Month: April 2015

Улсын Их Хурлын чуулганы өнөөдрийн /2015.04.30.Пүрэв гараг/ үдээс өмнөх нэгдсэн хуралдаан 10.00 цагт гишүүдийн 51,3 хувийн ирцтэй эхэллээ. Хуралдааны эхэнд Улсын Их Хурлын гишүүн Ө.Энхтүвшин, Б.Бат-Эрдэнэ нар Тавантолгойн асуудлыг Улсын Их Хурлаар хэлэлцэхийг дэмжиж буйгаа илэрхийлж, уг асуудлыг хэлэлцэх асуудал юунаас болж гацаанд орж хойшлогдоод байгаад тайлбар авахыг хүссэн юм. Тавантолгойн асуудлыг хэлэлцэх эсэхийг шийдэх ажлын хэсэг гаргах талаар намын бүлгүүд ярилцаад гурван намын бүлэг гурвуулаа нэрээ өгсөн. Ажлын хэсэг хагас бүтэн сайнд ажиллах байх. Яаралтай энэ асуудлыг шийдэж оруулж ирэх хэрэгтэй. Гэхдээ одоо өргөн барьсан хууль, тогтоомжтой нийцэж байгаа эсэх дээр дүгнэлт гарах ёстой. Ямар арга замаар явах вэ гэдгийг ажлыг хэсэгт орсон намын бүлгийн гишүүд бүлэг дээрээ очиж ярих хэрэгтэй. Тэгж байж өөрчлөлт оруулна гэсэн тайлбарыг Улсын Их Хурлын дарга өгөв.

Гишүүд тайлбар авсны дараа чуулганы нэгдсэн хуралдаан “Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” Улсын Их Хурлын тогтоолын төслийн хэлэлцэх эсэх асуудлаар үргэлжилж, тогтоолын төслийг хэлэлцэхийг дэмжих боломжгүй гэсэн байнгын хорооны саналын томьёоллоор санал хураалт явуулсныг хуралдаанд оролцсон гишүүд 61,9 хувиар дэмжив. Монгол Улсын Ерөнхийлөгчөөс 2015 оны 04 дүгээр сарын 14-ны өдөр Улсын Их Хуралд өргөн мэдүүлсэн Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай Улсын Их Хурлын тогтоолын төслийг чуулганы хуралдаанд оролцсон гишүүдийн олонх дэмжих боломжгүй гэж үзсэн тул хууль санаачлагчид нь буцаахаар шийдвэрлэлээ.

Үүний дараа Хөрөнгө оруулалтын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг хэлэлцэв. Хууль санаачлагчийн илтгэлийг Засгийн газрын Хэрэг эрхлэх газрын дарга С.Баярцогт, Төрийн байгуулалтын байнгын хорооны санал, дүгнэлтийг Улсын Их Хурлын гишүүн А.Бакей нар тус тус танилцуулав.

Засгийн газрын бүтэц, бүрэлдэхүүний тухай хууль шинэчлэн батлагдсанаар хөрөнгө оруулалтын нэгдсэн бодлого болон гадаадын хөрөнгө оруулалтын бодлого, зохицуулалт, бүртгэлийн асуудал Ерөнхий сайдын эрхлэх асуудлын хүрээнд хамаарах болсон тул Хөрөнгө оруулалтын тухай хуульд заасны дагуу хуучин төрийн захиргааны төв байгууллага /Эдийн засгийн хөгжлийн яам/-ын хэрэгжүүлж байсан чиг үүргийг Монгол Улсын Ерөнхий сайдын эрхлэх асуудлын хүрээнд үйл ажиллагаа явуулж байгаа холбогдох төрийн захиргааны байгууллагад шилжүүлж, нэр томьёог уг хуульд нийцүүлэн өөрчлөх үндэслэл, шаардлагыг харгалзан Хөрөнгө оруулалтын тухай хуульд нэмэлт, өөрчлөлт оруулах тухай хуулийн төслийг боловсруулжээ.

