Нийслэлийн 375 жилийн ойн хүрээнд Нийслэлийн Архивын газраас “Нүүдлийн хотоос-Суурин хот” нэн үнэт баримт болон гэрэл зургийн үзэсгэлэнг Үндэсний музейд толилуулж байна. Энэхүү үзэсгэлэн нь нийслэлийн ард иргэд, хүүхэд багачууд, хойч үеийнхэнд Улаанбаатар хотын түүхэн хөгжил, түүхийг таниулах, судлах, сурталчлах, их хотоо хайрлан хамгаалах хүмүүжил олгох зорилготой аж. Үзэсгэлэнд 1639-2014 он хүртэлх нийслэлийн түүхэнд холбогдох нэн үнэт 20 гаруй уран зураг, газрын зураг, 240 гаруй гэрэл зураг, Өргөө, Нийслэл хүрээ, Улаанбаатар хотын түүхэнд холбогдох 30 гаруй зарлиг, тогтоол, шийдвэр мөн баримтат кино, нийт 40 гаруй, дижитал хэлбэрээр үзүүлэх 50 гаруй үзмэрийг дэлгэн тавьсан байна. Үзэсгэлэнг арваннэгдүгээр сарын 07-ныг хүртэл үнэ төлбөргүй олон нийтэд үзүүлэх нь ээ. 
Month: October 2014
Сүхбаатар дүүргийн нутаг дэвсгэрээс төрөөд нэг ч хоноогүй хүүхдийн цогцос олджээ. Энэ сарын 27-28-ны шөнө төрүүлсэн хүүхдээ эх нь хаясан байх магадлалтай хэмээн үзэж байгаа аж. Тиймээс жирэмсэн байж байгаад төрөх хугацаа нь дөхсөн, хүүхэд нь яасан нь тодорхойгүй байгаа сэжигтэй иргэний мэдээллийг Нийслэлийн цагдаагийн газрын Гэмт хэрэгтэй тэмцэх газарт мэдэгдэхийг хүслээ. Мэдээллийг өндөр үнээр худалдаж авах аж. Сэжигтэй иргэний талаарх мэдээллийг 93022480, 99095223 дугаарын утсаар авна гэв.
Нийслэлийн 375 жилийн ойд зориулан Улаанбаатарт Үйлдвэрлэв 2014 хөтөлбөрийн хүрээнд нийслэлийн Жижиг дунд үйлдвэрийг дэмжих төв НӨҮГ-аас уламжлал болгон зохион байгуулдаг Улаанбаатарт Үйлдвэрлэв 2014 үзэсгэлэн худалдаанд оролцох хүсэлтэй жижиг дунд үйлдвэр эрхлэгч, иргэн, аж ахуй нэгжүүдийг 2014 оны 11 дүгээр сарын 03-07-ны өдрийн хооронд бүртгэнэ. Бүртгэл дээрх өдрүүдэд Нийслэлийн Засаг захиргааны IV дүгээр байрны 101 тоотод 08-17 цагийн хооронд явагдана. Улаанбаатарт үйлдвэрлэв 2014 үзэсгэлэн худалдаа 11 дүгээр сарын 21-23 өдрүүдэд Мишээл экспод болно. Дэлгэрэнгүй мэдээллийг 318547, 99106847, 88099941, 95824323,96024323,89824323 дугаарын утсаар авах боломжтой гэж Нийслэлийн Жижиг дунд үйлдвэрийг дэмжих төв НӨҮГ-аас мэдээллээ.
Татварын ерөнхий газрын Хяналт шалгалт, арга зүйн хэлтсийн дарга асан Ч.Гансүх, Баянгол дүүргийн Татварын хэлтсийн дарга асан Д.Энхбат тэргүүтэй 13 хүнд холбогдох хэргийг Улсын дээд шүүхэд өнөөдөр хэлэлцэж байна.
