МАХН-аас бүх аймаг, дүүргийн ИТХ-ын төлөөлөгчдийг оролцуулсан зөвлөгөөнийг Төрийн ордонд зохион байгуулж байна. Уг зөвлөгөөнд МАХН-аас сонгогдсон ИТХ-ын төлөөлөгчид, мөн МАХН-ын дарга Н.Энхбаяр оролцож байгаа аж.
Энэ үеэр УИХ-ын гишүүн, Шадар сайд Ц.Оюунбаатар “Хүний эрх, улс төрийн хэлмэгдүүлэлт” сэдвээр илтгэл тавьжээ.
УИХ-ын ээлжит бус чуулганаар Өршөөлийн тухай хуулийг баталсан. Өршөөлийн хуулийн хүрээнд 2000 шахам иргэн суллагдана. Улсын хэмжээнд шоронд хоригдож байгаа 8000 орчим иргэн бий. Тэдний 2000 шахам нь урьдчилан хорих төвд саатуулагдан, хоригдож байгаа иргэд бол үлдсэн 6000 нь шүүхээс ял сонсон хоригдож буй ажээ. Жилийнх нь зардал 40 тэрбум төгрөг болдог. Өршөөлийн хуулийг баталснаар 2000 шахам иргэн суллагдсанаар төсөвт суух зардал 20 орчим тэрбум төгрөгөөр буурах бололцоотой гэсэн мэдээллийг өгсөн байна.
Мөн Эрүүгийн хуульд эрх зүйн зарчмын өөрчлөлт хийх шаардлагатай. Ингэхгүй бол хүний эрхийн ноцтой зөрчлүүд буурахгүй байгаа. Гэмт хэрэг хийсэн хойно нь биш хийхээс урьдчилан сэргийлэх чиглэлээр аль ч шатны байгууллага ажиллахаа больсон. Үүнээс болж гэмт хэргийн зөрчил буурахаа больсон. Мөн зөрчилд хамаарахуйц хэргээр бусдыг шууд хорьдог. Нөгөө талдаа хоригдож байгаа иргэн нь эмнэлгийн тусламж авч чадахгүй амиа алддаг. Энэ нь хүний эрхийн ноцтой зөрчил рүү оруулж байна гэдгийг Шадар сайд тодотгожээ.
Иймээс эрх баригчид өш хонзонгоо мартаад, урьдын явдлаа мартаад Эрүүгийн хуульд зарчмын өөрчлөлт хийх чиглэлд ажиллах ёстой гэжээ. Мөн тэрбээр авлигын хэргээр шоронд 40 гаруй хүн ял эдэлж байгаагийн дийлэнх нь нягтлан, нярав зэрэг албан тушаалынх байгааг онцолж, хамгийн том албан тушаалтай нь яамны Төрийн нарийн бичгийн даргын алба хашиж байсан. Намаар нь хөөж үзвэл 20 шахам нь МАН-ынх, 7-8 нь Ардчилсан намынх гэнэ.