Монгол Улсын Засгийн газрын тухай хуульд нэмэлт, өөрчлөлт оруулах тухай 2014 оны 10 дугаар сарын 7-ны өдрийн хуулиар Эдийн засгийн хөгжлийн яам /хуучин нэрээр/-ыг татан буулгасан бөгөөд “Төрийн захиргааны байгууллагын тогтолцоо, бүтцийн ерөнхий бүдүүвч батлах тухай” Улсын Их Хурлын 2014 оны 12 дугаар сарын 4-ний өдрийн 75 дугаар тогтоолоор Засгийн газрын хэрэгжүүлэгч агентлаг-Хөрөнгө оруулалтын газрыг Монгол Улсын Ерөнхий сайдын эрхлэх асуудлын хүрээнд ажиллуулахаар шийдвэрлэсэн байна.

Хууль санаачлагчийн илтгэл болон байнгын хорооны санал, дүгнэлттэй холбогдуулан гишүүд асуулт асууж хариулт авлаа.Тухайлбал, Улсын Их Хурлын гишүүн Я.Содбаатар, өнөөдөр Монгол Улсад хөрөнгө оруулалтын асуудал хурцаар тавигдаж байна. Шинэ засгийн газар гарч ирснээр хөрөнгө оруулалтын талаар ямар ажил хийв. Хөрөнгө оруулалтын асуудалд илүү ач холбогдол өгч, төр, засаг анхаарлаа түлхүү тавих хэрэгтэй. Хөрөнгө оруулалтын тухай хууль гадаадын хөрөнгө оруулагчдад итгэл өгсөн хууль болж чадсан уу. Төрийн захиргааны байгууллагын шилжилт, хууль эрх зүйн орчинд ойр ойрхон хийгдэж байгаа өөрчлөлт нь тогтворгүй байдлыг бий болгож байна. Тогтворжуулалтын гэрчилгээг хэдэн компани аваад байна гэсэн асуудлыг хөндсөн бол Улсын Их Хурлын гишүүн Ц.Оюунбаатар, хуулийн төслийн гол ач холбогдол юунд байна вэ. Ерөнхий сайдын мэдэлд Засгийн газрын хэрэгжүүлэгч агентлаг-Хөрөнгө оруулалтын газрыг оруулья гэж байгаа юм байна. Гадны хөрөнгө оруулалтыг татах өөр ямар том шинэчлэл байгаа вэ. Өнөөдөр монголд хөрөнгө оруулалт оруулж ирэхэд хамгийн хүнд бэрхшээл нь төрийн албаны хүнд суртал, олон шат дамжлага байгаа. Хичнээн хууль гарсан ч хэрэгжилт муутай байдаг. Энэ асуудалд анхаарсан зүйл байна уу. Дөнгөж сая Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг унагачихлаа. Жинхэнэ зохицуулалт хийх нь энэ хөтөлбөр нь байсан гэв.

Улсын Их Хурлын гишүүн С.Баярцогт хариултдаа, өнөөдрийн хуулийн өөрчлөлт бодлогын бус техникийн шинжтэй өөрчлөлт. Хүлээлт бий болгоод байсан ашигт малтмалтай холбоотой гол гол зохицуулалт бүрэн дүүрэн хийгдсэн. Гадныхан юу хүсч байна гэвэл хамгийн гол нь хууль эрх зүйн орчин тогтвортой байх нь чухал гэдгийг хэлж байгаа. Хөрөнгө оруулалтын орчинг сайруулах талаар гишүүд санал, санаачлага гаргаад ажиллавал хамтарч ажиллахад бэлэн. Юуны түрүүнд бизнесийнхний нуруун дээрх ачааг хөнгөлөх хамгийн том хууль бол Эдийн засгийн ил тод байдлын тухай хууль. Энэ хуулийг Засгийн газрыг татаж аваад дахин боловсруулж өргөн барьсан. Хуулийн хэлэлцүүлэг хурдан хугацаанд хийгдвэл үр дүн гарах бололцоотой гэлээ.

