Боулингийн ганцаарчилсан төрлийн нээлттэй тэмцээн энэ сарын 28-нд “Big Bowling” төвд боллоо. Монголын боулингийн холбоо, Монголын боулинг сонирхогчдын холбоо хамтран түүхэндээ анх удаа зохиосноороо онцлог болсон тус тэмцээнд шилдэг 36 тамирчин өрсөлдөв. Эхний гурван тоглолтоос хамгийн өндөр оноо авсан болон бооцоотой халз тоглолтоос шалгарсан тус бүр дөрвөн тамирчин дараагийн шатанд шалгарсан. Удаах даваанд нэгээр гарсан нь наймд шалгарсантайгаа халз тоглон, хасагдах журмаар өрсөлдөхөд УБЦТС-ийн тамирчин Г.Магсаржалам түрүүлж, мөн тус компанийн тамирчин Г.Батжаргал, “Big Bowling” клубийн боулингч С.Дэлгэрцэцэг нар удааллаа. Сонирхуулахад, тус тэмцээнд “Өнөөдөр” сонины гэрэл зурагчин Э.Харцага эхний шатнаас таваар шалгарсан ч тус тэмцээний аваргад хоёрхон оноогоор дийлдэн, үзэгчдийн суудалд шилжсэн юм.
Энэ сарын 26-27-нд шилжих шөнө Баянзүрх дүүргийн 1-р хорооны нутагт оршин суух нэг гэр бүлийн хоёр хүний амь насанд хүрч, нөгөө хоёр хүнийг нь хүнд гэмтээсэн ноцтой хүн амины хэрэг гарсан билээ. Талийгаач эмэгтэй цагдаагийн хошууч цолтой байсан бөгөөд аавтайгаа амиа алдсан. Хошууч Ц нь өмнө нь Чингэлтэй дүүргийн Цагдаагийн хэлтэст ажиллаж байгаад өнгөрсөн зургадугаар сард шилжин томилогдсон байжээ. Харин шархадсан хоёр хүнийг яаралтай мэс засалд оруулсан ч ээж нь шархаа даалгүй өнгөрсөн бямба гаригт нас барсан байна. Ах Б нь одоо тус эмнэлэгт хэвтэн эмчлүүлж буй бөгөөд биеийн байдал нь хүнд байгаа аж. Тэрбээр уг нь Орхон аймгаас биеэ эмчлүүлэхээр Улаанбаатарт ирээд байсан байна.
Ам.долларын ханш өнөөдрийн байдлаар Найман шарга валют арилжааны төв дээр 1994 төгрөгөөр авч, 1995 төгрөгөөр арилжиж байна. Харин арилжааны банкууд нэг ам долларыг 1990 төгрөгөөр авч, 1999 төгрөгөөр арилжиж байна. Цаашид ч ам.долларын ханш буурах төлөвтэй байгааг эдийн засагчид онцолжээ.
Засгийн газрын ээлжит хуралдааныг өнөөдөр 16.00 цагт зарласан бөгөөд 20 шахам асуудал хэлэлцэн шийдвэрлэхээр төлөвлөжээ. Үүнд Төрөөс мэдээлэл, харилцаа холбооны хөгжлийн талаар баримтлах бодлого батлах тухай УИХ-ын тогтоолын төсөл, Арбитрын тухай хуулийн төсөл, Зарим газар нутгийг улсын тусгай хамгаалалтад авах тухай УИХ-ын тогтоолын төсөл зэрэг хэд, хэдэн чухал төслүүд хэлэлцэгдэх аж. Мөн өвөлжилтийн бэлтгэл хангалтын талаар Шадар сайд танилцуулах юм байна.
Өршөөл үзүүлэх тухай хууль батлагдсантай холбогдуулан 1700 гаруй иргэн суллагдсан. Тэднийг ажлын байраар хангаж, нийгэмшүүлэхэд салбарын яамны зүгээс ихээхэн анхаарч ажиллаж байгаа аж. Хөдөлмөрийн сайд Г.Баярсайхан “Өршөөлөөр суллагдан орон нутагт очиж буй хүмүүсийг яамны зүгээс Хөдөлмөр эрхлэлтийн үндэсний төвөөр дамжуулан сургалтад суулгаж, ажлын байрны захиалгыг хүлээж авч байна. Энэ дагуу ажил олгогч эзэдтэй холбох ажил тогтсон журмынхаа дагуу явж байгаа. Манай яамнаас ажлын байрны захиалга өгсөн байгууллагуудтай харилцаж байна. Хэдийгээр эдийн засаг хямралтай ч аж ахуйн нэгжүүд ажлын байрны захиалга ирүүлж байгаа. Бид хорих байгууллагаас суллагдсан иргэнийг гадуурхахгүйгээр хүлээж аваад ажиллуулж байгаа аж ахуйн нэгжийг урамшуулах хөшүүрэг бий болгохоор ажиллаж байна” гэв. 
Лос Анжелес Лэйкерс багийн супер од Коби Брайнт ҮСХ – ны 2015 – 2016 оны улирлыг дуусгаад зодог тайлахаа мэдэгдлээ.
Нийслэлийн Засаг дарга Э.Бат-Үүлийн захирамжийн дагуу нийслэлийн хэмжээнд цэргийн үүрэгтэн, бэлтгэл офицеруудын бүртгэлийг 2016 оны нэгдүгээр сарын 06-ны өдрөөс 24-ний өдөр хүртэлх хугацаанд зохион байгуулна.
Оросын тамирчин Алексей Ловчев эрэгтэйчүүдийн хүндийн өргөлтийн +105 кг-ын төрөлд дэлхийн рекордыг давтаж, хоёр дахь алтан медалийг хүртсэнээр “Дэлхийн хамгийн хүчтэй эрэгтэй” гэсэн цолыг хүртжээ. Ловчев хоёр дахь өргөлтөөсөө сүүлийн өргөлт хүртлээ жингээ 16кг-аар нэмсэн бөгөөд түүний бүх оролдлого амжилттай болж “цэвэр” гэсэн үнэлгээг авчээ. Тэрээр өмнө нь бэлтгэл хийх үедээ хэзээ ч 257 кг-аас дээш өргөж байгаагүй хэдий ч тэмцээний үеэр 264 кг-ийг өргөж, Иранын Хоссэйн Рэзазадэгийн тогтоосон дэлхийн рекордыг давтжээ. Дэлхийн амжилтыг давтсанаараа Оросынхоо шинэ рекордыг тогтоожээ.
Монголын шатрын холбооны ерөнхийлөгч Ц.Сайнбаярын нэрэмжит шатрын рапид, блиц болон бодлого бодолтын тэмцээн Гадаад хэргийн яаманд энэ сарын 28-29-ний өдрүүдэд боллоо. Тэмцээний рапид төрөлд эрэгтэйчүүдээс их мастер Б.Хатанбаатар, эмэгтэйчүүдээс ОУМ Б.Мөнгөнтуул нар түрүүллээ. ОУШХ-ны болон МШХ-ны дүрмийн дагуу зохион байгуулагдсан тус тэмцээнийш МШХ-ноос томилсон шүүгчдийн баг шүүж, ОУШХ-ны чансааг тооцжээ.