Сонины гуравдугаар нүүрт нийслэлийн эрчим хүч, дулааны шинэ эх үүсвэр болох тавдугаар цахилгаан станц барих асуудал гацаанаас гарсан талаарх нийтлэл багтсан бол долдугаар нүүрэнд хуримын цогц үйлчилгээний талаарх сурвалжлагыг багтаалаа. 2013 оны нэгдүгээр сард Хил хамгаалах ерөнхий газрын удирдлагууд албаны нохой бэлтгэх төлөвлөгөө гаргаж, Гаалийн ерөнхий газартай хамтран 240 гаруй сая төгрөгийн хөрөнгө оруулалтаар Төв аймгийн Баянчандмань суманд байх нохой сургалт бэлтгэлийн цогцолбороо байгуулжээ. Тус цогцолборт нэгэн зэрэг 30 нохой сургах бололцоотой бөгөөд сургалт гурван сар гаруй үргэлжилнэ. Тэгвэл гурав хоногийн өмнө энэхүү сургалтын гуравдугаар ээлжид хамрагдсан ноход төгсөлтөө хийлээ. Энэ удаад немц, бельги болон орос овчаркуудаас гадна монгол банхар, лобрадори үүлдрийн 20 гаруй нохой сургажээ. Энэ талаарх дэлгэрэнгүй мэдээллийг “Хилчин ноход төгсөлтөө хийлээ” хэмээх сурвалжлагад багтлаа.
Түүнчлэн “Хэлэх эрхийн индэр”, “Өд бэх”, “Өдрийн зочин”, “Гэмт хэргийн тойм”, “Гал тогоо”, “Амрах агшин” болон “Нэг анги” зэрэг тогтмол булангуудаа багтаалаа. “Өд бэх” буланд яруу найрагч Б.Галсансүхийн “Зохиолч Б.Ойдовын уйгаржин бичиг шүлгийг дунд сургуулийн сурах бичигт оруулмаар санагддаг” гэх нийтлэл орсон бол үүнтэй зэрэгцээд яруу найрагч Г.Лхагвадоржийн “Зүрхэн цохилго” номын шүлгийн дээжсээс шигтгэж өгчээ. Энэ удаагийн өдрийн зочин буланд нисэх загварын чөлөөт нислэгийн дэлхийн аварга М.Гонгорыг урилаа. “Гал тогоо” буланд улаан лоольтой амтат үхрийн чанасан мах бэлтгэх жорыг нийтэллээ.