Өчигдөр буюу 12 дугаар сарын нэгний өдөр Сретенск-Чита чиглэлийн хот хоорондын автобус гүүрнээс доош унаж осолдсоны улмаас 44 зорчигчийн 19 нь амиа алдаж, 22 хүн гэмтэж бэртсэн харамсалтай хэрэг гарчээ. Мөн хэд хэдэн хүн өөрсдөө ослын газрыг орхиж явсан гэх бөгөөд эмнэлэгт эмчлүүлж байгаа хүмүүсээс дөрөв нь сэхээн амьдруулах тасагт хэвтэж байгаа гэж ТАСС агентлаг мэдээлжээ.
Энэ хэрэгтэй холбогдуулан Өвөр Байгалын Сретенскийн аймгийн нутаг дэвсгэр дээр 12 дугаар сарын хоёрны өдрийг гашуудлын өдөр болгон зарласан байна. Аймгийн тэргүүн Алексей Закрудаев ослын улмаас амиа алдсан 19 хүний ар гэрт тус бүр 60 мянган рублийг / оршуулгын зардал болгон олгоно хэмээн мэдэгджээ. Мөн оршуулгатай холбоотой бүхий л ажлыг захиргаа хариуцан ажиллана хэмээн онцолсон аж.