Month: June 2015

УИХ-ын чуулганы үдээс хойшхи хуралдаанаар Эрүүгийн хууль болон
холбогдох бусад хуулийн төслүүдийн анхны хэлэлцүүлгийн хийхээр байлаа.
Өмнөх долоо хоногт уг төслийг хэлэлцэх үед УИХ дахь МАН-ын бүлэг тав
хоногийн засварлага авсан. Тиймээс тус бүлгийн авсан завсарлагааны
хугацаа дуусаагүй гэж үзэн чуулганы үдээс хойшхи хуралдааныг орхин
гарсан юм. Үүнтэй холбогдуулан УИХ дахь МАН-ын бүлгийн дарга
С.Бямбацогтод АН-ын бүлгийн дарга Д.Гарамгайбаатар мэдэгдэл хүргүүлжээ.
Уг мэдэгдэлд “АН-ын Гүйцэтгэх зөвлөлөөс Засгийн газарт хамтран ажиллаж
байгаа улс төрийн нам хүчний гэрээний биелэлтийг дүгнэхийг даалгасан.
Энэ дагуу УИХ дахь АН-ын бүлгийн хуралдаанаар хэлэлцээд МАН-тай
байгуулсан гэрээний биелэлт хангалтгүй гэж дүгнэсэн.

АН-ын Засгийн газраас өргөн барьж мэдүүлсэн хууль, тогтоолын төсөлд
танай бүлэг олон удаа санал тавьж ажилласан хэдий ч тодорхой үр дүнд
хүрээгүй. Энэ удаагийн ээлжит чуулган завсарлахад бага хугацаа үлдэж
байгаа учир төлөвлөсөн хууль, тогтоолын төслийг УИХ цаг алдалгүй
хэлэлцэх нь Монголын ард түмний ашигт нийцнэ.

Иймд гэрээний хэрэгжилтэд анхаарч, төлөвлөсөөн хууль тогтоолын
төслүүдийг хэлэлцэн батлахад саад учруулахгүй, хамтран ажиллахыг УИХ
дахь МАН-ын бүлэгт мэдэгдэж байна” гэжээ.

УИХ-ын чуулганы нэгдсэн хуралдаан өнөөдөр болж, Монгол Улсын 2014 оны
төсвийн гүйцэтгэл батлах тухай УИХ-ын тогтоолын төсөл, Улсын төсвийн
гүйцэтгэл, Засгийн газрын санхүүгийн тайлангийн нэг дэх хэлэлцүүлгийг
хийх үеэр АН-ын намын гишүүд хамтрагчдаа үг “дайв”.

Тодруулбал, УИХ-ын гишүүн Д.Батцогт “Н.Номтойбаяр гишүүнээ ээ, таны хэлж байгаа хэтэрч байна. Та МАН-ын бүлгийн дэд дарга, Ардчилсан намыг сонгосон нь буруу байж гэж. Ардчилсан нам Ардын намынхантай Засагт хамтраад сахил хүртээд шал дордов гэгч болсон. Засагт байхад Ардчилсан намынхан муухай байгаа бол та нар зургаан сайдаа тат, бид дэмжээд өгье. Муу нэртэй, муухай зүстэйгээрээ бид ялаа үүрээд, хариуцлагаа хүлээгээд сонгуульдаа оръё. Хамтарч байж ингэж болохгүй” гэсэн юм.

Харин УИХ-ын гишүүн Г.Баярсайхан “Ардын намынхан аль хэдийнэ төрхөмдөө буцахаар ачаа бараагаа бэлдсэн бэр шиг асуудалд хандаад байна. Асуудалд эрүүлээр хандах хэрэгтэй. Ардын намынхан Монгол Улсыг халамжийн улс болгосон шүү” хэмээн байр сууриа илэрхийлэв. Ямартай ч одоогоор чуулганы нэгдсэн хуралдаан завсарлаад байна.

