Монголын залуучуудын холбоо НҮБ-аас зарласан “Тогтвортой хөгжлийн бодлого”-ын хүрээнд “Сошиал ертөнц дэх сэтгэцийн эмгэгийн илэрц”, “Боловсрол- Хэрэглээгүй боловсрол”, “Хүний эрх- Эрх бол хөгжихүйн үндэс”, “Хөдөлмөр эрхлэлт- Ажил олгогчид юу хүсдэг вэ?”, “Жендерийн мэдрэмжтэй залуу хүн”, “Залуучуудын нийгмийн оролцоо” гэсэн зургаан сэдвээр эрдэм шинжилгээний уралдаан зарласан. Залуучуудын өмнө тулгамдаж буй асуудалд гарц шийдэл олохоор илтгэлд ирүүлсэн материалуудаас судалгаа сайн хийсэн шийдэл олсон шилдэг санаануудыг шүүж авжээ.
Монголын залуучуудын холбооны ерөнхий нарийн бичгийн дарга Б.Бэлгүтэй:
-“Бидэнд Монголын хүн амын гуравны нэг нь залуучууд гэхээс өөр тоймтой тоо хэлэх зүйл байхгүй. Ажилгүй, хөгжлийн бэрхшээлтэй, боловсролын түвшин гэх мэт нарийвчилсан судалгаагүй. Харин залуучуудын нийгмийн оролцоог нэмэгдүүлэх, тэднийг дэмжих бодлогын хүрээнд “Залуучууд судлал” эрдэм шинжилгээний уралдааныг зохион явуулдаг болсон” хэмээн ярив.
Уралдааны шилдэг бүтээлийн нэгээр шалгарсан “Отгонтэнгэр” хууль зүйн сургуулийн нэгдүгээр дамжааны оюутан Э.Баасансүрэн илтгэлийнхээ талаар.
-“Би “Хүний эрх- Эрх бол хөгжихүйн үндэс” сэдвийн хүрээнд “Хөгжлийн бэрхшээлтэй залуучуудын эрх, тулгамдаж буй асуудал”-ын талаар илтгэлээ бэлтгэсэн. Энэ сэдвийн хүрээнд 100 хөгжлийн бэрхшээлтэй залуусын дунд судалгаа хийж сурах орчин, нөхцөл ямар байгааг судалсан. Сурч боловсрох орчны таатай нөхцөл хамгийн дутмаг. Тусгай сургууль тэргэнцэртэй хүнд зориулсан налуу замтай өөр сургуулиудад тийм зам байхгүй. Соёл урлагийн их сургууль тумгай зориулалтын замтай болж тэнд сурдаг хөгжлийн бэрхшээлтэй оюутнуудад сурахад дөхөм болсон. Гэвч сургууль дотроо шатаар гарах бие засахад их хүндрэл учирдаг гэдгийг судалгаанд оролцсон хүмүүс хэлсэн” гэж ярилаа.