Тэдэнд холбогдох хэргийг Дүүргийн эрүүгийн хэргийн анхан шатны I шүүх өнгөрсөн хоёрдугаар сард таван өдөр хэлэлцээд Ч.Гансүхийг албан тушаал, эрх мэдлээ урвуулан ашиглаж, бусдаас хахууль авахыг завдсан, хууль бусаар хөрөнгөжсөн, албан тушаал, эрх мэдлээ урвуулан ашиглах гэмт хэргийг зохион байгуулсан гэм буруутайд тооцож, татварын улсын байцаагчаар ажиллах эрхийг нь найман жилээр хасч, найман жил чанга дэглэмтэй хорих ангид ял эдлүүлэхээр шийдвэрлэсэн билээ. Харин шүүгдэгч Д.Энхбатад мөн найман жил чанга дэглэмтэй хорих ангид ял эдлүүлэх, татварын улсын байцаагчаар ажиллаж байсан Т.Галмандах, О.Бямбасүрэн, Н.Рагчаахүү, Б.Өсөхбаяр, Н.Чинбат, Б.Жаргал нарыг албан тушаалаа урвуулан ашигласанд тооцож, гурван жил хорих ял оноосон билээ.
Анхан шатны шүүхийн энэхүү шийдвэрийг өнгөрөгч тавдугаар сард Давж заалдах шатны 10 дугаар шүүхэд хэлэлцээд Ч.Гансүхийн хууль бусаар олсон 2.8 тэрбум төгрөг гэсэн үнийн дүнд давхардал гарсныг засч, 1.4 тэрбум төгрөгийг улсын орлого болгохоор болж, бусад холбогдогчид оногдуулсан ялыг хэвээр баталсан юм.
Тэдний хяналтын шатанд гаргасан гомдлыг Дээд шүүхэд яг одоо хэлэлцэж байна.
Төрийн байгуулалтын байнгын хорооны өнөөдрийн хуралдаанаар УИХ-ын 28 гишүүнээс өргөн мэдүүлсэн Ерөнхий сайд Н.Алтанхуягийг огцруулах эсэх асуудлыг хэлэлцэхээр товлосон ч АН-ын бүлгийн дарга Д.Эрдэнэбат ирэх долоо хоногийн лхагва гаригийн байнгын хорооны хуралдаан хүртэл завсарлага авлаа. Тэрээр завсарлага авахдаа “Ерөнхий сайдыг огцруулах асуудлаар хугацаа алдагдаж байгаа. Овоо босгоогүй бол шаазгай юунд суух вэ гэгчээр Ардын намын хэд маань ийм санал өргөн бариагүй бол асуудал ингэж хүндрэхгүй. АН-ын бүлэг үдээс хойш энэ асуудлаар үргэлжлүүлэн хуралдахаар төлөвлөсөн” гэв. Харин түүний үгэнд УИХ-ын дэд дарга, МАН-ын дарга М.Энхболд хатуухан хариу барилаа.
МАН-ын дарга М.Энхболд хэлэхдээ “Бид овоо босгоё гэж зорьж яваад байсан юм огт байхгүй. Д.Эрдэнэбат дарга үгээ олж хэлж байх нь зүйтэй болов уу. Та МАН-ын бүлгийн 26 гишүүн, танай намын бүлгийн төлөөлөл, “Шударга ёс” эвслийн бүлгийн төлөөлөл бүхий 28 гишүүн гарын үсэг зурж, УИХ-ын гишүүнийхээ бүрэн эрхийн дагуу Ерөнхий сайдад хариуцлага тооцуулахаар өргөн мэдүүлсэн тогтоолын төсөлд ингэж хариуцлагагүй хандаж болохгүй. Энэ бичиг өргөн баригдаад 14 хонож байгаа. Та нар 14 хоногийн хугацаанд иргэд, олон түмний дунд яригдаж байгаа зүйл, тэдний санаа бодлыг сайтар судалж үзэх хэрэгтэй.
