулан 2013 онд үйл ажиллагааг нь эхлүүлсэн.
Тавантолгой цахилгаан станц төслийн нэгж нь байгаль орчин нийгэмд
нөлөөлөх байдлын үнэлгээ, нүүрс, ус, агаарын чанар, станцын байршил,
цахилгаан дамжуулах агаарын шугам, станцын ус хангамжийн шугам хоолой,
үнсэн сангийн нөөц газар зэрэг холбогдох 20 гаруй судалгаанууд, мөн
Эрчим хүч худалдах, худалдан авах гэрээ, Хөрөнгө оруулалтын гэрээ,
Хувьцаа эзэмшигчдийн гэрээ, Нүүрс, Ус нийлүүлэх гэрээ, Орон нутгийн
хамтын ажиллагааны гэрээ зэрэг 15 гэрээний төсөл, нийт 5000 гаруй хуудас
бүхий олон улсын стандарт, шаардлагыг хангасан баримт бичгийг
боловсруулж дуусгасан.
Төслийн техникийн зөвлөхөөр Австралийн “WorleyParsons”, Санхүүгийн
зөвлөхөөр Японы “Sumitomo Mitsui Banking Corporation” , Хуулийн
зөвлөхөөр АНУ-ын “Shearman & Sterling” , Байгаль орчин, нийгэмд
нөлөөлө байдлын үнэлгээг Английн “Mott MacDonald” компаниуд хийж
гүйцэтгэлээ.
Төсөлд хөрөнгө оруулах гадаадын хөрөнгө оруулагчийг сонгохоор дэлхийд
нэр хүнд бүхий бие даан эрчим хүч үйлдвэрлэгч (IPP-Independent Power
Producer) 25 компанид санал хүргүүлснээс 10 компани төсөлд оролцох
сонирхолоо илэрхийлж нэр бүхий 4 компанид Техникийн болон Арилжааны
ажлын даалгавар хүргүүлсэн юм. Үе шаттай сонгон шалгаруулалт хийсний
үндсэн дээр Японы “Marubeni” корпорацийг “Шалгарсан хөрөнгө
оруулагч”-аар 2016 оны 2 дугаар сарын 28-ний өдөр Тавантолгой Цахилгаан
станц төслийн Удирдах хороо хуралдаж тодрууллаа. Хөрөнгө оруулагчийг
сонгон шалгаруулах явцад олон улсын аудитын “Делоитт Онч” компани
хөндлөнгийн хяналт тавьж ажиллав.
Марубени корпораци нь дэлхийн 22 оронд нийт 34870 МВт суурилагдсан
хүчин чадал бүхий цахилгаан станцыг эзэмших, ашиглалтын үйл ажиллагаа
явуулдаг дэлхийн томоохон эрчим хүч үйлдвэрлэгч компани юм байна.
Өнөөдрөөс эхлэн Эрүүл ахуйн тухай хуулийн шинэчилсэн найруулга албан
ёсоор хэрэгжиж эхэллээ. Уг хуулийн шинэчлэн найруулгад гудамжинд шүлс,
нус цэрээ хаясан тохиолдолд 5, 000-1,000,000 төгрөгөөр торгох заалт
орсон байна. Уг заалтыг хэрэгжүүлэх журам тун удахгүй батлагдах төдийгүй
олон нийтийн хамтын ажилтны идэвхтэн, цагдаагийн албан хаагчид сайн
дурын ажилтан хяналт тавих аж.
МАХН-ын
залуус АТГ-ыг улс төрөөс хараат бус ажиллаж, МАХН-ын удирдлагуудыг
үндэслэлгүйгээр барьж, хорихгүй байхыг шаардаж албан бичиг илгээсэн.
Түүнчлэн албан бичгийн хариуг хуульд заасан хугацаанд багтаан ирүүлэхийг
хүссэн билээ.