Гишүүд асуулт асууж, үг хэлж дууссаны дараа хуулийн төслийг хэлэлцэх нь зүйтэй гэсэн байнгын хорооны саналаар санал хураалт явуулсныг хуралдаанд оролцсон гишүүд 78,4 хувиар дэмжсэн тул анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлэв.

Хуралдаанаар хэлэлцэх дараагийн асуудал Мөнгөн усны тухай Минаматагийн Конвенци”-д нэгдэн орсныг соёрхон батлах тухай хуулийн төслийг хэлэлцэх байв. Хууль санаачлагчийн илтгэлийг Байгаль орчин, ногоон хөгжил, аялал жуулчлалын сайд Д.Оюунхорол, Аюулгүй байдал, гадаад бодлогын байнгын хорооны санал, дүгнэлтийг Улсын Их Хурлын гишүүн Ц.Баярсайхан нар танилцууллаа.

Мөнгөн ус нь байгаль дээр оршдог элемент бөгөөд хүний үйл ажиллагаатай холбоотойгоор болон өөрөө байгаль дээр ялгарч, хүний эрүүл мэндэд хортой нөлөө үзүүлдэг онцгой хортой бодис юм байна. Мөнгөн ус нь задарч устдаггүй учраас үүссэн газраасаа хол тархах чадвартай ба агаар, ус, хөрс, ургамал, амьтны хооронд урт хугацаанд шилжиж хөдөлгөөнд оршиж, хүний тархи, төв мэдрэлийн систем, бөөр, уушгийг гэмтээж, мэдрэлийн системийн гажиг, дутуу хөгжилтэй хүүхэд төрөхөд нөлөөлдөг байна. Хэлэлцэж буй асуудалтай холбогдуулан гишүүд асуулт асууж, үг хэлсэн.

Тухайлбал, Улсын Их Хурлын гишүүн Г.Батхүү асуултдаа, мөнгөн ус агуулсан бүтээгдэхүүн, тоног төхөөрөмжийн зохицуулалт, хяналт муу байгаа. Үүнийг хэлэлцэж буй асуудлын хүрээнд зохицуулах ямар боломжтой вэ. Мөнгөн ус агуулсан хаягдлын цуглуулга, хадгалах, устгах асуудлыг зохицуулсан журам байхгүй, менежментийн систем байхгүй байгаагаас, иргэд мэдээлэл муутай, мэдэхгүй байгаагаас болж мөнгөн усанд их хорддог. Тухайлбал хог хаягдалтай цуг маш их мөнгөн ус хаягдаж байна. Түүнийг хогноос тусгаарлах, хоргүйжүүлэх асуудлыг энэ хүрээнд яаж авч үзэх вэ. Мөн мөнгөн ус агуулсан тоног төхөөрөмж, багаж хэрэгсэлтэй харьцдаг хүмүүсийн мэдлэг хангалтгүй байгаагийн зэрэгцээ, тэр тоног төхөөрөмжийг эргээд ашиглах боломжгүй болсон үед нь устгадаг, хоргүйжүүлдэг системийг яаж тогтоох вэ гэсэн асуудлыг хөндөв.

Улсын Их Хурлын гишүүн Д.Тэрбишдагва, мөнгөн ус ашиглалтын асуудал өнөөдөр цэгцтэй болоогүй. Мөнгөн усыг нууцаар оруулж ирдэг гэсэн мэдээлэл байдаг нь хэр бодитой вэ. Гаднаас орж ирж байгаа мөнгөн усны албан ёсны хэмжээ байна уу. Энэ хортой бодисыг багасгах хүрээнд хортой хог хаягдлын үйлдвэрлэл барих асуудал хэзээ шийдэгдэх вэ. Гар аргаар боловсруулж байгаа алтны хэмжээн дээр мөнгөн усыг багасгаж чадсан гэж байгаа нь сайшаалтай байна. Мөнгөн усны хордлогоос болж өвдсөн, эрүүл мэнд нь хохирсон хүн хичнээн байдаг вэ гэсэн асуултыг асуув.

