Улз голын сав газрын захиргаа, тусгай хамгаалалттай газар нутгийн Дорнод хамгаалалтын захиргааныхан хамтарч Угтам ууланд амьдардаг амьтдад зориулсан өвс, шүү тавьж өгсөн байсан. Тодруулбал, буга, бор гөрөөс, зээр ихээр ундаалж, бэлчээрлэдэг Угтам уулын рашаан булаг, Аргалантын арын булгийн эхэнд биотехникийн арга хэмжээ авч хэрэгжүүлэн гурван тонн өвс, Дашбалбар сумын Шүүтийн уураас 1.5 тонн байгалийн шүү татаж авчран ан амьтны зөрөг зам дээр байрлууллаа.
Дорнод аймгийн Угтамын байгалийн нөөцөт газарт сүүлийн жилүүдэд бугын тоо толгой өсч, ойролцоогоор 80 орчимд хүрсэн гэсэн тоон мэдээ байдаг аж. Энэ ажилд Дорнод хамгаалалтын захиргааны хамт олон, байгаль хамгаалагч Б.Гантөмөр болон Баяндун, Дашбалбар сумын газрын даамлууд, байгаль хамгаалагч нар оролцсон байна.