Тэгвэл
МАХН-ын дэргэдэх залуучуудын байгууллагын шаардлагад АТГ-аас хариу
илгээсэн байна. Тус бичигт, “Авлигын эсрэг хуулийн 16 дугаар зүйлийн
16.2-т “Аливаа албан тушаалтан, хувь хүн, хуулийн этгээд Авлигатай
тэмцэх газрын үйл ажиллагаанд нөлөөлөх, хөндлөнгөөс оролцох”-ыг
хориглосон. Шаардлагыг хүлээн авч шийдвэрлээгүй тохиолдолд шат дараалсан
тэмцлийн хэлбэрт шилжих тухай танай мэдэгдэл нь өөрөө байгууллагын
хэвийн үйл ажиллагаанд нөлөөлөх улс төрийн шинжтэй дарамт шахалт гэж
ойлгогдохоор байна. Улс төрийн намын дэргэдэх залуучуудын байгууллагын
зүгээс тус газрын үйл ажиллагаанд нөлөөлөх, авлига, албан тушаалын гэмт
хэргийн мөрдөн байцаалтын ажиллагаанд саад учруулахаар оролдож, намын
удирдлагуудыг суллахыг шаардсан зэрэг нь Эрүүгийн хуулийн 245 дугаар
зүйлд заасан гэмт хэргийн шинжийг агуулж байна” гэжээ.
Ерөнхий сайд Ч.Сайханбилэг өнөөдөр
ОХУ-ын Элчин сайд Искандер Кубарович Азизовыг хүлээн авч уулзан ОХУ-д
төлөх их өрийн үлдэгдлийг барагдуулсан тухай баримтыг гардууллаа.
Ерөнхий сайд “Их өрийн үлдэгдлийг
хоёрдугаар сард багтааж төлнө гэсний дагуу Монгол банкны өнөөдрийн
ханшаар 3 сая 832 мянга 515 долларыг Сангийн яам, Монгол банкнаас ОХУ-д
шилжүүлсэн баримтыг гардуулж байна. Энэ нь хоёр улсын харилцаанд
тэмдэглэгдэн үлдэх түүхэн өдөр юм. Энэ өрийг барагдуулснаар хоёр улсын
хувьд цаашдаа эдийн засгийн олон боломж нээгдэж байгаа гэдэгт итгэлтэй
байна. Өрийн асуудлыг дуусгахад олон хүмүүс ажилласан. Тэдэнд Монгол
Улсын Засгийн газрын тэргүүний өмнөөс талархал илэрхийлж байгааг
дамжуулж өгнө үү” гэлээ.
Энэ үеэр ОХУ-ын Элчин сайд Искандер
Кубарович Азизов “Хуучин ЗХУ, одоогийн ОХУ-ын өмнө Монгол Улсаас урьд нь
хүлээсэн бүх санхүүгийн үүрэг эцэслэгдэж байна. Ингэснээр хоёр талд
зээл санхүүгийн хамтын ажиллагааг хөгжүүлэх шинэ боломж үүсч байна.
Түүнчлэн Монгол Улс олон улсын зээл санхүүгийн зах зээлд гарах шинэ
боломж нээгдэж байна гэж үзэж байна” гэв.
Монголын Засгийн
газрын зэс, алтны “Өндөр наран” төсөл 12.4 тонн алтны нөөцтэй гэж Өмнөд
Солонгост төвтэй “Freegood Mines” компани мэдэгджээ. “Өндөр наран” нь
Монголын өмнөд нутаг дахь зэс, алтны орд газрыг хөгжүүлэх төсөл юм. Уг
орд газар порфирын зэсийн ордууд, тэр дундаа, алтны дөрвөн ордтой аж.
Алтны дөрвөн ордын баруун хэсгийн улаан судалд 68 цооног гаргаж, 11
мянган метр өрөмдлөг хийж, 12.4 тонн алтны нөөцтэй болохыг тогтоолоо гэж
“Freegood Mines” компанийн гүйцэтгэх захирал Сук Мин О мэдэгдэв.
