Уурхайчид Засгийн газрын шийдвэрийг эсэргүүцэн мэдээлэл хийлээ

Монголын эрчим хүч, геологи уул уурхайн үйлдвэрчний холбоод Хувь хүний орлогын албан татварыг 25 хувьд хүргэх Засгийн газрын санал болоод эрчим хүчний үйлдвэрүүдийг хувьчлах асуудлыг эсэргүүцэж мэдээлэл хийлээ.

Засгийн газар эдийн засгаа аврахын тулд хоёр сая 500 мянган төгрөгөөс дээш цалинтай иргэнээс авах Хувь хүний орлогын албан татварыг 25 хувьд хүргэсэн. Энэ нь нийт иргэдийн хоёр хувь нь буюу өндөр цалин авдаг хүмүүс дээрх татварыг төлнө. Гэвч сайдын тооцоо бодит амьдралтай нийцэхгүй гэдгийг уурхайчин, инженерүүд тайлбарлалаа. Тэд ХХОАТ-ын хэмжээг 25 хувь болговол өндөр албан тушаалтнууд өөрсдөө цалингийн орлогоо өөр хэлбэрээр авч, энэ хууль зөвхөн жирийн ажилчдад л үйлчилнэ гэж үзэж байна.

Мөн тэтгэвэр тогтоох насыг үечлэн нэмэх Сангийн сайдын санал эрчим хүч уул уурхайн салбарт газрын дор, халуун, хүйтэнд, шөнийн цагаар жижүүрлэн, хөдөлмөрийн хортой нөхцөлд ажилладаг 30 мянган уурхайчин, инженерүүд тэтгэврээ тогтоолгож чадалгүй хорвоогийн мөнх бусыг үз гэсэнтэй утга нэг гэж эсэргүүцлээ. Энэ салбарынхан хоёр сая 500 мянган төгрөг түүнээс дээш цалинтай ч бүгд орон сууцны зээлтэй гэлээ. Жилийн 2/3-т өдөр, шөнөгүй илүү цагаар ажиллаж олсон уурхайчин, инженерүүдийн цалин нэг хүний орлого биш нэг өрхийн орлого байдаг хэмээн тайлбарлав.

Өмнөх УИХ, Засгийн газрын баталсан ДЦС 4, ДЦС 3, ДЦС 2, Дарханы цахилгаан станц, Эрдэнэтийн дулааны цахилгаан станц гэсэн цахилгаан эрчим хүч үйлдвэрлэгч ТӨХК-ийн 30 хувийг хувьчлах шийдвэрийг салбарынхан нь дэмжихгүй байна. Тогтвортой ажиллаж буй дээрх үйлдвэрүүд хувьчлагдвал тэнд ажилладаг ажиллагсдын ажлын байр ганхаж, эрх ашиг нь зөрчигдөнө гэж үйлдвэрчний эвлэлийнхэн тайлбарлалаа. Жишээлбэл, Дарханы төмөрлөгийн үйлдвэрийг одоогоос хоёр жилийн өмнө концессийн гэрээгээр Кю Эс Си хувийн компанид шилжүүлснээс хойш тус үйлдвэрийн үйл ажиллагаа алдагдаж, бүтээгдэхүүн үйлдвэрлэлээ зогсоож, төмрийн хүдэр олборлодог уурхай болон хувирчээ. Мөн үйлдвэрийн 1300 ажилчинг сул зогсолтод хамруулсан ч, тэдэнд сул зогсолтын цалин өгөхөө болиод удсан гэлээ.

Уул уурхай, эрчим хүчний салбарын үйлдвэрчний эвлэлийнхэн хууль тогтоогч, шийдвэр гаргагчдад хандан ажилчнаа, хүнээ бодсон хууль, журам боловсруулж батлахыг шаардаж байна. Харин төрийн өмчит компаниудыг хувьчлахдаа эдийн засгийн тооцооллыг сайтар хийж, хувьчилж авсан компаниудын үйл ажиллагааг эргэн шалгадаг байхыг ч анхаарууллаа.