Улсын хэмжээнд энэ долоо хоногт бүртгэгдсэн зам тээврийн осол, хэргийн талаар мэдэгдлээ. 2018 оны зургадугаар сарын 11-15-ны өдрүүдэд нийслэл хотын хэмжээнд Замын цагдаагийн алба нийт 1115 дуудлага мэдээлэл бүртгэгдсэнээс зам тээврийн ослын 790 дуудлага бүртгэгдсэн бөгөөд ослын улмаас нийслэлд хоёр хүний амь нас хохирч, 43 хүн гэмтэж бэртжээ.Үүний 20 нь бага насны хүүхэд байгаа юм. Мөн орон нутагт таван хоногийн хугацаанд таван хүний амь нас хохирч, гурван хүн гэмтсэн ноцтой зам тээврийн ослууд бүртгэгдсэнийг тус тус шалгаж байна.
Тухайлбал, Сонгинохайрхан дүүргийн нутаг Баянхошууны тойрог замд “Kia Lotze” маркийн автомашины жолооч блокон хашаа мөргөж жолооч М-н амь нас хохирсон,
Дорноговь аймгийн Даланжаргалан сумын нутаг “Өлзийтийн зөрлөг” гэх газар “Pruis” маркийн автомашин онхолдож, жолооч 38 настай эмэгтэй Э-н амь нас хохирч, хоёр хүн гэмтсэн зэрэг ноцтой хэргүүд бүртгэгдсэн.
Цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 208 зөрчлийг илрүүлж хариуцлага тооцжээ.
Энэ долоо хоногт нийт бүртгэгдсэн зам тээврийн осол, хэргийг үйлдэгдсэн хэлбэрээр нь авч үзвэл явган зорчигч мөргөж гэмтээсэн 28 осол, мөргөлдөх хэлбэрээр 29 осол, онхолдох хэлбэрээр хоёр осол, үл хөдлөх зүйл мөргөсөн дөрвөн осол тус тус бүртгэгдсэн бөгөөд нийт бүртгэгдсэн ослыг өмнөх долоо хоногтой харьцуулахад зам тээврийн ослын шинжтэй дуудлага 12,5 хувиар, гэмтсэн хүний тоо 14,2 хувиар, хүүхэд өртсөн осол 14 хувиар, согтуугаар тээврийн хэрэгсэл жолоодсон зөрчил 13 хувиар тус тус өссөн үзүүлэлттэй байна.