Өнөөдөр Монголын хүүхдийн төлөө
байгууллагуудын үндэсний нэгдсэн холбооноос “Дүнжингарав” өвлийн
уралдаан нь хүүхдийн эрхийг зөрчиж байгаа талаар мэдээлэл хийлээ.
Хэвлэлийн хурлын үеэр тус холбооны тэргүүн Д.Авирмэд “Өвлийн морин
уралдаан нь уламжлал гэхээсээ илүүтэй зугаа цэнгэлийн хэлбэртэй болсон.
Энэ уралдаанд хүүхдүүд хохирч байна. Өвлийн хүйтний жавар арилаагүй
хатуу хахир цаг үед хүүхдээр хоёр цаг морь унуулж байгаа нь хүүхдийн
эрхийг ноцтой зөрчиж байгааа хэрэг. Баяр наадмийн тухай хуулиар
долоодугаар сарын уралдааныг зохицуулсан хэдий ч өвлийн уралдааныг
зохицуулсан тодорхой заалт байхгүй. Тиймээс энэ асуудалд яаралтай арга
хэмжээ авах хэрэгтэй. Бүр шаардлагатай гэж үзвэл насанд хүрэгчид өөрсдөө
морио унах хэрэгтэй. Тиймээс “Дүнжингарав-2016- морин уралдааныг зохион
байгуулахгүй байх нь зүйтэй” гэлээ.
Энэ оны эхээр Төв болон Өвөрхангай
амйгийн засаг дарга нар өвлийн морин уралдааныг аймгийн нутаг дэвсгэрт
зохион байгуулахыг хориглосон шийдвэр гаргаж байсан. Харин өнгөрөгч
долоо хоногт “Дүнжингарав-2016” төвийн бүсийн хаврын уралдааныг энэ
сарын 28-нд Төв аймгийн Аргалант сумын Цагаан хөтөлд зохион байгуулахаар
төлөвлөж, уг хуваарийг хоёрдугаар сарын наймны өдрийн Засгийн газрын
ээлжит хуралдаанаар баталжээ. Харин хангайн бүсийн хаврын уралдааныг
Өвөрхангай аймагт 3 дугаар сарын 6-нд зохион байгуулах юм. Хурдан морины
уралдааны үеэр хүүхэд хохирч байсан тоо баримтуудаас дурьдвал, 2013 онд
нийт 8148 хүүхэд морь унаснаас 958 хүүхэд уралдааны үед мориноос унаж,
916 нь хөнгөн, 34 нь хүндэвтэр, дөрөв нь хүнд гэмтэл авсан бол зургаан
хүүхэд амиа алдсан харамсалтай явдал болж байв. Мөн 2014 онд 7477 хүүхэд
хурдан морь унаж уралдсанаас 621 нь мориноос унаж, 593 хүүхэд хөнгөн
гэмтэж, 25 хүүхэд хүндэвтэр, гурван хүүхэд хүнд гэмтэл авсан байжээ.
Хүний эрхийн үндэсний комиссоос гаргасан судалгаагаар хурдан морины
унаач хүүхдүүдийн дийлэнх нь 6-12 насны хүүхэд байдаг гэжээ.