Узбекийн нэрт эдийн засагч Юлий Юсупов өөрийн фэйсвүүк хуудаснаа Монголоос тус улс руу мах нийлүүлэх шинэ төслийн талаар саналаа бичсэн тухай Podrobno.uz сайт мэдээллээ. Тэрээр тухайн баримт бичгийн талаарх зургаан зүйлийг онцолсон байна. Нэгд, яагаад мал эмнэлгийн хороо Монголтой хамтран ажиллах асуудлыг хариуцдаг билээ? Энэ байгууллагын дүрэмд тийм зүйл байдаг гэж үү?
Хоёрт, тухайн баримт бичигт “Монгол Улсад үйлдвэрлэж буй мах болон махан бүтээгдэхүүний чанар, үнэ Узбекстанд тохирно гэж үзжээ. Монгол харин манай жимс ногоогоор ихээхэн гачигддаг гэнэ. Хэн үүнийг мэдэж тодорхойлдог юм бол? Ямар шалгуураар? Хэрэв монгол мах Узбекстанд тохирч, харин Монгол манай жимс ногоогоор үнэхээр гачигдсан юм бол арилжааны шугамаар харилцаа тогтоож яагаад болохгүй гэж? Энд төрийн албан хаагчдын үг, тэр дундаа мал эмнэлгийн хороо ямар хамаатай юм бэ? Юу ч ойлгохгүй юм.
Гуравт, Узбекстан, Монголын хооронд агаарын болон бусад төрлийн тээврийн харилцаа тогтоохыг санал болгожээ. Ингэхдээ “Узбекстан хаво йуллари” компани бараа таваар зөөхөд тохирсон үнэ тогтоох ёстой гэнэ. Энэ компани ямар байдлаар үнэ тогтоох гээд байгаа юм бэ гэдэг ойлгомжгүй бөгөөд тохиромжтой үнэ гэж юу юм бэ? Монголтой хийх худалдааны тээврийн 50 хувийн зардлыг төр хариуцна. Мах болон жимс, ногоог онгоцоор тээвэрлэх үеийн татаасыг мөн тооцоолсон юм болов уу? Хоёр орны хамтын ажиллагаанд маш ашигтай зүйлд татаас олгоход яагаад Узбекстаны төсвийг зарцуулж байгаа юм бэ. Тэгвэл монголчууд арилжааны арга хэмжээнд татаас олгодоггүй гэсэн үг үү? Бид ч гэсэн тэдний төсвийн ийм маягийн зарцуулалтад анхаарах хэрэгтэй бус уу?
Дөрөвт, Монгол руу жимс, ногоо гаргах компаниудын жагсаалтыг гаргажээ. Ийм жагсаалт ямар хэрэгтэй юм бэ? Тавд, Төрийн нөөц, Сангийн яам улсын нөөцийг бүрдүүлэх, төсвийн байгууллагууд зөвхөн монгол мах авахыг үүрэгдсэн байх юм. Заавал яагаад монгол мах гэж? Төрийн худалдан авалт хийхэд тендер зарлах ёстойг яах нь ойлгомжгүй байна. Зургаад, Монгол руу гаргах бараа, бүтээгдэхүүний зардлын 50 хувийг Бизнесийг дэмжих төрийн сангаас 2019 оны наймдугаар сарын 1-нээс эхлэн даахаар болж байна. Тэгвэл тэр сангийн нэрийг өөрчилж Монголын мал аж ахуйг дэмжих сан гэвэл яасан юм бэ?
Манай төрийн албан хаагчид гайхшруулж барахгүй юм даа хэмээн Юлий Юсупов бичсэн байна.