Үлдсэн гурван ордын
өрөмдлөгийн ажил дуусах үед тогтоосон нөөц нэмэгдэж, 30 тонн хүрч
магадгүй бөгөөд энэ төсөл “Рио Тинто” компанийн хэрэгжүүлж байгаа алт,
зэсийн асар том “Оюутолгой” ордын өөр нэгэн хувилбар болно гэж тэрбээр
үзэж байна. Арилжааны олборлолтыг эхлэхээс өмнө “Freegood Mines” компани
гадаадын зөвлөгөөний компаниудтай хамтран бүтцийн өөрчлөлт хийх,
Хонконгт хувьцаа гаргах тухай төлөвлөгөөг бэлтгэж байна. Мөн санхүү
болон техникийн дэмжлэгийн чиглэлээр олон улсын уул уурхайн компаниудтай
стратегийн түншлэл байгуулах асуудлыг “Freegood Mines” хэлэлцэж
эхэлжээ.
Парис хотноо болох загварын долоо хоног гуравдугаар сарын эхээр болох
гэж байна. Загварын хот гэгддэг Парис хотод болох тус шоунд шилдэгүүдтэй
хамт Монголын дизайнер Ариунаа Сүри оролцохоор явжээ. Монголын
загварын үнэмлэмжийг тогтоодог Ариунаа Сүригийн монгол ахуй, монгол
соёлыг шингээсэн өвөрмөц, гайхалтай бүтээлүүдээ тус загварын тайзнаа
сонирхуулах юм байна.
Бид өмнө нь Японы олон улсад цор ганц Англи хэл
дээр өргөн нэвтрүүлгийн үйлчилгээ үзүүлэгч NHK WORLD телевиз Ази тивийн
олон улс үндэстнүүдийн тухай бэлтгэн хүргэдэг нэгэн төслийнхөө хүрээнд
Монгол Улсаас ARIUNAA SURI брэндийг сонгон баримтат нэвтрүүлэг хийхээр
болсон таатай мэдээллийг хүргэж байсан. Уг нэвтрүүлэг нь дэлхийн 150
орны 210 гаруй сая айл өрхөд Монгол Улсыг цаашлаад өв уламжлал, урлаг
соёл, хувцас загварыг “Ariunaa Suri” брэнд дэлхий дахинд ахин нэг удаа
сурталчлан таниулах юм. NHK World телевиз ирэх дөрөвдүгээр сард зураг
авалтаа хийхээр төлөвлөөд байгаа аж.
Сирийн нутаг дэвсгэрт гал зогсоосноос
хойш хоёр хоног өнгөрч байна. Өчигдөр гал зогсоох хэлэлцээрийн
хэрэгжилтийг хянах зорилгоор АНУ, ОХУ хамтран Сирийн баруун хойд хэсэг
дэх Латакия боомт болон Йордан улсын нийслэл Амман хотод НҮБ-ын ажиглах
цэгүүд шинээр байгуулсан байна.
Эдгээр цэгүүдээс НҮБ, 24 цагийн турш гал
зогсоох хэлэлцээрийн хэрэгжилтийг хянаж байгаа юм. Баасан гарагийн шөнө
дундаас эхлэн гал зогсоох хэлэлцээр хэрэгжиж эхэлсэн ч Сирийн зарим
хэсэгт багахан хэмжээтэй зэвсэгт мөргөлдөөн гарч, агаарын цохилтууд
үргэлжилсэн хэвээр байгаа талаар зарим агентлаг мэдээлж байна. Гал
зогсоох хэлэлцээр хэрэгжих хугацаанд талууд алан хядагч бүлэглэлийн
эсрэг цэргийн ажиллагаагаа үргэлжлүүлэхээр тохиролцсон юм. Сирийн
засгийн газрын цэргүүд Хама хотод явуулж байгаа цэргийн ажиллагаагаа
алан хядагчидтай тэмцэх зорилготой гэж тайлбарлажээ.