В.Путин илгээлтээ тавьж, сөрөг хүчнийхэн жагсав

Оросын төрийн тэргүүн В.Путин жил бүр Холбооны зөвлөлд ажлаа тайлагнадаг уламжлалтай. Өнгөрсөн лхагва гаригт Москва хотын үзэсгэлэнгийн гол танхим болох “Манеж”-д 17 дахь удаагийн илгээлтээ ийн тавьсан агаад нэг цаг гаруй үргэлжилжээ. ОХУ-ын ерөнхийлөгч улс орныхоо өнөөгийн байдлыг дүгнэж, дотоод, гадаад бодлогынхоо гол чиглэлүүдийг тодорхойлдгоороо өндөр ач холбогдолтойд тооцогддог.

Энэ удаагийн арга хэмжээг хэвлэл мэдээллийн 450 төлөөлөгч сурвалжлах эрх авахын тулд гурван удаа PCR шинжилгээнд хамрагдсан гэнэ. В.Путин илгээлтээ ОХУ-ын коронавируст цар тахлын эсрэг хэрэгжүүлж байгаа арга хэмжээгээр эхлүүлжээ. Тэрбээр коронавирусийн эсрэг гурван вакцин гарган авсан нь Оросын технологи, аж үйлдвэрлэлийн цар хүрээг харуулж буйг цохон тэмдэглэжээ. Мөн ойрын хугацаанд цар тахлын халдварыг зогсоож, хилээ нээж, жуулчдыг хүлээж авна хэмээн мэдэгдсэн байна. В.Путин цааш нь “ОХУ Өрнөдийн хооронд дипломат маргаан хурцадсан энэ үед ОХУ өөрийн эрх ашгаа хамгаалах болно. Оросыг өдөөн хатгаж, ашиг сонирхолд нь заналхийлсэн хэн ч хатуу хариутай тулгарах болно” гэжээ.

Мөн Беларусийн ерөнхийлөгчийн амь насанд халдахыг завдсан хуйвалдааныг эш татахдаа “Гадны ямар ч улс Оросын улаан шугамыг давах оролдлого хийхгүй гэдэгт итгэж байна” хэмээн онцолсон байна. Энэ жилийн илгээлт нэг цаг гаруй үргэлжилжээ. Владимир Путины хамгийн урт илгээлт 2018 онд хоёр цаг гаруй үргэлжилж байсан юм.

Үүнтэй зэрэгцэн сөрөг хүчнийхэн орон даяар жагсаал зохион байгуулж, шоронд хоригдож буй сөрөг хүчний удирдагчдын нэг А.Навальнийг суллахыг шаардсан байна. Зарим эх сурвалжийн мэдээлснээр зөвхөн Москва, Санкт-Петербург хотноо болсон жагсаалд 10 мянга гаруй хүн оролцжээ. Жагсаалын үеэр мөргөлдөөн гарч цагдаа нар 1613 хүнийг саатуулсан тухай мэдээ байна.

Жагсагчид хэдэн долоо хоногийн турш өлсгөлөн зарлаж, биеийн байдал нь муудсан А.Навальныйд эрүүл мэндийн тусламж үйлчилгээг үзүүлэхийг шаардсан байна. Тэрээр Покров хотын Засан хүмүүжүүлэх төвд ял эдэлж байгаа юм. Өдгөө 44 настай тэрээр гуравдугаар сарын 31-нд өлсгөлөн зарлаж буйгаа мэдэгджээ.

Д.ЦЭРЭНДОЛГОР