Улсын Их Хурлын гишүүн, Байгаль орчин, ногоон хөгжил, аялал жуулчлалын сайд Д.Оюунхорол өгсөн тайлбартаа, НҮБ-ын Байгаль орчны хөтөлбөрөөс гаргасан аргачлалыг ашиглан Монгол Улсад анх удаа 2011 онд мөнгөн усны ялгарлын тооллогыг хийхэд улсын хэмжээнд жилд 577.0 тонн мөнгөн ус ялгарч байгаагийн 85.9 хувь нь хөрсөнд, 5.43 хувь нь агаарт, 3.9 хувь нь завсрын бүтээгдэхүүнтэй, 2.6 хувь нь хог хаягдалтай хамт, 1.9 хувь нь усанд, 0.15 хувь нь хог хаягдал устгах болон цэвэрлэх байгууламжид хаягдаж байгаа бөгөөд гол эх үүсвэр нь өнгөт металлын анхан шатны боловсруулалт, мөнгөн ус агуулсан бараа бүтээгдэхүүний хаягдал, нүүрсээр ажилладаг цахилгаан дулааны станц, уурын болон ус халаагуурын зуух гэж тогтоосон гэлээ. Мөн ажлын хэсгээс өгсөн хариултад, мөнгөн усны хэрэглээ манай улсад харьцангуй хязгаарлагдсан. Алтны олборлолтод мөнгөн ус хэрэглэж байгаа ажиллагааг зогсоож чадсан гэж хэлж болно. Төв, Баянхонгор аймагт бага хэмжээгээр нууцаар ашиглаж байгаа тохиолдол байгаа. Ойрын хугацаанд дэлхий нийтээр хориглож байгаа мөнгөн ус агуулсан тоног төхөөрөмж, багаж хэрэгсэл, хэрэглээний зүйлсийг улсын хилээр оруулахыг хориглох хуулийн төслийг боловсруулахаар ажиллаж байгаа гэв.

Гишүүд асуулт асууж, үг хэлж дууссаны дараа “Мөнгөн усны тухай Минаматагийн Конвенци”-д нэгдэн орсныг соёрхон батлах тухай хуулийн төслийг батлах нь зүйтэй гэсэн байнгын хорооны саналаар санал хураалт явуулсныг хуралдаанд оролцсон гишүүд 78.2 хувийн саналаар дэмжсэнээр чуулганы үдээс өмнөх нэгдсэн хуралдаан завсарлалаа хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

УИХ-ын даргын захирамжаар байгуулсан ажлын хэсгийнхэн олон нийтийг шүүмжлэлийг багагүй татаад байгаа юм. Гэтэл нэг ажлын хэсэг байгуулаад зогсохгүй ажлын хэсгийн дор ахиад дэд ажлын хэсгийг УИХ-ын дарга З.Энхболдын захирамжаар байгуулжээ.

Монгол Улсын Засгийн газраас боловсруулсан Тавантолгойн гэрээний төслөө УИХ-д өргөн бариад долоо хонож байна. Өнгөрсөн долоо хоногийн пүрэв гаригт ЗГХЭГ-ын дарга С.Баярцогт Тавантолгойн гэрээний төслийг УИХ-ын дарга З.Энхболдод өргөн барьсан. Энэ төслийг бүлгүүдээр хэлэлцсэн боловч, өнөөдрийг хүртэл нэгдсэн шийдвэрт хүрээгүй байгаа. Мөн Эдийн засгийн байнгын хороогоор өчигдөр орох ёстой байсан ч УИХ-ын даргын шийдвэрээр Ажлын хэсэг байгуулсны дараа хэлэлцэхээр болсон юм.

