Үндэсний соёл амралтын хүрээлэн буюу бидний нэрлэж заншсанаар хүүхдийн парк жил бүрийн энэ өдөр ачааллаа дийлэхгүй болдог. Эцэг эхчүүд бяцхан үрсээ тоглуулах гээд хүүхдийн паркад дугаарлан зогсож, өдрийн талыг барах нь энүүхэнд. Үүнийг дагаад паркийн тоглоом үнэтэй байна, ажилтнууд нь хурдан шуурхай үйлчлэхгүй байна гэх гомдол гардаг.
Тэгвэл ямартай ч энэ жилийн хүүхдийн баяраар Үндэсний соёл амралтын хүрээлэнгийн тоглоомын үнэ нэмэгдээгүй ажээ. Тус компани сүүлийн таван жил үнээ нэмээгүй гэдгийг ч ажилтнууд нь хэлж байсан. Зургадугаар сарын 1-ний өдөр дугаарлан зогсохгүйн тулд өнгөрсөн амралтын өдрүүдэд хүүхдээ паркад тоглуулж, нэг хүслийг нь биелүүллээ. Үндэсний соёл амралтын хүрээлэн хүүхдийн баярын өдрийг тохиолдуулан “Гайхамшигт долоо хоног” хөтөлбөрөө эхлүүлжээ.
Тавдугаар сарын 29-нөөс энэ сарын 4-нийг дуустал багачуудад зориулсан жүжиг, үзүүлбэр, шоу тоглолт болох юм байна. Түүнчлэн 1-6 настай хүүхдэд зориулсан хүслийн галт тэрэг, нархан, жаргалтай бамбарууш, тулаант машин, хурдны машин, 12 жил зэрэг тоглоомыг шинээр суурилуулаад буй аж. Эдгээр тоглоом нь морин тойруулга, мөргөлддөг машиныг бодвол бага насны хүүхдүүдэд ганцаараа тоглох боломжийг бүрдүүлж өгчээ.
Олон улсын хүүхдийн эрхийг хамгаалах өдөр болж байна. Манайхан хүүхдийн баяр хэмээн нэрлэж заншсан энэ өдөр уг баярыг дүүрэгт бүрт зохион байгуулахаар болсон. Хамгийн их хөл хөдөлгөөнтэй газар нь Чингисийн талбай, Үндэсний цэцэрлэгт хүрээлэн, Хүүхдийн парк байдаг. Тиймээс хүүхдийн паркийн тоглоомын үнийг хүргэж байна.
Тухайлбал,
-Саран савлуур 5000 төгрөг
-Дельфин 5000 төгрөг
-Агаарын дугуй 5000 төгрөг
-Аймшгийн байшин 5000 төгрөг
-Мөргөлддөг машин 5000 төгрөг
-Галзуу хулгана 6000 төгрөг
-Мэлхий үсрэлт 5000 төгрөг
-Морин тойруулга 5000 төгрөг
-Гинж 5000 төгрөг
-Алсын харагч 5000 төгрөг
-Динозавр 5000 төгрөг
-Тойрог зам 6000 төгрөг
-Сансрын хөлөг 5000 төгрөгийн үнэтэй байгаа юм.
Эдгээрээс гадна багцын хөнгөлөлт буй аж. Өөрөөр хэлбэл, 10-25 мянган төгрөгийн багц авсан тохиолдолд 3-10 тоглоом тоглох боломжтой юм байна.