УИХ-ын гишүүн Н.Алтанхуягийг АТГ болон
Тагнуулын ерөнхий газраас шалгаж байгаа талаар мэдээлэл гарах болсон. Тэгвэл
Н.Алтанхуяг гишүүн Ерөнхий сайд Ч.Сайханбилэгээс тодруулга хүссэн албан бичиг
явуулжээ. УИХ-ын гишүүн Н.Алтанхуягт энэ сарын 3-ны өдөр Тагнуулийн Ерөнхий
газрын Мөрдөн байцаах хэлтсээс зарлан дуудах хуудас ирүүлсэн байна. Хэрэв
ирэхгүй бол албадан ирүүлэх арга хэмжээ авна гэж байсан тухай УИХ-ын гишүүн
Н.Алтанхуяг тус албан бичигтээ бичжээ. Энэ талаар Ерөнхий сайд танаас
тодруулахад “Би ярилаа. Очих шаардлагагүй” гэсэн хариулт авсан. Өнөөдөр
(өчигдөр) 2015 оны зургадугаар сарын 29-ний өдөр Тагнуулаас дахин дахин зарлан
дуудах хуудаст ирүүлжээ. Тагнуулын ерөнхий газар нь Ерөнхий сайдын шууд
харьяаны агентлаг тул ямар асуудлаар дуудаж байгаа талаар тодруулга бичгээр
гаргаж өгнө үү. Улс орны аюулгүй байдал болон төрийн үйл ажиллагаатай холбоотой
ямар ч асуудлаар тодруулга өгөхөд бэлэн байна хэмээн албан бичигтээ бичсэн
байна. Түүнчлэн өөрийн фэйсбүүк хуудаснаа “Хоёр жил гаруй АТГ ажил
хийлгэдэггүй, амар заяа үзүүлдэггүй байсан дээр тагнуулын газар нэмэгдлээ.
Монголынхоо төлөө дуугарч болохгүй, босгож бүтээж, хийж болохгүй цаг болохнээ.
Гадна дотно барьцаалагдсан хүмүүс тагнуулыг толгойлдог болжээ” хэмээн бичсэн
байна.

УИХ-ын чуулганы нэгдсэн хуралдаан завсарлалаа. Үдээс өмнөх хуралдаанаар 2014 оны улсын төсвийн гүйцэтгэлийг хэлэлцэж, байнгын хороодод шилжүүллээ.

Хуралдааны үеэр гишүүд асуулт асууж, санал хэлэв. Энэ үеэр УИХ-ын
гишүүн Д.Батцогт МАН-ынханд “агсам тавив”. Тэрбээр “Ардын намын
гишүүдийн хэлж байгаа үгэнд ганц хоёр үг хэлмээр байна. Номтойбаяр
гишүүн, ардын намын бүлгийн дэ дарга хүн. Би ардын намын бодлого гэж
үзэж байна. Өчигдөр бүлгийнхээ мэдээллийг хийхдээ Бид засагт ороод
ганцхан ажил хийсэн. АН-ын алдаа, но-г олж авлаа гэдэг үг хэлсэн.

Би буруу дуулаагүй бол АН-ыг сонгож болохгүй гэдгийг ухаарлаа гэж
хэлсэн. Ажил хариуцсан хүмүүст нь алдаа оноо гэж байдаг бол тэр улсуудад
нь хариуцлага тооцохоос АН-ын шударга мөрөөрөө ажлаа хийж байгаа мянга
мянган гишүүдийг хавтгайруулж ярих нь буруу. Номтойбаяр шиг гишүүд олон
болоод Монголын төр сайхан болчих юм байна л даа. Би тэгж бодохгүй
байна. Одоо больё, өөх ч биш, булчирхай ч биш. Би ардын намын засагт орж
ирээд сайн зүйл авчирсан гэж бодохгүй байна. Сахил хүртсэн биш шал
дордов гэгчийн үлгэр боллоо.

Бүлгийн дэд дарга нь ингэж мэдэгдэж байгаа юм бол зургаан сайдаа тат л
даа. Бид дэмжээд өгье. Та нар минь бүтэн нэр, бүлээн зүстэйгээ
сонгуульда ор. Муу нэртэй, муухай царайтайгаараа бид ялаа үүрээд орьё”
хэмээн чамгүй бухимдав.