Нийт ургамлын сангийн 60-аас дээш хувийг амьд тарьц суулгац, үр хөврөл, эс эдийн түвшинд хадгалан нөөцийн хомсдолыг хязгаарлахаар сорил туршилтын талбайд 10 хувийн амьд цуглуулгыг хамгаалалтанд аваад байгааг БОАЖЯ-наас мэдээлэв.
Манай улс өргөн уудам нутаг дэвсгэртэй, байгалийн бүс бүслүүр, ургах орчин янз бүр учир ургамлын аймгийн орчин нөхөн төлжиж ургахад таатай боловч далайн түвшнээс өндөрт байрладаг хуурай эх газрын эрс тэс уур амьсгалд бүрэлдэн бий болсон ургамлын аймгийн хөгжил маань дэлхийн ургамал үүслийн дөрвөн том төвөөс алслагдсан байдаг аж. Дээр нь дэлхийн дулаарал уур амьсгалын өөрчлөлт, уул уурхай, техник технологийн хөгжлийн хурдацтай зэрэгцэн цөлжилт, ган гачгийн давтамж олширсноос ургамлын олон янз байдал үгүй болж хомсдол үүсч, нөөц багасч байна. Энэ нь манайх шиг хэврэг ургамлын аймгийн хувьд том аюул гэдгийг БОАЖЯ-ны Хүрээлэн буй орчин, байгалийн нөөцийн удирдлагын газрын мэргэжилтэн Г.Оюунгэрэл хэллээ.
Хамгийн гол нь манайд хүний үйл ажиллагаанаас шалтгаалан эм тан, , хүнс, гоо сайхны үйлдвэрлэлийн үйл явц олширч, нэн ховор ургамлыг ихээр түүж хэрэглэх нь ихэссэн, ургамлын аймагт нөхөн сэргээлт хийхгүй байгаад мэргэжилтнүүд харамсаж байна. Нэг ёсондоо ургамлын олон янз байдал нөөцийг хамгаалах байдал манайд үндсэндээ хаягдаж, ургамлын төрөл зүйлүүд чимээгүй устгаж алга болох аюул бодитой тулгараад байгааг БОАЖЯ, байгаль орчны мэргэжлийн байгууллагууд оролцсон уулзалтын үеэр онцлон тэмдэглэв.
Гэхдээ манай ургамал судлаачид 3127 зүйл гуурст ургамал, 580 зүйл хөвд, мөн тооны дээд мөөг, 1056 зүйл хаг, 1933 зүйл замаг бүхий нийт 8000 зүйл ургамлын нийт төрөл зүйлийг бүртгэн данслаж, биет баримт цуглуулгын фонд бүхий олон улсад бүртгэлтэй (index Herbarium) сан хөмрөгийг бий болгож чаджээ. Ургамлын сан бүхий дээрх фондод 145.000 орчим хувь цуглуулгаас нэн ховор ургамлын 15, ховор ургамлын 7.5 хувь нь үр байдлаар хадгалагдаж байна. Нийт ургамлын удмын сангийн 60-аас дээш хувийг амьд тарьц суулгац, үр хөврөл, эс эдийн түвшинд хадгалж хамгаалж нөөцийн хомсдолыг хязгаарлахаар сорил туршилтын талбайд 10 хувийн амьд цуглуулгыг хамгаалалтанд аваад байгааг БОАЖЯ-наас мэдээлж байна.