Лхагва гаригт буюу өчигдөр УИХ-ын даргын захирамжаар Тавантолгойн ажлын хэсгийг томилж, ахлагчаар Л.Эрдэнэчимэгийг, гишүүдээр нь А.Бакей, Су.Батболд, О.Баасанхүү, Д.Ганхуяг, С.Ганбаатар, Б.Наранхүү, Д.Сумъяабазар, Б.Чойжилсүрэн нарыг томилсон. Мөн Тавантолгойн асуудлаар ажлын хэсэг байгуулсантай холбоотойгоор дэд ажлын хэсэг байгуулжээ.

Дэд ажлын хэсгийг УИХ-ын дарга З.Энхболдын Хуулийн зөвлөх А.Гансүх ахалж байгаа бол гишүүдэд нь П.Амаржаргал / УИХ-ын Тамгын газрын ахлөх зөвлөх/, Б.Батбилэг /Эрдэнэс Тавантолгойн компанийн санхүү эрхэлсэн дэд захирлын үүрэг гүйцэтгэгч/, И.Индранила /Эрдэнэс Оюутолгой компанийн хуулийн зөвлөх/, М.Мягмар-Эрдэнэ “Эрдэнэс Тавантолгой” компанийн үйлдвэр эрхэлсэн дэд захирал/ нар багтжээ.

Үүнийг харсан зарим хүмүүс Засгийн газраас өргөн барьсан гэрээний төслийг яахаараа төрийн өмчит компанийн ажилтнууд шүүн хэлэлцэх эрхтэйг гайхаж байна. Нөгөөтэйгүүр, Тавантолгойн ордын гэрээнд хаа байсан “Эрдэнэс Оюутолгой” компанийн хуулийн зөвлөхийг багтаасан нь гайхширал дагуулж байна. Тиймээс ажлын хэсгийн дор ажлын хэсэг ахиад дор нь ажлын хэсэг байгуулбал гайхах ч хэрэггүй биз.

Гуравдугаар хорооллын 16 дугаар байр нурах аюул нүүрлэж, оршин суугчдын хүнд байдал ороод байгаа. Гэтэл уг байрыг нурах аюулгүй гэж мэргэжлийн хяналтын газраас дүгнэлт гаргуулсан. Тэгвэл дээрх байрны ашиглалтын хэвийн ажиллагааг хангах талаар авах арга хэмжээний тухай захирамжийг Нийслэлийн Засаг дарга гаргасан байна. Тодруулбал, орон сууцны ашиглалтын хэвийн байдлыг хангах, уг асуудалтай холбогдуулан хууль, журам зөрчсөн эрх бүхий албан тушаалтан, аж ахуйн нэгжид хариуцлага тооцохоор шийдвэрлэжээ. Уг захирамжид:

1. Баянгол дүүргийн 15 дугаар хороо, 3 дугаар хорооллын 16 дугаар байрны барилгын сууринд барилгын норм дүрэм, стандарт, технологийн горим зөрчин, барилгын суурь газар шорооны ажлыг гүйцэтгэсний улмаас үүссэн нөхцөл байдалд хийсэн Мэргэжлийн хяналтын ерөнхий газрын улсын байцаагчийн 2015 оны 04 дүгээр сарын 24-ний өдрийн 07/008/207 дугаар дүгнэлтийн дагуу дараах арга хэмжээг авч хэрэгжүүлэхийг үүрэг болголоо.

1.1.Баянгол дүүргийн 15 дугаар хороо, 3 дугаар хорооллын 16 дугаар байрны суурь суулгалтын зөрүү, барилга хоорондын хөрсний өөрчлөлт, гулсалт, хийц бүтээцийн төлөв байдлын судалгаа шинжилгээг мэргэжлийн байгууллагаар гүйцэтгүүлэх, судалгааны дүнд үндэслэн барилгын аюулгүй байдлыг хангуулах арга хэмжээ авахыг нийслэлийн Ерөнхий төлөвлөлөгөөний газарт

