Өнгөрсөн сарын 28-ны өдөр Хан-Уул дүүргийн нэгдүгээр хороонд байрлах нэгэн рестораны гадна автомашины зогсоолоос Э, Э, О, М, А гэх этгээдүүд машин дотор мансууруулах төрлийн бодис хэрэглэж байсныг илрүүлж, тэднээс 1.1 грамм ICE буюу мөс гэх бодис илэрснийг эд мөрийн баримтаар хураан авсан байв. Мөн тухайн өдөр Хан-Уул дүүргийн нэгдүгээр хороо “Peace bridge” зочид буудлын автомашины зогсоол дээрээс Б, Г нарыг баривчилж шалгахад 19.2 грамм ICE буюу мөс гэх сэтгэцэд нөлөөлөх бодис илэрснийг эд мөрийн баримтаар хураан авчээ.
Дээрх хэргийг 1988 онд төрсөн эмэгтэй З, 1988 онд төрсөн эрэгтэй А нар үйлдсэн бөгөөд тэднийг өнгөрсөн бямба гаригт БНХАУ-ын Эрээнээс Улаанбаатар хотод ирэх үед нь баривчилж шалгахад дээрх их хэмжээний ICE буюу мөс гэх сэтгэцэд бодис илэрчээ. Уг хэрэгт холбогдуулан шалгаж байгаа эмэгтэй З нь улсын хилээр хууль бусаар удаа дараа сэтгэцэд нөлөөлөх бодис оруулж ирсэн байж болзошгүй нөхцөл байдал тогтоогдоод байгаа аж.
Уг хэрэгт холбогдоод байгаа 1988 онд төрсөн эрэгтэй А гэгч нь төрийн алба хаагч бөгөөд ИХШХЕГ-т (Иргэний харьяалал шилжилт хөдөлгөөний ерөнхий газар) ажилладаг юм байна. Эрүүгийн хуулийн 188 дугаар зүйлийн 188.2-д зааснаар эрүүгийн хэрэг үүсгэж, өнгөрсөн ням гаригт ШШГЕГ-ын харъяа цагдан хорих 461 дүгээр ангид баривчлан хорьжээ.