Бидний өргөн барьсан бичиг бол Монголын ард түмний дийлэнх олонхийн хүсэл санаа зоригт нийцсэн зүйл. 28 хүн босгосон овоо биш шүү. Улс орны эдийн засгийн байдал ямар болчихоод байгаа билээ, үүнд дүгнэлт хиймээр байна. Би хэд хоногийн өмнө байнгын хорооны хуралдаанд Монголд засаглалын хямрал бий болчихлоо гэж сануулж байсан. Харин өнөөдөр засаглалын хямрал бодитой нүүрлэчихлээ. Засаглалын хямралыг дагаад хууль тогтоох дээд байгууллага үйл ажиллагаагаа явуулж чадахгүй болчихлоо. Бакей дарга аа, Та Төрийн байгуулалтын байнгын хорооны даргын хувьд үүнд анхаарах ёстой шүү. Өнгөрсөн долоо хоногт З.Баянсэлэнгэ гишүүн Ерөнхий сайдыг огцруулах эсэх асуудлаас завсарлага авсан. Завсарлага дуусаад гурав хонож байна. Энэ гурван хоногт байнгын хороо асуудлаа хэлэлцэх талаар ямар ч санал санаачилга гаргаагүй. Лхагва гаригт УИХ юу ч хийгээгүй. Пүрэв гаригт УИХ төсөв дагаж орсон ганцхан асуудлыг хэлэлцсэн. Өнөөдөр дахиад завсарлага авчихлаа. Цаана нь цаг алдахгүй ярилцаж шийдэх ёстой төсвөөс эхлээд улс орны амьдралын олон асуудал бий.
Та бүхэн энэ байдалдаа дүгнэлт хийгээч ээ. Төр улсын ажил ийм хариуцлагагүй, замхарч байхад ард олонд хэлэх үггүй болж байна. Гадна талд эмх замбараагүй байдал үүсвэл эндээс Засгийн газар, УИХ юм хэлэх эрхгүй, нүүргүй, ичмээр байдалтай болж байна. Та бүхэн хийх ёстой ажлаа ажлаа хийж чадахгүй 3-4 хоногоор ордон дотор бие биеэ хүлээгээд сэлгүүцэж болохгүй шүү дээ. Тиймээс ойрын үед энэ асуудлаа яаралтай шийдэж хуулийн хүрээнд нь болгомоор байна” гэлээ.
Мөн Л.Цог гишүүн завсарлага авах нэрийдлээр асуудлыг сунжруулж болохгүйг сануулаад “Бид арай дэндэж байна. Тангараг өргөчихөөд ингээд сууж болохгүй” гэж байлаа. Тэрээр АН-ын бүлгийн дарга Д.Эрдэнэбатаар хэлэх үгээ заалгахгүйгээ ч энэ үеэр хэлээд амжив.
Харин Төрийн байгуулалтын байнгын хорооны дарга А.Бакей “Миний хувьд ч гэсэн та нартай адилхан байр суурьтай байгаа. Төсөв батлах хугацаа хаяанд ирсэн үед энэ асуудлыг нэг тийшээ болгох ёстой” гэж үзэж буйгаа илэрхийлсэн юм.
Байнгын хорооны хуралдаанд тус байнгын хороонд харьяалагддаг МАН-ын бүлгийн гишүүд бүгдээрээ ирсэн бол АН-ын бүлгээс А.Бакей, Д.Эрдэнэбат, Р.Бурмаа нар л оролцлоо.
Э.ЭНХ
АНУ-ын Нью-Йорк хотод энэ сарын 27-нд жуулчилж явсан 62 настай Монголын иргэн сураггүй болсон талаар тус хотын цагдаагийн газраас мэдээлсэн байна. Алга болсон жуулчин Монгол Улсын Төрийн соёрхолт зураач Долгоржавын Болд ажээ. Тэрээр алга болохоосоо өмнө Нью-Йорк хотын Манхаттен дүүргийн наймдугаар өргөн чөлөөний 31-р гудамжинд явж байсан нь камерын бичлэгт үлджээ. Тухайн үед саарал өнгийн хантааз, улаан ноосон цамц, хар өмдтэй явсан байна.
