Өнөөдөр есдүгээр сарын 1. Энэ өдөр цэцэг шиг гоёж, цэвэрхэн хувцсаа өмссөн багачууд эрдмийн өргөө рүүгээ ээж аавыгаа дагуулан, баяр хөөртэй явдаг. Нийслэлийн хөл хөдөлгөөн ч ихэсдэг. Энэ жил замын хөдөлгөөний ачааллыг нэмэгдүүлэхгүй байх зорилгоор зарим зохицуулалтыг хийсэн байна. Тухайлбал, өнөөдөр их дээд сургуулиуд 11:30, Ерөнхий боловсролын сургуулиуд 08:00-08:40 цагт хичээлийн шинэ жилийн нээлтээ хийх юм. Жил бүрийн есдүгээр сарын 1-нд Монгол Улсын Ерөнхийлөгч дунд сургуулийн сурагчдад хичээл заадаг уламжлалтай билээ. Ерөнхийлөгч Ц.Элбэгдорж 10:00-11:00 цагт “Монголын нэр ертөнцийн чихнээ” гэсэн сэдвээр хичээл заахаар болсон байна.
УИХ-ын дарга М.Энхболд МУБИС болон I дунд сургуулийн хичээлийн шинэ жилийн нээлтэд оролцох аж. Ерөнхий сайд Ж.Эрдэнэбат Нисэх дэх нийслэлийн VII сургууль, Засгийн газрын Хэрэг эрхлэх газрын дарга Ж.Мөнхбат МУИС-ийн хичээлийн шинэ жилийн нээлтэд оролцоно.
С.АРИУН