Month: July 2015

Нийслэлчүүд цахим картаар нийтийн тээвэрт үйлчлүүлдэг болоод хоёр хонож байна. Шинэ систем учраас иргэдийн дунд тулгамдсан асуудал багагүй гарч байгаа тул нийслэлийн Тээврийн газраас өнөөдөр иргэдийн асуултад хариулт өгөхөөр мэдээлэл хийлээ.

ИРГЭДИЙН ТАВЬЖ БУЙ НИЙТЛЭГ АСУУЛТЫН ХАРИУ

1. Цахим системд шилжсэнээр ямар хөнгөлөлт урамшуулал байх вэ?

• ХАРИУЛТ: Урамшууллын асуудлыг хэлэлцэж байгаа юм. Тухайлбал, 30 минутын дотор шилжин өөр автобусанд суусан тохиолдолд картнаас дахиж мөнгө суутгахгүй. Өөрөөр хэлбэл үнэгүй зорчино гэсэн үг. Мөн нэг өдөрт олон удаа нийтийн тээврээр зорчсон тохиолдолд 400 төгрөг суутгах зэрэг картын урамшуулал авдаг байхаар хэлэлцэж байгаа юм.

2. Хөгжлийн бэрхшээлтэй, ахмад настнуудын хувьд хорооноосоо картаа авна. Тэдний хувьд картаа хаясан ч бүртгэлтэй учраас санаа зовох асуудалгүй. Энгийн иргэд ТҮЦ-үүдээс картаа авсан тохиолдолд хэн гэдэг иргэн, хаанаас авсан нь тодорхойгүй. Тиймээс хаяж үрэгдүүлсэн тохиолдолд яах вэ?

• ХАРИУЛТ: Хөгжлийн бэрхшээлтэй, ахмад настнуудын хувьд хорооныхоо халамжийн ажилтнаар дамжуулан картаа худалдаж авна. Харин автобусны буудал дээрх ТҮЦ-ээс карт аваад үрэгдүүлсэн бол “Улаанбаатар смарт карт”-ын дэргэдэх Иргэдэд үйлчлэх төвд хандаж болох юм. Мөн картаа авсныхаа дараа бүртгүүлж болно. Иргэдэд үйлчлэх төвийн 78 11 12 89 дугаарын утсанд холбогдож мэдээлэл өгнө.

3. Буудал дээрх ТҮЦ-үүдээс картаа авна. Харин цэнэглэхдээ заавал банкин дээр очих уу. Аль банкин дээр цэнэглэх вэ?

4.Хичээлийн шинэ жил эхлэхээр оюутан, сурагчид автобусаар хөнгөлөлттэйгөөр зорчдог. Тэдний хувьд яах вэ. Картаа хаанаас авах вэ?

Оюутнуудын хувьд картыг нь ирэх сарын 15-наас Монголын оюутны холбоогоор дамжуулан олгоно. Харин сурагчдын картыг хичээлийн шинэ жил эхлэхээр олгож эхлэх юм.

5. Бэлэн мөнгөний хайрцгийг хэзээ хүртэл ажиллуулах вэ?

• ХАРИУЛТ: Иргэдийн дийлэнх нь картаа худалдан авч, автобусанд картаар үйлчлүүлдэг болж хэвших хүртэл ажиллуулна. Нийтийн тээврээр 500 мянган иргэн зорчдог гэх судалгаа бий. Өнөөдрийн байдлаар эдгээр иргэдийн дөнгөж 130 мянга нь л смарт карт худалдан авсан байна. Тиймээс энэ тоог 500 мянга дөхөх хүртэл бэлэн мөнгөний хайрцаг ажиллуулсаар байна.

6. Смарт карттай холбоотой мэдээллээ хаана өгч, гомдол санал хэлж болох вэ?

• ХАРИУЛТ: Иргэдэд үйлчлэх төвийг “Улаанбаатар смарт карт” компанийн дэргэд байгуулсан. Холбогдох утас нь 78 11 12 89 юм. Иргэд смарт карт, цахим системтэй холбоотой бүх мэдээлэл, гомдлоо энэ утсанд өгч болно.