1.2.Барилгын буурь хөрсний байдалд хийсэн судалгаа шинжилгээний дүн, хөрсний нуралт үүссэн нөхцөл байдлаас үндэслэн хүчитгэлийн зураг төсөл боловсруулахыг нийслэлийн Зураг төслийн хүрээлэн, зураг төслийн дагуу бэхлэх, хүчитгэх ажлыг орчны болон зэргэлдээх барилга байгууламжуудын аюулгүй байдлыг хангасны үндсэн дээр тусгай зөвшөөрөлтэй аж ахуйн нэгж байгууллагаар яаралтай гүйцэтгүүлэх, гүйцэтгэлд нь захиалагчийн хяналт тавихыг нийслэлийн Хөрөнгө оруулалтын газарт;

1.3.Орон сууцны 16 дугаар барилгын бохир ус цуглуулах шугам хоолой, ТТ-1 тунгаагуурын далд шугам хоолойн ашиглалтын шаардлагыг хангуулах, үерийн далан, лоткины хэвийн ажиллагааг хангах арга хэмжээ авч ажиллахыг Улаанбаатар хотын Захирагчийн ажлын Албанд

2. Дээрх үүссэн нөхцөл байдалтай уялдуулан авсан шуурхай арга хэмжээний дагуу Баянгол дүүргийн 15 дугаар хороо, 3 дугаар хорооллын 16 дугаар байрны оршин суугчдыг нүүлгэн шилжүүлж байрлуулах, хөрсний суурь байдалд судалгаа шинжилгээ, сууринд хөрсний нуралтаас хүчитгэл, бэхэлгээ хийх, инженерийн барилга байгууламжийг засварлах болон бусад сэргээн босгох ажлын зураг төслийг боловсруулж, мэргэжлийн байгууллагаар яаралтай гүйцэтгүүлэхэд шаардагдах зардлыг норм нормативын дагуу тооцон хянаж, нийслэлийн Засаг даргын нөөц хөрөнгөөс зарцуулж, холбогдох буруутай этгээдээр нөхөн төлүүлэх арга хэмжээ авахыг Тамгын газарт даалгалаа.

3.Захирамжийн хэрэгжилтэд хяналт тавих ажлыг холбогдох хууль тогтоомжид заасны дагуу зохион байгуулах, нэгдсэн удирдлагаар хангаж ажиллахыг Хот байгуулалт, хөрөнгө оруулалтын асуудал хариуцсан орлогч С.Очирбатад үүрэг болголоо.

Нийслэлийн Засаг дарга “Барилгын хууль тогтоомж зөрчсөн байгууллага, албан тушаалтанд хариуцлага тооцох талаар авах зарим арга хэмжээний тухай” А/354 дугаар захирамж

1. Холбогдох хууль тогтоомж болон газар эзэмшүүлэх гэрээгээр хүлээсэн үүргээ ноцтой зөрчсөн “Би Жи Би Жи” ХХК-ийн газар эзэмших эрхийг хүчингүй болгох талаар саналаа боловсруулж, 2015 оны 4 дүгээр сард багтаан танилцуулахыг нийслэлийн Өмчийн харилцааны газарт

2. Баянгол дүүргийн 15 дугаар хороо, 3 дугаар хорооллын 16 дугаар байрны барилгын сууринд барилгын норм дүрэм, стандарт, технологийн горим зөрчин, барилгын суурь газар шорооны ажлыг гүйцэтгэсний улмаас үүссэн нөхцөл байдалтай холбогдуулан дор дурдсан асуудлаар санал боловсруулж, танилцуулахыг Тамгын газарт

2.1. Газар эзэмших, ашиглах эрх олгох, барилга байгууламжийн байршил тогтоох, архитектур төлөвлөлтийн даалгавар боловсруулах, барилгын эскиз зургийг батлахдаа шинээр барих барилгын зориулалт, хүчин чадлыг ашиглаж байгаа барилгуудтай уялдуулаагүй, өөрийн эзэмшлийн шугам, хоолойн ашиглалтын хэвийн нөхцөлийг хангаагүй, барилга байгууламжийн ашиглалтад хяналт тавиагүй, зураг төсөл боловсруулах, магадлал хийх, барилгын ажил гүйцэтгэхтэй холбогдсон зөрчлийг тухай бүр шалгаж дүгнэлт гаргах үүргээ зохих ёсоор хэрэгжүүлээгүй холбогдох албан тушаалтнуудад хариуцлага тооцох;