Зураач До.Болд жуулчилж байх хугацаандаа Лонг Айланд хотын “Fairfield” зочид буудалд байрлаж байсан гэнэ. Нью-Йоркийн цагдаагийн газраас түүнийг төөрсөн, эсвэл ямар нэгэн золгүй явдал тохиолдсон хэмээн таамаглаж буй юм.
Монгол Улсын Төрийн соёрхолт зураач До.Болд нь И.Репиний нэрэмжит Уран зургийн академийг 1977 онд дүүргэсэн. Түүнийг Монголын дүрслэх урлагийн салбарт “Ардчилал”-ын салхийг анх зоригтойгоор оруулж ирсэн уран бүтээлч гэж тодорхойлох нь бий. Дэлхийн 20 гаруй оронд, 30 орчим үзэсгэлэн гаргаж, олон улсын шагнал удаа дараа хүртсэн түүнийг зөвхөн Монголын бус, дэлхийн уран бүтээлч гэдэг. Тухайлбал, түүний дүрслэх урлагийн салбарт оруулсан хувь нэмрийг өндрөөр үнэлэн Англи дахь олон Улсын намтрын төвөөс 2012 онд шилдэг 100 мэргэжилтний нэгээр шалгаруулж байсан билээ.
Э.НОМИН
Японы хаан ширээг залгамжлах хунтайж Нарухитогийн гэргий гүнж Масако 11 жилийн дараа анх удаа албан ёсны арга хэмжээнд оролцлоо. Нидерландын хаан Вилгелм-Александр, гүнж Максимагийн хамт Японд айлчилж байгаа юм. Тэдэнд зориулан Японы эзэн хаан хүндэтгэлийн хүлээн авалт зохион байгуулжээ.
Гүнж Масако сэтгэлийн хямрал өвчинд нэрвэгдсээр олон жил болж байгаа. Хамгийн сүүлд тэрээр 2003 онд Японы хааны ордонд болсон хүлээн авалтанд оролцжээ. Түүнээс хойш албан ёсны арга хэмжээнд оролцож олны өмнө бараг гараагүй. 2008 онд Их Британийн хунтайж Чарльз болон түүний гэргий Камилла нартай уулзахдаа зургаа авахуулсан удаатай.
Гүнж Масако нь Токиогийн болон Принстоны их сургуулийг дүүргэж, Харвардын их сургуульд эрдмийн зэрэг хамгаалж Японы Гадаад хэргийн яаманд дипломатчаар ажиллаж байсан. Өндөр боловсролтой гэгддэг Масако Японы хаан ширээг залгамжлах хунтайжтай гэрлэснээсээ хойш сэтгэл санааны хямралд автсан байна. Хааны ордны дэг жаяг, хаан ширээг залгамжлах хүү төрүүлэх шаардлагатай болсон зэрэг нь түүний эрүүл мэндэд сөргөөр нөлөөлсөн гэдэг. Түүнийг 2001 онд охин Айкогоо төрүүлэхэд Японы хаан ширээг залгамжлагчийн асуудал хурцаар тавигдаж, бүсгүй хүн хаан ширээг залгамжлах эсэх талаар яригдаж байсан.
