Дэлхий дээр мал амьтнаас хүнд дамжин халдварладаг 200 гаруй өвчин тохиолдож байгаагаас манай улсад 30 орчмыг нь оношилж, бүртгээд байна. Сүүлийн жилүүдэд уур амьсгалын өөрчлөлт, даяарчлал, хотжилт, шилжилт хөдөлгөөнтэй холбоотойгоор гадаадын улс орнуудаас хумхаа, эбола, коронавирусийн халдвар зэрэг өвчин зөөвөрлөгдөн орж ирэх эрсдэлтэй байна.
Энэ хүрээнд Нийслэлийн Эрүүл мэндийн газар, Зоонозын өвчин судлалын үндэсний төв, Баянзүрх дүүргийн эрүүл мэндийн төв, “Тэгш дүүрэн хүслэн” Өрхийн эрүүл мэндийн төвтэй хамтран өвчний сэжигтэй тохиолдлын үед ажиллах эмч, эмнэлгийн ажилчдын бэлэн байдлыг хангах, тусламж, үйлчилгээтэй холбоотой халдвараас сэргийлэх үйл ажиллагааг сайжруулах зорилгоор сургалт зохион байгууллаа.
“Зоонозын халдвар, шинэ болон сэргэж буй халдварт өвчнүүдийн сэжигтэй тохиолдлын үед авах хариу арга хэмжээ, бэлэн байдал” сэдэвт үзүүлэх дадлага сургалтанд халдварт өвчин хариуцсан эмч, мэргэжилтнүүд, амбулаторийн яаралтай тусламжийн багт томилогдсон эмч, сувилагч зэрэг нийт 40 хүн оролцлоо.