УИХ-ын чуулганы өнөөдрийн хуралдаанаар Засгийн газраас өргөн мэдүүлсэн Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслийн хамт өргөн мэдүүлсэн хууль, УИХ-ын тогтоолын төслүүдийн эцсийн хэлэлцүүлгийг хийсэн юм.
Хэлэлцүүлгийн үеэр УИХ-ын гишүүн М.Оюунчимэг: Төрийн өмчит компаниудын алдагдал сүүлийн хэдэн жилд хэт их өссөн байна. Бид өнөөдөр төрийн өмчийн компаниудынхаа бүтээмжийг нь нэмэгдүүлж ажиллуулахын оронд үнийг нь унагаж хувьчилдаг болж байна. Өр авлага үүсгэсэн хүмүүст хариуцлага тооцдог, ашигтай ажиллуулдаг болох талаар ямар зохицуулалт хийхээр уг тогтоолын төсөлд тусгасан бэ гэсэн юм.
Үүнд Төсвийн байнгын хорооны дарга Ч.Хүрэлбаатар хариулахдаа:Төсөв дагаж гарах тогтоолын төслүүд дотор нилээн олон дүгнэлтийг оруулсан. Тухайн төрийн аж ахуйд нэгжид аль нэгэн захирал очоод ажлаа сайжруулж чадахгүй бол ажлаас нь чөлөөлөхөөр болсон. Тэр хүн тухайн байгууллагад дөрвөн жилд хаан ноёноор очиж байгаа хүн биш. Ажлыг нь сайжруулах ёстой. Өнгөрсөн дөрвөн жилийн хугацаанд төрийн өмчит аж, ахуй нэгжид улсын төсөвт төвлөрүүлдэг мөнгөө бага төлөөд банкуудад их зээл тавьсан байгаа. Тиймээс ТУЗ-д нь мэргэжлийн хүмүүсийг тавьж өгөх ёстой гэдэг чиглэлийг ч мөн өгч байгаа. Төрийн өмчит аж, ахуй нэгжүүдийн зээлийг буулгах үр ашгийг нь нэмэгдүүлэх ажил руу чиглэсэн ажлуудыг хийлгэхээр даалгасан. Тэгэхээр хариуцлагагүй ажилбал ажлаас нь чөлөөлнө гэв.