Өчигдөр Ардчилсан намын бүлгийнхэн хаалттай хуралдлаа. Бүлгийн хуралдаанаар АН-ын дарга Н.Алтанхуяг намаа төлөөлөн МАХН-ын дарга Н.Энхбаяртай байгуулсан гэрээнийхээ хүрээнд намынхаа даргыг өгөх тухай асуудлыг өдөржин хэлэлцжээ. Өнөөдөр асуудлыг үргэлжлүүлэн хэлэлцэх бол “Алтан гадас”-ынхан намын даргын суудлыг нь өгүүлэхгүй байх талаас нь, “Шонхор” болон “МоАХ” фракцынхан намын даргын суудлыг авах сонирхолтой байгаагаа илэрхийлжээ. Асуудлыг бүлэг дээр шийдлээ ч Гүйцэтгэх зөвлөл, ҮЗХ-оор дахин хэлэлцэх шаардлагатай учир энэ долоо хоногтоо бараг шийдэхгүй байх гэцгээж байна. Намын даргаа өгөөд Ерөнхий сайдаа үргэлжлүүлэн хийе гэхээр намын дүрэмтэй харшлах асуудал тулгарах тул бүлгийнхэн нь ч гэсэн яаран шийдвэр гаргахгүй бололтой. Өчигдрийн хувьд дорвитой зүйл хэлэлцэн байр сууриа нэгтгэж чадаагүй гэнэ.
Л.ТӨР
Байнгын хорооны өнөөдрийн хуралдаан дээр АН-ын бүлэг завсарлага авав. Ингэснээр Ерөнхий сайд Н.Алтанхуягийг огцруулах эсэх асуудлыг ирэх долоо хоногт хэлэлцэхээр боллоо.
Н.Алтанхуяг сайдыг огцруулахаар УИХ дахь МАН-ын бүлгийн 26 гишүүн дээр Л.Цог, Ж.Батзандан нарын хоёр гишүүн нэмэгдэж нийт 28 гишүүн УИХ-д үндэслэлээ өргөн мэдүүлсэн. Өнгөрсөн долоо хоногт уг асуудлыг Төрийн байгуулалтын байнгын хорооны хуралдаанаар хэлэлцэх байсан боловч “Шударга ёс” эвслийн бүлгээс тав хоногийн завсарлага авч байсан юм.
Өнөөдрийн хуралдаанаар АН-ын бүлэг мөн завсарлага авснаар Ерөнхий сайдыг огцруулах асуудлыг ирэх долоо хоногийн лхагва гариг хүртэл хойшлуулж байна.
-МАНАЙ ХАМТЛАГИЙН НЭР ЧИНЬ ӨӨРӨӨ ХАР ТАМХИНЫ НЭР ШҮҮ ДЭЭ-
“Ехtacy” гэх охидын хамтлагийн гишүүн хар тамхи татсан хэргээр цагдаад байцаагджээ. Түүнийг хэсэг найз нарынхаа хамт хар тамхи татаж байхад нь саатуулсан аж. “Яагаад хар тамхи татах болов, хаанаас олж авсан. Хар тамхины мэдээллийг яаж олж авсан” гэх мэтээр мөрдөн байцаагчийг асуухад “Ехtacy” гэсэн манай хамтлагийн нэр чинь өөрөө хар тамхины нэр шүү дээ. Мэдээллийг энэ мэтээр хаанаас л бол хаанаас авч болж байна. Хар тамхи татаж үзье гэж бодоод л татсан” хэмээн пээдийсэн байна. Түүнд эрүүгийн хэрэг үүсгэн шалгаж байгаад хэргийг нь хэрэгсэхгүй болгожээ. Хуулийнхны ярьж буйгаар нэгэн нөлөө бүхий хүний хүсэлтээр хэргийг нь хэрэгсэхгүй болгосон гэнэ. Үе үе урлагийнхан тэр дундаа рок попынхон хар тамхи биедээ авч явсан, татсан гэх нь бараг л ердийн зүйл болсон. Төр засгаас энэ төрлийн гэмт хэрэгтэй тэмцэж илрүүлж буй боловч олон нийтэд мэдээлэхгүй хав дарж байгаад хэргийг хэрэгсэхгүй болгодог явдал гарч буйг хууль хяналтынхан хэлж буй юм. Рок попынхноос хар тамхи татаж байгаад баригдсан хүн багагүй байдаг гэнэ. Гэвч танил тал найз нөхдөөрөө дамжуулан эрүүгийн хэргийг хэрэгсэхгүй болгох явдал гарах болжээ. “Ехtacy” хамтлагийн охид залуухан 20 ч хүрээгүй, урлагийн тайзан дээр гараад удаагүй байгаа. Гэтэл хоёр гуравхан дуу дуулаад л “од” гэж өөрсдийгөө санаж хар тамхи хүртэл татах болсон нь нийгэмд буруу үлгэр дуурайлал болж буй юм.