7. Зарим автобусны кондукторууд “Манайх сүлжээгүй, холбогдоогүй учраас мөнгөөрөө явна уу” гэх мэтээр карт авсан иргэдийг хохироож байна. Энэ тохиолдолд яах вэ?

• ХАРИУЛТ: Цахим системийг нийтийн тээвэрт үйлчилж буй 1000 гаруй автобусанд бүгдэд нь нэвтрүүлсэн. Автбобусны кондуктор, жолоочид бүгд мэдэж байгаа. Тиймээс ийм асуудал гарвал дээрх утсанд холбогдож мэдээлэл өгөх хэрэгтэй.

8. Картын борлуулалт хэр байна вэ?

• ХАРИУЛТ: Өнөөдрийн байдлаар 130 мянган иргэн карт авсан байна. Энэ дундаас хөгжлийн бэрхшээлтэй, ахмад настнуудын 50 мянга нь картаа авчээ. Зорилтот бүлгийн иргэдийн хувьд карт авахдаа идэвтэй байгаа аж.

Өчигдөр Хан-Уул дүүргийн V хороо Наадамчдын гудамж, “Хүннү Молл” төвийн урд замд Hyundai Accent автомашин, Hyundai HD55 маркийн автомашинтай мөргөлдөж, жолооч Т /44н, эр/ нас барж, 3 хүн гэмтсэн байна.

Мөн Сонгинохайрхан дүүргийн XX хороо Товчооны зам, Хуучин 22-ын ШБТ-ны замд амины Toyota Prius автомашины жолооч Т нь согтууруулах ундааны зүйл хэрэглэсэн үедээ тээврийн хэрэгсэл жолоодож, Sinotruck болон Nord Benz маркийн автомашинуудтай мөргөлдөж, осол гаргажээ. Ослын үеэр нэр хаяр тодорхойгүй 25-30 орчим насны эмэгтэй нас барж, 4 хүн гэмтсэн байна.

Тиймээс согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхыг Замыг цагдаагийн газраас анхааруулж байна.

Монгол улсын нутаг дэвсгэрт JCB төлбөрийн картыг Монголбанкны “Банк хоорондын төлбөрийн картын нэгдсэн сүлжээ”-гээр 2013 оноос дамжуулж бусад банкууд өөрийн сүлжээнд хүлээн авах боломжтой болсон. Одоогоор картын үр дүнгийн тооцооллыг карт хүлээн авагч банкууд ХХБ-аар дамжуулж гүйцэтгэж байгаа. Монгол-Японы худалдааны харилцаа тэлж, хоёр орны хооронд зорчих жуулчдын тоо өсөж байгаа тул манай банкуудад JCB нэрийн картыг дангаар нь болон Т карт–JCB хосолсон карт гаргах сонирхол бий болж тухайн картын нэгдсэн гарцтай болох саналыг Монголбанкинд дэвшүүлж байсан.

Үүнтэй холбоотойгоор Монголбанк JCBI-ийн хооронд карт гаргах бизнест зориулсан “Системийн сүлжээ байгуулах гэрээ”-нд 2015 оны 7 дугаар сарын 29-ний өдөр Монголбанкийг төлөөлж Монголбанкны Дэд ерөнхийлөгч Э.Батшугар, JCBI-ийг төлөөлж JCBI-ийн Ерөнхийлөгч ноён Коремицу Санномия (Koremitsu Sannomiya) нар гарын үсэг зурлаа.

Энэхүү нэгдсэн сүлжээ бий болсноор банкуудад карт гаргах ижил боломж олгож холболтын нэмэлт зардалгүйгээр JCB төлбөрийн картыг гаргах, үйлчилгээний урсгал зардлаа хуваан төлж, гадаад оронд зорчих тэдгээр банкуудын харилцагч Монгол Улсын иргэдэд олон улсын JCB картын өргөн сүлжээг ашиглан төлбөр тооцоогоо түргэн шуурхай гүйцэтгэх бололцоо нээгдэж байна.

Английн алдарт зохиолч Э.Л.Жеймсийн “Fifty Shades of Grey” буюу “Тавин янз саарал” гурамсан романы орчуулагч А.Түвшинтуяа “Монгол арт-2015” дэлхийн тойрон аялалыг санаачилжээ. Эл тойрон аялал нь дэлхийн түүхийн нэгэн үеийг бичилцсэн нүүдэлчин ахуйт Монгол түмний түүх соёл, үндэсний урлаг, уран зургийг дэлхийд таниулах зорилготой.