2.2. Засгийн газрын 2009 оны 204 дүгээр тогтоолоор батлагдсан “Барилга байгууламжийн зураг төсөл боловсруулах, зөвшилцөх, магадлал хийх дүрэм”-ийг зөрчиж хот төлөвлөлтийн зай хэмжээ, барилгын бат бэх, галын найдваржилт зэрэг өндөр барилгын төлөвлөлтөнд тавигдах шаардлагуудыг тусгаагүй эскиз, ажлын зураг төсөлд магадлал хийж дүгнэлт гаргасан албан тушаалтнуудад хариуцлага тооцох, хяналт тавих талаар Барилгын хөгжлийн төвд санал хүргүүлэх;

2.3. Барилгын тухай хуулийн 14 дүгээр зүйлийн 14.9 дэх хэсэг, Засгийн газрын 2012 оны 151 дүгээр тогтоолоор батлагдсан “Барилгын ажлыг эхлүүлэх, үргэлжлүүлэх, ашиглалтад оруулах дүрэм”-ийн 2.4 дэх заалтыг зөрчиж, тухайн барилгын зураг төсөл боловсруулах болон угсралтын ажил гүйцэтгэх тухайлсан обьектын тусгай зөвшөөрөлгүй этгээдэд барилга угсралтын ажил эхлэх, үргэлжлүүлэх зөвшөөрөл олгосон эрх бүхий албан тушаалтнуудад хариуцлага тооцох, хяналт тавих талаар Барилга хот байгуулалтын яаманд санал хүргүүлэх;

2.4. Нийслэлийн иргэдийн Төлөөлөгчдийн Хурлын 2014 оны 5/14 дүгээр тогтоолоор батлагдсан “Нийслэлийн нутаг дэвсгэрт барилга барих газар олгох, барилгын эх загвар зураг батлах, барилга угсралтын ажил эхлүүлэх, ашиглалтад оруулах үйл ажиллагааны журам” болон холбогдох хууль тогтоомжид заасан барилгын суурийн улаан шугам тавих үйл ажиллагааны талаар хүлээсэн үүргээ хангалтгүй биелүүлж, тусгай зөвшөөрлийн нөхцөл, шаардлагыг ноцтой зөрчсөн этгээдэд хариуцлага тооцох, геодезийн үйл ажиллагаа явуулах тусгай зөвшөөрлийг цуцлуулах саналыг холбогдох байгууллагад хүргүүлэх;

2.5. Нийслэлийн Онцгой комиссын 2015 оны 04 дүгээр сарын 23-ны өдрийн 01 дүгээр тушаалын дагуу үүссэн нөхцөл байдалтай уялдуулан авсан шуурхай арга хэмжээний дагуу Баянгол дүүргийн 15 дугаар хороо, 3 дугаар хорооллын 16 дугаар байрны оршин суугчдыг нүүлгэн шилжүүлсэн, байрлуулсан болон бусад урьдчилан гаргасан зардлыг Мэргэжлийн хяналтын ерөнхий газрын 2015 оны 04 дүгээр сарын 24-ний өдрийн 07/008/207 дугаар дүгнэлтээр “Барилга угсралтын ажилд мөрдөх хөдөлмөрийн аюулгүй ажиллагааны үлгэрчилсэн заавар” БД12-101-05 дүрмийн 1.4, 1.5 дахь заалтыг зөрчсөн нь тогтоогдсон “Би Жи Би Жи” ХХК-иас гаргуулж, нөхөн төлүүлэх.