Анхнаас нь энэ төрлийн бодисын хор хөнөөлийг ухуулаагүйгээс урлагийнхан, тэр дундаа шинээр төрөн гарч буй уран бүтээлчид хар тамхи татаж байж уран бүтээлийн санаа олж авдаг гэсэн нэгэн буруу хандлагатай болсныг сэтгэл зовнин ярих ч хүн байна. Хар тамхийг Монголд гааруулах нэгэн муу үлгэрлэл рок попынхноос эхтэй. Анх “Харанга” хамтлагийн дуучин Х.Лхагвасүрэн хар тамхины хэрэгт холбогдож, хорих ялаар шийтгүүлсэн. Түүнийг хар тамхи татдаг гэж буруутгах нь битгий хэл сайн дуучин хэмээн магтаж, Монгол Улсын гавьяат гэсэн эрхэм хүндтэй цол олгосон. Энэ нь нийгэмд “хар тамхи татсан хүнийг яадаг ч үгүй юм байна” гэсэн буруу ойлголтыг өгсөн гэж болно.
“ЕХtacy” ГЭДЭГ НЭР СЭРГЭЭШ, ӨДӨӨХ ГЭСЭН УТГАТАЙ АНГЛИ ҮГНЭЭС ГАРАЛТАЙ
Үүний улмаас рок попын дараа үеийнхэн байнга л хар тамхины хэл аманд орсоор байгаа нь нууц биш юм. Охидын хамтлагт “Ехtacy” гэдэг нэрийг ч өгөхдөө бодлогогүй өгөв үү эсвэл далд хэлбэрээр хар тамхи сурталчлахын тулд өгчихөв үү гэсэн эргэлзээг ч төрүүлж болохоор байгаа юм. Учир нь “Ехtacy” гэдэг нэр сэргээш, өдөөх гэсэн утгатай англи үгнээс эхтэй байх юм. Монгол нэр өгч болох л байсан байх гэвч заавал ийм нэр сонгосон нь хар тамхи татсан охины ярианаас нэрнийх нь утга учир бэлхнээ харуулж байна. Тус хамтлагийн гишүүн Ice буюу мөс гэх нэртэй хар тамхи татаж байсан байна. “Энгийн нүдээр харахад элсэн чихэр шиг уг бодис нь хэрэглэсэн хүнд 24 цагийн туршид хүчтэй нөлөө үзүүлдэг. Хэрэглэсэн хүний нойр нь хүрдэггүй, бие нь сэргэж байгаа мэт байдаг” гэнэ. Түүнийг тугалган цаасан дээр тавьж, шатаан утааг нь сордог гэнэ.
