УИХ-ын дарга З.Энхболдыг сайд асан Г.Занданшатар “Ардчиллын хямрал ба Үндсэн хуулийн цэц” сэдвээр халз мэтгэлцээнд дуудсан тухай мэдээлэл гарсан.
Мэтгэлцээнийг энэ сарын 11-нд явуулахаар болсон гэх. Уг мэтгэлцээнд УИХ-ын даргын зөвлөх, Хууль зүйн байнгын хорооны дарга, Улсын Дээд шүүх, Өмгөөлөгчдийн холбоо, Хуульчдын холбоо, хуульч гишүүд, Үндсэн хуулийн Цэцийн дарга асан Ж.Амарсанаа болон улс төрийн намуудын төлөөлөл оролцож, асуулт асууна гэсэн мэдээллийг “Нэг монгол” төрийн бус байгууллага өгсөн.
Тэгвэл АН-ын дарга, УИХ-ын дарга З.Энхболдод мэтгэлцээнд дуудсан урилга ирээгүй байна. Тэгээд ч мэтгэлцээнд оролцох талууд эхлээд тохирсон байх тухай УИХ-ын Тамгын газраас мэдээлэв. “УИХ-ын даргыг халз мэтгэлцээнд урьсан албан ёсны хүсэлт ирээгүй. Энэ бол ташаа мэдээлэл” гэсэн хариултыг УИХ-ын хэвлэлийн албанаас өгөв.
Үүний өмнө УИХ-ын гишүүн О.Баасанхүү Ерөнхий сайд Ч.Сайханбилэгийг энэ сарын 12-нд халз мэтгэлцээнд урьж, Ерөнхий сайдыг хөнгөмсөг хүн болохыг нь нотлохоо амлаад байгаа билээ. Хэрэв мэтгэлцээнд ялагдвал УИХ-ын гишүүний албан тушаалаасаа татгалзана гэдгээ давхар амласан юм.