3. Барилгын архитектур төлөвлөлтийн даалгавар, батлагдсан зураг төсөл, магадлалын дүгнэлт, барилгын норм, дүрэм, стандарт, технологийн горим зөрчиж барилга угсралтын үйл ажиллагаа явуулж байгаа иргэн, аж ахуйн нэгж, байгууллагуудын талаарх танилцуулга, цаашид авах арга хэмжээний тухай санал, дүгнэлтийг нийслэлийн Удирдлагын зөвлөлийн хуралд 2015 оны 04 дүгээр сард багтаан хэлэлцүүлэхийг нийслэлийн Мэргэжлийн хяналтын газарт

4. Холбогдох хууль тогтоомж, дүрэм, журмаар хүлээсэн үүргээ зөрчиж, ажлын хариуцлага алдаж ноцтой нөхцөл байдал үүсгэсэн албан тушаалтныг шалгаж, гэм буруутай эсэхийг тогтоохыг Улаанбаатар хотын Цагдаагийн газарт үүрэг болголоо гэж.

Долоо хоног бүрийн пүрэв гаригт болдог “Сайдын цаг” уулзалтад Хүн амын хөгжил, нийгмийн хамгааллын сайд С.Эрдэнэ оролцоно. Уулзалт өнөөдөр 12.00 цагт Засгийн газрын хуралдааны танхимын дэргэдэх Мэдээллийн төвд болно.

Тэтгэврийн насыг нэмэх тухай асуудал яригдаж, олны дургүйцлийг хүргэж байгаа. Тэгвэл С.Эрдэнэ сайд “Өдрийн сонин”-д өгсөн ярилцлагадаа тэтгэвэрийн насыг нэмэхгүй гэж тодотгосон билээ. Тэрбээр “Сайдын цаг” уулзалтаараасалбартаа хийсэн асуудал, хэрхэн хөгжүүлэх тухай ажлынхаа төлөвлөгөө, тэтгэврийн насыг хойшлуулах болсон үндэслэл зэргийг мэдээлж, сэтгүүлчдийн сонирхсон асуултад хариулах юм.

Нийслэлийн удирдлагууд Сонгинохайрхан дүүргийн 500, Баянзүрх дүүргийн 600, Сүхбаатар дүүргийн 525, Чингэлтэй дүүргийн 580, Баянгол дүүргийн 380 нийт 3000 гаруй аж ахуйн нэгжийн төлөөлөлтэй уулзлаа. Уулзалтын үеэр АСЕМ-ын дээд хэмжээний чуулга уулзалтыг угтан Улаанбаатар хотод үйл ажиллагаа явуулж байгаа 35 мянган аж ахуйн нэгжийн дунд 2015 оны шилдэг тохижилт, ногоон байгууламжтай, цэмцгэр байгууллага аж ахуйн нэгж шалгаруулах болзолт уралдаан зарлаж байгааг танилцуулав.

Энэхүү уралдаантай хамтатган согтууруулах ундаа худалдах, түүгээр үйлчлэх тусгай зөвшөөрөлтэй газруудад аттестатчилал явуулах юм. Аж ахуйн нэгжийн удирдлагууд аттестатчиллыг хэрхэн явуулах, Гадна хаяг мэдээллийн байгууламжид тавигдах шаардлага, Амьдрах орчны зураглалд согтууруулах ундаа худалдах, түүгээр үйлчлэх тусгай зөвшөөрөлтэй газруудын байршил тоо хэмжээг хэрхэн тусгасан талаархи асуудлаар санал солилцлоо. Аж ахуйн нэгжийн удирдлагууд нийслэлээс зохион байгуулж байгаа ажлыг дэмжиж байгаагаа илэрхийлээд цаашид энэ жишгээр төр хувийн хэвшлийн хамтын ажиллагааг хангах олон ажлыг санаачлан зохион байгуулж байхыг хүсч, идэвхитэй оролцохоо илэрхийллээ гэж Улаанбаатар хотын Захирагчийн ажлын албанаас мэдээллээ.