Экстазийн төрлийн мансууруулах бодис гэж бий. Энэ нь хар тамхины төрлийн бодисыг үйлдвэрийн аргаар боловсруулж, нягтаршуулсан бэлдмэлийн төрөл бөгөөд дэлхий дахинд ийн нэрлэгдэж иржээ. Урьд нь манай улсын иргэд энэ төрлийн гэмт хэрэгт хэрэглэгч гэсэн ангилалд багтаж байсан бол сүүлийн дөрвөн жилийн хугацаанд энэ төрлийн гэмт хэргийн тээвэрлэгч гэсэн ангилалд хамаарах боллоо. Монгол Улсын талаар НҮБ-ын шинжээчдийн хийсэн үнэлгээнд геройн, амфетамин, каннабис, экстазийн төрлийн мансууруулах бодисын хэрэглээ өсөлттэй, тархацын хувьд каннабис хамгийн их, намуугийн тархалттай, экстазийн урсгал БНХАУ-аас чиглэсэн, геройн, амфетамины төрлийн бодисын худалдааны замууд дайран өнгөрч байна гэж дүгнэсэн байдаг. Хэдхэн жилийн дотор ингэтлээ тархсан хар тамхины хэргийн гол шалтгаан нь рок попынхон хэрэглэж байгаа нь бусдад буруу үлгэрлэл авчирч буйг харуулж буйгаас өөрцгүй юм. Хар тамхины хэрэгт холбогдож буй хүмүүс нь 19-24 насны залуучууд байх аж. Рок попынхны бас нэг жишээ бол “Flash” хамтлагийн гишүүн хар тамхины хэрэгт сэжиглэгдсэн гэх мэдээлэл бас түгж л байсан. Түүний хар тамхи, мансууруулах бодис өөртөө хадгалсан, хэрэглэсэн эсэх нь тодорхойгүй байгаа ч энэ төрлийн хэрэгт сэжиглэн шалгагдаж байсан ч тэгсхийгээд чимээгүй болсон. Судалгаагаар өдрөөс өдөрт энэ төрлийн гэмт хэрэгт холбогдогсод болон хэрэглэгчдийн тоо улам залуужиж байгаа нь харамсалтай.
ХАР ТАМХИНЫ ДӨРВӨН ХЭРЭГ ИЛРҮҮЛЖ, 11 ХҮНИЙГ ЦАГДАН ХОРЬЖЭЭ
Цагдаагийн байгууллага энэ сарын 13-27-ны хооронд буюу 14-хөн хоногийн дотор гэхэд л 11-н холбогдогчтой дөрвөн гэмт хэргийг илрүүлсэн байх жишээний. Тодруулбал, энэ сарын 13-ны өдөр Баянгол дүүргийн 16-р хорооны нутагт дэвсгэрт байрлах “Playback” интернэт тоглоомын газарт иргэн Ч,М, Б,А,Г,Б нар нь 350 грамм орчим мансууруулах үйлчилгээтэй каннабис төрлийн ургамлыг хууль бусаар олж авч, хадгалан хэрэглэсэн. Мөн тус дүүргийн 15-р хороонд оршин суудаг иргэн А гэгч нь 23 грамм каннабисийг иргэн С-аас хууль бусаар олж авч хадгалсан. Иргэн С нь иргэн М,А нартай бүлэглэн мансууруулах төрлийн каннабис төрлийн ургамлыг хууль бусаар олж авч зарсан үйлдлийг нь илрүүлжээ. Эдгээр иргэдээс 1кг 629 грамм каннабисыг хураан аваад байгаа аж. Харин энэ сарын 22-ны өдөр Баянгол дүүргийн 12-р хороонд оршин суух иргэн Л, М нар нь хар тамхи мансууруулах төрлийн мөс буюу Ice-ийг хууль бусаар Монгол улсын хилээр нэвтрүүлж, зарж борлуулсан хадгалсан үйлдлийг илрүүлжээ. Түүнчлэн 27-ны өдөр Баянзүрх дүүргийн 4-р хороонд оршин суух иргэн Ч гэгч нь найман кг каннабис буюу мансууруулах төрлийн ургамлын хууль бусаар олж авч хадгалж байгаад цагдаагийн байгууллагад баригдсан байна. Тэдэнд Эрүүгийн хуулийн тусгай ангийн 192.2-оор сэжигтнээр баривчлан шалгаж байгаа аж. Сүүлийн 14 хоногийн хугацаанд нийт 11 кг каннабис буюу мансууруулах төрлийн ургамал 34 грамм Ici буюу мөсийг цагдаагийн байгууллага хураан авчээ.
Г.ОНОН