Багийн бүрэлдэхүүнд “June production”-ы захирал Ш.Боролдойхүү, найруулагч, зураач Э.Эрдэнэжаргал, сэтгүүлч Ө.Оюу, “Урлах эрдэм” дээд сургуулийн багш, үндэсний бичгээ өөрийн бүтээлдээ шингээн үлдээж яваа зураач СТА Л.Амарсанаа, Монголын урлагийг европ болон олон улсад сурталчлан таниулж буй зураач Г.Наранцацралт /ZAZAA/, залуу дуучин Б.Зоригоо /этник Зоригоо/ нар багтжээ.

Тус тойрон аяллын багийнхан өнгөрсөн тавдугаар сарын 25-нд АНУ-ын Сан Франциско хотноо “Монгол арт” шоугаар анхны гараагаа эхэлсэн юм. Тэд энэхүү тоглолтдоо Монгол үндэсний хөгжим, бүжиг, ардын урлагийн гайхалтай дуу хоолой, “June” продакшны өвөрмөц содон видео, тайз засалт, гэрлийн хослол зэрэг олон сонирхолтой үзүүлбэрээс гадна зураач Zazaa-ийн Body art шоу үзүүлбэр, зураач Л.Амарсанаагийн уран бичлэг, эдгээрийг гайхамшигтай хослуулсан гэрэл техник, тайзны амьд тоглолт, уран зургийн амьд үзүүлбэрүүдийг толилуулжээ.

Тус аяллын уран бүтээлчид энэ ондоо багтан АНУ-ын Лос Анжелос, Лас Вегас зэрэг хотод аялан энэхүү шоугаа толилуулан, түүх соёл, урлагаа сурталчлах юм байна.

Телевиз, кино сонирхогчдын олон улсын “Загасан нүд 2015” наадмын үндэсний шалгаруулалт эхэллээ.

Энэ жил 13 удаагаа зохион байгуулж буй тус наадамд Байгаль-Аялал, Миний гэр бүл-Манай хот, Cinema буюу кино, Animation буюу компьютер графикаар бүтээсэн кино, Хөгжилтэй агшин гэсэн төрлөөр оролцох боломжтой.

Үндэсний хэмжээний бүтээлийг ирэх сарын 15-ныг хүртэл UBS телевизийн байранд “Загасан нүд” фестивалийн комисс хүлээн авч байна. Наадамд оролцох бүтээл нь DVD болон HD форматаар бичигдсэн байх шаардлагатай бөгөөд нэг бүтээлийн үргэлжлэх хугацааг 15 минутад багтаахыг сануулж байна.

Монголоос оролцогчдын бүтээлийг мэргэжлийн комисс шалгаруулна. Таны бүтээл үндэсний хэмжээнд шалгарснаар ОХУ-ын Улан-Үдэ хотноо болох телевиз кино сонирхогчдын “Загасан нүд-2015” олон улсын наадамд оролцох юм.

Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Автомашингүй гудамж” төслийг хэрэгжүүлэх тухай А/626 дугаар захирамж гаргалаа. “Гудамж төсөл”-ийн “Хотын төв” дэд төслийн хүрээнд хэрэгжүүлэх “Авто машингүй гудамж” төсөлд хамрагдах гудамжнуудын хаяг, байршлыг баталлаа.

Мэргэжлийн сүмогийн Монгол бөхчүүдийн “Алтан хараацай”, МУГТ Кёкүтэнхо Н.Цэвэгням, түүний гэргий Кэйко нар өчигдөр Гэрлэх еслолын ордонд бүртгүүлж, Монгол улсдаа өрх нэмж гэр бүлээ нэмлээ.

арга хэмжээнд Холбооны төлөөлөгчид болон ах дүүс найз нөхөд, дэвжээний анд, алтан хараацай Кёкүшюүзан Д.Батбаяр эхнэрийн хамт, дүү нар болох Тэрүнофүжи Г.Ган-Эрдэнэ, Кёкүшюүхо Т.Эрдэнэбаатар нар оролцлоо.