Энэ сарын 1-ний өдрөөс эхлэн хүчин
төгөлдөр мөрдөгдөж эхэлсэн НӨАТ-ын тухай хуулийн дагуу анхны сугалааны
тохирол өнөөдөр МҮОНТВ-ээр 19:30 цагт явагдах гэж байна. НӨАТ-ын тухай
хуулийн шинэчилсэн найруулгын хүрээнд иргэд төлсөн НӨАТ-ынхаа 20 хувийг
буцаан авах, 100 сая төгрөгийн сантай сугалаанд сар бүр оролцох боломж
бүрдэж байгаа.
Энэ сугалаанд иргэд төлбөрийн баримтан
дээрх сугалааны дугаараа бүртгүүлсэнээр оролцох бөгөөд 30000-100 сая
төгрөг хүртэлх хонжвороос хожих боломжтой. Азтаны тоог бүртгэгдсэн
баримтын тооноос хамаарч тогтоож байх аж. Өөрөөр хэлбэл 4 сая баримт
бүртгэгдлээ гэхэд 4000 азтан шалгаруулах юм байна. Харин нэг иргэн хэдэн
ч баримтаар сугалаанд оролцож болох учир хонжвор таарах магадлал өндөр
гэж үзэж байгаа юм.
Хэрэв таны үйлчлүүлсэн жижиг дэлгүүр, үсчин, гоо сайхан төлбөрийн шинэ баримт олгохгүй, хэрхэн олгохоо мэдэхгүй байвал www.ebarimt.mn сайтыг
танилцуулж, улмаар баримтаа гаргуулж авах хэрэгтэй аж. Харин баримт
хэвлэх кассын машин байхгүй, авч амжаагүй тохиолдолд и-мэйл хаягаараа
баримтаа авахаас гадна Төрийн үйлчилгээний ТҮЦ машинаас баримтаа авах
боломжтой юм. Ингэхийн тулд төлбөрийн баримтын дугаараа ТҮЦ машинд
бүртгүүлэх ёстой аж. Энэ нь орон нутгийн иргэдэд төлбөрийн шинэ баримтыг
авахад илүү дөхөм болж байгаа юм.